അമേരിക്കൻ മാധ്യമമായ ന്യൂയോർക്ക് ടൈംസിലൂടെയാണ് ചാവേർ ഭീകരന്റെ ചിത്രവും വിവരങ്ങളും സ്ഫോടനത്തിനുപയോഗിച്ച ബോംബിന്റെ അവശിഷ്ടങ്ങളുടെ ചിത്രവും ആദ്യം പുറത്തുവന്നത്. സ്കോട്ട്ലൻഡ്്യാർഡിന്റെ അന്വേഷണപുരോഗതിയെ ഇത് തടസപ്പടുത്തിയെന്നാണ് ബ്രിട്ടീഷ് മാധ്യമങ്ങൾ പറയുന്നത്.

കേസ് അന്വേഷിക്കുന്ന പൊലീസ് സംഘം കിട്ടുന്ന ഓരോ വിവരവും നാഷണൽ കൌണ്ടർ ടെററിസം ടീമിന് കൈമാറാറുണ്ട്. ഇവർ ഇത് അമേരിക്ക, ഓസ്ട്രേലിയ, കാനഡ, ന്യൂസിലാൻഡ് എന്നീ രാജ്യങ്ങളിലെ രഹസ്യാന്വേഷണ ഏജൻസികൾക്ക് ഉടൻ ലഭ്യമാക്കും. എല്ലാ ഭീകരാക്രമണ കേസുകളിലും ഈ നടപടി പതിവാണ്. ഇതനുസരിച്ച് അമേരിക്കൻ രഹസ്യാന്വേഷണ ഏജൻസിക്കു നൽകിയ വിവരങ്ങളാണ് പിറ്റേന്ന് പത്രത്തിലൂടെ പുറത്തായത്.

ഭീകരപ്രവർത്തനങ്ങളെക്കുറിച്ച് ഇങ്ങനെ പരസ്പരം രഹസ്യവിവരങ്ങൾ കൈമാറുന്ന കരാർ ഫൈവ് ഐസ് ഇന്റലിജൻസ് ഷെയറിംങ് എഗ്രിമെന്റ് എന്നാണ് അറിയപ്പെടുന്നത്. രാജ്യസുരക്ഷയെ കരുതി ഈ അഞ്ചുരാജ്യങ്ങളും തമ്മിൽ ഒപ്പുവച്ചിട്ടുള്ള കരാറിലെ വ്യവസ്ഥകൾക്കു വിരുദ്ധമായി വിവരം ചോർന്നു പോയത് ബ്രിട്ടൺ അതീവ ഗൗരവമായിത്തന്നെയാണ് കാണുന്നത്. അമേരിക്കയ്ക്ക് ഇത് നാണക്കേടുമായി.

ഇതിനിടെ രഹസ്യവിവരങ്ങൾ ചോർത്തി പ്രസിദ്ധീകരിച്ചത് രാജ്യസുരക്ഷക്ക് ഭീഷണി ഉയർത്തുന്ന നടപടിയാണെന്നും ഇതേക്കുറിച്ച് വിശദമായ അന്വേഷണം നടത്തി കുറ്റക്കാരെ ശിക്ഷിക്കുമെന്നും ബ്രസൽസിൽ നാറ്റോ സഖ്യത്തിന്റെ യോഗത്തിനിടെ ഡൊണൾഡ് ട്രംപ് വ്യക്തമാക്കി. നാളുകളായി തുടരുന്ന പ്രവണതയാണിതെന്നും അദ്ദേഹം കുറ്റപ്പെടുത്തി. അമേരിക്കൻ ഡിപ്പാർട്ട്മെന്റ് ഓഫ് ജസ്റ്റീസ് ആയിരിക്കും ഇതുസംബന്ധിച്ച് അന്വേഷണം നടത്തുക. നയതന്ത്രതലത്തിൽ അമേരിക്കയും ബ്രിട്ടണും തമ്മിലുള്ള ബന്ധത്തേക്കാൾ പരിപോഷിപ്പിക്കപ്പെടേണ്ട മറ്റൊന്നില്ലെന്നും സംഭവത്തെക്കുറിച്ച് പ്രതികരിക്കവേ  ട്രംപ് വിശദീകരിച്ചു.

ഇതിനിടെ ഭീകരാക്രമണവുമായി ബന്ധമുണ്ടെന്ന് സംശയിക്കുന്ന രണ്ടുപേരേക്കൂടി ഇന്നലെ അറസ്റ്റു ചെയ്തു. ഇതോടെ ആകെ അറസ്റ്റിലായവരുടെ എണ്ണം എട്ടായി.