ന്യൂസ് ഡെസ്ക് , മലയാളം യുകെ

യുകെയിലെ 40 ലക്ഷം തൊഴിലാളികൾക്ക് സെൽഫ് ഐസൊലേഷൻ ഗ്രാന്റിനായി ഇന്ന് മുതൽ അപേക്ഷിക്കാൻ കഴിയും. രണ്ടാഴ് ചത്തേക്ക് സ്വയം ഒറ്റപ്പെടാൻ സാധിക്കാത്ത, കുറഞ്ഞ വരുമാനമുള്ള ജീവനക്കാർക്ക് സാമ്പത്തിക സഹായം നൽകാമെന്ന പ്രതീക്ഷയിലാണ് നിലവിൽ ഇംഗ്ലണ്ടിൽ മാത്രമായി ഈ ഗ്രാന്റ് അവതരിപ്പിച്ചത്. രണ്ടാഴ്ചത്തെ ക്വാറന്റൈൻ നിയമങ്ങൾ ലംഘിക്കുന്ന ആളുകൾക്ക് 10,000 പൗണ്ട് പിഴ ഈടാക്കുമെന്ന പുതിയ നടപടി സ്വീകരിച്ച സമയത്ത് തന്നെ ക്വാറന്റൈനിൽ കഴിയുന്ന താഴ്ന്ന വരുമാനക്കാർക്ക് 500 പൗണ്ട് ആനുകൂല്യം സർക്കാർ പ്രഖ്യാപിച്ചിരുന്നു. ഇംഗ്ലണ്ടിലെ നാല്പത് ലക്ഷത്തിൽ താഴെ വരുന്ന ആളുകൾക്ക് മാത്രമെ ഇതിനപേക്ഷിക്കാൻ യോഗ്യത ഉള്ളൂ എന്നും സർക്കാർ അറിയിച്ചു. യൂണിവേഴ് സൽ ക്രെഡിറ്റ്‌, വർക്കിംഗ്‌ ടാക് സ് ക്രെഡിറ്റ്‌, പെൻഷൻ ക്രെഡിറ്റ്‌, വരുമാനത്തെ അടിസ്ഥാനമാക്കിയുള്ള തൊഴിൽ, പിന്തുണ അലവൻസ്, ഭവന ആനുകൂല്യം, വരുമാന പിന്തുണ, ജോബ് സീക്കർ അലവൻസ് തുടങ്ങിയവ ലഭിക്കുന്നുണ്ടെങ്കിൽ ഈ ആനുകൂല്യത്തിനായി അപേക്ഷിക്കാം. ഒപ്പം കോവിഡ് ലക്ഷണങ്ങൾ ഉണ്ടെന്ന് പറഞ്ഞ് നിങ്ങൾക്ക് അപേക്ഷിക്കാൻ കഴിയില്ല. എൻ എച്ച് എസ് ടെസ്റ്റ്‌ ആൻഡ് ട്രേസ് ആപ്ളിക്കേഷൻ വഴി ക്വാറന്റൈനിൽ കഴിയാൻ നിങ്ങളോട് ആവശ്യപ്പെട്ടാൽ മാത്രമെ ആനുകൂല്യത്തിന് അർഹതയുള്ളൂ. സെപ്റ്റംബർ 28 മുതൽ ക്വാറന്റൈനിൽ കഴിയാൻ ആരംഭിക്കുന്ന ആർക്കും പേയ്‌മെന്റുകൾ ലഭ്യമാകും. എന്നാൽ ഒക്ടോബർ 12 നകം മാത്രമേ ഇത് പൂർണമായും പ്രവർത്തനക്ഷമമായേക്കൂ എന്ന് സർക്കാർ പ്രതീക്ഷിക്കുന്നു.

സെപ്റ്റംബർ 28 മുതൽ സ്വയം ഒറ്റപ്പെടാൻ തുടങ്ങുന്ന ആർക്കും അവരുടെ പ്രദേശത്ത് പദ്ധതി പ്രാബല്യത്തിൽ വന്നതിനുശേഷം ഒരു ബാക്ക്ഡേറ്റഡ് പേയ്‌മെന്റ് ലഭിക്കും. ഈ ആനുകൂല്യത്തിനായി ഫോണിലൂടെയോ ഓൺലൈൻ വഴിയോ അപേക്ഷിക്കാവുന്നതാണ്. നിങ്ങളുടെ പ്രാദേശിക കൗൺസിലിനാണ് ആവശ്യമായ തെളിവുകൾ സമർപ്പിക്കേണ്ടത്. കൗൺസിലുകൾ പേയ്‌മെന്റുകൾ വിതരണം ചെയ്യുകയും സിസ്റ്റം നിയന്ത്രിക്കുകയും ചെയ്യുമെന്ന് സർക്കാർ അറിയിച്ചു. കൗൺസിലുകൾക്ക് അവരുടെ ചെലവുകൾ കേന്ദ്രസർക്കാർ നൽകും.

നിങ്ങൾ അപേക്ഷിക്കുമ്പോൾ നാല് തെളിവുകൾ കാണിക്കേണ്ടതുണ്ടെന്ന് സർക്കാർ പറയുന്നു;

• നിങ്ങളോട് സെൽഫ് ഐസൊലേഷനിൽ കഴിയാൻ ആവശ്യപ്പെട്ട് ടെസ്റ്റ്‌ ആൻഡ് ട്രേസിൽ നിന്നും വന്ന നോട്ടിഫിക്കേഷൻ ( ഐഡി നമ്പർ ഉൾപ്പടെ )

• ബാങ്ക് സ്റ്റേറ്റ് മെന്റ്

• തൊഴിൽ ചെയ്യുന്നുണ്ടെന്ന തെളിവുകൾ

• നിങ്ങൾക്ക് വീട്ടിൽ നിന്ന് ജോലി ചെയ്യാൻ കഴിയില്ലെന്ന് നിങ്ങളുടെ തൊഴിലുടമയിൽ നിന്നുള്ള സ്ഥിരീകരണം. നിങ്ങൾ സ്വയം തൊഴിൽ ചെയ്യുന്നയാളാണെങ്കിൽ, സ്വയം വിലയിരുത്തലിന്റെ തെളിവുകൾ.

ആഴ്ചയിൽ 95.85 പൗണ്ടിന്റെ ചികിത്സാ ആനുകൂല്യത്തിന് പുറമെയാണ് ഈ സഹായം സർക്കാർ ഒരുക്കുന്നത്. ഈ തുക പര്യാപ് തമല്ലെന്ന് യൂണിയനുകളും ലേബർ പാർട്ടിയും മാസങ്ങളായി മുന്നറിയിപ്പ് നൽകിയിരുന്നു. ഈ പദ്ധതി ഇപ്പോൾ ഇംഗ്ലണ്ടിൽ മാത്രമാണ് പ്രവർത്തിക്കുന്നത്. എന്നാൽ രാജ്യം മുഴുവൻ വ്യാപിപ്പിക്കുമെന്ന് സർക്കാർ അറിയിച്ചെങ്കിലും നിശ്ചിത തീയതി നൽകിയിട്ടില്ല.