ന്യൂസ് ഡെസ്ക്, മലയാളം യുകെ
ബ്രിട്ടനിൽ ശൈത്യകാലത്ത് ആശുപത്രികളിലെ തിരക്ക് കുറയ്ക്കുന്നതിനും അടിയന്തര ചികിത്സ ആവശ്യമായി വരുന്ന രോഗികളുടെ എണ്ണം നിയന്ത്രിക്കുന്നതിനുമായി മൂന്ന് ലക്ഷം രോഗികൾക്ക് അധിക ആരോഗ്യപരിചരണം നൽകാൻ എൻഎച്ച്എസ് (NHS) പദ്ധതി. ഇംഗ്ലണ്ടിലെ പ്രായാധിക്യം, ശാരീരിക അവശത, ദീർഘകാല രോഗങ്ങൾ എന്നിവയുള്ളവർക്കാണ് പദ്ധതിയുടെ പ്രയോജനം ലഭിക്കുക. ഇതിനായി 40 ദശലക്ഷം പൗണ്ട് (ഏകദേശം 400 കോടി രൂപ) ചെലവഴിക്കും. ജിപി (GP) ക്ലിനിക്കുകൾ വഴി ആരോഗ്യപരിശോധന, മരുന്നുകളുടെ ഉപയോഗം വിലയിരുത്തൽ, ശ്വാസകോശ പരിശോധന എന്നിവ നടത്തും. രോഗാവസ്ഥ ഗുരുതരമാകുന്നതിന് മുമ്പ് ആവശ്യമായ ചികിത്സ ലഭ്യമാക്കി ആശുപത്രിയിൽ പ്രവേശിപ്പിക്കേണ്ട സാഹചര്യം ഒഴിവാക്കുകയാണ് ലക്ഷ്യം.
ഹൃദ്രോഗം, ശ്വാസകോശ സംബന്ധമായ അസുഖങ്ങൾ, എംഫിസീമ, ക്രോണിക് ഒബ്സ്ട്രക്റ്റീവ് പൾമണറി ഡിസീസ് (COPD) തുടങ്ങിയ രോഗങ്ങളുള്ളവർക്കും ശാരീരിക അവശത നേരിടുന്നവർക്കുമാണ് പ്രത്യേക പരിഗണന. 2026-27 സാമ്പത്തിക വർഷത്തിലെ നിലവിലുള്ള ജിപി ബജറ്റിൽ നിന്ന് പുനർവിനിയോഗിക്കുന്ന തുകയാണ് പദ്ധതിക്കായി ഉപയോഗിക്കുന്നത്. അർഹരായ ഓരോ രോഗിക്കും അധിക പരിചരണം നൽകുന്നതിനായി ജിപി പ്രാക്ടീസുകളുടെ കൂട്ടായ്മകൾക്ക് 126 പൗണ്ട് വീതം ലഭിക്കും. ചെറിയ ആരോഗ്യപ്രശ്നങ്ങൾ ഗുരുതരമാകുന്നതിന് മുമ്പ് കണ്ടെത്തി വീട്ടിൽത്തന്നെ ചികിത്സ ഉറപ്പാക്കാനാണ് ശ്രമമെന്ന് പ്രധാനമന്ത്രി ആൻഡി ബേൺഹാം പറഞ്ഞു. ഫ്ലൂ വാക്സിനേഷൻ, അടിയന്തര ചികിത്സാ സൗകര്യങ്ങൾ വർധിപ്പിക്കൽ, സാമൂഹിക പരിചരണ സംവിധാനങ്ങളുമായുള്ള സഹകരണം എന്നിവയും ശൈത്യകാല മുന്നൊരുക്കങ്ങളുടെ ഭാഗമാണ്.
പദ്ധതിയെ റോയൽ കോളേജ് ഓഫ് ജിപിമാർ സ്വാഗതം ചെയ്തു. രോഗികളുടെ ആരോഗ്യസ്ഥിതിയും ചികിത്സാചരിത്രവും അടുത്തറിയുന്ന കുടുംബ ഡോക്ടർമാർക്ക് അപകടസാധ്യതയുള്ളവരെ നേരത്തെ കണ്ടെത്താൻ കഴിയുമെന്ന് സംഘടനാ പ്രസിഡന്റ് പ്രൊഫ. വിക്ടോറിയ സോർട്സിയൂ ബ്രൗൺ വ്യക്തമാക്കി. എന്നാൽ താൽക്കാലിക പദ്ധതികൾകൊണ്ട് മാത്രം ദീർഘകാല രോഗങ്ങൾ നേരിടുന്നവരുടെ ചികിത്സാ പ്രശ്നങ്ങൾ പരിഹരിക്കാനാകില്ലെന്നും പ്രാഥമിക ആരോഗ്യപരിചരണ മേഖലയിൽ തുടർച്ചയായ നിക്ഷേപം ആവശ്യമാണെന്നും അവർ ചൂണ്ടിക്കാട്ടി. വേനൽക്കാലത്തെ കടുത്ത ചൂട് എൻഎച്ച്എസിന് വലിയ സമ്മർദം സൃഷ്ടിച്ചതിന് പിന്നാലെ വരാനിരിക്കുന്ന ശൈത്യകാലവും വെല്ലുവിളിയാകുമെന്നാണ് ആരോഗ്യവകുപ്പിന്റെ വിലയിരുത്തൽ. ആശുപത്രികളെ ആശ്രയിക്കാതെ വീടിനടുത്ത് തന്നെ മെച്ചപ്പെട്ട ചികിത്സ ലഭ്യമാക്കുന്നതിനാണ് സർക്കാർ കൂടുതൽ പ്രാധാന്യം നൽകുന്നത്.
Leave a Reply