ന്യൂസ് ഡെസ്ക്, മലയാളം യുകെ
ലണ്ടൻ: ഇംഗ്ലണ്ടിലെ ഹോട്ടലുകൾ, ബി ആൻഡ് ബി, എയർബിഎൻബി തുടങ്ങിയ താമസസൗകര്യങ്ങൾക്ക് ‘ഓവർനൈറ്റ് വിസിറ്റർ ലെവി’ ഏർപ്പെടുത്താനുള്ള സർക്കാർ തീരുമാനത്തിനെതിരെ ഹോസ്പിറ്റാലിറ്റി മേഖല ശക്തമായ പ്രതിഷേധവുമായി രംഗത്ത്. പുതിയ നികുതി നടപ്പാക്കുന്നത് ഇതിനകം ഉയർന്ന ചെലവുകൾ നേരിടുന്ന ഹോട്ടൽ–ടൂറിസം മേഖലയ്ക്ക് കൂടുതൽ സമ്മർദമുണ്ടാക്കുമെന്നും അവധിക്കാലം ചെലവേറിയതാക്കുമെന്നും വ്യവസായ പ്രതിനിധികൾ മുന്നറിയിപ്പ് നൽകി.
നികുതി നിരക്കിന് ദേശീയതലത്തിൽ പരമാവധി പരിധി നിശ്ചയിക്കാത്തതാണ് വ്യവസായത്തിന്റെ പ്രധാന ആശങ്ക. 5 ശതമാനം നിരക്കിൽ നികുതി പൂർണമായി നടപ്പാക്കിയാൽ 2030ഓടെ ഏകദേശം 33,000 തൊഴിലുകൾ നഷ്ടപ്പെടാനും സമ്പദ്വ്യവസ്ഥയിൽ 2.2 ബില്യൺ പൗണ്ടിന്റെ കുറവുണ്ടാകാനും സാധ്യതയുണ്ടെന്ന് യുകെ ഹോസ്പിറ്റാലിറ്റി മുന്നറിയിപ്പ് നൽകി. മേയർമാർക്ക് ഒരൊറ്റ നികുതി ചുമത്താനുള്ള അധികാരം നൽകിയാൽ പ്രാദേശിക ഭരണകൂടങ്ങളുടെ സാമ്പത്തിക പ്രതിസന്ധി കാരണം ഭാവിയിൽ നിരക്ക് ഉയർത്താനുള്ള സാധ്യതയുണ്ടെന്നും സംഘടന ചൂണ്ടിക്കാട്ടി.
ഇതിനകം തന്നെ ബ്രിട്ടനിലെ ഹോസ്പിറ്റാലിറ്റി മേഖലയ്ക്ക് 20 ശതമാനം വിൽപ്പന നികുതി ബാധകമാണെന്നും യൂറോപ്പിലെ പല രാജ്യങ്ങളുമായി താരതമ്യം ചെയ്യുമ്പോൾ ഇത് ഉയർന്നതാണെന്നും വ്യവസായം പറയുന്നു. ഹോട്ടൽ ഉടമകൾക്ക് ദേശീയ ഇൻഷുറൻസ്, കുറഞ്ഞ വേതനം, പണപ്പെരുപ്പം തുടങ്ങിയവ മൂലം ചെലവ് വർധിച്ച സാഹചര്യത്തിൽ പുതിയ നികുതി ഉപഭോക്താക്കളിലേക്ക് അധികഭാരം മാറ്റാൻ നിർബന്ധിതരാക്കുമെന്നും മുന്നറിയിപ്പുണ്ട്. സർക്കാർ തീരുമാനം പിൻവലിക്കണമെന്നല്ല, കുറഞ്ഞത് നികുതിക്ക് വ്യക്തമായ പരിധിയും ഏകീകൃത നിയമങ്ങളും ഏർപ്പെടുത്തണമെന്നാണ് വ്യവസായത്തിന്റെ ആവശ്യം.
Leave a Reply