ന്യൂസ് ഡെസ്ക്, മലയാളം യുകെ
ബ്രസീലിൽ നിന്നുള്ള മാംസ ഇറക്കുമതിക്ക് അടിയന്തിര വിലക്ക് ഏർപ്പെടുത്തണമെന്ന് ബ്രിട്ടനിലെ പ്രമുഖ കർഷക സംഘടനകളും മൃഗാരോഗ്യ വിദഗ്ധരും സർക്കാരിനോട് ആവശ്യപ്പെട്ടു. കന്നുകാലി–കോഴി വളർത്തലിൽ ആന്റിബയോട്ടിക്കുകളുടെ അമിത ഉപയോഗം തുടരുന്നതായും യൂറോപ്യൻ യൂണിയന്റെ മാനദണ്ഡങ്ങൾ പാലിക്കുന്നതായി തെളിയിക്കാൻ ബ്രസീലിന് കഴിഞ്ഞിട്ടില്ലെന്നുമാണ് ആശങ്ക. ഇതേ കാരണത്താൽ അടുത്ത ആഴ്ച മുതൽ ബ്രസീലിയൻ ബീഫിനും ചിക്കനും യൂറോപ്യൻ യൂണിയൻ വിലക്ക് ഏർപ്പെടുത്താനിരിക്കുകയാണ്.
കൃഷിയിടങ്ങളിലെ ആന്റിബയോട്ടിക് ദുരുപയോഗം മനുഷ്യരിൽ മരുന്നുകളെ പ്രതിരോധിക്കുന്ന ‘സൂപ്പർബഗ്’ രോഗാണുക്കളുടെ വ്യാപനത്തിന് പ്രധാന കാരണങ്ങളിലൊന്നാണെന്ന് ആരോഗ്യ വിദഗ്ധർ മുന്നറിയിപ്പ് നൽകി. ബ്രസീലിൽ ചില നിയന്ത്രണങ്ങൾ കൊണ്ടുവന്നിട്ടുണ്ടെങ്കിലും മനുഷ്യചികിത്സയിൽ അത്യന്തം നിർണായകമായ ആന്റിബയോട്ടിക്കുകൾ വെറ്ററിനറി ഡോക്ടറുടെ നിർദേശമില്ലാതെ ലഭ്യമാകുന്നുവെന്നും അവയുടെ ഉപയോഗത്തിൽ മതിയായ മേൽനോട്ടമില്ലെന്നും മുൻ അന്വേഷണങ്ങൾ കണ്ടെത്തിയിരുന്നു.
ബ്രെക്സിറ്റിന് ശേഷം ബ്രസീലിൽ നിന്നുള്ള ഇറക്കുമതി ഗണ്യമായി വർധിച്ച സാഹചര്യത്തിൽ യൂറോപ്യൻ വിപണി അടയുന്നതോടെ കൂടുതൽ മാംസം ബ്രിട്ടനിലേക്ക് ഒഴുകിയെത്തുമെന്ന ആശങ്കയും കർഷകർ ഉയർത്തുന്നു. ബ്രിട്ടീഷ് കർഷകർ ആന്റിബയോട്ടിക് ഉപയോഗം കുറച്ച് ഉയർന്ന ഉൽപ്പാദന നിലവാരം പാലിക്കുന്നുണ്ടെന്നും ഇറക്കുമതി ചെയ്യുന്ന ഭക്ഷ്യവസ്തുക്കൾക്കും അതേ മാനദണ്ഡങ്ങൾ ബാധകമാക്കണമെന്നും ദേശീയ കർഷക യൂണിയൻ ആവശ്യപ്പെട്ടു. വിഷയത്തിൽ ബ്രസീലിനോട് വിശദീകരണം തേടിയിട്ടുണ്ടെന്നും പൊതുജനാരോഗ്യവും ഭക്ഷ്യസുരക്ഷയും സംരക്ഷിക്കാൻ ആവശ്യമായ നടപടി സ്വീകരിക്കുമെന്നും ബ്രിട്ടീഷ് സർക്കാർ അറിയിച്ചു.
Leave a Reply