ഒമാൻ തീരത്ത് ഇന്ത്യൻ ചരക്കുകപ്പലിനുനേരെയുണ്ടായ വ്യോമാക്രമണത്തിൽ ഗുജറാത്ത് സ്വദേശിയായ ഒരു നാവികൻ കൊല്ലപ്പെട്ടു. തിങ്കളാഴ്ച വൈകിട്ട് ഒമാനിലെ ലിമയ്ക്ക് സമീപം 14 ഇന്ത്യൻ ജീവനക്കാരുമായി സഞ്ചരിക്കുകയായിരുന്ന ‘എം.എസ്.വി. അൽ യൂസഫി’ എന്ന കപ്പലിനുനേരെയാണ് തിരിച്ചറിയാത്ത ഉറവിടത്തിൽനിന്ന് ആക്രമണമുണ്ടായത്. ഗുരുതരമായി പരിക്കേറ്റ ഗാന്ധാർ നഹീം അസീസ് എന്ന നാവികൻ പിന്നീട് മരിച്ചു. കപ്പലിലുണ്ടായിരുന്ന മറ്റ് 13 ജീവനക്കാരെയും ഒമാൻ കോസ്റ്റ് ഗാർഡ് സുരക്ഷിതമായി രക്ഷപ്പെടുത്തി.
കേന്ദ്ര തുറമുഖ, കപ്പൽ ഗതാഗത മന്ത്രി സർബാനന്ദ സോണോവാൾ സമൂഹമാധ്യമമായ എക്സിലൂടെയാണ് സംഭവം സ്ഥിരീകരിച്ചത്. രക്ഷപ്പെട്ട ജീവനക്കാർക്ക് ആവശ്യമായ സഹായങ്ങൾ ലഭ്യമാക്കാനും കൊല്ലപ്പെട്ട നാവികന്റെ മൃതദേഹം ഉൾപ്പെടെ എല്ലാവരെയും നാട്ടിലെത്തിക്കാനും ഒമാനിലെ ഇന്ത്യൻ എംബസി അധികൃതരുമായി ബന്ധപ്പെടുന്നുണ്ട്. ആക്രമണത്തെ ശക്തമായി അപലപിച്ച വിദേശകാര്യ മന്ത്രാലയം, പശ്ചിമേഷ്യയിൽ സംഘർഷം ഉടൻ അവസാനിപ്പിച്ച് നയതന്ത്ര ചർച്ചകളിലൂടെ സമാധാനപരമായ പരിഹാരം കണ്ടെത്തണമെന്ന് ആവശ്യപ്പെട്ടു. വാണിജ്യക്കപ്പലുകൾക്കും സാധാരണക്കാരുടെ അടിസ്ഥാനസൗകര്യങ്ങൾക്കും നേരെയുള്ള ആക്രമണങ്ങൾ അവസാനിപ്പിക്കണമെന്നും അന്താരാഷ്ട്ര സമുദ്രപാതകളിലൂടെയുള്ള ഗതാഗത സ്വാതന്ത്ര്യം ഉറപ്പാക്കണമെന്നും ഇന്ത്യ വ്യക്തമാക്കി.
അമേരിക്കയും ഇസ്രായേലും ഇറാനും തമ്മിൽ ഫെബ്രുവരി 28-ന് യുദ്ധം ആരംഭിച്ചതിനുശേഷം പശ്ചിമേഷ്യൻ മേഖലയിലെ കപ്പലുകൾക്കും എണ്ണ ടാങ്കറുകൾക്കും നേരെയുണ്ടായ ആക്രമണങ്ങളിൽ കുറഞ്ഞത് 22 ഇന്ത്യക്കാർ കൊല്ലപ്പെട്ടിരുന്നു. ഒമാൻ തീരത്തെ പുതിയ ആക്രമണത്തോടെ മേഖലയിൽ കൊല്ലപ്പെട്ട ഇന്ത്യൻ പൗരന്മാരുടെ എണ്ണം 23 ആയി ഉയർന്നു. സമുദ്രവ്യാപാരത്തിന്റെ സുരക്ഷയും ഇന്ത്യൻ നാവികരുടെ ജീവനും സംബന്ധിച്ച ആശങ്കകൾ വർധിക്കുന്ന സാഹചര്യത്തിൽ, മേഖലയിലെ സംഘർഷം അവസാനിപ്പിക്കണമെന്ന നിലപാട് ഇന്ത്യ വീണ്ടും ശക്തമായി ആവർത്തിച്ചു.
Leave a Reply