തിരുവനന്തപുരം∙ ഓസ്‌ട്രേലിയയിൽ ജോലി വാഗ്ദാനം ചെയ്ത് രണ്ട് സ്ത്രീകളിൽനിന്ന് 21 ലക്ഷം രൂപ തട്ടിയെടുത്ത കേസിൽ യുവാവും യുവതിയും അറസ്റ്റിൽ. തൃശൂർ മുരിങ്ങൂർ നാലുകെട്ടിൽ കടവിള വീട്ടിൽ ഷഫീഖ് (49), മലപ്പുറം നിലമ്പൂർ പാടികുളത്തുംപടി വീട്ടിൽ സഫ്ന (32) എന്നിവരെയാണ് വിഴിഞ്ഞം പൊലീസിന്റെ പ്രത്യേക അന്വേഷണ സംഘം അറസ്റ്റ് ചെയ്തത്. ഓസ്‌ട്രേലിയയിലെ പ്രമുഖ കമ്പനിയിൽ ജോലി നൽകാമെന്ന് വിശ്വസിപ്പിച്ചാണ് ഇരുവരിൽനിന്നും പണം വാങ്ങിയതെന്ന് പൊലീസ് പറഞ്ഞു.
വിഴിഞ്ഞം സ്വദേശികളായ അജിത, മേരി ഗ്ലാൻസ് എന്നിവർ നൽകിയ പരാതിയിലാണ് നടപടി. കഴിഞ്ഞ ഏപ്രിലിലാണ് ഇരുവരും പ്രതികൾക്ക് പണം നൽകിയത്. ഓസ്‌ട്രേലിയയിലേക്ക് കൊണ്ടുപോകുന്നതിനെക്കുറിച്ച് പിന്നീട് ഫോണിൽ ബന്ധപ്പെട്ടെങ്കിലും പ്രതികളിൽനിന്ന് വ്യക്തമായ മറുപടി ലഭിച്ചില്ല. ഇതോടെയാണ് ഇരുവരും വിഴിഞ്ഞം പൊലീസിൽ പരാതി നൽകിയത്. പരാതിയുടെ അടിസ്ഥാനത്തിൽ നടത്തിയ അന്വേഷണത്തിലാണ് തട്ടിപ്പ് പുറത്തായത്.
സി.ഐ. കെ. ഹേമന്ത് കുമാറിന്റെ നേതൃത്വത്തിൽ എസ്.ഐ. എം. പ്രശാന്ത്, എസ്.സി.പി.ഒ. വി.യു. വിനയകുമാർ, സി.പി.ഒ. ആർ. റെജിൻ, വനിതാ സി.പി.ഒ. ലിനി എന്നിവരടങ്ങിയ സംഘമാണ് മലപ്പുറത്തും തൃശൂരിലും തിരച്ചിൽ നടത്തി പ്രതികളെ പിടികൂടിയത്. കോടതിയിൽ ഹാജരാക്കിയ ഇരുവരെയും റിമാൻഡ് ചെയ്തു. സംഭവത്തിൽ കൂടുതൽ പേർക്ക് പങ്കുണ്ടോയെന്നും സമാനരീതിയിൽ മറ്റാരെയെങ്കിലും കബളിപ്പിച്ചിട്ടുണ്ടോയെന്നും പൊലീസ് അന്വേഷിക്കുന്നുണ്ട്.
Leave a Reply