ന്യൂസ് ഡെസ്ക്, മലയാളം യുകെ
ബ്രെക്സിറ്റിന് പിന്നാലെ ബ്രിട്ടനും യൂറോപ്യൻ യൂണിയനും തമ്മിലുള്ള ഭക്ഷ്യ-കാർഷിക ഉൽപ്പന്ന വ്യാപാരത്തിൽ ഏർപ്പെടുത്തിയിരുന്ന പരിശോധനകളും നിയന്ത്രണങ്ങളും ഒഴിവാക്കുന്നതിനുള്ള കരാർ രൂപരേഖയായി. ഈ മാസം അവസാനം നടക്കുന്ന ബ്രിട്ടൻ-യൂറോപ്യൻ യൂണിയൻ ഉച്ചകോടിക്ക് മുന്നോടിയായാണ് 200 പേജുള്ള കരാർരേഖ തയ്യാറാക്കിയിരിക്കുന്നത്. കരാർ നടപ്പാകുന്നതോടെ ഭക്ഷ്യ ഉൽപ്പന്നങ്ങൾ കയറ്റുമതി ചെയ്യുന്നതിനും ഇറക്കുമതി ചെയ്യുന്നതിനും ആവശ്യമായ ആരോഗ്യ സർട്ടിഫിക്കറ്റുകൾ, പരിശോധനാ ഫീസുകൾ, തുറമുഖ ചാർജുകൾ തുടങ്ങിയവയിൽ വലിയ ഇളവുകൾ ലഭിക്കും. ഇതുവഴി ബ്രിട്ടീഷ് സമ്പദ്‌വ്യവസ്ഥയ്ക്ക് പ്രതിവർഷം 5.1 ബില്യൺ പൗണ്ടിന്റെ നേട്ടമുണ്ടാകുമെന്നാണ് സർക്കാർ പ്രതീക്ഷിക്കുന്നത്. യൂറോപ്യൻ യൂണിയനിലേക്കുള്ള പുതിയ സോസേജുകൾ, ബർഗറുകൾ, കടൽവിഭവങ്ങൾ, വിത്തുരുളക്കിഴങ്ങ് എന്നിവയുടെ കയറ്റുമതി പുനരാരംഭിക്കാനും ധാരണ സഹായിക്കും.
കരാറിന്റെ ഭാഗമായി ഭക്ഷ്യസുരക്ഷ, മൃഗസംരക്ഷണം, സസ്യസംരക്ഷണം എന്നിവയുമായി ബന്ധപ്പെട്ട യൂറോപ്യൻ യൂണിയന്റെ നിയമങ്ങൾ ബ്രിട്ടൻ പിന്തുടരേണ്ടിവരും. പുതിയതായി നിലവിൽ വരുന്ന യൂറോപ്യൻ നിയമങ്ങൾക്കനുസരിച്ച് ബ്രിട്ടനും സ്വന്തം ചട്ടങ്ങളിൽ മാറ്റം വരുത്തുന്ന രീതിയാണിത്. കൂടാതെ ബ്രിട്ടനിൽ നിന്നുള്ള വളർത്തുമൃഗങ്ങൾക്ക് യൂറോപ്യൻ രാജ്യങ്ങളിലേക്ക് യാത്ര ചെയ്യാൻ പെറ്റ് പാസ്‌പോർട്ട് സൗകര്യവും ലഭിക്കും. വടക്കൻ അയർലൻഡിനും കരാർ വലിയ ആശ്വാസമാകും. ബ്രിട്ടന്റെ മറ്റു ഭാഗങ്ങളിൽനിന്ന് വടക്കൻ അയർലൻഡിലേക്ക് എത്തുന്ന ഭക്ഷ്യ ഉൽപ്പന്നങ്ങൾക്ക് നിലവിലുള്ള രേഖാപരിശോധനകളും ചില ഭൗതിക പരിശോധനകളും ഇതോടെ ഒഴിവാക്കാനാകും. അതേസമയം, യൂറോപ്യൻ നിയമങ്ങൾ വീണ്ടും സ്വീകരിക്കുന്നത് ബ്രെക്സിറ്റിലൂടെ നേടിയ സ്വാതന്ത്ര്യത്തിന് തിരിച്ചടിയാണെന്ന് ചില ബ്രെക്സിറ്റ് അനുകൂലികൾ വിമർശിക്കുന്നുണ്ട്. എന്നാൽ ചെലവ് കുറയുന്നതും അതിർത്തിയിലെ കാലതാമസം ഒഴിവാകുന്നതും വ്യാപാര മേഖലയ്ക്ക് വലിയ നേട്ടമാണെന്നാണ് ബ്രിട്ടീഷ് ചേംബർ ഓഫ് കൊമേഴ്‌സിന്റെ വിലയിരുത്തൽ.
ഭക്ഷ്യവ്യാപാര കരാറിനൊപ്പം കാർബൺ വിപണി ബന്ധിപ്പിക്കൽ, യുവാക്കൾക്ക് ഇരുരാജ്യങ്ങൾക്കുമിടയിൽ യാത്ര ചെയ്യാനും ജോലി ചെയ്യാനും അവസരം നൽകുന്ന പദ്ധതി തുടങ്ങിയവയിലും ധാരണയുണ്ടാക്കാൻ നീക്കമുണ്ട്. പുതിയ ക്രമീകരണങ്ങൾ ബ്രിട്ടീഷ് കയറ്റുമതിക്കാർക്ക് യൂറോപ്യൻ യൂണിയന്റെ കാർബൺ അതിർത്തി നികുതി ഒഴിവാക്കാനും സഹായിക്കും. യൂറോപ്യൻ യൂണിയനുമായുള്ള നിലവിലെ വ്യാപാരബന്ധം പ്രതീക്ഷിച്ച നേട്ടം നൽകുന്നില്ലെന്നും ബ്രെക്സിറ്റിന് ശേഷമുള്ള നിയന്ത്രണങ്ങൾ വ്യാപാര സ്ഥാപനങ്ങളെ ബുദ്ധിമുട്ടിക്കുന്നുണ്ടെന്നും ബ്രിട്ടീഷ് ചേംബർ ഓഫ് കൊമേഴ്‌സ് ചൂണ്ടിക്കാട്ടി. കസ്റ്റംസ് യൂണിയൻ, സ്വിസ് മാതൃകയിലുള്ള ഏകവിപണി ബന്ധം തുടങ്ങി കൂടുതൽ അടുത്ത ബന്ധത്തിനുള്ള ഒൻപത് സാധ്യതകളും സംഘടന മുന്നോട്ടുവച്ചിട്ടുണ്ട്. ഈ മാസം നടക്കുന്ന ഉച്ചകോടിയിൽ യൂറോപ്യൻ യൂണിയനുമായുള്ള ബന്ധം കൂടുതൽ ശക്തമാക്കുന്നതിനും ദീർഘകാലത്ത് കൂടുതൽ അടുത്ത സഹകരണത്തിനുമുള്ള ചർച്ചകൾക്ക് തുടക്കമിടാനാണ് ബ്രിട്ടീഷ് പ്രധാനമന്ത്രി ആൻഡി ബേൺഹാമിന്റെ നീക്കം.
Leave a Reply