ലണ്ടൻ: റെക്കോർഡ് ചൂട് അനുഭവപ്പെട്ട വേനൽക്കാലത്തിനു പിന്നാലെ ഇംഗ്ലണ്ടിലെ ആറ് മേഖലകളിൽ കടുത്ത വരൾച്ച പ്രഖ്യാപിച്ചു. ഡെവൺ, കോൺവാൾ, ഡോർസെറ്റ്, സോമർസെറ്റ്, ഈസ്റ്റ് സസെക്സ്, വെസ്റ്റ് സസെക്സ് എന്നിവിടങ്ങളിലാണ് വരൾച്ച രൂക്ഷമായത്. തെക്കുകിഴക്കൻ, തെക്കുപടിഞ്ഞാറൻ ഇംഗ്ലണ്ടിലെ ജലസംഭരണികളിൽ വെള്ളത്തിന്റെ അളവ് നിർണായകമായി കുറഞ്ഞതോടെ പൊതുജലവിതരണം പ്രതിസന്ധിയിലായി. പ്രതിസന്ധി നേരിടാൻ അടിയന്തര നടപടികൾ സ്വീകരിച്ചുവരികയാണ്. ഏപ്രിൽ മുതൽ സെപ്റ്റംബർ വരെയുള്ള കാലയളവിൽ ഒരു നൂറ്റാണ്ടിലേറെയായി രേഖപ്പെടുത്തിയ ഏറ്റവും വരണ്ട കാലാവസ്ഥയാണ് ഇത്തവണ അനുഭവപ്പെട്ടത്. കാലാവസ്ഥാ വ്യതിയാനമാണ് വരൾച്ച രൂക്ഷമാകാൻ പ്രധാന കാരണങ്ങളിലൊന്ന്.
ഹേവാർഡ്സ് ഹീത്ത്, ഉക്ഫീൽഡ് എന്നിവിടങ്ങളിലായി ഏകദേശം 95,000 കെട്ടിടങ്ങളിലേക്ക് വെള്ളമെത്തിക്കുന്ന ആർഡിംഗ്ലി ജലസംഭരണിയിൽ ശേഷിയുടെ 19 ശതമാനം വെള്ളം മാത്രമാണുള്ളത്. ഈസ്റ്റ് ഡെവൺ, നോർത്ത് ഡെവൺ, സോമർസെറ്റ്, വെസ്റ്റ് ഡോർസെറ്റ് മേഖലകളിലേക്ക് വെള്ളമെത്തിക്കുന്ന വിംബിൾബോൾ സംഭരണിയിലെ ജലനിരപ്പ് 16 ശതമാനമായി കുറഞ്ഞു. വർഷത്തിലെ ഈ സമയത്ത് ജലസംഭരണികളിൽ ശരാശരി 75 ശതമാനം വെള്ളമുണ്ടാകണമെന്നാണ് പരിസ്ഥിതി ഏജൻസിയുടെ കണക്കുകൂട്ടൽ. കോൺവാളിലെ ഡ്രിഫ്റ്റ്, സ്റ്റിത്തിയൻസ് സംഭരണികൾ ഉൾപ്പെടെ തെക്കുപടിഞ്ഞാറൻ ഇംഗ്ലണ്ടിലെ ചെറുകിട സംഭരണികളിലും ജലക്ഷാമം ആശങ്കയുയർത്തുന്നുണ്ട്. ഇവയെ ആശ്രയിക്കുന്ന പതിനായിരക്കണക്കിന് കുടുംബങ്ങളുടെ ജലവിതരണവും ഭീഷണിയിലാണ്.
ജലക്ഷാമം രൂക്ഷമായ സാഹചര്യത്തിൽ ഗോൾഫ് ക്ലബുകൾ, സ്വകാര്യ സ്കൂളുകൾ, വാണിജ്യ കാർവാഷുകൾ തുടങ്ങിയ സ്ഥാപനങ്ങളുടെ അനിവാര്യമല്ലാത്ത ജലോപയോഗത്തിന് നിയന്ത്രണം ഏർപ്പെടുത്തണമെന്ന് സൗത്ത് ഈസ്റ്റ് വാട്ടർ, സൗത്ത് വെസ്റ്റ് വാട്ടർ, സതേൺ വാട്ടർ കമ്പനികൾ ആവശ്യപ്പെട്ടു. എന്നാൽ പരിസ്ഥിതി സെക്രട്ടറി ആഞ്ചല ഈഗിൾ ഇതിന് ഇതുവരെ അനുമതി നൽകിയിട്ടില്ല. ജലസംഭരണികളിലെയും നദികളിലെയും ജലനിരപ്പ് ദിവസേന നിരീക്ഷിക്കാനും ജലത്തിന്റെ ഗുണനിലവാരം പരിശോധിക്കുന്നത് ശക്തമാക്കാനും സർക്കാർ തീരുമാനിച്ചിട്ടുണ്ട്. മലിനജലം കൂടുതൽ സാന്ദ്രമാകുന്നതുമൂലം പരിസ്ഥിതി മലിനീകരണസാധ്യത ഉയരുമെന്ന ആശങ്കയും നിലനിൽക്കുന്നു. ജലോപയോഗം കുറയ്ക്കാൻ പൊതുജനങ്ങളോടും സ്ഥാപനങ്ങളോടും അധികൃതർ അഭ്യർഥിച്ചു.
Leave a Reply