ന്യൂസ് ഡെസ്ക്, മലയാളം യുകെ
യുകെയിൽ സബ്സ്ക്രിപ്ഷൻ റദ്ദാക്കൽ എളുപ്പമാക്കുകയും അനാവശ്യ ഓട്ടോ-റിന്യൂവലുകളിൽ നിന്ന് ഉപഭോക്താക്കളെ സംരക്ഷിക്കുകയും ചെയ്യുന്നതിനായി പുതിയ നിയമങ്ങൾ കൊണ്ടുവരുമെന്ന് സർക്കാർ അറിയിച്ചു. “സബ്സ്ക്രിപ്ഷൻ ട്രാപ്പുകൾ”ക്കെതിരെ കടുത്ത നടപടി സ്വീകരിക്കുന്നതിലൂടെ ശരാശരി വ്യക്തിക്ക് വർഷത്തിൽ ഏകദേശം £170 വരെ ലാഭിക്കാനാകുമെന്നാണ് ബിസിനസ് ആൻഡ് ട്രേഡ് വകുപ്പിന്റെ (DBT) വിലയിരുത്തൽ. ഉപഭോക്താക്കൾക്ക് ഇനി സബ്സ്ക്രിപ്ഷൻ റദ്ദാക്കാൻ നിരന്തര ഫോൺ കോളുകൾ ചെയ്യേണ്ട സാഹചര്യം ഒഴിവാക്കും.
പുതിയ നിയമപ്രകാരം, ഒരു ഫ്രീ ട്രയൽ കാലാവധി അവസാനിച്ചതിന് ശേഷമോ, വാർഷിക സബ്സ്ക്രിപ്ഷൻ സ്വയമേവ പുതുക്കുമ്പോഴോ ഉപഭോക്താക്കൾക്ക് 14 ദിവസത്തെ “കൂളിംഗ് ഓഫ്” കാലയളവ് അനുവദിക്കും. ഈ സമയത്തിനുള്ളിൽ സബ്സ്ക്രിപ്ഷൻ റദ്ദാക്കിയാൽ പൂർണ്ണമായോ അനുപാതികമായോ റീഫണ്ട് ലഭിക്കും. കൂടാതെ, സബ്സ്ക്രിപ്ഷൻ റദ്ദാക്കൽ “ഒരു ക്ലിക്കിൽ” നടത്താനാകുന്ന രീതിയിലേക്ക് സംവിധാനങ്ങൾ മാറ്റണമെന്നും സർക്കാർ നിർദേശിച്ചു.
കമ്പനികൾ ഉപഭോക്താക്കളെ അറിയിക്കാതെ ചെലവേറിയ കരാറുകളിലേക്ക് ചേർക്കുന്ന പ്രവണത അവസാനിപ്പിക്കുന്നതിനായി, മുൻകൂട്ടി വ്യക്തമായ വിവരങ്ങൾ നൽകുന്നത് നിർബന്ധമാക്കും. ഫ്രീ ട്രയൽ അവസാനിക്കാനിരിക്കുമ്പോഴും, ഒരു വർഷമോ അതിലധികമോ ദൈർഘ്യമുള്ള കരാറുകൾ പുതുക്കാനിരിക്കുമ്പോഴും ഉപഭോക്താക്കൾക്ക് നിർബന്ധമായും ഓർമ്മപ്പെടുത്തലുകൾ നൽകണം. പുതിയ നിയമങ്ങൾ 2027-ൽ പ്രാബല്യത്തിൽ വരുമെന്നാണ് പുറത്തുവരുന്ന വിവരങ്ങൾ സൂചിപ്പിക്കുന്നത്.
Leave a Reply