ന്യൂസ് ഡെസ്ക്, മലയാളം യുകെ
ബ്രിട്ടനിൽ സൂപ്പർമാർക്കറ്റിൽനിന്ന് 40 പെൻസ് വിലയുള്ള മൂന്ന് ഷോപ്പിങ് ബാഗുകൾ പണം നൽകാതെ എടുത്ത സംഭവത്തിൽ സന്നദ്ധ പൊലീസ് ഉദ്യോഗസ്ഥന് ജോലി നഷ്ടമായി. വെസ്റ്റ് മെർഷ്യ പൊലീസ് സേനയിൽ സ്പെഷ്യൽ കോൺസ്റ്റബിളായിരുന്ന ലൂക്ക് ഹോഡ്ജ്‌സണാണ് നടപടിക്ക് വിധേയനായത്. സെയിൻസ്ബറീസ് സൂപ്പർമാർക്കറ്റിൽ ജീവനക്കാരൻ കൂടിയായിരുന്ന ഇയാൾ 2025 ഡിസംബറിൽ മൂന്ന് തവണ ബാഗുകൾക്ക് പണം നൽകാതെ എടുത്തതായി കണ്ടെത്തി. മൂന്ന് ബാഗുകളുടെയും ആകെ വില 1 പൗണ്ട് 20 പെൻസ് (£1.20) ആയിരുന്നു.
സംഭവത്തെ തുടർന്ന് സെയിൻസ്ബറീസ് ഹോഡ്ജ്‌സണെ ഗുരുതരമായ അച്ചടക്കലംഘനത്തിന്റെ പേരിൽ ജോലിയിൽനിന്ന് പിരിച്ചുവിട്ടു. പിന്നാലെ പൊലീസ് സേനയിലും അച്ചടക്കനടപടി സ്വീകരിച്ചു. ജൂലൈ 17ന് നടന്ന വിചാരണയിൽ, ബാഗുകൾക്ക് പണം നൽകേണ്ടതുണ്ടെന്ന് അറിഞ്ഞിട്ടും മനഃപൂർവം പണം നൽകാതിരുന്നതായി വിലയിരുത്തി. പണം നൽകാൻ മറന്നതാണെന്ന ഹോഡ്ജ്‌സണിന്റെ വിശദീകരണം അധികൃതർ അംഗീകരിച്ചില്ല. പിന്നീട് ബാഗുകളുടെ വില തിരിച്ചടച്ചതായും അന്വേഷണവുമായി സഹകരിച്ചതായും റിപ്പോർട്ടുകളുണ്ട്.
പൊലീസ് സേനയിലെ സത്യസന്ധതയും പൊതുജനവിശ്വാസവും സംരക്ഷിക്കാൻ പിരിച്ചുവിടൽ അനിവാര്യമാണെന്ന് വെസ്റ്റ് മെർഷ്യ പൊലീസ് ചീഫ് കോൺസ്റ്റബിൾ റിച്ചാർഡ് കൂപ്പർ വ്യക്തമാക്കി. മോഷണവും സത്യസന്ധതയില്ലായ്മയും പൊലീസ് ഉദ്യോഗസ്ഥന്റെ ഔദ്യോഗിക ചുമതല നിർവഹിക്കാനുള്ള വിശ്വാസ്യതയെ തകർക്കുന്നതാണെന്ന് അദ്ദേഹം ചൂണ്ടിക്കാട്ടി. ഇതിന്റെ ഭാഗമായി ഹോഡ്ജ്‌സണെ ജോലിയിൽനിന്ന് നോട്ടീസ് കൂടാതെ പിരിച്ചുവിടാനും ഭാവിയിൽ പൊലീസ് ഉദ്യോഗസ്ഥനാകുന്നതിൽനിന്ന് വിലക്കുള്ള പട്ടികയിൽ ഉൾപ്പെടുത്താനും തീരുമാനിച്ചു.
Leave a Reply