ന്യൂസ് ഡെസ്ക്, മലയാളം യുകെ
ലണ്ടൻ: ബ്രിട്ടീഷ് പ്രധാനമന്ത്രി സ്ഥാനമൊഴിയുന്നതായി പ്രഖ്യാപിച്ച കെയർ സ്റ്റാർമർ, 10 ഡൗണിംഗ് സ്ട്രീറ്റിന് മുന്നിൽ നടത്തിയ ആറു മിനിറ്റ് ദൈർഘ്യമുള്ള പ്രസംഗത്തിലൂടെ തന്റെ പ്രധാനമന്ത്രി പദവിയുടെ അവസാന അധ്യായം കുറിച്ചു. മുൻ പ്രധാനമന്ത്രി ഋഷി സുനക് രാജിവെച്ചപ്പോൾ നടത്തിയ പ്രസംഗത്തെ അനുസ്മരിപ്പിക്കുന്ന രീതിയിലായിരുന്നു ചടങ്ങ്. ഭാര്യ വിക്ടോറിയ, മകൻ, മുതിർന്ന മന്ത്രിമാർ, ഉപദേഷ്ടാക്കൾ, അടുത്ത സഹപ്രവർത്തകർ എന്നിവരുടെ സാന്നിധ്യത്തിലായിരുന്നു പ്രഖ്യാപനം. നൂറോളം മാധ്യമപ്രവർത്തകരും രാഷ്ട്രീയനിരീക്ഷകരും ചടങ്ങിന് സാക്ഷികളായി.
രണ്ടുവർഷം മുൻപ് ലേബർ പാർട്ടിയെ അധികാരത്തിലെത്തിച്ച് ഡൗണിംഗ് സ്ട്രീറ്റിലേക്ക് നടന്നുകയറിയ നിമിഷമാണ് തന്റെ ജീവിതത്തിലെ ഏറ്റവും അഭിമാനകരമായ നിമിഷമെന്ന് സ്റ്റാർമർ പറഞ്ഞു. എന്നാൽ അടുത്ത പൊതുതെരഞ്ഞെടുപ്പിലേക്ക് പാർട്ടിയെ നയിക്കാൻ താനാണ് ഏറ്റവും അനുയോജ്യനെന്ന വിശ്വാസം പാർലമെന്ററി പാർട്ടിക്കില്ലെന്ന് വ്യക്തമായതോടെ ആ തീരുമാനം താൻ മാന്യമായി അംഗീകരിക്കുകയാണെന്നും അദ്ദേഹം വ്യക്തമാക്കി. രാജിവിവരം ചാൾസ് രാജാവിനെ അറിയിച്ചിട്ടുണ്ടെന്നും പുതിയ നേതാവിനെ തിരഞ്ഞെടുക്കുന്നതുവരെ പ്രധാനമന്ത്രിയായി തുടരുമെന്നും സ്റ്റാർമർ അറിയിച്ചു.
പ്രസംഗത്തിന്റെ അവസാന ഭാഗമാണ് ഏറ്റവും വികാരഭരിതമായത്. നല്ല സമയത്തും മോശം സമയത്തും തന്റെ കൂടെ ഉറച്ചുനിന്ന ഭാര്യ വിക്ടോറിയയ്ക്ക് നന്ദി പറഞ്ഞ സ്റ്റാർമർ, രാജ്യത്തെ ഏറ്റവും വലിയ ജോലി അവസാനിപ്പിക്കുമ്പോൾ ഇനി ഏറ്റവും പ്രധാനപ്പെട്ട ജോലിയായ ഭർത്താവിന്റെയും പിതാവിന്റെയും ഉത്തരവാദിത്വങ്ങളിൽ കൂടുതൽ സമയം ചെലവഴിക്കാനാണ് ആഗ്രഹിക്കുന്നതെന്ന് പറഞ്ഞു. കുടുംബത്തെക്കുറിച്ച് പരാമർശിക്കുന്നതിനിടെ അദ്ദേഹം വികാരാധീനനായി . പ്രസംഗം അവസാനിക്കുമ്പോൾ സമീപത്ത് യൂറോപ്യൻ യൂണിയൻ അനുകൂല പ്രവർത്തകനായ സ്റ്റീവ് ബ്രേയുടെ സംഗീതവും കേൾക്കാമായിരുന്നു.
ചടങ്ങിന്റെ ദൃശ്യങ്ങളിൽ ശ്രദ്ധേയമായത് സ്റ്റാർമറുടെ രാഷ്ട്രീയ യാത്രയിൽ നിർണായക പങ്കുവഹിച്ചവരുടെ സാന്നിധ്യമായിരുന്നു. ഉപപ്രധാനമന്ത്രി ഡേവിഡ് ലാമി, ചീഫ് സെക്രട്ടറി ഡാരൻ ജോൺസ്, മുതിർന്ന ഉപദേഷ്ടാക്കളായ ജോൺ സ്റ്റീവൻസ്, ടെസ ടൈലർ ടോഡ്, ലിസ് ബേറ്റ്സ് തുടങ്ങിയവർ അദ്ദേഹത്തിന് പിന്നിൽ അണിനിരന്നു. അധികാരത്തിന്റെ കേന്ദ്രമായ ഡൗണിംഗ് സ്ട്രീറ്റിന് മുന്നിൽ നിന്നുള്ള ആ വിടവാങ്ങൽ പ്രസംഗം ഒരു രാഷ്ട്രീയ പ്രഖ്യാപനം മാത്രമല്ല, രണ്ടുവർഷം നീണ്ട പ്രധാനമന്ത്രി കാലഘട്ടത്തിന്റെ ഔപചാരിക സമാപന നിമിഷമായും ബ്രിട്ടീഷ് രാഷ്ട്രീയ ചരിത്രത്തിൽ രേഖപ്പെടുത്തപ്പെടുകയാണ്.
Leave a Reply