ന്യൂസ് ഡെസ്ക്, മലയാളം യുകെ
ഇംഗ്ലീഷ് ചാനൽ കടന്ന് യുകെയിലേക്ക് കടക്കാൻ ശ്രമിക്കുന്നതിനിടെ നാല് കുടിയേറ്റക്കാർ മരിച്ച സംഭവത്തിൽ ഒരാളെ അറസ്റ്റ് ചെയ്ത് കോടതിയിൽ ഹാജരാക്കി . ആളുകളുടെ ജീവൻ അപകടത്തിലാക്കുന്ന രീതിയിൽ ബോട്ട് നിയന്ത്രിച്ചെന്ന കുറ്റം ചുമത്തി സുഡാൻ സ്വദേശിയായ 27കാരൻ അൽനൂർ മുഹമ്മദ് അലിയാണ് പ്രതി ചേർക്കപ്പെട്ടിരിക്കുന്നത്. ഫ്രാൻസിലെ കലെയ്സിന് സമീപമുള്ള സെന്റ് എറ്റിയൻ ഓ മോൺ തീരത്തുനിന്ന് ‘വാട്ടർ ടാക്സി’യിൽ കയറുന്നതിനിടെ അപകടമുണ്ടായതായാണ് അന്വേഷണത്തിൽ വ്യക്തമാകുന്നത്. ഫോക്സ്റ്റൺ മജിസ്ട്രേറ്റ് കോടതിയിൽ ഹാജരായ പ്രതി കുറ്റം നിഷേധിച്ചു . ഇയാളെ മേയ് 11ന് കാന്തർബറി ക്രൗൺ കോടതിയിൽ വീണ്ടും ഹാജരാക്കുന്നതിനായി കസ്റ്റഡിയിൽ തുടരാൻ ഉത്തരവിട്ടിരിക്കുകയാണ്.
മരണപ്പെട്ടവരുടെ കൂടുതൽ വിവരങ്ങൾ ഇതുവരെ പുറത്തുവിട്ടിട്ടില്ല. ബോട്ട് യാത്ര ആരംഭിച്ചതിന് പിന്നിലുള്ള സാഹചര്യങ്ങൾ ഫ്രഞ്ച് പ്രോസിക്യൂട്ടർമാർ അന്വേഷിച്ചുകൊണ്ടിരിക്കുകയാണ്. സംഭവത്തിനിടെ 38 പേരെ ഫ്രഞ്ച് തീരത്തേക്ക് തിരികെ കൊണ്ടുവന്നപ്പോൾ, 74 പേർ യുകെയിലേക്ക് കടന്നതായി നാഷണൽ ക്രൈം ഏജൻസി (NCA) അറിയിച്ചു. യാത്ര ചെയ്തവരുമായി ബന്ധപ്പെട്ട കൂടുതൽ വിവരങ്ങൾ ശേഖരിക്കുന്നതിനായി അന്വേഷണ സംഘം അന്വേഷണം തുടരുകയാണ്.
വ്യാഴാഴ്ച രാവിലെ ഏകദേശം 7.30ഓടെയാണ് രക്ഷാപ്രവർത്തനം ആരംഭിച്ചത്. പാസ്-ദെ-കലെയിലെ ബുലോൺ-സ്യൂർ-മേർ തെക്കുഭാഗത്താണ് സംഭവം നടന്നത്. മരിച്ച നാല് പേരും കടലിലേക്ക് വളരെ അകലെ എത്തിയിരുന്നുവെന്ന് ഫ്രഞ്ച് സർക്കാർ പ്രതിനിധി ഫ്രാൻസ്വാ-ക്സാവിയർ ലോച്ച് വ്യക്തമാക്കി. മനുഷ്യക്കടത്ത് ശ്രമങ്ങളുമായി ബന്ധപ്പെട്ട അപകടങ്ങൾ തുടരുന്ന പശ്ചാത്തലത്തിൽ സംഭവം കൂടുതൽ ആശങ്ക ഉയർത്തിയിരിക്കുകയാണ്.
Leave a Reply