തിരുവനന്തപുരം: നിയമസഭാ തിരഞ്ഞെടുപ്പിലേറ്റ തിരിച്ചടിക്ക് പിന്നാലെ ജനങ്ങളുമായുള്ള ബന്ധത്തിലും സംഘടനാ പ്രവർത്തനങ്ങളിലും ഉണ്ടായ വീഴ്ചകൾ സിപിഎം തുറന്നു സമ്മതിച്ചു. ജനങ്ങളോട് കൂടുതൽ വിനയത്തോടെയും ഉത്തരവാദിത്തത്തോടെയും പെരുമാറുന്നതിൽ പാർട്ടിക്ക് പാളിച്ച സംഭവിച്ചുവെന്നാണ് നേതൃത്വത്തിന്റെ വിലയിരുത്തൽ. സ്ഥാനാർഥി നിർണയത്തിലെയും പ്രചാരണ പ്രവർത്തനങ്ങളിലെയും പോരായ്മകളും പരാജയത്തിന് കാരണമായതായി ചൂണ്ടിക്കാട്ടി.
തിരഞ്ഞെടുപ്പ് തോൽവിയെ തുടർന്ന് തെറ്റുതിരുത്തൽ നടപടികളുമായി മുന്നോട്ടുപോകാനാണ് പാർട്ടി തീരുമാനം. താഴെത്തട്ടിലെ സംഘടനാ പ്രവർത്തനം ശക്തിപ്പെടുത്തുക, ജനങ്ങളുമായുള്ള നേരിട്ടുള്ള ബന്ധം വർധിപ്പിക്കുക, പാർട്ടിക്കുള്ളിൽ ഉയർന്ന അസംതൃപ്തികൾ പരിഹരിക്കുക തുടങ്ങിയ കാര്യങ്ങൾക്ക് മുൻഗണന നൽകും. കേരളത്തിലും പശ്ചിമ ബംഗാളിലുമുണ്ടായ തിരിച്ചടികൾ സംബന്ധിച്ച കൂടുതൽ ചർച്ചകൾക്കായി വിപുലമായ യോഗങ്ങളും സംഘടിപ്പിക്കും.
അധികാര ശൈലി, സ്ഥാനാർഥി നിർണയം, ജനവികാരം മനസ്സിലാക്കുന്നതിലെ വീഴ്ച എന്നിവയെക്കുറിച്ച് പാർട്ടിക്കുള്ളിൽ തന്നെ വിമർശനങ്ങൾ ഉയർന്നിരുന്നു. അണികളുടെയും പൊതുജനങ്ങളുടെയും വിശ്വാസം വീണ്ടെടുക്കാൻ നേതൃത്വതലത്തിൽ ഉൾപ്പെടെ മാറ്റങ്ങൾ അനിവാര്യമാണെന്ന അഭിപ്രായവും വിവിധ ഘടകങ്ങളിൽ നിന്ന് ഉയരുന്നുണ്ട്. ഈ സാഹചര്യത്തിലാണ് സംഘടനയെ പുനരുജ്ജീവിപ്പിക്കാനും ജനപിന്തുണ തിരിച്ചുപിടിക്കാനുമായി സിപിഎം തെറ്റുതിരുത്തൽ നടപടികൾക്ക് തുടക്കമിടുന്നത്.
Leave a Reply