പാലക്കാട് കൊഴിഞ്ഞാമ്പാറയിൽ കുളിമുറിയിലെ വെള്ളത്തൊട്ടിയിൽ അഞ്ചും മൂന്നും വയസ്സുള്ള സഹോദരങ്ങളെ മരിച്ചനിലയിൽ കണ്ടെത്തിയ സംഭവത്തിൽ കുട്ടികളുടെ മാതാവ് നിവേദ്യയെ പൊലീസ് കസ്റ്റഡിയിലെടുത്തു. കുട്ടികളെ കൊലപ്പെടുത്തിയെന്ന സംശയത്തെ തുടർന്നാണ് മാതാവിനെ ചോദ്യം ചെയ്യുന്നത്. നാട്ടുകാരുടെ പരാതിയെത്തുടർന്നാണ് പൊലീസ് നടപടി.
വടകരപ്പതി പഴണിയാർപാളയം മണൽക്കാട് ജോൺകുമാറിന്റെയും നിവേദ്യയുടെയും മക്കളായ ജെനിഫർ ജൂലിയറ്റ് (5), റോബിൻ ക്രിസ്റ്റഫർ (3) എന്നിവരാണ് മരിച്ചത്. ചൊവ്വാഴ്ച രാവിലെ മേനോൻപാറ കൂരാങ്കാട്ടിലെ വാടകവീട്ടിലാണ് ഇരുവരെയും വെള്ളത്തൊട്ടിയിൽ മരിച്ചനിലയിൽ കണ്ടെത്തിയത്. സംഭവസമയത്ത് ജോൺകുമാർ ജോലിക്ക് പോയിരിക്കുകയായിരുന്നു; നിവേദ്യയും കുട്ടികളും മാത്രമാണ് വീട്ടിലുണ്ടായിരുന്നത്.
കുട്ടികളുടെ മരണത്തിൽ ദുരൂഹത ഉയർന്നതോടെ പൊലീസ് അന്വേഷണം ഊർജിതമാക്കി. ഏറെനേരം കുട്ടികളുടെ ശബ്ദം കേൾക്കാതായതിനെ തുടർന്ന് അന്വേഷിച്ചപ്പോഴാണ് ഇരുവരെയും വെള്ളത്തൊട്ടിയിൽ കണ്ടെത്തിയതെന്നാണ് നിവേദ്യ പൊലീസിനോട് പറഞ്ഞത്. നാട്ടുകാർ ആശുപത്രിയിലെത്തിച്ചെങ്കിലും കുട്ടികളുടെ ജീവൻ രക്ഷിക്കാനായില്ല. മരണകാരണം വ്യക്തമാക്കുന്നതിനും സംഭവത്തിന്റെ യഥാർഥ സാഹചര്യം കണ്ടെത്തുന്നതിനുമുള്ള അന്വേഷണത്തിലാണ് പൊലീസ്.
Leave a Reply