ന്യൂസ് ഡെസ്ക്, മലയാളം യുകെ
യുകെയിലെ മലയാളി കെയർ വർക്കർമാർക്ക് വലിയ ആശ്വാസം നൽകുന്ന പ്രഖ്യാപനവുമായി ബ്രിട്ടീഷ് സർക്കാർ. കുറഞ്ഞ വരുമാനക്കാരായ കുടിയേറ്റക്കാർക്ക് സ്ഥിരതാമസാനുമതിയായ ഇൻഡെഫിനിറ്റ് ലീവ് ടു റിമെയിൻ (ILR) ലഭിക്കുന്നതിനുള്ള കാലാവധി 15 വർഷമായി ഉയർത്താനുള്ള മുൻ നിർദേശത്തിൽ നിന്ന് സർക്കാർ പിന്മാറി. 2025 മെയ് മാസത്തിന് മുമ്പ് കെയർ വർക്കർ വിസയിൽ യുകെയിലെത്തുകയോ ഈ വിസയിലേക്ക് മാറുകയോ ചെയ്തവർക്ക് നിശ്ചിത നിബന്ധനകൾ പാലിച്ചാൽ അഞ്ച് വർഷത്തെ കാലാവധിയിൽ തന്നെ ILR നേടാനുള്ള അവസരം നിലനിർത്താനാണ് തീരുമാനം. പ്രതിവർഷം കുറഞ്ഞത് 25,000 പൗണ്ട് വരുമാനം, വിസയിലെ വ്യവസ്ഥകൾ പാലിച്ചുള്ള കെയർ മേഖലയിൽ ജോലി, അംഗീകൃത സ്പോൺസർഷിപ്പ് എന്നിവയാണ് പ്രധാന നിബന്ധനകൾ. ഹോം സെക്രട്ടറി ഷബാന മഹ്മൂദ് നവംബർ രണ്ടിനാണ് പുതിയ ഇളവ് പ്രഖ്യാപിച്ചത്.
കോവിഡ് മഹാമാരിക്ക് ശേഷം ബ്രിട്ടനിലെ ആരോഗ്യ – സാമൂഹിക പരിചരണ മേഖലയിൽ വലിയ സേവനം ചെയ്ത വിദേശ കെയർ വർക്കർമാരുടെ സംഭാവന പരിഗണിച്ചാണ് ഈ ഇളവ്. നേരത്തെ പ്രഖ്യാപിച്ച പരിഷ്കാരപ്രകാരം കുറഞ്ഞ വരുമാനക്കാരായ ചില കുടിയേറ്റക്കാർക്ക് ILR ലഭിക്കാൻ 15 വർഷം വരെ കാത്തിരിക്കേണ്ടിവരുമെന്ന ആശങ്കയുണ്ടായിരുന്നു. എന്നാൽ പുതിയ തീരുമാനത്തോടെ അർഹരായ മലയാളി കെയർ വർക്കർമാർക്ക് അഞ്ച് വർഷത്തിനുശേഷം തന്നെ സ്ഥിരതാമസത്തിന് അപേക്ഷിക്കാം. ക്രിമിനൽ റെക്കോർഡ് ഇല്ലായ്മ, ഉയർന്ന നിലവാരത്തിലുള്ള ഇംഗ്ലീഷ് പരിജ്ഞാനം, സർക്കാരിന് കുടിശ്ശികയില്ലായ്മ, നാഷണൽ ഇൻഷുറൻസ് സംഭാവനകൾ തുടങ്ങിയ പൊതുവായ നിബന്ധനകളും പാലിക്കേണ്ടിവരും.
അതേസമയം, അഞ്ച് വർഷത്തെ ILR വ്യവസ്ഥകൾ പാലിക്കാൻ കഴിയാത്ത കെയർ വർക്കർമാർക്കും സർക്കാർ മറ്റൊരു അവസരം നൽകുന്നുണ്ട്. ഇവർക്ക് പുതിയ അഞ്ച് വർഷത്തെ കെയർ വിസയ്ക്ക് അപേക്ഷിക്കാം. മുൻ തൊഴിലുടമയുമായി നിർബന്ധിതമായി ബന്ധിപ്പിക്കാതെ, അംഗീകൃത പുതിയ തൊഴിലുടമയെ കണ്ടെത്തി ജോലി തുടരാനും സർക്കാർ സഹായം നൽകും. ഈ അഞ്ച് വർഷത്തെ വിസ കാലാവധി പൂർത്തിയാക്കിയശേഷം ILR അപേക്ഷിക്കാനും അവസരമുണ്ടാകും. ഇതോടെ യുകെയിൽ ജോലി ചെയ്യുന്ന ആയിരക്കണക്കിന് മലയാളി കെയർ വർക്കർമാർക്കും കുടുംബങ്ങൾക്കും സ്ഥിരതാമസവുമായി ബന്ധപ്പെട്ട അനിശ്ചിതത്വം കുറയുമെന്നാണ് പ്രതീക്ഷ. എന്നാൽ ഈ ആനുകൂല്യം എല്ലാ കെയർ വർക്കർമാർക്കും സ്വമേധയാ ലഭിക്കുന്നതല്ലെന്നും വ്യക്തിഗത യോഗ്യതയും വിസാ വ്യവസ്ഥകളും പരിശോധിക്കണമെന്നും സർക്കാർ വ്യക്തമാക്കുന്നു.
Leave a Reply