ന്യൂസ് ഡെസ്ക്, മലയാളം യുകെ

യുകെയിലെ ഭവന വിലയിൽ വൻ കുതിച്ചു കയറ്റം ഉണ്ടായതായുള്ള വാർത്തകൾ പുറത്തുവന്നു. നവംബർ മാസത്തിൽ രണ്ട് വർഷത്തിനിടയിലെ ഏറ്റവും കൂടിയ നിരക്കിൽ വീടുകളുടെ വില ഉയർന്നതായാണ് കണക്കുകൾ കാണിക്കുന്നത്. ഭവന വിലയിലെ വാർഷിക വളർച്ചാ നിരക്ക് നവംബറിൽ 3.7 ശതമാനമാണ്. എന്നാൽ ഒക്ടോബറിലെ വളർച്ചാ നിരക്ക് 2.4 ശതമാനം മാത്രമായിരുന്നു.

യുകെയിലെ ഏറ്റവും വലിയ ബിൽഡിങ് സൊസൈറ്റി ആയ നേഷൻ വൈഡ് ആണ് മേൽ പറഞ്ഞ കണക്കുകൾ പുറത്തു വിട്ടിരിക്കുന്നത്. 2022 നവംബർ മാസത്തിനു ശേഷമുള്ള ഏറ്റവും വേഗമേറിയ വളർച്ചാ നിരക്കാണിത്. വിലകളിലെ കുതിച്ചു കയറ്റം ഭവന വിലകളുടെ ശരാശരി 208144 പൗണ്ട് ആയി ഉയർത്തി. വായ്പാ നിരക്ക് ബാങ്ക് ഓഫ് ഇംഗ്ലണ്ട് കുറച്ചത് മൂലം കൂടുതൽ ആളുകൾ വീടു വാങ്ങിയതാണ് ഭവന വിപണിയിലെ വളർച്ചയ്ക്ക് കാരണമെന്നാണ് ഈ രംഗത്തെ വിദഗ്ധർ അഭിപ്രായപ്പെടുന്നത്.

ഭവന വിപണിയിലെ നിലവിലെ കണക്കുകൾക്ക് ഒക്ടോബർ 30-ാം തീയതി ചാൻസലർ റേച്ചൽ റീവ്സ് അവതരിപ്പിച്ച ബഡ്ജറ്റിലെ നിർദ്ദേശങ്ങൾക്ക് ഭവന വിപണിയിലെ വളർച്ചയുമായി നേരിട്ട് ബന്ധമില്ലെന്നാണ് ഈ രംഗത്തെ വിദഗ്ധർ അഭിപ്രായപ്പെടുന്നത്. എന്നാലും ബഡ്ജറ്റിൽ സ്റ്റാമ്പ് ഡ്യൂട്ടിയിൽ മാറ്റങ്ങൾ വരുത്തിയിരുന്നു. അതു കൂടാതെ 2025 ഏപ്രിൽ മാസം മുതൽ രണ്ടാമത് വീടുകൾ വാങ്ങുമ്പോൾ നികുതി ഉയർത്തുകയും ചെയ്തിട്ടുണ്ട്. ബഡ്ജറ്റിലെ ഈ മാറ്റങ്ങൾ മാർച്ച് അവസാനം വാരം വരെ കൂടുതൽ ആളുകൾ വീടു വാങ്ങുന്നതിന് കാരണമാകും എന്നാണ് കരുതുന്നത്.

ന്യൂസ് ഡെസ്ക്, മലയാളം യുകെ

ജൂലൈ 4- ന് ലേബർ പാർട്ടി അധികാരത്തിൽ എത്തിയതിനു ശേഷവും കുടിയേറ്റത്തിൽ കാര്യമായ കുറവ് വന്നില്ലെന്നുള്ള റിപ്പോർട്ടുകൾ പുറത്തു വന്നു. 4 മാസ കാലയളവിൽ ഇരുപതിനായിരത്തിലധികം ആളുകളാണ് ചെറു ബോട്ടുകളിലായി യുകെയിലേയ്ക്ക് അനധികൃതമായി കുടിയേറ്റം നടത്തിയത്. കഴിഞ്ഞ ശനിയാഴ്ച രാത്രിയും 112 പേരുമായി രണ്ട് ബോട്ടുകൾ യുകെയിൽ എത്തിയതായുള്ള റിപ്പോർട്ടുകൾ പുറത്തുവന്നു.

ലേബർ പാർട്ടി അധികാരത്തിൽ എത്തിയതിനുശേഷം 20110 പേർ ചെറു ബോട്ടുകളിൽ യുകെയിൽ എത്തിയതായാണ് കണക്കുകൾ കാണിക്കുന്നത്. ജൂലൈ 4 ന് നടന്ന പൊതു തിരഞ്ഞെടുപ്പിലെ ഒരു പ്രധാന ചർച്ച വിഷയം യുകെയിലേയ്ക്കുള്ള കുടിയേറ്റത്തിലെ വർദ്ധനവ് ആയിരുന്നു. ലേബർ പാർട്ടിയുടെ തിരഞ്ഞെടുപ്പ് പ്രകടനപത്രിയിൽ കുടിയേറ്റം കുറയ്ക്കുന്നതിനുള്ള സാധ്യമായി എല്ലാ നടപടികളും സ്വീകരിക്കുമെന്ന് പ്രത്യേകം എടുത്തു പറഞ്ഞിരുന്നു. എന്നാൽ പുതിയ കണക്കുകൾ പ്രകാരം കൺസർവേറ്റീവ് പാർട്ടിയുടെ ആദ്യ 6 മാസ കാലയളവുമായി താരതമ്യം ചെയ്യുമ്പോൾ കെയർ സ്റ്റാർമറിൻ്റെ സർക്കാരിന്റെ കാലത്ത് കൂടുതൽ കുടിയേറ്റം നടന്നതായാണ് കണക്കുകൾ കാണിക്കുന്നത്. കഴിഞ്ഞവർഷം ഇതേ വർഷ കാലയളവുമായി താരതമ്യം ചെയ്യുമ്പോൾ അനധികൃത ക്രോസിങ്ങുകളുടെ എണ്ണം 15 ശതമാനം കൂടുതലാണ്.

നിയമപരവും നിയമവിരുദ്ധവുമായ കുടിയേറ്റം കുറയ്ക്കുന്നതിനുള്ള വിശദമായ പദ്ധതി സർക്കാർ അടുത്ത ആഴ്ച പ്രസിദ്ധീകരിക്കും. എന്നാൽ ആരോഗ്യരംഗം ഉൾപ്പെടെയുള്ള പല മേഖലകളിലായി മതിയായ പ്രവർത്തി പരിചയമുള്ള തൊഴിലാളികളുടെ അഭാവം മൂലം കുടിയേറ്റത്തിന് പൂർണമായും ഒഴിവാക്കാൻ യുകെയ്ക്ക് കഴിയില്ല. എല്ലായ്പ്പോഴും കുടിയേറ്റം ആവശ്യമാണെന്നും എന്നാൽ അത് ബ്രിട്ടീഷ് തൊഴിലാളികളെ പരിശീലിപ്പിക്കുന്നതുമായി സന്തുലിതമാക്കേണ്ടതുണ്ടെന്നും മിനിസ്റ്റർ ഓഫ് സ്റ്റേറ്റ് ഓഫ് ബിസിനസ് ആയ പാറ്റ് മക്ഫാഡൻ പറഞ്ഞത് ശ്രദ്ധേയമാണ്. കുടിയേറ്റം കുറയ്ക്കുന്നതിനുള്ള സർക്കാരിൻറെ നടപടികൾ എങ്ങനെ മലയാളികളെ ബാധിക്കുമെന്നാണ് പ്രധാനമായും യുകെയിൽ സ്റ്റുഡൻറ് വിസയിൽ എത്തുന്ന മലയാളി വിദ്യാർഥികൾ ഉറ്റുനോക്കുന്നത് . നഷ്ടത്തിലായ യു കെ യൂണിവേഴ്സിറ്റികളെ സഹായിക്കാൻ ഇൻറർനാഷണൽ സ്റ്റുഡൻസിന്റെ അഡ്മിഷനുകളെ ബാധിക്കുന്ന നടപടികൾ സർക്കാർ സ്വീകരികക്കില്ലെന്നാണ് പൊതുവെ കരുതുന്നത്.

ന്യൂസ് ഡെസ്ക്, മലയാളം യുകെ

യുകെയിൽ ഉള്ള അന്യരാജ്യക്കാരുടെ വിസ ഏതുതരമാണെങ്കിലും ഡിസംബർ 31 -ന് അകം അത് ഇ- വിസ ആക്കണമെന്ന വാർത്ത മലയാളം യുകെ ന്യൂസ് നേരത്തെ പ്രസിദ്ധീകരിച്ചിരുന്നു. യുകെ വിസ ആൻഡ് ഇമിഗ്രേഷൻ (യുകെവിഐ) വിഭാഗം ഫിസിക്കൽ ഇമിഗ്രേഷൻ ഡോക്യുമെൻ്റുകൾക്ക് പകരം ഇ-വിസ എന്ന ഓൺലൈൻ റെക്കോർഡ് സ്ഥാപിക്കുന്നതിന്റെ ഭാഗമായാണ് ഈ നടപടികൾ. നിങ്ങളുടെ വിസ പുതുക്കേണ്ട തീയതി ആയില്ലെങ്കിൽ പോലും, ഇ – വിസയിലേക്ക് മാറേണ്ടത് അനിവാര്യമാണ്. ഇതിനായി പ്രത്യേകം ഫീസോ മറ്റൊന്നും തന്നെയില്ല. നിങ്ങളുടെ വീട്ടിൽ ഇരുന്നുകൊണ്ടു തന്നെ മൊബൈലിലോ ലാപ്ടോപ്പിലോ ഇതിനാവശ്യമായ നടപടികൾ പൂർത്തീകരിക്കാവുന്നതാണ്. നിങ്ങൾക്ക് പിആർ ഉണ്ടെങ്കിൽ പോലും ഇ – വിസയിലേക്ക് മാറേണ്ടത് അത്യന്താപേക്ഷിതമാണെന്ന് നിയമങ്ങളിൽ വ്യക്തമാക്കുന്നുണ്ട്.

എന്നാൽ ആയിരക്കണക്കിന് ആളുകൾക്ക് തങ്ങളുടെ ഇ -വിസ അക്സസ് ചെയ്യാൻ സാധിക്കുന്നില്ലെന്ന റിപ്പോർട്ടുകൾ ആണ് പുറത്തു വന്നു കൊണ്ടിരിക്കുന്നത്. പലർക്കും ഇ വിസ ലഭിക്കുന്നതിൽ ബുദ്ധിമുട്ട് നേരിടുന്നതായുള്ള വസ്തുത ഹോം ഓഫീസും സമ്മതിച്ചിട്ടുണ്ട്. ഇ വിസ അക്സസ് ചെയ്യുന്നതിലെ സാങ്കേതിക തകരാറുകൾ കടുത്ത പ്രശ്നങ്ങൾക്ക് വഴി വെക്കുമെന്ന് മനുഷ്യാവകാശ പ്രവർത്തകർ ആശങ്ക ഉന്നയിച്ചിട്ടുണ്ട്. ഇത്തരം പ്രശ്നം ബാധിച്ചവർക്ക് യുകെയിൽ കഴിയാൻ അവകാശമുണ്ടെങ്കിലും ജോലി ചെയ്യാനോ വീട് വാടകയ്ക്ക് എടുക്കാനോ ഉള്ള അവകാശം ഉണ്ടായിരിക്കുകയില്ല.

നല്ലൊരു ശതമാനം കുടിയേറ്റക്കാർക്ക് അർഹതയുണ്ടായിട്ടും സാങ്കേതികമായ തടസ്സങ്ങൾ മൂലം ഇ- വിസ ലഭിച്ചിട്ടില്ലെന്ന വാർത്ത പ്രമുഖ ദിനപത്രമായ ഗാർഡിയൻ ആണ് പുറത്തു വിട്ടത്. ഇത്തരക്കാരിൽ പലരും താഴ്ന്ന വരുമാനക്കാരാണ്. ഇ -വിസ ലഭിക്കാതിരുന്നത് കൊണ്ട് നിയമപരമായി ജോലി ചെയ്യാനുള്ള അവസരം നിഷേധിക്കുന്നത് മൂലം പലരും കടുത്ത സാമ്പത്തിക ബുദ്ധിമുട്ടിലാകുമെന്ന വിവരങ്ങളും പുറത്തു വരുന്നുണ്ട്. പലർക്കും ഇ – വിസ ഉണ്ടെന്ന് സ്ക്രീൻ കാണിക്കുന്നുണ്ടെങ്കിലും അത് ഓപ്പൺ ചെയ്യാൻ ശ്രമിക്കുമ്പോൾ സാധിക്കുന്നില്ലെന്ന പരാതിയാണ് വ്യാപകമായി ഉയർന്നു വന്നിരിക്കുന്നത്. എന്നാൽ ഇ വിസകൾ ഡൗൺലോഡ് ചെയ്യാൻ സാധിക്കാത്തവർക്ക് തെളിവായി മറ്റു ചില രേഖകൾ കാണിക്കാമെന്ന് ഹോം ഓഫീസ് അറിയിച്ചിട്ടുണ്ട്. പക്ഷേ പല തൊഴിലുടമകളും ഇത്തരം തെളിവുകൾ സ്വീകരിക്കാൻ വിമുഖത കാണിക്കുന്നതായാണ് പലരും പരാതിപ്പെടുന്നത്.

ന്യൂസ് ഡെസ്ക്, മലയാളം യുകെ

യുകെയിൽ രജിസ്റ്റർ ചെയ്‌ത നേഴ്‌സുമാരുടെ എണ്ണത്തിൽ റെക്കോർഡ് വർദ്ധനവ് ഉണ്ടായതായി നേഴ്‌സിംഗ് ആൻഡ് മിഡ്‌വൈഫറി കൗൺസിൽ (എൻഎംസി) പുറത്ത് വിട്ട റിപ്പോർട്ടിൽ പറയുന്നു. വർദ്ധനവ് ഉണ്ടായിട്ടും നേഴ്‌സുമാരുടെ എണ്ണം ആവശ്യമുള്ളതിനേക്കാൾ വളരെ കുറവാണെന്ന് മുതിർന്ന നേഴ്‌സുമാർ പറയുന്നു. നേഴ്‌സിംഗ് ആൻഡ് മിഡ്‌വൈഫറി കൗൺസിലിൻെറ റിപ്പോർട്ട് അനുസരിച്ച് യുകെയിൽ രജിസ്റ്റർ ചെയ്ത നേഴ്‌സുമാരുടെയും മിഡ്‌വൈഫുമാരുടെയും എണ്ണത്തിൽ 2017 ലേക്കാൾ 22 ശതമാനം വർദ്ധനവാണ് ഉണ്ടായിരിക്കുന്നതെന്ന് പറയുന്നു. ഈ വർഷം രാജ്യത്ത് രജിസ്റ്റർ ചെയ്‌ത നേഴ്‌സുമാരുടെ എണ്ണം 841,367 ആണ്. നേഴ്‌സുമാരുടെ എണ്ണത്തിൽ ക്രമാതീതമായ വർദ്ധനവ് ഉണ്ടായിട്ടുണ്ടെങ്കിലും തൊഴിലാളികളുടെ കുറവ്, വർദ്ധിച്ചു വരുന്ന പരിചയ കുറവ്, അന്താരാഷ്ട്ര റിക്രൂട്ട്‌മെൻ്റിനെ അമിതമായി ആശ്രയിക്കൽ തുടങ്ങിയ ആശങ്കകൾ ഇപ്പോഴും നിലനിൽക്കുന്നുണ്ട്.

ഇന്ത്യയിൽ നിന്നുൾപ്പടെയുള്ള രാജ്യങ്ങളിൽ നിന്ന് വന്ന നേഴ്‌സുമാർ, ജീവനക്കാരുടെ സംഖ്യ വർദ്ധിപ്പിക്കുന്നതിൽ നിർണായക പങ്ക് വഹിച്ചിട്ടുണ്ട്. ഏറ്റവും പുതിയ ഡാറ്റയിൽ വിദേശ റിക്രൂട്ട്‌മെൻ്റിലെ മാന്ദ്യം കാണാം. ഇത് ഭാവിയെ കുറിച്ച് അധികൃതരിൽ ആശങ്കകൾ ഉയർത്തിയിട്ടുണ്ട്. യുകെയിൽ നിന്നുള്ള നേഴ്‌സുമാരുടെ എണ്ണം കുറഞ്ഞ് വരുന്നതും അധികൃതർ ചൂണ്ടിക്കാട്ടി. കഴിഞ്ഞ അഞ്ചു വർഷകാലത്തിൽ യുകെയിൽ നിന്നുള്ള വളരെ കുറച്ച് പേർ മാത്രമാണ് നേഴ്‌സിംഗ് രജിസ്റ്റർ ചെയ്‌തിരിക്കുന്നത്‌. കുറഞ്ഞ വേതനം, ജീവനക്കാരുടെ കുറവ് തുടങ്ങിയവയാണ് ഇതിന് കാരണമായി റോയൽ കോളേജ് ഓഫ് നേഴ്‌സിംഗ് (ആർസിഎൻ) ഉൾപ്പെടെയുള്ള വിദഗ്ധർ എടുത്ത് പറയുന്നത്.

യുകെയിലെ നേഴ്‌സിംഗ് വിദ്യാർത്ഥികളുടെ എണ്ണത്തിലുള്ള കുറവും ആശങ്ക ഉണ്ടാക്കുന്നു. വരും വർഷങ്ങളിൽ ഇത് പ്രശ്നങ്ങൾക്ക് കാരണമാകുമെന്ന് വിദഗ്ദ്ധർ പറയുന്നു. കൂടുതൽ വിദ്യാർഥികളെ നേഴ്സിംഗിലേയ്ക്ക് ആകർഷിക്കുന്നതിനായി വിദ്യാർത്ഥി വായ്പകൾ കുറയ്ക്കാനുള്ള നയങ്ങൾ സർക്കാർ സ്വീകരിക്കണമെന്ന് വിദഗ്ധർ പറയുന്നു. ഇത്തരം അടിസ്ഥാന പ്രശ്‌നങ്ങളെ സർക്കാർ ഉടൻ അഭിസംബോധന ചെയ്യണമെന്നും അവർ കൂട്ടിച്ചേർത്തു. വേതനം മെച്ചപ്പെടുത്തുന്നതിനും എൻ എച്ച് എസ് പുനർനിർമ്മിക്കുന്നതിനുമുള്ള ശ്രമങ്ങൾ സർക്കാരിൻെറ ഭാഗത്ത് നിന്ന് ഉണ്ടാകുന്നുണ്ടെങ്കിലും നേഴ്സുമാരുടെ എണ്ണത്തിലുള്ള കുറവ് പരിഹരിക്കണമെങ്കിൽ സർക്കാരിൻെറ ഭാഗത്ത് നിന്ന് ഇടപെടൽ ഉണ്ടാകണമെന്ന് അധികൃതർ പറയുന്നു.

ന്യൂസ് ഡെസ്ക്, മലയാളം യുകെ

അസിസ്റ്റഡ് ഡൈയിങ് ബില്ലിന് ബ്രിട്ടീഷ് പാർലമെൻറ് പ്രാഥമികാംഗീകാരം നൽകി. ലേബർ എംപി കിം ലീഡ്‌ബീറ്റർ നിർദ്ദേശിച്ച ബില്ല് 275 നെതിരെ 330 വോട്ടുകൾക്കാണ് പ്രാഥമിക അംഗീകാരം ലഭിച്ചത്. എന്നാൽ ബില്ലിനെ ചൊല്ലിയുള്ള ഉൾ പാർട്ടി തർക്കങ്ങൾ തുടരുകയാണ്. ഗുരുതരമായ രോഗങ്ങൾ ഉള്ളവരെ പാലിയേറ്റീവ് കെയർ സംവിധാനത്തിലേക്ക് അയക്കുന്നതിനു പകരം ജി പി മാർ ദയാവധത്തിന് നിർദ്ദേശിക്കുന്ന പ്രവണത വർദ്ധിക്കുമെന്ന മുന്നറിയിപ്പുമായി മുതിർന്ന ലേബർ പാർട്ടി എംപി ഡയാൻ അബോട്ട് രംഗത്ത് വന്നത് ഇതിന്റെ സൂചനയാണ് . ഡയാൻ അബോട്ട് അസിസ്റ്റഡ് ഡൈയിങ്ങിനെതിരെ വോട്ട് ചെയ്തിരുന്നു.

യഥാർത്ഥത്തിൽ ഗുരുതര രോഗമുള്ള പലർക്കും വേണ്ടത് സ്വാന്തന പരിചരണമാണന്നും നിയമം ദുരുപയോഗം ചെയ്ത് ഹോസ്പിസ് കെയറിലേക്കും പ്രവേശനം ലഭിക്കേണ്ട രോഗികൾക്ക് അസിസ്റ്റൻറ് ഡൈയിങ് നിയമത്തിന്റെ പേരിൽ അത് നിഷേധിക്കാനുള്ള സാധ്യത ഉണ്ടെന്നാണ് ഡയാൻ അബോട്ട് ചൂണ്ടി കാണിക്കുന്നത് . ഡയാൻ അബോട്ടിൻ്റെ വാദമുഖങ്ങൾ നിലവിൽ ക്രിസ്ത്യൻ സഭയും സന്നദ്ധ സംഘടനകളും നേരത്തെ ഉയർത്തി കാട്ടിയിരുന്നു. ബിൽ നിയമമാകുമ്പോൾ ശക്തമായ സുരക്ഷാ മാനദണ്ഡങ്ങൾ ഉണ്ടാകുമെന്നും ആരും മരിക്കാൻ നിർബന്ധിതരാകില്ലെന്നുമാണ് വിമർശനങ്ങളെ കുറിച്ച് ബിൽ അവതരിപ്പിച്ച ലീഡ്ബീറ്റർ ആവർത്തിച്ച് ഉറപ്പ് നൽകിയത്.

ബില്ലിനെ എതിർത്ത പ്രമുഖ വ്യക്തികളിൽ ആരോഗ്യ സെക്രട്ടറി വെസ് സ്ട്രീറ്റിംഗ് ഉൾപ്പെടുന്നു . ബിൽ നിയമമായാലും ഇല്ലെങ്കിലും പാലിയേറ്റീവ് കെയർ ശക്തിപ്പെടുത്തുന്നതിന് ശക്തമായ നടപടികൾ സ്വീകരിക്കണമെന്ന് ചർച്ചകൾക്കിടയിൽ അദ്ദേഹം പറഞ്ഞത് ശ്രദ്ധേയമായി. ചർച്ചകൾ പുരോഗമിക്കുമ്പോൾ വെള്ളിയാഴ്ച ബില്ലിനെ പിന്തുണച്ച പല എംപിമാരും സുരക്ഷയെ കുറിച്ചുള്ള ആശങ്കകൾ കാരണം തങ്ങളുടെ നിലപാട് മാറ്റുമെന്ന് ഇതിനകം സൂചന നൽകിയിട്ടുണ്ട്. മൂന്ന് കൺസർവേറ്റീവ് എംപിമാരും 18 ലേബർ എംപിമാരും വെള്ളിയാഴ്ച വോട്ട് രേഖപ്പെടുത്തിയില്ല. ബില്ലിലെ സുരക്ഷാ നടപടിക്രമങ്ങളെ കുറിച്ച് കടുത്ത ആശങ്കയുണ്ടെന്നും അതിനാലാണ് വോട്ടെടുപ്പിൽ നിന്ന് വിട്ടു നിൽക്കുന്നതെന്നും കാൾഡർ വാലിയിലെ ലേബർ എംപി ജോഷ് ഫെൻ്റൺ-ഗ്ലിൻ പറഞ്ഞു.

ന്യൂസ് ഡെസ്ക്, മലയാളം യുകെ

അടുത്തവർഷം മുതൽ ബിബിസി ലൈസൻസ് ഫീസിൽ വർദ്ധനവ് ഉണ്ടാകുമെന്ന റിപ്പോർട്ടുകൾ പുറത്തു വന്നു. 2022 -ൽ ഉണ്ടാക്കിയ കരാറിന്റെ അടിസ്ഥാനത്തിൽ 2027 വരെ ഓരോ വർഷവും പണപ്പെരുപ്പത്തിന് ആനുപാതികമായി ടെലിവിഷൻ ലൈസൻസ് വർദ്ധിപ്പിക്കുന്നതിന്‍റെ ഭാഗമായാണ് പുതിയ നിരക്ക് പ്രാബല്യത്തിൽ വരുന്നത് . അടുത്ത സാമ്പത്തിക വർഷം മുതൽ കഴിഞ്ഞവർഷം ഉപയോഗിച്ചിരുന്ന പ്രതിമാസ പണപെരുപ്പ നിരക്കിനു പകരം വാർഷിക പണപെരുപ്പ നിരക്ക് കണക്കാക്കിയാണ് വർദ്ധനവ് നിലവിൽ വരുന്നത് എന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്.

വർദ്ധനവ് നിലവിൽ വരുന്നതോടെ ടെലിവിഷൻ ലൈസൻസിന്റെ വില 2025 -ൽ 5 പൗണ്ട് മുതൽ 174.50 പൗണ്ട് വരെ ഉയരും . വർദ്ധനവ് മൂലം ബുദ്ധിമുട്ട് അനുഭവിക്കുന്ന കുടുംബങ്ങൾക്ക് പിൻതുണ നൽകുമെന്ന് ഡിപ്പാർട്ട്മെൻറ് ഫോർ കൾച്ചർ, മീഡിയ ആൻഡ് സ്പോർട്ട് (ഡിസിഎം എസ് ) അറിയിച്ചിട്ടുണ്ട്. ബിബിസിയുടെ നടത്തിപ്പിനായാണ് ടിവി ലൈസൻസ് ഫീ ഉപയോഗിക്കുന്നത്. ബിബിസി ഷോകൾക്കും സേവനങ്ങൾക്കും ഒപ്പം ഭാവിയിലെ വികസന പ്രവർത്തനങ്ങളെ ശരിയായ ദിശയിൽ നയിക്കുന്നതിനെ കുറിച്ചും കൂടുതൽ അവലോകനം നടത്തുമെന്ന് സർക്കാർ അറിയിച്ചിട്ടുണ്ട്.

സാമ്പത്തിക ബുദ്ധിമുട്ട് അനുഭവിക്കുന്നവർക്ക് ലളിതമായ പെയ്മെൻറ് പ്ലാനുകൾ നൽകുമെന്നാണ് സർക്കാർ വാഗ്ദാനം ചെയ്തിരിക്കുന്നത്. സാമ്പത്തിക ബുദ്ധിമുട്ടുകൾ നേരിടുന്ന 9000 ലധികം കുടുംബങ്ങൾക്ക് സർക്കാർ സഹായം പ്രയോജനം ചെയ്യും. ഇവർക്ക് രണ്ടാഴ്ചയിൽ ഒരിക്കലോ പ്രതിമാസ തവണകളായോ ഫീസ് അടയ്ക്കാനുള്ള അവസരം ഉണ്ടാകുമെന്ന് കള്‍ച്ചറല്‍ സെക്രട്ടറി ലിസ നാന്‍ഡി വ്യക്തമാക്കിയിരുന്നു.

ന്യൂസ് ഡെസ്ക്, മലയാളം യുകെ

നവംബർ 29-ാം തീയതി ലേബർ എംപി കിം ലീഡ്‌ബീറ്ററിൽ പാർലമെന്റിൽ അവതരിപ്പിച്ച അസിസ്റ്റഡ് ഡൈയിങ്ങ് ബില്ലിന് പാർലമെൻറ് പ്രാഥമിക അംഗീകാരം നൽകി. ചരിത്രപരമായ വോട്ടെടുപ്പിൽ ബില്ലിനെ 330 എംപിമാരാണ് പിന്തുണച്ചത്. 275 പേർ എതിർത്ത് വോട്ട് ചെയ്തു. ഭൂരിപക്ഷം എംപിമാരും പിന്തുണച്ച് വോട്ട് ചെയ്തതോടെ ബിൽ സൂക്ഷ്മ പരിശോധനകൾക്കായി അയക്കപ്പെടും. ഇതിനു മുൻപ് 2015 -ൽ വോൾവർഹാംപ്ടൺ സൗത്ത് വെസ്റ്റിലെ മുൻ ലേബർ എംപിയായ റോബ് മാരിസ്, ദയാവധം നിയമവിധേയമാക്കാനുള്ള ഒരു ശ്രമം പാർലമെന്റിൽ നടത്തിയിരുന്നു. എന്നാൽ അന്ന് 118 നെതിരെ 330 വോട്ടുകൾക്കാണ് ബിൽ പരാജയപ്പെട്ടത്. എന്നാൽ പിന്നീട് പല രാജ്യങ്ങളിലും ദയാവധം നിയമവിധേയമായത് പുതിയ ബില്ലിന്റെ ചർച്ചയിൽ കാര്യമായി പ്രതിഫലിച്ചു. വിവിധ പാർട്ടികളിൽ നിന്നായി 330 എം പിമാരാണ് ബില്ലിനെ പിൻതുണച്ചത്. 275 പേർ എതിർക്കുകയും ചെയ്തു.

സ്വകാര്യ ബില്ലായി അവതരിപ്പിക്കപ്പെട്ട സുപ്രധാനമായ ബില്ലിൽ വിവിധ പാർട്ടികളിൽ കടുത്ത അഭിപ്രായ ഭിന്നത രൂപീകരിച്ചതായുള്ള റിപ്പോർട്ടുകളാണ് പുറത്തു വരുന്നത്. ക്യാബിനറ്റിൽ തന്നെ ഒരു കൂട്ടർ ബില്ലിനെ അനുകൂലിച്ചപ്പോൾ മറ്റൊരു കൂട്ടർ ബില്ലിനെ ശക്തമായി എതിർക്കുകയും ചെയ്തു. പ്രധാനമന്ത്രി കെയർ സ്റ്റാർമറും ചാൻസലർ റേച്ചൽ റീവ്സും ബില്ലിനെ പിൻതുണച്ചപ്പോൾ മറ്റ് ക്യാബിനറ്റ് അംഗങ്ങളായ ആരോഗ്യ സെക്രട്ടറി വെസ് സ്ട്രീറ്റിംഗ്, ജസ്റ്റിസ് സെക്രട്ടറി ഷബാന മഹമൂദ് എന്നിവർ ബില്ലിനെതിരെ വോട്ട് ചെയ്തു. 2015 -ൽ ഡൈയിങ് ബില്ല് ആദ്യമായി അവതരിപ്പിച്ച വോൾവർഹാംപ്ടൺ സൗത്ത് വെസ്റ്റിലെ മുൻ ലേബർ എംപിയായ റോബ് മാരിസ് നവംബർ 29-ാം തീയതി നടന്ന ചരിത്രപരമായ മുഹൂർത്തത്തിന് സാക്ഷ്യം വഹിക്കാൻ പാർലമെന്റിൽ എത്തിയിരുന്നു. 2017 -ൽ എം പി സ്ഥാനം ഒഴിഞ്ഞതിനു ശേഷം ആദ്യമായാണ് അദ്ദേഹം പാർലമെന്റിൽ എത്തിയത്. ബില്ലിനെ അനുകൂലിക്കും എന്നു കരുതിയ പലരും അതിനായി മുന്നോട്ടുവന്നില്ലെന്ന് അദ്ദേഹം പറഞ്ഞു.

എന്നാൽ അസിസ്റ്റഡ് ഡൈയിങ്ങ് ബിൽ നിയമമാകുന്നതിന് മുമ്പ് ഇംഗ്ലണ്ടിലെ പാലിയേറ്റീവ് കെയർ മികച്ചതാക്കണമെന്ന അഭിപ്രായം ശക്തമായി ഉയർന്നു വന്നിട്ടുണ്ട്. സർക്കാർ ഫണ്ടിന്റെ അഭാവമാണ് പ്രധാന തടസ്സമായി ചൂണ്ടി കാണിക്കപ്പെടുന്നത്. ദയാവധത്തെ കുറിച്ച് നടക്കുന്ന ചർച്ചകളിൽ എൻഎച്ച്എസും കടന്നു വന്നു. എൻഎച്ച്എസ്സിന്റെ പരിചരണം തൃപ്തികരമായി ലഭിക്കാതിരിക്കുന്ന മാരകരോഗമുള്ളവർ ദയാവധം തിരഞ്ഞെടുത്തേക്കാമെന്നാണ് ഒരു എംപിയായ അൻ്റോണിയ ബാൻസ് പറഞ്ഞു. പാലിയേറ്റീവ് പരിചരണത്തിലും അപകടകരമായ പ്രവണതകൾ ഉടലെടുക്കാം എന്ന് പലരും ചൂണ്ടി കാണിക്കുന്നുണ്ട്.

ന്യൂസ് ഡെസ്ക്, മലയാളം യുകെ

ചാൾസ് മൂന്നാമൻ രാജാവിൻ്റെ അസിസ്റ്റൻ്റ് പ്രൈവറ്റ് സെക്രട്ടറി എന്ന നിലയിൽ ആഗോള ശ്രദ്ധ നേടി കാസർഗോഡ് സ്വദേശിനിയായ മുനാ ഷംസുദ്ദീൻ. കഴിഞ്ഞ വർഷമാണ് ലോകത്താകമാനമുള്ള മലയാളികൾക്ക് അഭിമാനമായി മുനായ്ക്ക് ഈ സ്‌ഥാനത്തേക്ക്‌ നിയമനം വന്നത്. ചാൾസ് രാജാവിൻ്റെ ഔദ്യോഗിക പരിപാടികൾക്ക് മേൽനോട്ടം വഹിക്കുക, അന്താരാഷ്ട്ര യാത്രകളിൽ അദ്ദേഹത്തോടൊപ്പം പോകുക തുടങ്ങിയ കാര്യങ്ങൾ മുനയുടെ ജോലിയുടെ പരിധിയിൽ വരുന്നവയാണ്.

ഈ ശ്രദ്ധേയമായ സ്ഥാനത്തേയ്ക്കുള്ള മുനായുടെ യാത്ര കഠിനാധ്വാനത്തിൻ്റെയും അർപ്പണബോധത്തിൻ്റെയും തെളിവാണ്. നോട്ടിംഗ്ഹാം സർവകലാശാലയിൽ ഗണിതശാസ്ത്രത്തിലും എഞ്ചിനീയറിംഗിലും പഠനം പൂർത്തിയാക്കിയ ശേഷം, ബ്രിട്ടീഷ് ഫോറിൻ സർവീസിൽ ചേർന്ന മുന ഷംസുദ്ദീൻ്റെ റാങ്കുകൾ അതിവേഗം ഉയരുകയായിരുന്നു. ഇതിനോടകം തന്നെ ജറുസലേമിലെ കോൺസുലേറ്റ് ജനറൽ, പാകിസ്ഥാനിലെ കറാച്ചിയിൽ ഡെപ്യൂട്ടി ഹെഡ് ഓഫ് മിഷൻ തുടങ്ങിയ സുപ്രധാന നയതന്ത്ര റോളുകളിൽ അവർ സേവനമനുഷ്ഠിച്ചിട്ടുണ്ട്.

ലണ്ടനിലെ ഫോറിൻ, കോമൺവെൽത്ത്, ഡെവലപ്‌മെൻ്റ് ഓഫീസിൻ്റെ ഭാഗമായിരിക്കേയാണ് മുനായ്ക്ക് ഈ അവസരം ലഭിച്ചത്. മുനയുടെ ഭർത്താവ് ഡേവിഡ് യുഎൻ ഉദ്യോഗസ്ഥനാണ്. യുഎസ്, ബ്രിട്ടൻ, സൗദി അറേബ്യ എന്നിവിടങ്ങളിൽ ശ്രദ്ധേയനായ അഭിഭാഷകൻ, പരേതനായ ഡോ. പുതിയപുരയിൽ ഷംസുദ്ദീൻ്റെ മകളാണ് മുനാ ഷംസുദ്ദീൻ. മുനയുടെ മുത്തച്ഛൻ അഡ്വക്കേറ്റ് പി. അഹമ്മദ് ഉൾപ്പെടെയുള്ള കുടുംബാംഗങ്ങൾ വിവിധ മേഖലകളിലുള്ള തങ്ങളുടെ സംഭാവനകൾക്ക് പ്രശസ്തരാണ്.

ന്യൂസ് ഡെസ്ക്, മലയാളം യുകെ

ബ്രിട്ടനിൽ അധികം താമസിയാതെ ദയാവധം നിയമവിധേയമാകും എന്നാണ് പൊതുവെ കരുതപ്പെടുന്നത്. 275 -ന് എതിരെ 330 വോട്ടുകൾക്ക് അസിസ്റ്റഡ് ഡൈയിങ് ബില്ലിന് പാർലമെന്റിൽ പ്രാഥമിക അംഗീകാരം ലഭിച്ചത് അതിനു തുടക്കമാണ്. പല രാജ്യങ്ങളിലും ദയാവധം നിയമവിധേയമാണെങ്കിലും ബ്രിട്ടൻ മടിച്ചു നിൽക്കുകയായിരുന്നു. 2015 -ൽ ദയാവധം നിയമ വിധേയമാക്കാനുള്ള ബിൽ അവതരിപ്പിച്ചപ്പോൾ 118 നെതിരെ 330 വോട്ടുകൾക്ക് നിരസിക്കപ്പെട്ടിരുന്നു.

ദയാവധത്തെ കുറിച്ചുള്ള ചർച്ചകൾക്കിടയിൽ ഇംഗ്ലണ്ടിലെ പാലിയേറ്റീവ് കെയർ സംവിധാനങ്ങൾ ഫലപ്രദമല്ലെന്നുള്ള കടുത്ത വിമർശനങ്ങളും ഉയർന്നു വരുന്നുണ്ട്. പാലിയേറ്റീവ് കെയറിന് ആവശ്യമായി ഫണ്ട് ലഭിക്കുന്നില്ലെന്ന പരാതിയാണ് വ്യാപകമായി ഉയർന്നു വരുന്നത്. ലോകത്തിലെ ഏറ്റവും മികച്ച പാലിയേറ്റീവ് കെയർ സംവിധാനം യുകെയിലാണ് നിലവിലുള്ളതെന്ന് പറയുമ്പോഴും പണത്തിന്റെ അഭാവം ഗുരുതര പ്രതിസന്ധി സൃഷ്ടിക്കുന്നതായി അസോസിയേഷൻ ഫോർ പാലിയേറ്റീവ് മെഡിസിൻ (എപിഎം) ൻ്റെ പ്രസിഡൻറ് ഡോ സാറാ കോക്സ് പറഞ്ഞു.

അസിസ്റ്റഡ് ഡൈയിങ് ബിൽ നിയമ വിധേയമാക്കാനുള്ള പ്രാരംഭ നടപടികൾ മാത്രമാണ് നിലവിൽ കഴിഞ്ഞത്. ബില്ലിനെതിരെ വോട്ട് ചെയ്ത മിക്ക എംപിമാരും ഇംഗ്ലണ്ടിലെ പാലിയേറ്റീവ് കെയർ സംവിധാനം പരിഷ്കരിക്കണമെന്ന അഭിപ്രായക്കാരാണ്. ബില്ലിൽ മതിയായ സുരക്ഷാ സംവിധാനങ്ങൾ ഇല്ലെന്നാണ് തനിക്ക് തോന്നുന്നതെന്ന് ദയാവധത്തെ എതിർക്കുന്ന ലേബർ പാർട്ടിയുടെ ഡയാന അബോട്ട് അഭിപ്രായപ്പെട്ടു. ഇംഗ്ലണ്ടിൽ പത്തിൽ നാല് ആശുപത്രികളിലും ആഴ്ചയിൽ എല്ലാ ദിവസവും സ്പെഷ്യലിസ്റ്റ് പാലിയേറ്റീവ് കെയർ സേവനങ്ങൾ ലഭ്യമല്ലെന്ന ഞെട്ടിക്കുന്ന ഓഡിറ്റ് റിപ്പോർട്ടുകൾ പുറത്തു വരുന്നുണ്ട്. പ്രതിവർഷം 300000 പേർക്ക് പാലിയേറ്റീവ് കെയറിന്റെ പരിചരണം നൽകുന്ന പല ഹോസ്പിസുകൾ പണത്തിനായി പാടുപെടുകയാണ് എന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. പാലിയേറ്റീവ് കെയർ മേഖലയിലെ വീഴ്ചകൾ ആദ്യം പരിഹരിച്ചിട്ടുവേണം ദയാവധം നീയമവിധേയമാക്കാൻ എന്നാണ് ബില്ലിനെ എതിർക്കുന്നവർ പറയുന്നത് .

ന്യൂസ് ഡെസ്ക്, മലയാളം യുകെ

തന്റെ മൊബൈൽ ഫോൺ മോഷ്ടിച്ചതായി പോലീസിനെ തെറ്റിദ്ധരിപ്പിച്ച കുറ്റത്തിൽ താൻ കുറ്റക്കാരിയാണെന്ന് പറഞ്ഞ് ട്രാൻസ്പോർട്ട് സെക്രട്ടറി ലൂയിസ് ഹെയ്‌ഗ് സ്‌ഥാനം രാജിവെച്ചു. കെയർ സ്റ്റാർമർ മന്ത്രിസഭ അധികാരമേറ്റതിനു ശേഷമുള്ള ആദ്യ രാജിയാണ് ഇത്. 2013ൽ നടന്ന ഒരു മോഷണത്തിൽ തന്റെ മൊബൈൽ ഫോൺ നഷ്ടപ്പെട്ടതായാണ് ഹെയ്‌ഗ് പോലീസിനോട് ആദ്യം വ്യക്തമാക്കിയത്. എന്നാൽ പിന്നീട് നടന്ന അന്വേഷണത്തിൽ മൊബൈൽ ഫോൺ മോഷ്ടിക്കപ്പെട്ടിട്ടില്ലെന്ന് വ്യക്തമായിരുന്നു. ഇത് അബദ്ധവശാൽ സംഭവിച്ച ഒരു പിഴവാണെന്നും, എന്നാൽ പിന്നീട് നടന്ന പോലീസ് ചോദ്യം ചെയ്യലിൽ ഇത് സംബന്ധിച്ച് പരാമർശിക്കേണ്ട എന്ന് തന്റെ അഭിഭാഷകൻ തന്നെ ഉപദേശിച്ചതായും അവർ വ്യക്തമാക്കി. പോലീസ് പിന്നീട് ഈ കേസ് ക്രൗൺ പ്രോസിക്യൂഷൻ സർവീസിന് കൈമാറുകയായിരുന്നു. 2015 ലെ എംപി തിരഞ്ഞെടുപ്പിന് ആറുമാസം മുമ്പ് മജിസ്‌ട്രേറ്റ് കോടതിയിൽ, പോലീസിൽ തെറ്റായ റിപ്പോർട്ട് നൽകിയതായി താൻ കുറ്റസമ്മതം നടത്തിയതായും, തനിക്ക് ഇതിൽ ഡിസ്ചാർജ് ലഭിച്ചതായും ലൂയിസ് ഹൈഗ് നേരത്തെ വ്യക്തമാക്കിയിരുന്നു.

ഒരു കുറ്റകൃത്യത്തിൽ കുറ്റക്കാരനാണെങ്കിലും കാര്യമായ ശിക്ഷ നൽകേണ്ടതില്ലെന്ന് കോടതി തീരുമാനിക്കുന്ന ഒരാൾക്ക് നൽകുന്ന ഒരു തരം ശിക്ഷയാണ് ഡിസ്ചാർജ്. ലേബർ പാർട്ടി പ്രതിപക്ഷത്ത് ആയിരിക്കുമ്പോൾ തന്നെ ഷാഡോ ക്യാബിനറ്റിലെ തന്റെ നിയമന സമയത്ത്, ട്രാൻസ്‌പോർട് സെക്രട്ടറി തന്റെ ഡിസ്ചാർജ് പ്രഖ്യാപിച്ചിരുന്നതായി വൈറ്റ് ഹോൾ വൃത്തങ്ങൾ നേരത്തെ അറിയിച്ചു. പോലീസിനെ തെറ്റായ മൊഴി നൽകിയ ലൂയിസ് ഹൈഗിൻ്റെ നടപടിക്കെതിരെ പ്രതിപക്ഷം കർശനമായി വിമർശനം ഉന്നയിച്ചിരുന്നു. പുറത്തുവരുന്ന വെളിപ്പെടുത്തലുകൾ ആശങ്കപരമാണ് എന്ന പ്രതികരണമാണ് കൺസർവേറ്റീവ് പാർട്ടി ചെയർ നൈജൽ ഹഡിൽസ്റ്റൺ നടത്തിയത്. പോലീസിനെ തെറ്റിദ്ധരിപ്പിച്ച ഒരാളെ തന്റെ ക്യാബിനറ്റിൽ അപ്പോയിന്റ് ചെയ്യുമ്പോൾ പ്രധാനമന്ത്രി ഉത്തരം പറയേണ്ടതാണെന്നും അദ്ദേഹം ഓർമ്മിപ്പിച്ചു. രാഷ്ട്രീയത്തിൽ പ്രവേശിക്കുന്നതിനുമുമ്പ്, ട്രാൻസ്പോർട്ട് സെക്രട്ടറി മെട്രോപൊളിറ്റൻ പോലീസിൽ പ്രത്യേക കോൺസ്റ്റബിളായിരുന്നു. 2009 നും 2011 നും ഇടയിൽ സൗത്ത് ലണ്ടൻ ബറോ ഓഫ് ലാംബെത്തിൽ അവർ സേവനമനുഷ്ഠിച്ചിട്ടുണ്ട്.

കള്ളം പറഞ്ഞതിന്റെ പേരിൽ മന്ത്രി രാജിവെക്കേണ്ടി വന്ന വാർത്ത അതിവേഗമാണ് യുകെയിലെ മലയാളികളുടെ ഇടയിലെ ചർച്ചകളിൽ ഇടംപിടിച്ചത്. കേരളത്തിൽ മയക്കുമരുന്ന് കേസിൽ ഉൾപ്പെട്ട ഓസ്ട്രേലിയൻ പൗരനെ രക്ഷിക്കാനായി മുൻമന്ത്രിയും ജനപ്രതിനിധിയുമായ ആൻറണി രാജു എംഎൽഎ തെളിവുകളിൽ കൃത്രിമത്വം കാണിച്ച വാർത്തകളുമായാണ് ഇത് പലരും കൂട്ടി വായിച്ചത്. 34 വർഷം മുൻപ് നടന്ന കേസിൽ എംഎൽഎ കുറ്റവിചാരണയെ നേരിടണമെന്ന് ഹൈക്കോടതി അടുത്തയിടെ വിധിച്ചത് വൻ വാർത്താ പ്രാധാന്യം കൈവന്നിരുന്നു. 1990 ഏപ്രില്‍ 4 നാണ് ഉൾവസ്ത്രത്തില്‍ ഹാഷിഷുമായി ആന്‍ഡ്രൂ സാല്‍വാദോര്‍ സാര്‍ലി എന്ന ഓസ്‌ട്രേലിയന്‍ സ്വദേശി തിരുവനന്തപുരം വിമാനത്താവളത്തില്‍ പിടിയിലായത്. തൊണ്ടിമുതലായ അടിവസ്ത്രം കൈക്കലാക്കി പ്രതിക്ക് പാകമാകാത്ത രീതിയിൽ മാറ്റം വരുത്തി തിരിച്ചു നൽകിയെന്നാണ് ആരോപണം. പ്രധാന തൊണ്ടിമുതലായ വിദേശി ധരിച്ചിരുന്ന അടിവസ്ത്രം വിദേശിക്ക് പാകമാകില്ലെന്നും ഇത് വ്യാജ തൊണ്ടിയാണെന്നുമുള്ള പ്രതിഭാഗത്തിന്റെ വാദം കണക്കിലെടുത്താണ് സെഷൻസ് കോടതി പത്ത് വർഷം ശിക്ഷ വിധിച്ച പ്രതിയെ ഹൈക്കോടതി പിന്നീട് വെറുതെ വിട്ടത്.