നഗോയ: ഏഷ്യൻ ഗെയിംസിൽ വനിതകളുടെ ലോങ് ജംപിൽ മലയാളി താരം ആൻസി സോജന് വെള്ളി മെഡൽ. 6.53 മീറ്റർ ദൂരം ചാടിയാണ് ആൻസി രണ്ടാം സ്ഥാനത്തെത്തിയത്. അവസാന ശ്രമം വരെ ഒന്നാം സ്ഥാനത്തായിരുന്ന ആൻസിയെ ആറാം ശ്രമത്തിൽ ചൈനയുടെ യിങ്ഗിങ് ഹുവാങ് 6.55 മീറ്റർ ചാടി മറികടക്കുകയായിരുന്നു.
ആദ്യ ശ്രമത്തിൽ 6.49 മീറ്റർ ചാടിയ ആൻസി മികച്ച തുടക്കമാണ് കുറിച്ചത്. രണ്ടാം ശ്രമം ഫൗളായെങ്കിലും മൂന്നാം ശ്രമത്തിൽ 6.46 മീറ്റർ ചാടി വീണ്ടും മുന്നിലെത്തി. അഞ്ചാം ശ്രമത്തിൽ 6.49 മീറ്റർ ചാടി ചൈനീസ് താരം ആൻസിക്കൊപ്പമെത്തി. എന്നാൽ അഞ്ചാം ശ്രമത്തിൽ 6.53 മീറ്റർ കണ്ടെത്തി ആൻസി വീണ്ടും ഒന്നാം സ്ഥാനത്തെത്തി. സ്വർണം ഉറപ്പിച്ചെന്ന പ്രതീക്ഷ നിലനിൽക്കെയാണ് അവസാന ശ്രമത്തിൽ ചൈനീസ് താരം മുന്നിലെത്തിയത്.
ആൻസി സോജൻ കഴിഞ്ഞ ഏഷ്യൻ ഗെയിംസിലും 6.63 മീറ്റർ ചാടി വെള്ളി നേടിയിരുന്നു. വനിതാ ലോങ് ജംപിൽ ഇന്ത്യയ്ക്കായി 2002ലെ ഏഷ്യൻ ഗെയിംസിൽ സ്വർണം നേടിയ ഏക താരമാണ് അഞ്ജു ബോബി ജോർജ്. 22 വർഷം പഴക്കമുള്ള അഞ്ജുവിന്റെ 6.83 മീറ്റർ ദേശീയ റെക്കോർഡ് ഈ വർഷം ജൂണിൽ ഭുവനേശ്വറിൽ നടന്ന അന്തർസംസ്ഥാന മീറ്റിൽ 6.88 മീറ്റർ ചാടി ആൻസി തിരുത്തിയിരുന്നു. കഴിഞ്ഞ വർഷം ഏഷ്യൻ അത്ലറ്റിക് ചാമ്പ്യൻഷിപ്പിലും ആൻസി വെള്ളി നേടിയിരുന്നു.
Leave a Reply