ന്യൂസ് ഡെസ്ക്, മലയാളം യുകെ
ഈസ്റ്റ് സസെക്സിൽ ലൂയിസിന് സമീപം ട്രെയിൻ പാളം തെറ്റിയുണ്ടായ അപകടത്തിൽ രണ്ട് പേർക്ക് ഗുരുതര പരുക്കേറ്റു. ഹേവാർഡ്സ് ഹീത്തിനും ലൂയിസിനും ഇടയിൽ വ്യാഴാഴ്ച വൈകിട്ട് നാലുമണിയോടെയാണ് അപകടമുണ്ടായത്. ഏകദേശം 150 യാത്രക്കാരാണ് ട്രെയിനിലുണ്ടായിരുന്നത്. അപകടത്തെ തുടർന്ന് ഏതാനും യാത്രക്കാർ ട്രെയിനിനുള്ളിൽ കുടുങ്ങിയെങ്കിലും എല്ലാവരെയും സുരക്ഷിതമായി പുറത്തെത്തിച്ചതായി അധികൃതർ അറിയിച്ചു.
പാളം തെറ്റിയ ട്രെയിനിന്റെ മൂന്ന് പിൻ ബോഗികൾ സമീപത്തെ വയലിലേക്ക് മറിഞ്ഞു. ബോഗികൾ വശത്തേക്ക് മറിഞ്ഞതോടെ യാത്രക്കാർ ജനലുകളിലൂടെയും മറ്റും പുറത്തുകടക്കുകയായിരുന്നു . അപകടസമയം ട്രെയിൻ ശക്തമായി കുലുങ്ങിയെന്നും വാഹനാപകടത്തിന് സമാനമായ അനുഭവമായിരുന്നെന്നും യാത്രക്കാർ പറഞ്ഞു. സംഭവസ്ഥലത്തെത്തിയ അടിയന്തിരസേന പരുക്കേറ്റവർക്ക് പ്രാഥമിക ചികിത്സ നൽകിയ ശേഷം ചിലരെ സമീപത്തെ ആശുപത്രികളിലേക്ക് മാറ്റി.
അപകടത്തെ തുടർന്ന് ബ്രിട്ടീഷ് ട്രാൻസ്പോർട്ട് പൊലീസ്, സസെക്സ് പൊലീസ്, ആംബുലൻസ് സർവീസ്, നെറ്റ്വർക്ക് റെയിൽ എന്നിവയുടെ നേതൃത്വത്തിൽ രക്ഷാപ്രവർത്തനം നടന്നു. രണ്ട് പേർക്ക് ഗുരുതര പരുക്കേറ്റതിനു പുറമെ 18 പേർക്ക് നേരിയ പരുക്കേറ്റതായി പൊലീസ് അറിയിച്ചു. ലൂയിസിനും ഹേവാർഡ്സ് ഹീത്തിനുമിടയിൽ ട്രെയിൻ സർവീസുകൾക്ക് വലിയ തടസ്സം തുടരുന്നതിനാൽ യാത്രക്കാർ ജാഗ്രത പാലിക്കണമെന്ന് അധികൃതർ നിർദേശിച്ചു. അപകടത്തിന്റെ കാരണം കണ്ടെത്താൻ റെയിൽ ആക്സിഡന്റ് ഇൻവെസ്റ്റിഗേഷൻ ബ്രാഞ്ച് അന്വേഷണം ആരംഭിച്ചിട്ടുണ്ട്.
Leave a Reply