ലണ്ടൻ∙ ബ്രിട്ടിഷ് പ്രധാനമന്ത്രി ബോറിസ് ജോൺസനും ഇന്ത്യൻ വംശജയായ മുൻഭാര്യ മറീന വീലറും തമ്മിലുള്ള വിവാഹമോചനത്തിന്റെ ഔദ്യോഗിക നടപടികൾ പൂർത്തിയായി. കഴിഞ്ഞ 250 വർഷത്തിനിടെ, വിവാഹമോചനം നേടുന്ന ആദ്യത്തെ ബ്രിട്ടിഷ് പ്രധാനമന്ത്രിയാണു ജോൺസൻ.

പഞ്ചാബുകാരിയായ ദീപ് സിങ്ങിന്റെയും ബിബിസി വിദേശകാര്യ കറസ്പോണ്ടന്റായിരുന്ന ചാൾസ് വീലറുടെയും മകളാണ് മറീന. ജോൺസനുമായി 27 വർഷം നീണ്ട ദാമ്പത്യത്തിൽ 4 മക്കളുണ്ട്. 2018 ൽ വേർപിരിഞ്ഞു. ജോൺസനും ഇപ്പോഴത്തെ പങ്കാളി ക്യാരി സിമൻസിനും കഴിഞ്ഞ 29ന് ആൺകുഞ്ഞു പിറന്നിരുന്നു.പ്രമുഖ അഭിഭാഷകയാണ് മറീന. അമ്മ ദീപ് സിങ്ങിനെക്കുറിച്ചുള്ള ‘ദ് ലോസ്റ്റ് ഹോംസ്റ്റെഡ്’ എന്ന പുസ്തകം ഉടൻ പുറത്തിറങ്ങും.