ന്യൂസ് ഡെസ്ക്, മലയാളം യുകെ
ഇംഗ്ലണ്ടിലെ എൻഎച്ച്എസ് കൺസൾട്ടന്റ് ഡോക്ടർമാർ അടുത്ത 12 മാസത്തിനുള്ളിൽ സമരനടപടികൾ സ്വീകരിക്കാൻ അനുകൂലമായി വോട്ട് ചെയ്തു. ശമ്പളവർധനയും ജോലി സമയത്തിലെ കുറവും ആവശ്യപ്പെട്ടാണ് സമരഭീഷണി ഉയർന്നിരിക്കുന്നത്. ബ്രിട്ടീഷ് മെഡിക്കൽ അസോസിയേഷൻ (ബിഎംഎ) നടത്തിയ വോട്ടെടുപ്പിൽ 76 ശതമാനം പേർ സമരത്തെ അനുകൂലിച്ചപ്പോൾ, പങ്കാളിത്തം 51.5 ശതമാനമായിരുന്നു. നിലവിൽ സമര തീയതികൾ പ്രഖ്യാപിച്ചിട്ടില്ലെങ്കിലും സർക്കാരുമായി ചർച്ചകൾക്ക് സാധ്യത തുടരുകയാണ്.
2008-09 കാലഘട്ടവുമായി താരതമ്യം ചെയ്യുമ്പോൾ കൺസൾട്ടന്റ് ഡോക്ടർമാരുടെ യഥാർഥ ശമ്പള മൂല്യം ഏകദേശം 25 ശതമാനം കുറഞ്ഞതായി ബിഎംഎ ആരോപിക്കുന്നു. അതിനാൽ അനുകൂലമായ ശമ്പള കരാർ, സാധാരണ ജോലി സമയം ആഴ്ചയിൽ 40 മണിക്കൂറിൽ നിന്ന് 37.5 മണിക്കൂറായി കുറയ്ക്കൽ, രാത്രിയിലെയും അവധി ദിവസങ്ങളിലെയും സേവനങ്ങൾക്ക് കൂടുതൽ പ്രതിഫലം എന്നിവയാണ് പ്രധാന ആവശ്യങ്ങൾ. രോഗി പരിചരണത്തിന് പുറമെ ഗവേഷണം, പരിശീലനം, സേവന നവീകരണം തുടങ്ങിയ പ്രവർത്തനങ്ങൾക്ക് കൂടുതൽ സമയം അനുവദിക്കണമെന്നും അവർ ആവശ്യപ്പെടുന്നു.
അതേസമയം, കൺസൾട്ടന്റ് ഡോക്ടർമാർ രാജ്യത്തെ ഏറ്റവും ഉയർന്ന വരുമാനമുള്ള വിഭാഗങ്ങളിൽ ഉൾപ്പെടുന്നവരാണെന്നും ശരാശരി വാർഷിക വരുമാനം 1.52 ലക്ഷം പൗണ്ടിലധികമാണെന്നും ചൂണ്ടിക്കാട്ടി സർക്കാർ സമരനീക്കത്തെ വിമർശിച്ചു. സമരം നടപ്പായാൽ രോഗി പരിചരണത്തെയും ആശുപത്രി സേവനങ്ങളെയും അത് വീണ്ടും ബാധിക്കുമെന്ന ആശങ്ക എൻഎച്ച്എസ് നേതൃത്വവും പ്രകടിപ്പിച്ചു. അടുത്തിടെ റെസിഡന്റ് ഡോക്ടർമാർ സർക്കാരിന്റെ പുതിയ ശമ്പള നിർദേശം അംഗീകരിച്ച് സമരം പിൻവലിച്ചതിന് പിന്നാലെയാണ് കൺസൾട്ടന്റ് ഡോക്ടർമാരുടെ ഈ തീരുമാനം പുറത്തുവന്നിരിക്കുന്നത്.
Leave a Reply