ന്യൂസ് ഡെസ്ക്, മലയാളം യുകെ
ബ്രിട്ടനിൽ വീടുകളിലും ഫ്ലാറ്റുകളിലും താമസിക്കുന്നവർക്ക് ഇനി ബാൽക്കണിയിൽ ഘടിപ്പിക്കാവുന്ന പ്ലഗ്-ഇൻ സോളാർ പാനലുകൾ ഉപയോഗിച്ച് വൈദ്യുതി ഉൽപാദിപ്പിക്കാൻ വഴിയൊരുങ്ങുന്നു. സർക്കാർ നിയമഭേദഗതി നടപ്പാക്കിയതോടെ ഓഗസ്റ്റ് 27 മുതൽ ഇത്തരം ‘ബാൽക്കണി സോളാർ’ സംവിധാനങ്ങൾ രാജ്യത്ത് നിയമപരമായി വിൽക്കാനും ഉപയോഗിക്കാനും സാധിക്കും. യൂറോപ്യൻ രാജ്യങ്ങളിൽ വ്യാപകമായി പ്രചാരത്തിലുള്ള ഈ സംവിധാനങ്ങൾ വാടകവീടുകളിലും ഫ്ലാറ്റുകളിലും താമസിക്കുന്നവർക്ക് ഗുണകരമാകുമെന്നാണ് വിലയിരുത്തൽ.
പരമ്പരാഗത മേൽക്കൂര സോളാർ സംവിധാനങ്ങളിൽ നിന്ന് വ്യത്യസ്തമായി, ബാൽക്കണി സോളാർ പാനലുകൾ സാധാരണ വൈദ്യുതി പ്ലഗിൽ ബന്ധിപ്പിച്ചാൽ തന്നെ പ്രവർത്തിക്കും. ബാൽക്കണി, ടെറസ്, ഷെഡ് മേൽക്കൂര തുടങ്ങിയ തുറസ്സായ ഇടങ്ങളിൽ സ്ഥാപിക്കാവുന്ന ഇവ വീടിന്റെ വൈദ്യുതി ആവശ്യത്തിന്റെ ഒരു ഭാഗം നിറവേറ്റാൻ സഹായിക്കും. കറീസ്, ബി ആൻഡ് ക്യു, അസ്ഡ തുടങ്ങിയ പ്രമുഖ റീട്ടെയിൽ കമ്പനികൾ ഈ സംവിധാനങ്ങൾ വിപണിയിലെത്തിക്കാനൊരുങ്ങുകയാണ്. ഏകദേശം 400 പൗണ്ടിൽ തുടങ്ങുന്ന സംവിധാനങ്ങൾ വഴി വർഷം 70 മുതൽ 110 പൗണ്ട് വരെ വൈദ്യുതി ബില്ലിൽ ലാഭം നേടാമെന്നാണ് കണക്ക്.
ഇറാൻ യുദ്ധത്തെ തുടർന്നുള്ള ആഗോള ഊർജവില വർധനയുടെ പശ്ചാത്തലത്തിൽ ബ്രിട്ടനിൽ ഹരിത ഊർജ പരിഹാരങ്ങളിലേക്കുള്ള ജനങ്ങളുടെ താൽപര്യം കൂടിയിരിക്കുകയാണ്. കഴിഞ്ഞ വർഷം മാത്രം 2.69 ലക്ഷം സോളാർ ഇൻസ്റ്റലേഷനുകൾ ആണ് രാജ്യത്ത് പൂർത്തിയായത്. പുതിയ നിയമം ഭാവിയിൽ പ്ലഗ്-ഇൻ ബാറ്ററികൾ ഉൾപ്പെടെയുള്ള കൂടുതൽ ഗാർഹിക ഊർജ പരിഹാരങ്ങൾക്ക് വഴിയൊരുക്കുമെന്നും വിദഗ്ധർ അഭിപ്രായപ്പെട്ടു. എന്നാൽ മികച്ച ഫലം ലഭിക്കാൻ സൂര്യപ്രകാശം ലഭിക്കുന്ന അനുയോജ്യമായ സ്ഥലം ആവശ്യമായതോടൊപ്പം ചില സാഹചര്യങ്ങളിൽ ഭൂവുടമകളുടെയോ കെട്ടിട ഉടമകളുടെയോ അനുമതിയും ആവശ്യമായി വരും.
Leave a Reply