ന്യൂസ് ഡെസ്ക് മലയാളം യുകെ ന്യൂസ്

യു കെ :- സ്കൂളിൽനിന്ന് വീട്ടിലേക്ക് നടന്നുവരികയായിരുന്ന പതിനാലു വയസ്സുകാരി വിദ്യാർത്ഥിനി ബസിടിച്ചു അത്യാസന്ന നിലയിൽ ആശുപത്രിയിലായി. കൂടെയുണ്ടായിരുന്ന മറ്റൊരു പെൺകുട്ടിക്കും സാരമായ പരിക്കേറ്റിട്ടുണ്ട്. സ്കൂൾ വിട്ട ശേഷം ക്രോസിംഗിൽ കാത്തു നിൽക്കുമ്പോഴായിരുന്നു ഡബിൾഡക്കർ ബസ് പെൺകുട്ടികളുടെ ഇടയിലേക്ക് പാഞ്ഞു കയറിയത്.

നോർത്ത് ലണ്ടനിലെ സ്റ്റാംഫോർഡ് ഹിൽ ഏരിയയിൽ തിങ്കളാഴ്ച വൈകുന്നേരം അഞ്ചുമണിയോടെ ആയിരുന്നു സംഭവം. ഉടൻതന്നെ എമർജൻസി സർവീസുകൾ സംഭവസ്ഥലത്ത് എത്തി രക്ഷാപ്രവർത്തനം ആരംഭിച്ചു. പോലീസ്, ആംബുലൻസ്, അഗ്നിശമന സേന വിഭാഗം എന്നിവരെല്ലാം തന്നെ സംഭവസ്ഥലത്ത് എത്തി. പെൺകുട്ടിയെ ഇടിച്ച ശേഷം പിന്നീട് ബസ് അടുത്തുള്ള ലാമ്പ് പോസ്റ്റിൽ ഇടിച്ച് നിൽക്കുകയായിരുന്നുവെന്നാണ് നിലവിലെ റിപ്പോർട്ടുകൾ വ്യക്തമാക്കുന്നത്. ഒരു പെൺകുട്ടി ബസ്സിന് അടിയിൽ പെട്ടതാണ് കൂടുതൽ അപകടകാരണം ആയതെന്ന് ദൃക്സാക്ഷികൾ വ്യക്തമാക്കി.

കൂടെയുണ്ടായിരുന്ന മറ്റൊരു പെൺകുട്ടിയും സാരമായ പരിക്കുകളോടെ ആശുപത്രിയിലാണ്. യെല്ലോ ജംഗ്ഷനിൽ കടക്കാതെ ബസ് വെട്ടിച്ചതാണ് അപകടകാരണമെന്നാണ് പ്രാഥമിക നിഗമനം. അപകടത്തിൽപ്പെട്ട പെൺകുട്ടികളുടെ മാതാപിതാക്കളെ വിവരം അറിയിച്ചതായി മെട്രോപൊളിറ്റൻ പോലീസ് വ്യക്തമാക്കി. ഇതുവരെയും ഇത് സംബന്ധിച്ച് അറസ്റ്റുകൾ ഒന്നും തന്നെ രേഖപ്പെടുത്തിയിട്ടില്ല.