ന്യൂസ് ഡെസ്ക്, മലയാളം യുകെ
ലണ്ടൻ: ഇംഗ്ലണ്ടിലെ എല്ലാവർക്കും സൗജന്യ സാമൂഹിക പരിചരണ സേവനം ലഭ്യമാക്കുന്ന എൻഎച്ച്എസ് മാതൃകയിലുള്ള സംവിധാനം കൊണ്ടുവരാൻ പ്രധാനമന്ത്രി ആൻഡി ബേൺഹാം. പദ്ധതിയുടെ വിശദമായ രൂപരേഖ തയ്യാറാക്കി അടുത്ത പൊതുതെരഞ്ഞെടുപ്പിൽ ജനങ്ങൾക്കു മുന്നിൽ അവതരിപ്പിക്കുമെന്ന് അദ്ദേഹം പറഞ്ഞു. എല്ലാവരും സംഭാവന ചെയ്യുകയും എല്ലാവർക്കും പരിരക്ഷ ലഭിക്കുകയും ചെയ്യുന്ന സംവിധാനമാണ് ലക്ഷ്യമെന്നും, പദ്ധതി നടപ്പാക്കാൻ നികുതി വർധന ഉൾപ്പെടെയുള്ള മാർഗങ്ങൾ തള്ളിക്കളയുന്നില്ലെന്നും അദ്ദേഹം വ്യക്തമാക്കി. നിലവിൽ ഇംഗ്ലണ്ടിൽ 23,250 പൗണ്ടിൽ കൂടുതൽ സമ്പാദ്യമുള്ളവർക്ക് സാമൂഹിക പരിചരണച്ചെലവിന് പ്രാദേശിക കൗൺസിലിൽനിന്ന് സഹായം ലഭിക്കില്ല.
പദ്ധതിക്ക് ആവശ്യമായ പണം കണ്ടെത്തുന്നതിൽ ഇതുവരെ വ്യക്തമായ രൂപരേഖ പുറത്തുവന്നിട്ടില്ല. എല്ലാവർക്കും ഉപയോഗിക്കാവുന്ന സൗജന്യ സാമൂഹിക പരിചരണ സംവിധാനത്തിന് പ്രതിവർഷം 18 ബില്യൻ പൗണ്ട് വരെ ചെലവാകുമെന്ന കണക്കുകൾ ബേൺഹാം തള്ളി. ആശുപത്രികളിൽ വീട്ടിലേക്ക് മടങ്ങാൻ കഴിയാതെ കഴിയുന്ന നിരവധി രോഗികൾക്ക് ആവശ്യമായ സാമൂഹിക പരിചരണം ലഭ്യമല്ലാത്തത് എൻഎച്ച്എസിനും വലിയ ചെലവുണ്ടാക്കുന്നുവെന്നും അദ്ദേഹം പറഞ്ഞു. നികുതി വർധനവിനെ കൺസർവേറ്റീവ് പാർട്ടി ശക്തമായി എതിർത്തു. കൂടുതൽ പണം ആവശ്യമെങ്കിൽ മറ്റ് മാർഗങ്ങളിലൂടെ കണ്ടെത്തണമെന്നാണ് ഷാഡോ ഹോം സെക്രട്ടറി ക്രിസ് ഫിൽപ്പിന്റെ നിലപാട്.
സാമൂഹിക പരിചരണ പരിഷ്കരണത്തിന് രാഷ്ട്രീയ പാർട്ടികൾക്കിടയിൽ ധാരണ ആവശ്യമാണ് എന്ന നിലപാടിലാണ് ബേൺഹാം. പരിഷ്കരണവുമായി ബന്ധപ്പെട്ട അവലോകനം നേരത്തെയാക്കാനും തീരുമാനിച്ചിട്ടുണ്ട്. പദ്ധതി നടപ്പാക്കുന്നതിന് എല്ലാവരും സംഭാവന ചെയ്യുന്ന രീതിയിലുള്ള സംവിധാനം പരിഗണിക്കുമെന്നും, എന്നാൽ നിലവിലെ എൻഎച്ച്എസ് ഫണ്ടിങ് മാതൃക അതേപടി ആവണമെന്നില്ലെന്നും അദ്ദേഹം വ്യക്തമാക്കി. സാമൂഹിക പരിചരണ പരിഷ്കരണത്തിന് പണം കണ്ടെത്താൻ പെൻഷൻ ‘ട്രിപ്പിൾ ലോക്ക്’ ഒഴിവാക്കുന്നതും പരിഗണിക്കാമെന്ന് ലേബർ എംപി ഡാരൻ ജോൺസ് പറഞ്ഞു. അതേസമയം, ബേൺഹാമിന്റെ നിർദേശത്തിൽ കൂടുതൽ നികുതി ഏർപ്പെടുത്താനുള്ള സാധ്യതയുണ്ടെന്ന് കൺസർവേറ്റീവുകൾ ആരോപിച്ചു.
Leave a Reply