ന്യൂസ് ഡെസ്ക്, മലയാളം യുകെ
ലണ്ടൻ: സർവകലാശാലകൾ അടുത്ത മാസം തുറക്കാനിരിക്കെ മെനിംജൈറ്റിസ് – ബി (MenB) രോഗത്തിനെതിരായ സൗജന്യ വാക്സിൻ എത്രയും വേഗം സ്വീകരിക്കണമെന്ന് ഇംഗ്ലണ്ടിലെ വിദ്യാർഥികൾക്ക് എൻഎച്ച്എസ് അടിയന്തിര മുന്നറിയിപ്പ് നൽകി. ഈ വർഷം കെന്റ്, ബെർക്ഷയർ മേഖലകളിലുണ്ടായ രോഗബാധയുമായി ബന്ധപ്പെട്ട് മൂന്ന് വിദ്യാർഥികൾ മരിച്ചതിനെ തുടർന്നാണ് പ്രത്യേക പ്രതിരോധ കുത്തിവയ്പ് പദ്ധതി ആരംഭിച്ചത്. ജൂലൈ 20-ന് പദ്ധതി ആരംഭിച്ചെങ്കിലും അർഹരായ ഏകദേശം പത്ത് ലക്ഷം യുവാക്കളിൽ ഒരു ലക്ഷത്തിൽ താഴെപ്പേർ മാത്രമാണ് ഇതുവരെ വാക്സിൻ സ്വീകരിച്ചത്.
സർവകലാശാല ഹോസ്റ്റലുകളിലും മറ്റ് താമസസൗകര്യങ്ങളിൽ പുതിയ ആളുകളുമായി അടുത്ത സമ്പർക്കത്തിൽ കഴിയുന്നതിനാൽ രോഗവ്യാപന സാധ്യത കൂടുതലാണെന്ന് ആരോഗ്യവിദഗ്ധർ ചൂണ്ടിക്കാട്ടുന്നു. വർഷം 13 പൂർത്തിയാക്കിയ വിദ്യാർഥികൾക്കും 25 വയസ്സിന് താഴെയുള്ള ആദ്യവർഷ സർവകലാശാല വിദ്യാർഥികൾക്കും വിദേശ വിദ്യാർഥികൾക്കും രണ്ട് ഡോസ് അടങ്ങുന്ന വാക്സിൻ കോഴ്സ് സൗജന്യമായി ലഭിക്കും. നാല് ആഴ്ചയുടെ ഇടവേളയിൽ രണ്ട് ഡോസുകളും സ്വീകരിക്കണമെന്ന് ഫാർമസിസ്റ്റുകൾ നിർദേശിച്ചു.
മെനിംജൈറ്റിസ്-ബി മസ്തിഷ്കത്തെ ചുറ്റിയുള്ള ആവരണങ്ങളെ ബാധിക്കുന്ന ഗുരുതര ബാക്ടീരിയ രോഗമാണ്. മണിക്കൂറുകൾക്കകം ജീവന് ഭീഷണിയായ മെനിംജൈറ്റിസിനും സെപ്റ്റിസീമിയക്കും കാരണമാകാം. പനി, കടുത്ത തലവേദന, ഛർദ്ദി, പേശിവേദന, കഴുത്ത് മരവിപ്പ്, വെളിച്ചത്തോടുള്ള അസഹിഷ്ണുത, മങ്ങാത്ത ചർമപ്പാടുകൾ തുടങ്ങിയ ലക്ഷണങ്ങൾ കണ്ടാൽ ഉടൻ ചികിത്സ തേടണമെന്ന് ആരോഗ്യ അധികൃതർ അറിയിച്ചു.
Leave a Reply