കേരളത്തിൽ വരാനിരിക്കുന്ന നിയമസഭാ തിരഞ്ഞെടുപ്പിൽ ഇടതുപക്ഷ ജനാധിപത്യ മുന്നണിയുടെ തുടർഭരണം ഉറപ്പാക്കുന്നതിനും പ്രവാസലോകത്തുനിന്ന് വിപുലമായ പ്രചാരണ പ്രവർത്തനങ്ങൾ ഏകോപിപ്പിക്കുന്നതിനുമായി എൽഡിഎഫ് യുകെ – അയർലണ്ട് കമ്മിറ്റി പുനഃസംഘടിപ്പിച്ചു. ലോകമാതൃകയായ കേരളത്തിലെ വികസനക്ഷേമ പ്രവർത്തനങ്ങൾ ജനങ്ങളിലേക്ക് എത്തിക്കാനും, പ്രവാസി വോട്ടർമാരുടെ സജീവ പങ്കാളിത്തം ഉറപ്പാക്കാനുമാണ് ഈ സംവിധാനം ലക്ഷ്യമിടുന്നത്.

സിപിഐ(എം) സാർവ്വദേശീയ ഘടകമായ അസോസിയേഷൻ ഓഫ് ഇന്ത്യൻ കമ്മ്യൂണിസ്റ്റ്സ് (AIC), പ്രവാസി കേരള കോൺഗ്രസ്, സിപിഐ, കൈരളി യുകെ, ക്രാന്തി അയർലണ്ട്, ഇന്ത്യൻ വർക്കേഴ്സ് അസോസിയേഷൻ (IWA) എന്നീ സംഘടനകൾ ചേർന്നാണ് സമിതിക്ക് രൂപം നൽകിയത്.

യുകെയിലെയും അയർലണ്ടിലെയും വിവിധ മേഖലകളിൽ നിന്നുള്ള പ്രതിനിധികൾ പങ്കെടുത്ത യോഗത്തിൽ രാജേഷ് കൃഷ്ണയെ കൺവീനറായും, ജിജോ അരയത്ത്, ഷിനിത്ത് എ.കെ. എന്നിവരെ ജോയിന്റ് കൺവീനർമാരായും തിരഞ്ഞെടുത്തു.

യോഗത്തിൽ വിവിധ സംഘടനകളെ പ്രതിനിധീകരിച്ച് ജനേഷ് നായർ, ഷൈമോൻ തോട്ടുങ്കൽ, ജിജോ അരയത്ത്, നവീൻ ഹരി, ബിജു ഗോപിനാഥ് തുടങ്ങിയവർ സംസാരിച്ചു. കേരളത്തിന്റെ സർവ്വ മേഖലകളിലും എൽഡിഎഫ് സർക്കാർ കൊണ്ടുവന്ന വിപ്ലവകരമായ മാറ്റങ്ങൾ പ്രവാസികൾക്കിടയിലും അവരുടെ നാട്ടിലെ കുടുംബാംഗങ്ങൾക്കിടയിലും സജീവ ചർച്ചയാക്കണമെന്ന് യോഗം ആഹ്വാനം ചെയ്തു.

തിരഞ്ഞെടുപ്പ് ലക്ഷ്യമാക്കി വിപുലമായ പ്രചാരണ പരിപാടികളാണ് കമ്മിറ്റി ആസൂത്രണം ചെയ്തിരിക്കുന്നത്: ഇടതുപക്ഷ സർക്കാരിന്റെ ജനോപകാരപ്രദമായ വികസന പ്രവർത്തനങ്ങൾ വോട്ടർമാരിലേക്ക് എത്തിക്കാനും, കലാ-സാംസ്കാരിക പ്രവർത്തനങ്ങളിലൂടെ വിപുലമായ പ്രചാരണം സംഘടിപ്പിക്കാനും യോഗം തീരുമാനിച്ചു. പ്രവർത്തനങ്ങൾ ഏകോപിപ്പിക്കുന്നതിനായി വിവിധ സബ് കമ്മിറ്റികളെയും തിരഞ്ഞെടുത്തു. അശ്വതി അശോക്, രാജു കുന്നക്കാട്ട് , എബിൻ രാജു , ബിനോജ് ജോൺ, മാന്വൽ മാത്യു, ടോമിച്ചൻ കൊഴുവനാൽ തുടങ്ങിയവർ വിവിധ കമ്മിറ്റികൾക്ക് നേതൃത്വം നൽകും

വരും ദിവസങ്ങളിൽ കൂടുതൽ പ്രവാസി സംഘടനകളെയും വ്യക്തികളെയും ഉൾപ്പെടുത്തി പ്രചാരണം വിപുലമാക്കാനാണ് കമ്മിറ്റിയുടെ തീരുമാനം.

ഈസ്റ്റ് ആംഗ്ലിയയിലെ പ്രമുഖ മലയാളി സംഘടനയായ ഹേവർഹിൽ മലയാളി അസോസിയേഷൻ (HMA) സംഘടിപ്പിച്ച അഖില യുകെ ബാഡ്മിന്റൺ ടൂർണമെന്റ് ലിന്റൺ വില്ലേജ് ഹാളിൽ വിജയകരമായി പൂർത്തിയായി . യുകെയിലെ വിവിധ ഭാഗങ്ങളിൽ നിന്ന് എത്തിയ 28 തെരഞ്ഞെടുത്ത ടീമുകൾ ഈ ആവേശകരമായ കായികമേളയിൽ പങ്കെടുത്തു.

രാവിലെ 9 മണിക്ക് ആരംഭിച്ച മത്സരങ്ങൾ വൈകുന്നേരം 4 മണിയോടെ സമാപിച്ചു. ദിനം മുഴുവൻ നീണ്ടുനിന്ന മത്സരങ്ങളിൽ മികച്ച കായികമികവും സൗഹൃദപരമായ മത്സരാത്മകതയും നിറഞ്ഞുനിന്നു. പങ്കെടുത്ത എല്ലാ ടീമുകളും മികച്ച പ്രകടനം കാഴ്ചവെച്ചതായി സംഘാടകർ അറിയിച്ചു.

വിജയികൾ
ഒന്നാം സ്ഥാനം – മാത്യൂസ് റോയ് & ബെസ്റ്റിൻ ജോസഫ് (നോട്ടിംഗ്ഹാം)
ഫസ്റ്റ് റണ്ണർ അപ്പ് – ജെർമി കുര്യൻ ജോർജ് (ബർമിംഗ്ഹാം) & കിൻലി ബിക്കു (ഹണ്ടിംഗ്ടൺ)
സെക്കൻഡ് റണ്ണർ അപ്പ് – ഏബി ജോസ് & നിതിൻ ജോസ് (സ്റ്റ്രാറ്റ്ഫോർഡ്, ലണ്ടൻ)
വിജയികളായ ടീമുകൾക്ക് ട്രോഫികളും ക്യാഷ് അവാർഡുകളും സമ്മാനിച്ചു.
യുകെയുടെ വിവിധ ഭാഗങ്ങളിൽ നിന്ന് എത്തിയ എല്ലാ പങ്കാളികൾക്കും HMA ഹൃദയപൂർവ്വം നന്ദി അറിയിച്ചു. സമൂഹ ഐക്യവും ആരോഗ്യകരമായ കായിക മത്സരാത്മകതയും വളർത്തുകയാണ് ടൂർണമെന്റിന്റെ പ്രധാന ലക്ഷ്യമെന്ന് സംഘാടകർ വ്യക്തമാക്കി.

പരിപാടിയുടെ സംഘാടകർ

ശ്രീ. റിജു സാമുവൽ
റോസിൻ ജോർജ്
ശ്രീ. ജെറിൽ ജോൺ
ശ്രീ. സിജോ ജോർജ്
ശ്രീ. സാൻ ജോസഫ്
ശ്രീ. പ്രവീൺ ജോസ്
വിഷ്ണു മോഹൻ

സന്നദ്ധ പ്രവർത്തകർ

പ്രിൻസ് ജേക്കബ്, സൈജു ജോസഫ് എബ്രഹാം ലൂക്കോസ്, അനീവ്, ഉജ്ജ്വൽ, , ക്രിസ്റ്റിൻ, സിൻസൺ, ജോസ് എന്നിവർ ഉൾപ്പെടെയുള്ള സന്നദ്ധ പ്രവർത്തകരുടെ സേവനവും ടൂർണമെന്റിന്റെ വിജയത്തിന് വലിയ കരുത്തായി.

സ്പോൺസർമാരുടെയും സമൂഹാംഗങ്ങളുടെയും പിന്തുണയ്ക്ക് HMA നന്ദി രേഖപ്പെടുത്തി. ഭാവിയിലും ഇത്തരത്തിലുള്ള കായിക–സാംസ്കാരിക പരിപാടികൾ സംഘടിപ്പിക്കുമെന്ന് ഭാരവാഹികൾ അറിയിച്ചു.

അപ്പച്ചൻ കണ്ണഞ്ചിറ

ബോൺമൗത്ത്‌ : യു കെ യിലെ കലാപ്രേമികൾ ആകാംക്ഷയോടെ കാത്തിരിക്കുന്ന “മഴവിൽ ഫ്ലാഷ് 2026” മറ്റന്നാൾ, ഫെബ്രുവരി 21 ന് ശനിയാഴ്ച്ച ബോൺമൗത്തിൽ അരങ്ങേറും. ഉച്ചതിരിഞ്ഞ് 3 മണിക്ക് ആരംഭിക്കുകയും, രാത്രി പതിനൊന്നു മണി വരെ നീണ്ടു നിൽക്കുകയും ചെയ്യുന്ന ‘കലാ മഹോത്സവത്തിൽ’ കലാലോകത്തെ പ്രശസ്തരും, പ്രഗത്ഭരുമായ പ്രതിഭകൾ സദസ്സിന് ഗംഭീരമായ കലാവിരുന്നാവും സമ്മാനിക്കുക..

പ്രശസ്ത ഗായകരായ ശ്രീ കലാഭവൻ ബിനു, ഗിരീഷ് മേനോൻ എന്നിവരുടെ സംഗീത വിരുന്നിനോടൊപ്പം, ഫ്‌ളവേഴ്‌സ് ടി വി യിലൂടെ ഏവരുടെയും പ്രശംസ ഏറ്റുവാങ്ങിയ മിമിക്രി ആർട്ടിസ്റ്റ് പ്രസാദ് ശിവൻ അവതരിപ്പിക്കുന്ന മിമിക്രിയും, കൂടാതെ, യുകെയിലെ പ്രശസ്തരായ 35-ഓളം ഗായകരും 25-ൽ പരം നർത്തകരും ചേർന്ന് വേദിയിൽ കലയുടെ മഴവിൽ വസന്തം വിരിക്കും. സംഗീതവും നൃത്തവും മിമിക്രിയും സമന്വയിക്കുന്ന ‘മഴവിൽ ഫ്ലാഷ് 2026 ‘ സാക്ഷാൽ കലയുടെ മഹോത്സവ ആഘോഷ വേദിയാവും.

ജനപ്രിയ പരിപാടിയിൽ ചീഫ് ഗസ്റ്റായി സോഷ്യൽ മീഡിയ താരവും, റീലുകളുടെ രാജകുമാരിയുമായ റീന ജോൺ പങ്കെടുക്കും. പരിപാടിയോട് അനുബന്ധിച്ച് കലാപ്രേമികൾക്കായി പ്രശസ്ത കേറ്ററേഴ്‌സായ ‘മട്ടാഞ്ചേരി കേറ്ററിംഗ്സ്’ സ്വാദിഷ്‌ടമായ ഭക്ഷണ വിഭവങ്ങൾ തയ്യാറാക്കി, മിതമായ നിരക്കിൽ നല്കുന്നതാവും.

പ്രവാസ ലോകത്തെ പിരിമുറുക്കത്തിനിടയിൽ, മനസ്സിന് കുളിർമ്മ പകരുന്ന കലാപ്രേമികളുടെ മഹാസംഗമ വേദിയിലെത്തി, ഹൃദയം നിറയുന്ന കലാ വിരുന്നും, രുചിയുടെ കലവറയും ആസ്വദിക്കുവാനും, ആനന്ദിക്കുവാനുമുള്ള “മഴവിൽ ഫ്ലാഷ് 2026” ആഘോഷത്തിലേക്ക് ഏവരെയും ഹാർദ്ദവമായി സ്വാഗതം ചെയ്യുന്നതായി മുഖ്യ സംഘാടകരായ അനീഷും, ഷിനുവും അറിയിച്ചു.

കൂടുതൽ വിവരങ്ങൾക്ക്:
അനീഷ് ജോർജ് – 07915061105
ഷിനു സിറിയക് – 07888659644

BARRINGTON THEATRE , PENNYS WALK , FERN DOWN , BOURNE MOUTH, BH22 9TH

ബ്രൈറ്റൺ മലയാളി അസോസിയേഷന്റെ ആഭിമുഖ്യത്തിൽ പ്രകൽപ്പ എന്ന പേരിൽ ഡാൻസിനും, മ്യൂസിക്കിനും, ആർട്ടിനുമായി ഒരു ശിൽപശാല സംഘടിപ്പിക്കുന്നു. 2026 ഫെബ്രുവരി 21, 22 തീയതികളിൽ ബ്രൈറ്റണിലുള്ള ബ്രൈറ്റൺ ഗേൾസ് ഡാൻസ് സ്റ്റുഡിയോയിൽ വച്ചാണ് ശിൽപശാല സംഘടിപ്പിച്ചിരിക്കുന്നത് .താഴെ കൊടുത്തിരിക്കുന്ന രെജിസ്ട്രേഷൻ ലിങ്ക് വഴി രജിസ്റ്റർ ചെയ്യാവുന്നതാണ്.

https://brightonmalayalee.co.uk/prakalpa

കൂടുതൽ വിവരങ്ങൾക്ക് ചുവടെ കൊടുത്തിരിക്കുന്ന നമ്പറിൽ ബന്ധപ്പെടാവുന്നതാണ്.

രാമു – 07711 462647

സുധീഷ് തോമസ്

സ്റ്റോക്ക് ഓൺ ട്രെൻഡിലെ നിത്യസഹായ മാതാ ദേവാലയത്തിലെ വിമൻസ് ഫോറത്തിന്റെവാർഷിക ആഘോഷം ‘നസ്രാണി മേളം’ ആഴ്ചകളോളം വരുന്ന ഒരുക്കങ്ങൾക്ക് പരിസമാപ്തി കുറിച്ചുകൊണ്ട് ,നൂറോളം വരുന്ന വിമൻസ് ഫോറം അംഗങ്ങൾ ചേർന്നൊരുക്കിയ കലാവിരുന്നോടുകൂടി വർണ്ണാഭമായി നടത്തപ്പെട്ടു.

വിമൻസ് ഫോറം പ്രസിഡൻറ് അനു എബ്രഹാം കോഡിനേറ്ററും സോഫി കുര്യാക്കോസ്, ഷെറിൻ ജോയ് എന്നിവർ കൾച്ചറൽ പ്രോഗ്രാം കോഡിനേറ്റേഴ്സുമായി കമ്മിറ്റികൾക്ക് നേതൃത്വം നൽകി. ആഴ്ചകളായുള്ള ഒരുക്കങ്ങൾ, ജോലിത്തിരക്കിനിടയിൽ ഉള്ള പ്രാക്ടീസുകൾ ഒന്നും വെറുതെ ആയില്ല. ഫെബ്രുവരി 14ാം തീയതി ട്രെൻഡ് വെയിലിൽ ഉള്ള സെൻറ് ജോസഫ് കോളേജ് ഹാളിൽ, ഡിജിറ്റൽ സംവിധാനത്തിലൂടെയുള്ള ലോഞ്ചിങ്ങിലൂടെ നസ്രാണി മേളത്തിന് തുടക്കം കുറിച്ചു. പ്രാർത്ഥനാ ഗാനത്തോടെ ആരംഭിച്ച യോഗത്തിൽ വികാരി ഫാദർ ജോർജ് എട്ടു പറയിൽ അധ്യക്ഷത വഹിച്ചു. രൂപതാ വിമൻസ് ഫോറം ഡയറക്ടർ ഡോക്ടർ സിസ്റ്റർ ജീൻ മാത്യു എസ് എച്ച് ഉദ്ഘാടനം നിർവഹിച്ചപ്പോൾ ലോക മാതൃവേദി ജോയിൻറ്സെക്രട്ടറി ട്വിങ്കിൾ റൈസൻ, രൂപതാ വിമൻസ് ഫോറം പ്രസിഡൻറ് മെർലിൻ മാത്യു, റോയൽ സ്റ്റോക്ക് ഹോസ്പിറ്റലിലെ ഓർഗൻ ഡോണേഷൻ ലീഡും ക്രിട്ടിക്കൽ കെയർ കൺസൾട്ടന്റുമായ ഡോക്ടർ പ്രാബ് ക്ലർ, കീൽ യൂണിവേഴ്സിറ്റി ഡീനും ഗൈനക്കോളജി കൺസൾട്ടന്റുമായ പ്രൊഫസർ ഫിഡൽമ ഓ മഹോണി എന്നിവർ ആശംസകൾ അർപ്പിച്ചു. വിമൻസ് ഫോറം പ്രസിഡൻറ് അനു എബ്രഹാം എല്ലാവർക്കും സ്വാഗതം ആശംസിച്ചപ്പോൾ സെക്രട്ടറി അന്നു കെ പൗലോസ് നന്ദി അർപ്പിച്ചു.

കേരളത്തിൻറെ വിവിധ ഭാഗങ്ങളിൽ നിന്നും സ്റ്റോക്ക് ഓൺ ട്രെൻഡിൽ കുടിയേറിയ സീറോ മലബാർ നസ്രാണികളുടെ ഒരുമയുടെയും കൂട്ടായ്മയുടെയും ആഘോഷം കൂടിയായിരുന്നു നസ്രാണിമേളം. ഇടവകയിലെ വനിതകളെ എല്ലാം ഒന്നിച്ചുകൂട്ടി സൗഹൃദവും പരസ്പര സ്നേഹവും സഹകരണവും വർദ്ധിപ്പിക്കാനായി വിഭാവനം ചെയ്ത പരിപാടി ഇടവക മുഴുവനിലേയും ഈ നാട്ടിലുള്ളവരുടെയും കൂടി ഒരു ആഘോഷമായി മാറുകയായിരുന്നു.

കാൽ നൂറ്റാണ്ടിന്റെ കുടിയേറ്റ ചരിത്രമുള്ള സ്റ്റോക്കിലെ മാർത്തോമാ നസ്രാണികളുടെ കൂട്ടായ്മയിൽ ഉള്ള വളർച്ചയുടെ ഒരു പ്രതിഫലനം കൂടിയായിരുന്നു നസ്രാണിമേളം. ഇടവകയിലെ വിമൻസ് ഫോറത്തിന് പൂർണ്ണ സഹകരണവുമായി മെൻസ് ഫോറം, സീറോ മലബാർ യൂത്ത് മൂവ്മെൻറ് സംഘടനകളും ഉണ്ടായിരുന്നു എന്നത് വലിയ സന്തോഷം നൽകുന്നു. ഇടവകയിലെ കുടുംബ കൂട്ടായ്മ യൂണിറ്റുകളിലെ ഓരോ വിമൻസ് ഫോറം അംഗങ്ങളെയും വ്യക്തിപരമായി ക്ഷണിക്കാൻ നിയോഗിക്കപ്പെട്ട വോളണ്ടിയേഴ്സ്, വിവിധ കമ്മിറ്റി മെമ്പേഴ്സ്, എക്സിക്യൂട്ടീവ്, കോർ കമ്മിറ്റി മെമ്പേഴ്സ് എന്നിവരുടെ കൂട്ടായ ശ്രമത്തിനൊപ്പം മെൻസ് ഫോറത്തിന്റെ സഹകരണവും ഇടവക വികാരി ജോർജ് എട്ടു പറയിൽ അച്ചൻ്റെ നേതൃത്വവും കൂടിയായപ്പോൾ നസ്രാണിമേളം ഓർമ്മയിൽ സൂക്ഷിക്കാനുള്ള ഒരു പുതിയ ഏട് തന്നെ സൃഷ്ടിച്ചു. എട്ടു വർഷങ്ങളായുള്ള സ്റ്റോക്ക് വിമൻസ് ഫോറത്തിന്റെ ജൈത്രയാത്രയിൽ നിർണായക പങ്കുവഹിച്ച മുൻ കമ്മിറ്റി അംഗങ്ങളെ ആദരിക്കാനും പുതു നേതൃത്വം മറന്നില്ല അവർക്കുള്ള ഉപഹാരങ്ങൾ പ്രൊഫസർ ഫിഡൽമ ഓ മഹോണി സമർപ്പിച്ചു.

ആനുവൽ ഡേ നാമനിർദ്ദേശ മത്സരത്തിൽ ഏറ്റവും അഭികാമ്യമായ “നസ്രാണിമേളം ” എന്ന പേര് നിർദ്ദേശിച്ച ശ്രീമതി ഷിബി ജോൺസനെ ആദരിച്ചു, ഉപഹാരം കൈമാറി. വിമൻസ് ഫോറം ആന്തത്തോടെ അവസാനിച്ച ഔദ്യോഗിക മീറ്റിങ്ങിനെ തുടർന്ന് വിമൻസ് ഫോറം അംഗങ്ങളുടെ കലാവിരുന്നായിരുന്നു. ഒന്നിനൊന്ന് വ്യത്യസ്തങ്ങളായ പരിപാടികൾ. പ്രയർ ഡാൻസ്, ക്ലാസിക്കൽ ഡാൻസ്, ക്രിസ്ത്യൻ തിരുവാതിര, സ്കിറ്റ്, തമാശ നിറഞ്ഞ കപ്പിൾ ഡാൻസുകൾ, ബോളിവുഡ് ഡാൻസ്, സ്റ്റോക്കിലെ വാനമ്പാടികളുടെ ഗാനമേള, പാരമ്പര്യവും ആധുനികതയും കോർത്തിണക്കിയ ഫാഷൻ ഷോ, ഓട്ടം തുള്ളൽ, നസ്രാണി പാരമ്പര്യം ഒട്ടും പറയാത്ത വേഷവിധാനങ്ങളുമായി മാർഗംകളിയും അവയിൽ ചിലത് മാത്രം. ജോലിത്തിരക്കിനും കുടുംബത്തിലെ ഉത്തരവാദിത്വങ്ങളുടെ ഇടയിലും പ്രാക്ടീസിന് സമയം കണ്ടെത്തി മനോഹരമായി പ്രോഗ്രാമുകൾ അവതരിപ്പിച്ചവരെ എല്ലാവരും അഭിനന്ദിച്ചു .

ലോകമെമ്പാടും വാലന്റൈൻസ് ഡേ ആഘോഷിച്ചപ്പോൾ സ്റ്റോക്ക് നസ്രാണികളും അതിൻറെ പ്രാധാന്യം ഒട്ടും ചോരാതെ ശ്രദ്ധിച്ചു. വിശുദ്ധ വാലന്റൈനെ അനുസ്മരിക്കുകയും വിവാഹത്തിൻറെ 25 വർഷങ്ങൾ പൂർത്തിയാക്കിയ മാത്തച്ചൻ- മരിയ, ഡേവിസ് പാപ്പു – ഷിൻസി, സന്തോഷ് -ലൈജി എന്നീ ദമ്പതികളെ ആദരിച്ചും, ലക്കിവാലന്റൈൻ കപ്പിൾ നറുക്കെടുപ്പ് നടത്തി വിജയികളായ ഫെനിഷ് -ലീന ദമ്പതികൾക്ക് ഉപഹാരം സമർപ്പിച്ചും വിമൻസ് ഫോറം ആഘോഷിച്ചപ്പോൾ, എല്ലാ സുന്ദരി മണികൾക്കും ചുമന്ന റോസാപ്പൂ വിതരണം അപ്രതീക്ഷിതമായി നടത്തി മെൻസ് ഫോറം പ്രണയ ദിനത്തിൻറെ മനോഹാരിതയ്ക്ക് മാറ്റുകൂട്ടി. അപ്രതീക്ഷിതമായി ലഭിച്ച ആദരവിന്റെ ആത്മ നിവൃതിലായിരുന്നു എല്ലാ തരുണീമണികളും. എല്ലാ ഡിജിറ്റൽ ഡിസ്പ്ലേ സപ്പോർട്ടുമായി സുദീപ് എബ്രഹാമും സൗണ്ട് സിസ്റ്റവുമായി സെബിൻ, സിന്റോ, ജിബി എന്നിവരും എൽഇഡി സ്ക്രീനുമായി ജാസ് ലൈവ് ഡിജിറ്റലും കൂടിയായപ്പോൾ കണ്ണിനു കാതിനും കുളിർമയായി.

എല്ലാവിധ സഹകരണവുമായി കൈകാരന്മാരുടെ നേതൃത്വവും ഉണ്ടായിരുന്നു. പലഹാരങ്ങളും പാനീയങ്ങളുമായി സീറോ മലബാർ യൂത്ത് മൂവ്മെന്റിലെ യുവത്വങ്ങളും പ്രധാന ഭക്ഷണങ്ങൾ ഒരുക്കി സ്റ്റോക്കിലെ ടേസ്റ്റി ഫുഡ് റസ്റ്റോറൻറ് രംഗത്ത് എത്തിയപ്പോൾ മനവും വയറും നിറഞ്ഞ ഒരു സായാഹ്നമായി മാറി- *നസ്രാണിമേളം*- സ്റ്റോക്ക് ഓൺ ട്രെൻഡിലെ മാർത്തോമ നസ്രാണികൾക്ക്.

അപ്പച്ചൻ കണ്ണഞ്ചിറ

ഹോൺചർച്ച്: യു കെ യിലെ കലാസ്നേഹികളുടെ സ്നേഹവും, പ്രോത്സാഹനവും ഏറ്റു വാങ്ങിയ, ‘7 ബീറ്റ്‌സ് മ്യൂസിക് ബാൻഡ്’ സംഗീതോത്സവ വിരുന്നുമായി വീണ്ടും എത്തുന്നു. ലണ്ടനിലേ സംഗീത പ്രേമികളുടെ അഭ്യർത്ഥന മാനിച്ച്‌ സംഗീതോത്സവത്തിന്റെ സീസൺ 9, മാർച്ച് 7 ന് ശനിയാഴ്ച്ച ഹോൺചർച്ചിൽ വെച്ചാവും സംഘടിപ്പിക്കുക.

സംഗീത-നൃത്ത സദസ്സുകളൊരുക്കിയും, നിരവധിയായ ജീവകാരുണ്യ പ്രവർത്തനങ്ങളിലൂടെയും, പത്മഭൂഷൺ ഓ എൻ വി സാറിന്റെ അനുസ്മരണങ്ങൾ സംഘടിപ്പിച്ചും, പുതുമുഖ ഗായകർക്കും നർത്തകർക്കും വേദികൾ നൽകിയും, യു കെ യിലെ മലയാളി കലാഹൃദയങ്ങളിൽ ഇടംപിടിച്ച സെവൻ ബീറ്റ്‌സ് സംഗീതോത്സവത്തിൽ പ്രവേശനം തികച്ചും സൗജന്യമായിരിക്കും.

മലയാള ഭാഷയ്ക്കു നിരവധി നിത്യ ഹരിത ഗാനങ്ങൾ സമ്മാനിച്ച അന്തരിച്ച പത്മഭൂഷൺ ഓ എൻ വി കുറുപ്പ് മാഷിന്റെ അനുസ്മരണവും, അദ്ദേഹത്തിന്റെ ശ്രദ്ധേയമായ നിരവധി ഗാനങ്ങൾ കോർത്തിണക്കി നടത്തുന്ന സംഗീതാദദരവും, 7 ബീറ്റ്സ് വേദിയിൽ സാറിന്റെ പാവനസ്മരണക്കു മുമ്പിൽ സ്മരണാഞ്ജലിയായി അർപ്പിക്കും.

മലയാള സിനിമയിലെ പ്രമുഖ സംഗീത സംവിധായകനും നിരവധി ഹിറ്റ് ഗാനങ്ങൾ ഒരുക്കി മലയാളികളുടെ ഹൃദയം കീഴടക്കിയ എസ് പി വെങ്കിടേഷ് മാഷിന്റെ പാവന അനുസ്മരണവും തഥവസരത്തിൽ നടത്തപ്പെടും. മെഗാ ഹിറ്റ് ചിത്രങ്ങളായ രാജാവിന്റെ മകൻ, ഇന്ദ്രജാലം, ഏകലവ്യൻ, മാഫിയ അടക്കം നിരവധി ചിത്രങ്ങൾക്ക് മികച്ച പശ്ചാത്തല സംഗീതം അദ്ദേഹം നൽകിയിരുന്നു. മലയാള സിനിമകളിലെ ഹിറ്റ് ഗാനങ്ങളായ പൂവേ പൂവേ പാലപ്പൂവേ, തൂമഞ്ഞിൻ നെഞ്ചിൽ, മഞ്ഞിൻ ചിറകുള്ള, കണ്ണാടി കൂടും കൂട്ടി അടക്കം നിരവധി ഗാനങ്ങൾക്ക് സംഗീത സംവിധാനവുമൊരുക്കിയ അനശ്വര കലാകാരനുള്ള സമുചിതമായ സ്മരണാഞ്ജലിയാവും സംഗീതോത്സവ വേദിയിൽ സമർപ്പിക്കുക.

സീസൺ 9 നു ലണ്ടനിലെ സഹൃദയരായ കലാ-സാമൂഹ്യ-സാംസ്കാരിക രംഗങ്ങളിലെ പ്രമുഖ മലയാളി കൂട്ടായ്മ്മകളാവും ആഥിതേയത്വം വഹിക്കുക. ജീവകാരുണ്യ പ്രവർത്തനങ്ങളിലൂടെ കേരളത്തിൽ നിരവധി കുടുംബങ്ങൾക്ക് താങ്ങും തണലുമായി മാറിയ 7 ബീറ്റ്‌സ്, ചാരിറ്റി പ്രവർത്തിനായിട്ടാണ് സംഗീതോത്സവ വരുമാനം പൂർണ്ണമായി ഉപയോഗിച്ചു വരുന്നത്. സംഗീതവും നൃത്തവും സമന്വയിക്കുന്ന കലോത്സവത്തിൽ ഒമ്പതാം തവണയും ടൈറ്റിൽ സ്പോൺസറായി എത്തുന്നത്, യു കെ യിലെ പ്രമുഖ മോർട്ടഗേജ് & ഇൻഷുറൻസ് സ്ഥാപനമായ ലൈഫ് ലൈൻ പ്രൊട്ടക്ട് ഇൻഷുറൻസ് & മോർട്ടഗേജ് സർവീസസ് ആണ്.

7 ബീറ്റ്‌സ് സംഗീതോത്സവ സീസൺ 9 വേദിയിൽ, പ്രഗത്ഭരായ സംഗീത നൃത്ത താരങ്ങളുടെ സർഗ്ഗാത്മക കഴിവുകളുടെ ആവനാഴിയിലെ ഏറ്റവും മികച്ച പ്രകടനങ്ങൾ പുറത്തെടുക്കുമ്പോൾ, ഉള്ളു നിറയെ ആനന്ദിക്കുവാനും, ആസ്വദിക്കുവാനും അവസരമൊരുക്കുന്ന മെഗാ കലാവിരുന്നാവും ഹോൺചർച്ചിൽ കലാസദസ്സിനു സമ്മാനിക്കുക.

മാർച്ച് ഏഴിന് ശനിയാഴ്ച്ച ഉച്ചക്ക് രണ്ടു മണിമുതൽ രാത്രി പത്തുമണി വരെ നീണ്ടു നിൽക്കുന്ന സംഗീതരാവിൽ കലാസ്വാദകർക്കു തികച്ചും സൗജന്യമായിട്ടാവും പ്രവേശനം അനുവദിക്കുക.

7 ബീറ്റ്‌സ് സംഗീതോത്സവം സീസൺ 9 ന്റെ ഭാഗമാകുവാൻ ഏവരെയും ഹോൺചർച്ച് കാമ്പ്യൻ സ്‌കൂൾ ഓഡിറ്റോറിയത്തിലേക്കു ഹൃദയപൂർവ്വം ക്ഷണിച്ചുകൊള്ളുന്നതായി കോർഡിനേറ്റർമാരായ ജോമോൻ മാമൂട്ടിൽ. സണ്ണിമോൻ മത്തായി അറിയിച്ചു.

കൂടുതൽ വിവരങ്ങൾക്ക് ബന്ധപ്പെടുക:
Sunnymon Mathai: 07727993229
Jomon Mammoottil: 07930431445
Manoj Thomas: 07846475589
kevin konickal: 07515428149
Dr Sivakumar: 0747426997
Luby Mathew: 07886263726
Appachan Kannanchira: 07737956977

Venue: The Campion School, Wingletye Lane, Hornchurch, London, RM11 3BX

ബ്ലാക്ക്‌ബേൺ: ബ്ലാക്ക്‌ബേൺ യുണൈറ്റഡ് മലയാളി അസോസിയേഷൻ (UMA) ഫെബ്രുവരി 14, 2026-ന് നടന്ന 22-ാമത് വാർഷിക പൊതുയോഗത്തിൽ പുതിയ ഭാരവാഹികളെ തെരഞ്ഞെടുത്തു. സംഘടന 23-ാം പ്രവർത്തന വർഷത്തിലേക്ക് പ്രവേശിക്കുന്ന ഘട്ടത്തിലാണ് പുതിയ കമ്മിറ്റി ചുമതലയേറ്റത്.

യോഗത്തിൽ അംഗങ്ങളുടെ സാന്നിധ്യത്തിൽ പുതിയ ഭാരവാഹികളെ പ്രഖ്യാപിക്കുകയും സംഘടനയുടെ പ്രവർത്തനങ്ങളെക്കുറിച്ച് ചർച്ച നടത്തുകയും ചെയ്തു.

പുതിയ ഭാരവാഹികൾ:

പ്രസിഡന്റ് – അജിൽ ജോസഫ്

വൈസ് പ്രസിഡന്റ് – ഷാരിക മനോജ് നായർ

സെക്രട്ടറി – ജിൻസി ഷിബു വെളുത്തെപ്പിള്ളി

ജോയിന്റ് സെക്രട്ടറി – ജോൺ മാത്യു

ട്രഷറർ – റെജി ചാക്കോ

ജോയിന്റ് ട്രഷറർ – ഏലിക്കുട്ടി വർഗീസ്

എക്സിക്യൂട്ടീവ് കമ്മിറ്റി അംഗങ്ങൾ: ബിജോയ് കോര, സുനിൽ തോമസ്, അനിൽകുമാർ സദാനന്ദൻ, എജി ജോർജ്, രമ്യ ചന്ദ്രശേഖരൻ, ബിൻസി രാജേഷ്, ലൈജി പൗലോസ്.

യോഗത്തിൽ മുൻ പ്രസിഡന്റ് രാജേഷ് കുടിലിൽ ഉൾപ്പെടെയുള്ള മുൻ കമ്മിറ്റിയംഗങ്ങളുടെ സേവനങ്ങളെ അനുസ്മരിച്ചു നന്ദി രേഖപ്പെടുത്തി. സംഘടനയുടെ വളർച്ചക്കും ഐക്യത്തിനും നൽകിയ സംഭാവനകൾ അംഗങ്ങൾ പ്രത്യേകം പ്രശംസിച്ചു.

ബെർലി മാളിയേക്കൽ

ലണ്ടൻ: ബ്രിട്ടനിലെ കുടിയേറ്റക്കാരുടെ ഐ എൽ ആർ അവകാശങ്ങൾ സംരക്ഷിക്കുന്നതിനായി യുക്മ ദേശീയതലത്തിൽ ആരംഭിച്ച ക്യാമ്പയിന് പിന്തുണ നൽകി യുകെയിലെ വിവിധ അസോസിയേഷനുകളും വ്യക്തികളും മുന്നോട്ട് വന്നിരുന്നു. ഫെബ്രുവരി 12 ന് കൺസൾട്ടേഷൻ തീർന്നതോടെ നമ്മുടെ അഭിപ്രായം പറയുവാനുള്ള അവസരം തീർന്നിരുന്നു. ഇനിയാണ് സർക്കാർ പാർലമെന്റിൽ ചർച്ച ചെയ്ത ശേഷം നിയമം പാസാക്കുന്നത്. യുക്മ മുന്നോട്ട് വച്ച നിർദ്ദേശങ്ങൾ സർക്കാർ സ്വീകരിക്കുമെന്ന് വിശ്വസിക്കുന്നു.

പുതിയ തലമുറകുടിയേറ്റക്കാരെ സാരമായി ബാധിക്കാവുന്ന ഐ എൽ ആർ പരിഷ്‌കാരങ്ങൾ, നിയമപരമായി കുടിയേറിയ സ്‌കിൽഡ് വർക്കേഴ്സിന്റെയും അവരുടെ കുടുംബങ്ങളുടെയും അവകാശങ്ങൾ സംരക്ഷിക്കണമെന്ന ആവശ്യം എന്നിവ ഉന്നയിച്ചുകൊണ്ടാണ് യുകെയിലെ എല്ലാ എം പി മാർക്കും നിവേദനം കൊടുക്കുവാൻ യുക്മ ക്യാമ്പയിൻ ആരംഭിച്ചിരുന്നത്.

ഈ ക്യാമ്പയിന്റെ ഭാഗമായി കാർഡിഫ് – പേനാർത്ത് നിയോജകമണ്ഡലത്തിലെ എം പി ആയ ശ്രീ. സ്റ്റീഫൻ ഡോട്ടിക്ക് തന്റെ പരിധിക്കുള്ളിലെ ലാൻഡോക് കമ്മ്യൂണിറ്റി കോൺസിലർ ശ്രീ ബെന്നി അഗസ്റ്റിനും യുക്മ വെയിൽസ് റീജിയണൽ ട്രഷറർ ശ്രീ റ്റോമ്പിൽ കണ്ണത്തും ഒരുമിച്ച് ഐ എൽ ആർ നിവേദനം സമർപ്പിച്ചു.

ലാൻഡോക്ക് ഹോസ്പിറ്റലിൽ മലയാളികൾ നൽകിവരുന്ന സേവനത്തെകുറിച് എം പി വളരെ സ്നേഹത്തോടെ സ്മരിച്ചു. കാർഡിഫ് – പേനാർത്ത് ഭാഗങ്ങളിൽ വസിക്കുന്ന മലയാളികൾക്ക് വേണ്ടി പാർലമെന്റിൽ ശക്തമായി സംസാരിക്കുമെന്ന് ശ്രീ സ്റ്റീഫൻ ഡോട്ടി ഉറപ്പ് നൽകി.

കഴിഞ്ഞ രണ്ട് മാസമായി യുക്മ നടത്തി വന്നിരുന്ന ഈ ഐ എൽ ആർ ക്യാമ്പയിൻ ഡിസംബർ 20ന് വെയിൽസിലെ ബാരിയിൽ വച്ച് യുക്മ ദേശീയ കമ്മിറ്റി അംഗം ബെന്നി അഗസ്റ്റിൻ ഉത്‌ഘാടനം ചെയ്യുകയും എം പി ശ്രീ കനിഷ്ക നാരായണന് മലയാളി വെൽഫെയർ അസോസിയേഷൻ പ്രസിഡന്റ് റ്റോമ്പിൽ കണ്ണത്ത് ഐ എൽ ആർ നിവേദനം സമർപ്പിക്കുകയും ചെയ്തു. അതിനു ശേഷം വെയിൽസിലെ 24 നിയോജകമണ്ഡലങ്ങളിൽ എം പി മാർക്ക് നിവേദനം സമർപ്പിക്കുകയുണ്ടായി.

യുകെയിലെ പുതിയ കുടിയേറ്റക്കാർ വളരെ ആകാംഷയോടെയാണ് ലേബർ സർക്കാരിന്റെ ഇന്ന് നീക്കത്തെ നോക്കി കാണുന്നത്. പുതിയ ഐ എൽ ആർ, വിസ നിബന്ധനകൾ, സ്പൗസ് വിസ എന്നിവയുമായി ബന്ധപ്പെട്ട് നിർദ്ദേശിച്ച മാറ്റങ്ങൾ ഈ സമൂഹത്തിന്റെ ഭാവിയെ ഗുരുതരമായി ബാധിക്കുമെന്ന ആശങ്ക ശക്തമായി ഉയർന്നിട്ടുണ്ട്. യുക്മ നടത്തുന്ന ഈ ക്യാമ്പയിൻ അതിന്റെ ഫലം കാണട്ടെയെന്ന് പ്രത്യാശിക്കാം.

റോയ് തോമസ്

മാറ്റ്ലോക് വാലി : നിരത്തുകളുടെ അധിപന്മാരായ ട്രക്ക് കളുടെ വളയം പിടിക്കുന്ന മലയാളികളുടെ കൂട്ടായ്മയായ മലയാളി ട്രക്ക് ഡ്രൈവേഴ്സ് യുകെ (MTDUK)യുടെ 2026-27പ്രവർത്തന വർഷത്തിലേക്കുള്ള പുതിയ സാരഥികളെ തെരത്തെടുത്തു.

കമ്മിറ്റി അംഗങ്ങളായി: –

​കോശി വർഗീസ് (ഡർബി)
​ജിസ്മോൻ മാത്യു (സ്റ്റെർലിംഗ്)
​രാജീവ് ജോൺ (ബെർമിംഗ്ഹാം)
​റിജു ജോൺ (എക്സിറ്റർ)
​ലിൻജു ആന്റണി (ചെംസ്ഫോർഡ്) എന്നിവരെ തെരഞ്ഞെടുത്തപ്പോൾ
​റോയ് തോമസും (എക്സിറ്റർ), അമൽ പയസും (സ്കോട്ലാൻഡ്) അഡ്വൈസറി കമ്മിറ്റി അംഗങ്ങളാണ്.

ഡർബിഷയറിലെ മാറ്റ്‌ലോക് വാലിയിലെ ലിയ ഗ്രീൻ ഔട്ട്ഡോഴ്സിൽ (Lea Green Outdoors) വച്ച് കഴിഞ്ഞ 6,7,8 തിയതികളിൽ പ്രൗഢ ഗംഭീരമായ നടന്ന MTDUK യുടെ നാലാമത് വാർഷിക കൂട്ടായ്മയിലാണ് പുതിയ ഭാരവാഹികളെ തെരഞ്ഞെടുത്തത്.

സംഗമത്തിൽ രാജ്യത്തിൻ്റെ വിവിധ ഭാഗങ്ങളിൽ നിന്നായി ഒട്ടേറെ അംഗങ്ങൾ പങ്കെടുത്തു.
​മൂന്ന് ദിവസം നീണ്ടുനിന്ന സംഗമത്തിൽ തൊഴിൽപരമായ കാര്യങ്ങളും ഡ്രൈവർമാരുടെ ക്ഷേമവും പ്രധാന ചർച്ചാവിഷയമായി. ശനിയാഴ്ച നടന്ന ഔദ്യോഗിക ചടങ്ങിൽ തൊഴിൽ മേഖലയിലെ വെല്ലുവിളികൾ, ഡ്രൈവർമാർ പാലിക്കേണ്ട നിയമപരമായ മാനദണ്ഡങ്ങൾ, സുരക്ഷാ മുൻകരുതലുകൾ എന്നിവയെക്കുറിച്ച് വിപുലമായ ചർച്ചകൾ നടന്നു. അംഗങ്ങൾ തങ്ങളുടെ പ്രവൃത്തിപരിചയവും അറിവുകളും പരസ്പരം പങ്കുവെച്ചു.

​വിഭവസമൃദ്ധമായ ഭക്ഷണവും അംഗങ്ങളുടെ വിവിധ കലാപരിപാടികളും ആഘോഷങ്ങൾക്ക് മാറ്റു കൂട്ടി. പീക്ക് ഡിസ്ട്രിക്റ്റ് മലനിരകളുടെ മനോഹാരിതയിൽ വീണ്ടും സൗഹൃദം പുതുക്കിയ അംഗങ്ങൾ, മൂന്നാം ദിവസം പുതിയ ലക്ഷ്യങ്ങളുമായി യുകെയുടെ വിവിധ ഭാഗങ്ങളിലുള്ള തങ്ങളുടെ സ്വഭവനങ്ങളിലേക്ക് മടങ്ങി.

നോർത്ത് ലിങ്കൺഷയറിലെ എല്ലാ കമ്യൂണിറ്റികളെയും ഒരു വേദിയിൽ എത്തിയ്ക്കുക എന്ന ചരിത്രദൗത്യം നിറവേറ്റി ഇന്ത്യൻ കൾച്ചറൽ അസോസിയേഷൻ നോർത്ത് ലിങ്കൺഷയർ (ICANL). സ്കൻതോർപ്പിലെ പ്രശസ്തമായ ദി ബാത്സ് ഹാളിൽ ജനുവരി 31 ശനിയാഴ്ച നടത്തപ്പെട്ട റിവർ ഓഫ് ടാലൻ്റ് എന്ന മൾട്ടി കൾച്ചറൽ ടാലൻ്റ് ഷോ ആൻഡ് അവാർഡ് സെറമണിയിലാണ് ഇന്ത്യാക്കാരോടൊപ്പം ബ്രിട്ടിഷ്, ബംഗ്ലാദേശി, പാക്കിസ്ഥാനി, ശ്രിലങ്കൻ, ചൈനീസ്, യൂറോപ്യൻ കമ്മ്യൂണിറ്റികൾ വേദിയിലും സദസിലും അണിനിരന്നത്. ഇന്ത്യൻ കൾച്ചറൽ അസോസിയേഷൻ നോർത്ത് ലിങ്കൺഷയറിൻ്റെ പ്രവർത്തന മികവിൻ്റെ അംഗീകാരമായി നോർത്ത് ലിങ്കൺഷയർ കൗൺസിൻ്റെ ഭാഗമായ സ്കൻതോർപ്പ് തീയേറ്റേഴ്സും സംയുക്തമായാണ് റിവർ ഓഫ് ടാലൻ്റ് ഇവൻ്റ് സംഘടിപ്പിച്ചത്.

ഇവൻറിൻ്റെ ഷെഡ്യൂൾഡ് ടൈമിന് പത്തു മിനിട്ട് മുമ്പേ തന്നെ 400 സീറ്റുകളും നിറഞ്ഞു. അസതോമ സദ്ഗമയയും ലോകാ സമസ്താ സുഖിനോ ഭവന്ദുവും ഒഴുകിയെത്തിയ പശ്ചാത്തലത്തിൽ ഇന്ത്യൻ കൾച്ചറൽ അസോസിയേഷനിലെ എട്ട് അംഗങ്ങൾ നിറദീപവുമായി വേദിയിലെത്തി നിറഞ്ഞ സദസിനെ സാക്ഷിയാക്കി നിലവിളക്ക് തെളിയിച്ചു. ഇന്ത്യൻ – ബ്രിട്ടീഷ് ദേശീയ പതാകകൾ വന്ദേമാതരത്തിൻ്റെ അകമ്പടിയിൽ വേദിയിലുയർന്നു. നാലു മണിക്കൂർ നീണ്ടുനിന്ന കലാ സന്ധ്യയിൽ 22 പെർഫോർമൻസുകൾ സ്റ്റേജിലെത്തി. വിവിധ ഇനങ്ങളിലായി ഇംഗ്ലീഷുകാരുടെ ഡ്രമിംഗ് ടീമായ ഹംബർ തായ്ക്കോയും യുവ സിംഗറായ പേജ് അലിസണുമടക്കം 110 പേർ അരങ്ങു തകർത്തു. ഈസ്റ്റ് യോർക്ക്ഷയർ കൾച്ചറൽ ഓർഗനൈസേഷനും ഹൾ ഇന്ത്യൻ മലയാളി അസോസിയേഷനും ഇന്ത്യൻ കൾച്ചറൽ അസോസിയേഷനൊപ്പം കൈകോർത്ത ഇവൻറിൽ ഇന്ത്യൻ ക്ളാസിക്കൽ, സിനിമാറ്റിക് ഡാൻസുകൾക്കൊപ്പം സിംഗേഴ്സും കാണികൾക്ക് വിരുന്നൊരുക്കി.

ഇന്ത്യൻ കൾച്ചറൽ അസോസിയേഷൻ്റെ 2026 ലെ എക്സലൻസ് അവാർഡുകൾ നോർത്ത് ലിങ്കൺഷയർ മേയർ കൗൺസിലർ കരോൾ റോസ് സമ്മാനിച്ചു. വ്യക്തിഗത കാറ്റഗറിയിൽ അഞ്ച് അവാർഡുകളും ഓർഗനൈസേഷനുകൾക്ക് രണ്ടു അവാർഡുകളുമാണ് ഇത്തവണ നല്കിയത്. വർഗീസ് ഡാനിയേൽ, യുക്മ നാഷണൽ വൈസ് പ്രസിഡൻ്റ് ഷെഫീൽഡ് ( ദി കമ്യൂണിറ്റി ലീഡർഷിപ്പ് എക്സലൻസ്), സുനിൽ കപിൽ, സ്കൻതോർപ്പ് (ദി കമ്യൂണിറ്റി ഫിലാൻത്രോപ്പി എക്സലൻസ്), ഡോ. ഇർഷാദ് മുഹമ്മദ് അലി, ഹൾ ( ദി കമ്യൂണിറ്റി എംപവർമെൻ്റ് എക്സലൻസ്), സുധാ സണ്ണി, ഹൾ ( ദി കമ്യൂണിറ്റി എംപവർമെൻ്റ് എക്സലൻസ്), ഇവിറ്റ് ബട്ട്ലർ, സ്കൻതോർപ്പ് ( ദി കമ്മ്യൂണിറ്റി സർവീസ് എക്സലൻസ്), നോർത്ത് ലിങ്കൺഷയർ സ്കൗട്ട്സ് (ദി കമ്യൂണിറ്റി സർവീസ് ലോറിയേറ്റ് ) യുണൈറ്റഡ് റൂട്ട്സ് ( ദി കമ്യൂണിറ്റി ഇംപാക്ട് എക്സലൻസ്) അവാർഡുകൾ സ്വീകരിച്ചു. ഇവാ മരിയ കുര്യാക്കോസും ദിയാ എലെസാ ജോർജും ദി ആർട്ടിസ്റ്റിക് എക്സലൻസ് അവാർഡുകൾക്കും അസോസിയേഷനിലെ പ്രവർത്തന മികവിന് നൽകുന്ന കീ കോൺട്രിബ്യൂട്ടർ അവാർഡുകൾക്ക് ലിസാ ബിനോയിയും സജീഷ് ബാബു കെ.ആറും അർഹരായി.

ജിഎംപി ഫാർമസ്യൂട്ടിക്കൽ ലിമിറ്റഡ് ഹൾ, കപിൽ കെയർ ഹോംസ്, സ്കൻതോർപ്പും മുഖ്യ സ്പോൺസർമാരായ ഇവൻറിൽ മറ്റ് 18 സ്പോൺസർമാരും പിന്തുണ നല്കി. ശ്രീലക്ഷ്മി രമേശനും, ശാലു വിപിനും, ലിയാ ബിനോയിയും നേതൃത്വം നല്കിയ കോമ്പയറിംഗ് ടീമും പ്രോഗ്രാമുകൾ കൃത്യമായി വേദിയിലെത്തിച്ച അസോസിയേഷൻ്റെ ഓർഗനൈസിംഗ് ടീമും കാണികളുടെയും സ്കൻതോപ്പ് തിയേറ്റേഴ്സിൻ്റെയും മുക്തകണ്ഠമായ പ്രശംസ ഏറ്റുവാങ്ങി. ലോക്കൽ കമ്യൂണിറ്റികളെ ഒന്നിപ്പിക്കാൻ അസോസിയേഷൻ നടത്തിയ പ്രവർത്തനങ്ങളെയും . സംഘാടക മികവിനെയും നോർത്ത് ലിങ്കൺഷയർ കമ്യൂണിറ്റി പാർട്ട്ണർഷിപ്പ് മാനേജർ ജെയ്ൻ റെയ്ത്ബി ആശംസാ പ്രസംഗത്തിൽ പ്രത്യേകം . പരാമർശിച്ചു.

ഐസിഎഎൻഎൽ റിതമിക് കിഡ്സ്, ജൊഹാനാ സിജോ, ബിൽഹാ ഏലിയാസ്, ദിയാ മരിയം ജോർജ്, ഫ്രേയാ ബോസ്, കാരിൻ ഒലിവ്, ഡോ. മിറിയം ഐസക്, ഐഡാ ഇർഷാദ്, അനന്യ ഗോപാലകൃഷ്ണൻ, അമിത് വിശ്വനാഥ്, ഇവാ മരിയ കുര്യാക്കോസ്, ഡോ. ഡൊമനിക് രാജ്കുമാർ, അനു ആൻ്റണി, അമേലിയ ആൻറണി, പേജ് അലിസൺ, ഇവൈസിഒ കിഡ്സ്, മുദ്രാ മോബ് ഗ്രിംസ്ബി, മയൂര സംഗം, ഹംബർ തായ്കോ, നക്ഷത്ര നാട്യാലയം, ഹിമാ ഫ്യൂഷൻ ടീം, ഇവൈസിഒ ജൂണിയേഴ്സ് ടീമുകൾ ഇവൻറിനെ അവിസ്മരണീയമാക്കി.

റിവർ ഓഫ് ടാലൻ്റ് ഇവൻറിലൂടെ സമാഹരിച്ച ആയിരം പൗണ്ട്, സ്കൻതോർപ്പ് ജനറൽ ഹോസ്പിറ്റലിൻ്റെ ചാരിറ്റിയായ ദി ഹെൽത്ത് ട്രീ ഫൗണ്ടേഷന് കൈമാറും. ഹോസ്പിറ്റലിൻ്റെ മറ്റേണിറ്റി, ഡിമെൻഷ്യാ കെയർ വാർഡുകളിൽ ഇംപ്രൂവ്മെൻറിനായി ഈ ഫണ്ട് വിനിയോഗിക്കും. വരും വർഷങ്ങളിലും സമാന രീതിയിലുള്ള കമ്യൂണിറ്റി ഇവൻ്റ് നടത്താൻ ഇന്ത്യൻ കൾച്ചറൽ അസോസിയേഷൻ ആഗ്രഹിക്കുന്നതായും അതിനായി നോർത്ത് ലിങ്കൺ ഷയർ കൗൺസിൽ അതോറിറ്റിയുടെ ഭാഗത്ത് നിന്ന് സഹകരണം തുടരണമെന്നും പ്രസിഡൻഷ്യൽ അഡ്രസിൽ ഇന്ത്യൻ കൾച്ചറൽ അസോസിയേഷൻ പ്രസിഡൻ്റ് ബിനോയി ജോസഫ് അഭ്യർത്ഥിച്ചു. നോർത്ത് ലിങ്കൺ ഷയറിലെ കമ്യൂണിറ്റികളെ ഒരു കുടക്കീഴിൽ അണിനിരത്താനുള്ള പ്രവർത്തനങ്ങൾക്ക് ഇന്ത്യൻ കൾച്ചറൽ അസോസിയേഷൻ തുടർന്നും നേതൃത്വം നൽകുമെന്നുള്ള പ്രഖ്യാപനത്തെ നിറഞ്ഞ ഹർഷാരവത്തോടെയാണ് സദസ് വരവേറ്റത്.