ന്യൂസ് ഡെസ്ക്, മലയാളം യുകെ
ലണ്ടൻ: ഇംഗ്ലണ്ടിന്റെയും വെയിൽസിന്റെയും ഭൂരിഭാഗം പ്രദേശങ്ങളിൽ അനുഭവപ്പെടുന്ന ശക്തമായ ഉഷ്ണതരംഗം അടുത്ത ആഴ്ചയിലേക്കും തുടരുമെന്ന് യുകെയുടെ മെറ്റ് ഓഫീസ് അറിയിച്ചു. ഞായറാഴ്ചയും പല പ്രദേശങ്ങളിലും താപനില 30 ഡിഗ്രി സെൽഷ്യസിന് മുകളിലായിരിക്കുമെന്നാണ് പ്രവചനം. ചില മേഖലകളിൽ കാട്ടുതീ ഭീഷണിയും ആരോഗ്യ മുന്നറിയിപ്പുകളും തുടരുന്നുണ്ട്.
തെക്കൻ, കിഴക്കൻ ഇംഗ്ലണ്ടിലാണ് ചൂട് ഏറ്റവും രൂക്ഷമായി അനുഭവപ്പെടുന്നത്. തിങ്കളാഴ്ചയും ചൊവ്വാഴ്ചയും താപനില 34 ഡിഗ്രി സെൽഷ്യസിനോട് അടുക്കാനോ അതിലധികമാകാനോ സാധ്യതയുണ്ടെന്ന് മെറ്റ് ഓഫീസ് വ്യക്തമാക്കി. പ്രായമായവരും കുട്ടികളും ആരോഗ്യപ്രശ്നങ്ങളുള്ളവരും പ്രത്യേക ജാഗ്രത പാലിക്കണമെന്ന് അധികൃതർ നിർദേശിച്ചിട്ടുണ്ട്.
തുടർച്ചയായ ഉയർന്ന താപനില കാരണം ജലക്ഷാമം, കാട്ടുതീ സാധ്യത, ആരോഗ്യപ്രശ്നങ്ങൾ എന്നിവയെക്കുറിച്ചും ആശങ്ക ഉയരുന്നുണ്ട്. ഈ വർഷം ബ്രിട്ടൻ നേരിടുന്ന മൂന്നാമത്തെ വലിയ ഉഷ്ണ തരംഗമാണിത്. സമീപകാലത്തെ ചൂട് യൂറോപ്പിലുടനീളം വ്യാപക പ്രത്യാഘാതങ്ങൾ സൃഷ്ടിച്ചതായും കാലാവസ്ഥാ വ്യതിയാനത്തിന്റെ ആഘാതങ്ങൾ കൂടുതൽ പ്രകടമാകുന്നതായും വിദഗ്ധർ ചൂണ്ടിക്കാട്ടുന്നു.
Leave a Reply