ഗ്ലോസ്റ്റര്‍ : സേവനം യുകെയുടെ രണ്ടാം വാർഷികാഘോഷം ഗംഭീരമാക്കുവാന്‍ യുകെയിലെ കുടുംബാംഗങ്ങള്‍ തയ്യാറെടുക്കുന്നു. ലോകമലയാളി സമൂഹത്തിൽ ജാതിമത രഹിത സമൂഹം എന്ന ലക്ഷ്യവുമായി പ്രവർത്തിച്ച, ഒരേ സമയം ആത്മീയ ഗുരുവും എന്നാൽ മനുഷ്യരെല്ലാം ഒരു ജാതി എന്ന് ഉറക്കെ പറയുകയും ചെയ്ത സാക്ഷാൽ ശ്രീനാരായണ ഗുരുദേവന്റെ ആശയങ്ങളെ പിന്തുടരുകയും ഇപ്പോൾ യൂറോപ്പിലെ ഏറ്റവും വലിയ ശ്രീനാരായണ പ്രസ്ഥാനവുമായി മാറിയ “സേവനം യുകെ” ഈ വരുന്ന മെയ് 21ന് രണ്ടാം വാർഷികം ഡെർബിഷെയറിൽ വച്ച് ആഘോഷിക്കുകയാണ്.

ബൃഹത്തായ ആഘോഷ പരിപാടികളാണ് രണ്ടാം വാർഷികത്തോടനുബന്ധിച്ചു സേവനം യുകെ ആസൂത്രണം ചെയ്തിരിക്കുന്നത്. ലോക മാനവികതയുടെ പ്രതീകമായ ശിവഗിരിമഠം സെക്രട്ടറി ബ്രഹ്മശ്രീ ഗുരു പ്രസാദ് സ്വാമിയുടെ നേതൃത്വത്തിലുള്ള ഭക്തിസാന്ദ്രമായ സര്‍വ്വ ഐശ്വര്യ കുടുംബ പൂജയോട് കൂടിയാണ് ഇത്തവണയും ആഘോഷങ്ങൾക്ക് തുടക്കമാകുന്നത്. നാട്ടിൽ നിന്നും പരിപാടിയിൽ പങ്കെടുക്കേണ്ട വിശിഷ്ട അതിഥികളുടെ വിസയും മറ്റും റെഡിയാകുന്ന മുറയ്ക്ക് മറ്റു വിവരങ്ങൾ അറിയിക്കുന്നതാണ്.

സേവനം യുകെ കുടുംബാംഗങ്ങളുടെ പങ്കാളിത്തവും പൂർണ്ണ പിന്തുണയുമാണ് “സേവനം യുകെ”യുടെ വിജയമന്ത്രം. അത്‌ കൊണ്ട് തന്നെ രണ്ടാം വാർഷികാഘോഷം ഉജ്ജ്വലമാക്കുന്നതിന് ഏവരുടെയും പിന്തുണ അഭ്യർത്ഥിക്കുന്നതായി സേവനം യുകെ ചെയര്‍മാന്‍ ശ്രീ. ബൈജു പാലക്കൽ, കൺവീനർ ശ്രീകുമാർ കല്ലിട്ടതിൽ എന്നിവർ അറിയിച്ചു