ന്യൂസ് ഡെസ്ക്, മലയാളം യുകെ
ലണ്ടൻ ലൂട്ടൺ വിമാനത്താവളത്തിലെ ഒരു ബഹുനില കാർ പാർക്കിംഗ് ഏരിയയിൽ നിന്ന് ഒരു വാഹനം വീണതിനെ തുടർന്ന് ഒരാൾക്ക് ഗുരുതരമായി പരുക്കേറ്റു. അപകടം ഉണ്ടായ ഉടൻ തന്നെ കാർ പാർക്ക് വണ്ണിലേക്ക് അടിയന്തര സേവനങ്ങൾ വിളിച്ചതായും ഒരാളെ ഗുരുതരമായ പരുക്കുകളോടെ ആശുപത്രിയിൽ പ്രവേശിപ്പിച്ചതായും പോലീസ് പറഞ്ഞു. ആംബുലൻസും ഫയർഫോഴ്‌സും ഉൾപ്പെടെ തങ്ങളുടെ ഉദ്യോഗസ്ഥരെ സ്ഥലത്തെത്തിച്ചതായി ബെഡ്ഫോർഡ്ഷയർ പോലീസ് പറഞ്ഞു.
അപകടത്തിൽപ്പെട്ട വാഹനം കാർ പാർക്കിങ്ങിന്റെ മുകളിലത്തെ നിലയിലായിരുന്നു എന്നാണ് പുറത്തുവരുന്ന വിവരങ്ങൾ സൂചിപ്പിക്കുന്നത്. അപകടം നടന്ന സ്ഥലമായ ടെർമിനൽ കാർ പാർക്ക് വൺ പ്രധാന വിമാനത്താവള കെട്ടിടത്തിൽ നിന്ന് നാല് മിനിറ്റ് നടക്കാവുന്ന ദൂരത്തിലാണ്. വാഹനമോടിക്കുന്നവർക്ക് അവരുടെ വാഹനങ്ങൾ സ്വയം പാർക്ക് ചെയ്യാനോ മീറ്റ്-ആൻഡ്-ഗ്രീറ്റ് സേവനങ്ങൾ ഉപയോഗിക്കാനോ ഉള്ള ഓപ്ഷനുകൾ ഉണ്ട്. ഇനി ഒരു അറിയിപ്പ് ഉണ്ടാകുന്നതുവരെ വാഹനങ്ങൾ വിമാനത്താവളത്തിന്റെ മിഡ്-സ്റ്റേ കാർ പാർക്കിലേയ്ക്ക് വഴിതിരിച്ചുവിടുമെന്ന് ഒരു പ്രസ്താവനയിൽ എയർപോർട്ട് അധികൃതർ പറഞ്ഞു. 2023 ഒക്ടോബറിൽ ഉണ്ടായ തീപിടുത്തത്തിൽ 1,400 വാഹനങ്ങൾ നശിച്ച സ്ഥലത്തിന് അടുത്തായിട്ടാണ് അപകടം നടന്ന സ്ഥലം.
Leave a Reply