മനോജ് ജോസഫ്
ലിവർപൂൾ: യുകെയിലെ മലയാളി കായികപ്രേമികളെ ആവേശത്തിന്റെ മുൾമുനയിൽ നിർത്തിയ ‘ഒരുമ ബ്ലാക്ക്ബേൺ പുൾ ലീഗ് സീസൺ 2’ വടംവലി മത്സരത്തിൽ ലിവർപൂൾ മലയാളി അസോസിയേഷൻ (ലിമ) വനിതാ ടീമിന് ചരിത്ര വിജയം. ജൂലൈ 11-ന് ബ്ലാക്ക്ബേണിൽ വച്ചു നടന്ന കടുത്ത പോരാട്ടത്തിനൊടുവിലാണ് എതിരാളികളെയെല്ലാം നിഷ്പ്രഭരാക്കി ലിമയുടെ പെൺപട കിരീടം ചൂടിയത്.
യുകെയിലെ പ്രമുഖ ടീമുകളായ ക്വീൻസ് ഓൾഡ്ഹാം (Queens Oldham), സ്റ്റോക്ക് എലൈറ്റ് (Stock Elite), യു.എം.എ ബ്ലാക്ക്ബേൺ (UMA Blackburn) എന്നിവർക്കെതിരെ ഒരൊറ്റ കളിപോലും തോൽക്കാതെ, തുടർച്ചയായ വിജയങ്ങൾ അനായാസം കരസ്ഥമാക്കിയാണ് ലിമ ഫൈനലിലേക്ക് നേരിട്ട് യോഗ്യത നേടിയത്. കാണികളെ ആവേശത്തിന്റെ കൊടുമുടിയിലെത്തിച്ച ഫൈനൽ പോരാട്ടത്തിൽ, ടൂർണമെന്റിന്റെ ആതിഥേയരും കരുത്തരുമായ ഒരുമ ബ്ലാക്ക്ബേണിനെ അടിയറവ് പറയിച്ചാണ് ലിമയുടെ പെൺപുലികൾ ഒന്നാം സ്ഥാനം സ്വന്തമാക്കിയത്.
കോച്ച് ഹരികുമാർ ഗോപാലന്റെ കീഴിൽ കൃത്യമായ തന്ത്രങ്ങളും തികഞ്ഞ പ്രൊഫഷണൽ ശൈലിയും പരിശീലിച്ചാണ് ടീം കളത്തിലിറങ്ങിയത്. യുകെയിലെ കഠിനമായ ജോലിത്തിരക്കുകൾക്കും വീട്ടുചുമതലകൾക്കും ഇടയിലാണ് ഈ പെൺകുട്ടികൾ പരിശീലനത്തിനായി സമയം കണ്ടെത്തിയത്. യുകെയിലെ പ്രതികൂലമായ കാലാവസ്ഥയെപ്പോലും വകവെക്കാതെ ഗ്രൗണ്ടിൽ അവർ ഒഴുക്കിയ വിയർപ്പിനും കഠിനാധ്വാനത്തിനും ലഭിച്ച ഏറ്റവും മികച്ച അംഗീകാരമാണ് ഈ ചാമ്പ്യൻ പട്ടം.
യുകെയുടെ മണ്ണിൽ ലിവർപൂൾ മലയാളി അസോസിയേഷൻ്റെ അഭിമാനമായി കപ്പുയർത്തിയ ലിമയുടെ വനിതാ ടീമിനെ യുകെയുടെ വിവിധ ഭാഗങ്ങളിലുള്ള പ്രവാസി മലയാളി സമൂഹവും സംഘടനകളും ഹൃദയം നിറഞ്ഞ് അഭിനന്ദിച്ചു. വരും വർഷങ്ങളിലും ഈ പെൺകരുത്ത് വലിയ വിജയങ്ങൾ ആവർത്തിക്കുമെന്ന പ്രതീക്ഷയിലാണ് ലിവർപൂളിലെ കായികപ്രേമികൾ.
Leave a Reply