ന്യൂസ് ഡെസ്ക്, മലയാളം യുകെ
ലണ്ടൻ: പ്രധാനമന്ത്രി കെയർ സ്റ്റാർമറുടെ രാജിക്ക് പിന്നാലെ ലേബർ പാർട്ടിയുടെ പ്രധാനമന്ത്രി സ്ഥാനാർഥിയായി ഉയർന്നുവരുന്ന ആൻഡി ബേൺഹാം തിങ്കളാഴ്ച പാർലമെന്റിൽ എംപിയായി സത്യപ്രതിജ്ഞ ചെയ്തു. മേക്കർഫീൽഡ് ഉപതിരഞ്ഞെടുപ്പിൽ വിജയിച്ച ശേഷമാണ് അദ്ദേഹം ഹൗസ് ഓഫ് കോമൺസിലേക്ക് തിരിച്ചെത്തിയത്. സ്റ്റാർമറുടെ രാജിപ്രഖ്യാപനത്തിന് മണിക്കൂറുകൾക്കകം തന്നെ ബേൺഹാം നേതൃസ്ഥാനത്തേക്ക് മത്സരിക്കുമെന്ന് സ്ഥിരീകരിക്കുകയും രാജ്യത്തിന് സ്ഥിരതയുള്ള നേതൃത്വം നൽകുമെന്ന് പ്രഖ്യാപിക്കുകയും ചെയ്തു.
ലേബർ നേതൃസ്ഥാനത്തേക്കുള്ള നാമനിർദേശ നടപടികൾ ജൂലൈ 9-ന് ആരംഭിക്കും. നിലവിൽ ബേൺഹാമിനെതിരെ പ്രമുഖ എതിരാളികൾ രംഗത്തില്ല. മുൻ ആരോഗ്യമന്ത്രി വെസ് സ്ട്രീറ്റിങ് മത്സരിക്കില്ലെന്ന് പ്രഖ്യാപിച്ച് ബേൺഹാമിന് പിന്തുണ നൽകുകയും ചെയ്തു. ഇതോടെ മത്സരമില്ലാതെ തന്നെ ജൂലൈ മധ്യത്തോടെ ബേൺഹാം പ്രധാനമന്ത്രിയായി ചുമതലയേൽക്കാനുള്ള സാധ്യത ശക്തമായിട്ടുണ്ട്. ജീവിതച്ചെലവ്, സാമ്പത്തിക വളർച്ച, പൊതുസേവനങ്ങളുടെ മെച്ചപ്പെടുത്തൽ എന്നിവയ്ക്കായിരിക്കും മുൻഗണനയെന്ന് ബേൺഹാം വ്യക്തമാക്കി.
അതേസമയം, പുതിയ പ്രധാനമന്ത്രി അധികാരമേൽക്കുന്നതിന് മുമ്പ് പൊതുതെരഞ്ഞെടുപ്പ് നടത്തുമോയെന്ന ചോദ്യത്തിന് ബേൺഹാം വ്യക്തമായ മറുപടി നൽകിയില്ല. “ഇനിയും നിരവധി ഘട്ടങ്ങൾ ബാക്കിയുണ്ട്” എന്നായിരുന്നു അദ്ദേഹത്തിന്റെ പ്രതികരണം. സ്റ്റാർമറുടെ നേതൃത്വത്തെയും രാജ്യത്തിനുവേണ്ടിയുള്ള സേവനത്തെയും അദ്ദേഹം പ്രശംസിക്കുകയും നേതൃമാറ്റം ക്രമബദ്ധമായി പൂർത്തിയാക്കുമെന്നും ഉറപ്പുനൽകുകയും ചെയ്തു. ലേബർ പാർട്ടിയെ ഒരുമിപ്പിക്കുകയും റിഫോം യുകെയുടെ വെല്ലുവിളി നേരിടുകയും ചെയ്യുക എന്നതാണ് ബേൺഹാമിന് മുന്നിലുള്ള ഏറ്റവും വലിയ ദൗത്യമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
Leave a Reply