റോമി കുര്യാക്കോസ്

മിഡ്ലാന്ഡ്സ്: കേരള നിയമസഭ തെരഞ്ഞെടുപ്പിനെ മുന്നിൽക്കണ്ട് യു ഡി എഫ് സ്ഥാനാർഥികളുടെ വിജയത്തിനായി ഇന്ത്യൻ ഓവർസീസ് കോൺഗ്രസ്‌ (യുകെ) കേരള ചാപ്റ്റർ മിഡ്ലാന്ഡ്സ് ക്യാമ്പയിൻ കമ്മിറ്റി തയ്യാറാക്കിയ പ്രചാരണ വീഡിയോ ഗാനം പുറത്തിറങ്ങി. “പടയൊരുക്കം – മാറ്റത്തിനായി ഒരുമിക്കാം” എന്ന ആശയവുമായി പുറത്തിറങ്ങിയ ഈ ഗാനം സോഷ്യൽ മീഡിയ പ്ലാറ്റ്ഫോമുകളിൽ ഇതിനോടകം ശ്രദ്ധ നേടിക്കഴിഞ്ഞു.

കഴിഞ്ഞ ഒരു ദശാബ്ദമായി സംസ്ഥാനത്ത് തുടരുന്ന ഇടതുപക്ഷ ഭരണത്തിന്റെ നയങ്ങളെ വിമർശിക്കുകയും, രാഷ്ട്രീയ മാറ്റത്തിനായുള്ള ആവശ്യം ഉയർത്തുകയും ചെയ്യുന്ന സന്ദേശമാണ് ഗാനത്തിലൂടെ മുന്നോട്ട് വയ്ക്കുന്നത്. കേരളത്തിലും വിദേശരാജ്യങ്ങളിലുമായി നിരവധി യു ഡി എഫ് നേതാക്കൾ ഐ ഒ സി (യുകെ) പുറത്തിറക്കിയ ഗാനത്തിന് പിന്തുണയും ആശംസകളും രേഖപ്പെടുത്തിയിട്ടുണ്ട്.

ഗാനത്തിന്റെ വരികൾ ഒരുക്കിയത് യു കെയിലെ കോൺഗ്രസ്‌ നേതാവായ ഫിലിപ്പ് കെ ജോൺ ആണ്. സംഗീത സംവിധാനം നിർവഹിച്ചത് ഫെമിൻ ഫ്രാൻസിസ്. യുവ ഗായിക ശ്രദ്ധ ദിനേശാണ് ഗാനം ആലപിച്ചിരിക്കുന്നത്. ഓർക്കസ്ട്രേഷൻ ജോസഫ് പി ടി നിർവഹിച്ചപ്പോൾ, മിക്സിംഗ് നിർവഹിച്ചത് അരുൺ കെ പി ആണ്. മെട്രോ സ്റ്റുഡിയോയാണ് ഗാനത്തിന്റെ റെക്കോർഡിംഗിനും നിർമ്മാണത്തിനും പിന്നിൽ പ്രവർത്തിച്ചത്.

ഐ ഒ സി (യുകെ) കേരള ചാപ്റ്റർ മിഡ്ലാന്ഡ്സ് ക്യാമ്പയിൻ കമ്മിറ്റിയുടെ കീഴിൽ രൂപീകരിച്ച പ്രവർത്തകസംഘവും സോഷ്യൽ മീഡിയ ടീമും 140 മണ്ഡലങ്ങളിലെയും യു ഡി എഫ് സ്ഥാനാർഥികൾക്കായി ശക്തമായ പ്രചാരണ പ്രവർത്തനങ്ങൾ തുടരുന്നു. മണ്ഡലം അടിസ്ഥാനത്തിൽ അവലോകന യോഗങ്ങളും ചർച്ചകളും ഉൾപ്പടെ ശക്തമായ പ്രചാരണ പരിപാടികളാണ് ക്യാമ്പയിൻ കമ്മിറ്റിയുടെ കീഴിൽ സംഘടിപ്പിച്ചു വരുന്നത്.

ഐ ഒ സി (യുകെ) – കേരള ചാപ്റ്റർ പ്രസിഡന്റ്‌ ഷൈനു ക്ലെയർ മാത്യൂസ്, ജനറൽ സെക്രട്ടറി റോമി കുര്യാക്കോസ്, ജോയിന്റ് ട്രഷറർ മണികണ്ഠൻ ഐക്കാട്, സോണി ചാക്കോ, അനുരാഗ് എ ആർ, സൈമൺ ചെറിയാൻ, മിഥുൻ മോഹൻ, ഷിജോ എന്നിവരടങ്ങുന്ന സംഘമാണ് പ്രചാരണ പരിപാടികൾക്ക് നേതൃത്വം വഹിക്കുന്നത്.

പ്രവാസി സമൂഹത്തിന്റെ സജീവ പങ്കാളിത്തം ഉറപ്പാക്കുന്നതിന്റെ ഭാഗമായി വീഡിയോ പരമാവധി ആളുകളിൽ എത്തിക്കണമെന്ന് കമ്മിറ്റി അഭ്യർത്ഥിച്ചു. “കേരളം ജയിക്കും, യു ഡി എഫ് നയിക്കും” എന്ന മുദ്രാവാക്യത്തോടെ ക്യാമ്പയിൻ കൂടുതൽ ശക്തമായി മുന്നോട്ട് കൊണ്ടുപോകുന്നതായും സംഘാടകർ വ്യക്തമാക്കി.

റോമി കുര്യാക്കോസ്

മിഡ്ലാന്ഡ്സ്: കേരള നിയമസഭ തെരഞ്ഞെടുപ്പിനെ മുന്നിൽക്കണ്ട് യു ഡി എഫ് സ്ഥാനാർഥികളുടെ വിജയത്തിനായി ഇന്ത്യൻ ഓവർസീസ് കോൺഗ്രസ്‌ (യുകെ) കേരള ചാപ്റ്റർ മിഡ്ലാന്ഡ്സ് ക്യാമ്പയിൻ കമ്മിറ്റിയുടെ നേതൃത്വത്തിൽ പ്രചാരണ പ്രവർത്തനങ്ങൾ ശക്തമാക്കുന്നു. ഇതിന്റെ ഭാഗമായി ഏപ്രിൽ 2, വ്യാഴാഴ്ച യു ഡി എഫ് പ്രചാരണ വീഡിയോ ഗാനം സമൂഹമാധ്യമങ്ങൾ മുഖേന പുറത്തിറക്കുമെന്ന് കമ്മിറ്റി അറിയിച്ചു.

കേരളത്തിലും വിദേശ രാജ്യങ്ങളിലുമായി വിവിധ യു ഡി എഫ് നേതാക്കൾ സംരംഭത്തിന് ആശംസകളും പിന്തുണയും അറിയിച്ചിട്ടുണ്ട്. കഴിഞ്ഞ 10 വർഷമായി ഇടതുപക്ഷ സർക്കാർ തുടർന്നു വരുന്ന ജനദ്രോഹ നയങ്ങൾ വിവരിച്ചുകൊണ്ടും മാറ്റത്തിനായുള്ള ആഹ്വാനം ഉയർത്തിക്കൊണ്ടുമാണ് ഗാനം ഒരുക്കിയിരിക്കുന്നത്.

യു കെയിലെ പ്രമുഖ കോൺഗ്രസ്‌ സംഘടനാ നേതാവും സിനിമ സംവിധായകൻ, നിർമ്മാതാവ്, ഗാനരചയിതാവ് എന്നീ നിലകളിൽ ശ്രദ്ധേയനുമായ മുൻ അധ്യാപകൻ ഫിലിപ്പ് കെ ജോൺ ആണ് ഗാനരചന നിർവഹിച്ചിരിക്കുന്നത്. സംഗീതം ഒരുക്കിയത് ഫെമിൻ ഫ്രാൻസിസ്. പ്രശസ്ത യുവഗായികയും സീ കേരളം ‘സ രി ഗ മ’ സീസൺ 3 മത്സരാർത്ഥിയും ആലുവ സ്വദേശിനിയുമായ ശ്രദ്ധ ദിനേശാണ് ഗാനം ആലപിച്ചിരിക്കുന്നത്. ജോസഫ് പി ടി (ഓർക്കസ്ട്രേഷൻ), അരുൺ കെ പി (മിക്സിങ്), മെട്രോ സ്റ്റുഡിയോ എന്നിവരാണ് മറ്റ് അണിയറ പ്രവർത്തകർ.

ഐഒസി (യുകെ) കേരള ചാപ്റ്റർ മിഡ്ലാന്ഡ്സ് ക്യാമ്പയിൻ കമ്മിറ്റിയുടെ നേതൃത്വത്തിൽ രൂപീകരിച്ച കർമ്മസേനയും സോഷ്യൽ മീഡിയ/വാർ റൂം ടീമും 140 മണ്ഡലങ്ങളിലെയും യു ഡി എഫ് സ്ഥാനാർഥികൾക്കായി ശക്തമായ പ്രചാരണം കഴിഞ്ഞ ദിവസങ്ങളായി നടത്തിവരുന്നു. തുടർന്നുള്ള ദിവസങ്ങളിൽ വിവിധ മണ്ഡലങ്ങളെ അടിസ്ഥാനമാക്കി അവലോകനങ്ങളും ചർച്ചകളും സംഘടിപ്പിക്കുമെന്ന് ക്യാമ്പയി‍ൻ കമ്മിറ്റി സംഘാടകരായ ഷൈനു ക്ലെയർ മാത്യൂസ്, റോമി കുര്യാക്കോസ്, മണികണ്ഠൻ ഐക്കാട്, സോണി ചാക്കോ, മിഥുൻ മോഹൻ, സൈമൺ ചെറിയാൻ, ഷിജോ, അനുരാഗ് എ ആർ എന്നിവർ അറിയിച്ചു.

“പടയൊരുക്കം – മാറ്റത്തിനായി ഒരുമിക്കാം” എന്ന സന്ദേശവുമായി 140 മണ്ഡലങ്ങളിലെയും യു ഡി എഫ് സ്ഥാനാർഥികൾക്ക് പിന്തുണ ഉറപ്പാക്കുകയാണ് ഈ ക്യാമ്പയിൻ ലക്ഷ്യം. പ്രവാസി സമൂഹത്തിന്റെ സജീവ പങ്കാളിത്തം ഉറപ്പാക്കുന്നതിനായി സോഷ്യൽ മീഡിയ പ്ലാറ്റ്ഫോമുകളിലൂടെ വീഡിയോ വ്യാപകമായി പ്രചരിപ്പിക്കണമെന്നും കമ്മിറ്റി അഭ്യർത്ഥിച്ചു.

കേരളത്തിലെ രാഷ്ട്രീയ മാറ്റത്തിനായുള്ള പ്രചാരണത്തിന് കൂടുതൽ ശക്തി പകരുന്നതായിരിക്കും ഈ വീഡിയോ ഗാനമെന്ന് സംഘാടകർ വ്യക്തമാക്കി. എല്ലാവരും വീഡിയോ കാണുകയും സമൂഹമാധ്യമങ്ങളിൽ പോസ്റ്റ് ചെയ്യുകയും ഷെയർ ചെയ്യുകയും ചെയ്യണമെന്ന് അഭ്യർത്ഥിച്ചു.

“കേരളം ജയിക്കും, യു ഡി എഫ് നയിക്കും” എന്ന മുദ്രാവാക്യത്തോടെയാണ് ക്യാമ്പയിൻ മുന്നോട്ട് പോകുന്നത്.

റജി നന്തികാട്ട്

ലണ്ടൻ : ലണ്ടനിൽ യുഡിഎഫ് (യുകെ ) ഘടകം ഈസ്റ്റ് ലണ്ടനിലെ ബാർക്കിങ് റോഡിൽ ശ്രീ നാരായണ ഗുരുമിഷൻ ഹാളിൽ സംഘടിപ്പിച്ച ഇലക്ഷൻ ക്യാമ്പയിൻ ” പുതുയുഗ കേരളം ” ജന പങ്കാളിത്തം കൊണ്ട് ഗംഭീര വിജയമായി. 2026 മാർച്ച് 29 ന് വൈകുന്നേരം 6 മണിക്ക് ആരംഭിച്ച യോഗത്തിൽ ഐ ഒ സി (യുകെ) കേരള ചാപ്റ്റർ പ്രസിഡണ്ട് സുജു ഡാനിയേൽ അധ്യക്ഷത വഹിച്ചു. യോഗം ഉദ്‌ഘാടനം കെപിസിസി പ്രസിഡണ്ട് അഡ്വ. സണ്ണി ജോസഫ് ഓൺലൈൻ വഴി നിർവഹിച്ചു. ശ്രീ പാണക്കാട് മുനവ്വർ അലി തങ്ങൾ, യൂത്ത് കോൺഗ്രസ് പത്തനംതിട്ട ജില്ല പ്രസിഡണ്ട് വിജയ് ഇന്ദുചൂഡൻ എന്നിവർ ഓൺലൈൻ വഴി ആശംസകൾ നേർന്നു. ഈസ്റ്റ് ഹാം കൗൺസിലർ ഇമാം ഉൽ ഹഖ് , കെ എം സി സി നേതാവായ കരീം മാഷ്, ഐഒസി നേതാക്കളായ ഡോ. ജോഷി ജോസ്, അപ്പാ ഗഫൂർ, അഷറഫ് അബ്ദുള്ള, ഷൈനു മാത്യു, റോണി എം ജേക്കബ്, ഗിരി മാധവൻ , ഹിഷാം ഇർഷാദ് ,നജീബ്, യൂത്ത് വിങ് നേതാക്കളായ എഫ്രേം സാം, അഡ്വ. ബിബിൻ ബോബച്ചൻ, റസ്തർ, അഡ്വ. സാബിത് എന്നിവർ ആശംസകൾ നേർന്ന് സംസാരിച്ചു.

ഉദ്‌ഘാടന പ്രസംഗത്തിൽ കെപിസിസി പ്രസിഡണ്ട് അഡ്വ. സണ്ണി ജോസഫ് യുഡിഎഫ് വിജയത്തിനായി യുഡിഎഫ് (യുകെ ) ഘടകം നടത്തുന്ന പ്രവർത്തനങ്ങൾ അഭിനന്ദനാർഹമാണെന്ന് സൂചിപ്പിച്ചു. വിവിധ മേഖലകളിൽ നിന്നുള്ള യുഡിഎഫ് പ്രവർത്തകരും സമൂഹത്തിലെ പ്രമുഖരും യോഗത്തിൽ പങ്കെടുത്തു. കഴിഞ്ഞ പത്ത് വർഷമായി കേരളത്തിൽ നടക്കുന്ന ദുർഭരണം അവസാനിപ്പിക്കേണ്ടത് എത്ര പ്രാധാന്യം നിറഞ്ഞതാണെന്ന് പ്രാസംഗികർ തെളിവ് സഹിതം വിവരിച്ചത് കേൾവിക്കാർ ഞെട്ടലോടെയാണ് ശ്രവിച്ചത്. ഓരോ പ്രവാസിയായ യുഡിഎഫ് പ്രവർത്തകനും തങ്ങളാൽ കഴിയുന്ന രീതിയിൽ പ്രവർത്തിക്കാമെന്ന് തീരുമാനമെടുത്തത് യോഗത്തിന് ആവേശം പകർന്നു. ഈസ്റ്റ് ലണ്ടൻ യൂണിവേഴ്സിറ്റി സ്റ്റുഡന്റ് ഓഫീസർ ആയി തിരഞ്ഞെടുക്കപ്പെട്ട അഭിലാഷ് റോയിയെ പുരസ്‍കാരം നൽകി ആദരിച്ചു. റജി നന്തികാട്ട് നന്ദി അർപ്പിച്ചതോടെ യോഗം അവസാനിച്ചു.

യോഗത്തിന്റെ വിജയത്തിനായി പ്രസാദ് കൊച്ചുവിള, സന്തോഷ് ബെഞ്ചമിൻ, ജോർജ് തോമസ് ഐ ഒ സി (യുകെ ) കേരള ചാപ്റ്റർ ഈസ്റ്റ് ലണ്ടൻ യൂണിറ്റ് പ്രവർത്തകരായ ഷൈനു മാത്യു , ഇജാസ് ബിൻ മുഹമ്മദ് , ജിബു സാബു, പ്രദീപ് നായർ, എബ്രഹാം വാഴൂർ, ഹിഷാം ഇർഷാദ്, ഹിജിനാസ് ,ഷിജൻ ജോസ് , നിതിൻ തോമസ്, സുജ ആർതർ തുടങ്ങിയവർ നേതൃത്വം നൽകി

റോമി കുര്യാക്കോസ്

യൂറോപ്പ്: കേരള നിയമസഭ തെരഞ്ഞെടുപ്പിനോടനുബന്ധിച്ച് യു ഡി എഫ് യൂറോപ്പ് സംഘടിപ്പിച്ച ‘മീറ്റ് ദ കാൻഡിഡേറ്റ്’ പരിപാടി പ്രവാസി സമൂഹത്തിന്റെ സജീവ പങ്കാളിത്തത്തോടെ ശ്രദ്ധേയമായി സമാപിച്ചു. ഞായറാഴ്ച ഇന്ത്യൻ സമയം രാത്രി 10ന് ഓൺലൈനായി ആരംഭിച്ച പരിപാടി യൂറോപ്പിലെയും മറ്റു വിവിധ രാജ്യങ്ങളിലെയും യുഡിഫ് നേതാക്കന്മാരുടെയും ജനാതിപത്യ വിശ്വാസികളുടെയും വലിയ പങ്കാളിത്തം കൊണ്ടു ശ്രദ്ധേയമായി.

യുഡിഫ് യൂറോപ്പ് ചെയർമാൻ സിറോഷ് ജോർജ് അധ്യക്ഷത വഹിച്ചു. കൺവീനർ സണ്ണി ജോസഫ് സ്വാഗതം ആശംസിച്ചു. യു ഡി എഫ് യൂറോപ്പ് വൈസ് ചെയർമാൻ മുഹമ്മദ് അലി കൂനാരി, ജോയിന്റ് കൺവീനർ ടോമി തൊണ്ടംകുഴി, റോമി കുര്യാക്കോസ് എന്നിവർ ഏകോപനമൊരുക്കി. അശ്വതി നായർ നന്ദി അർപ്പിച്ചു.

പരിപാടിയിൽ വിവിധ നിയോജക മണ്ഡലങ്ങളിൽ നിന്നുള്ള യു ഡി എഫ് സ്ഥാനാർത്ഥികൾ പങ്കെടുത്തു. എ പി അനിൽകുമാർ എം എൽ എ (വണ്ടൂർ), ആര്യാടൻ ഷൗക്കത്ത് എം എൽ എ (നിലമ്പൂർ), മാത്യു കുഴൽനാടൻ എം എൽ എ (മൂവാറ്റുപുഴ), ചാണ്ടി ഉമ്മൻ എം എൽ എ (പുതുപ്പള്ളി), അപ്പു ജോൺ ജോസഫ് (തൊടുപുഴ), പഴകുളം മധു (റാന്നി), ജ്യോതികുമാർ ചാമക്കാല (പത്തനാപുരം), ഷിബു തെക്കുംപുറം (കോതമംഗലം), വി എസ് ജോയ് (തവനൂർ), എ ഡി തോമസ് (ആലപ്പുഴ) എന്നിവർ തങ്ങളുടെ മണ്ഡലങ്ങളിലെ വികസന കാഴ്ചപ്പാടുകളും പ്രധാന വിഷയങ്ങളും വിശദീകരിച്ചു.

കേരളത്തിലെ രാഷ്ട്രീയ സാഹചര്യങ്ങൾ വിലയിരുത്തിയ സ്ഥാനാർഥികൾ വരാനിരിക്കുന്ന തെരഞ്ഞെടുപ്പിൽ യു ഡി എഫിന് വിജയം ഉറപ്പാണെന്ന് ആത്മവിശ്വാസം പ്രകടിപ്പിക്കുകയും പ്രവാസികളുടെ പിന്തുണ നിർണായകമാണെന്നും വ്യക്തമാക്കി.

പ്രവാസി മലയാളികൾ ഉയർത്തിയ ചോദ്യങ്ങൾക്കും നിർദ്ദേശങ്ങൾക്കും സ്ഥാനാർത്ഥികൾ നേരിട്ട് മറുപടി നൽകിയതും പരിപാടിയുടെ പ്രധാന ആകർഷണമായി. സാമൂഹ്യമാധ്യമങ്ങളും ഓൺലൈൻ പ്ലാറ്റ്ഫോമുകളും ഉപയോഗിച്ച് തെരഞ്ഞെടുപ്പ് പ്രചാരണത്തിന് കൂടുതൽ ശക്തി നൽകുന്നതിൽ ഇത്തരം പരിപാടികൾ നിർണായകമാണെന്ന് പങ്കെടുത്തവർ അഭിപ്രായപ്പെട്ടു.

പ്രവാസി സമൂഹത്തിന്റെ പങ്കാളിത്തം കൂടുതൽ ശക്തിപ്പെടുത്തുക എന്ന ലക്ഷ്യത്തോടെ സംഘടിപ്പിച്ച പരിപാടി വലിയ വിജയമായി മാറിയതായി യു ഡി എഫ് യൂറോപ്പ് ചെയർമാൻ സിറോഷ് ജോർജ്, കൺവീനർ സണ്ണി ജോസഫ് എന്നിവർ അറിയിച്ചു.

കേരളത്തിലെ തെരഞ്ഞെടുപ്പ് പോരാട്ടത്തിൽ പ്രവാസികളുടെ സാന്നിധ്യവും പിന്തുണയും കൂടുതൽ ശക്തമാകുന്നതിന്റെ സൂചനയായി ഈ പരിപാടി മാറിയതായും സംഘാടകർ കൂട്ടിച്ചേർത്തു.

പ്രവാസ ലോകത്തെ യുഡിഫ് നേതാക്കന്മാരായ അനുരാ മത്തായി, ജോയ് കൊച്ചാട്ട്, യു എ നസീർ, ഷൈനു ക്ലെയർ മാത്യൂസ്, സണ്ണി വെളിയത്ത്, മുഹമ്മദ്‌ കോട്ടക്കൽ, അബ്ദുൽ അസീസ്, ടോം, ബോസ്സ്, യൂറോപ്പിലെ മുതിർന്ന മാധ്യമ പ്രവർത്തകരായ ജോസ് കുമ്പിളുവേലിൽ, അപ്പച്ചൻ കണ്ണഞ്ചിറ എന്നിവരും പരിപാടിയുടെ ഭാഗമായി പങ്കെടുത്തു സംസാരിച്ചു.

റോമി കുര്യാക്കോസ്

സ്കോട്ട് ലൻഡ്: യു കെയിലെ കുടിയേറ്റക്കാർ നേരിടുന്ന ഏറ്റവും വലിയ പ്രതിസന്ധിയായ ഐ എൽ ആർ നിയമമാറ്റങ്ങളെക്കുറിച്ചുള്ള ഗൗരവകരമായ ആശങ്കകൾ ഐ ഒ സി (യുകെ) – സ്കോട്ട്ലൻഡ് പ്രതിനിധികൾ സ്കോട്ടിഷ് നാഷണൽ പാർട്ടി പ്രതിനിധി മാർട്ടിൻ ഡേയെ അറിയിച്ചു. പി ആറിന് അപേക്ഷിക്കാൻ നിലവിലെ 5 വർഷത്തെ കാലാവധി 10 വർഷമായി ഉയർത്തുന്നതടക്കമുള്ള ഗവൺമെന്റ് നീക്കങ്ങൾക്കെതിരെ ശക്തമായ പ്രതിഷേധമാണ് പ്രവാസികൾക്കിടയിലുള്ളതെന്നും ഇതുസംബന്ധിച്ച് ഐ ഒ സി സ്കോട്ട്ലൻഡ് യൂണിറ്റ് തയ്യാറാക്കിയ ഔദ്യോഗിക നിവേദനം ഭാരവാഹികൾ ചേർന്ന് മാർട്ടിൻ ഡേയ്ക്ക് കൈമാറി പിന്തുണ അഭ്യർത്ഥിച്ചു. നിലവിൽ യു കെയിൽ ഉള്ളവർക്ക് മുൻകാല പ്രാബല്യത്തോടെ നിയമങ്ങൾ മാറുന്നത് നീതിനിഷേധമാണെന്നും, പാർലമെന്റിൽ തങ്ങളുടെ ശബ്ദമായി മാറണമെന്നും സംഘടന അദ്ദേഹത്തെ ബോധ്യപ്പെടുത്തി.

മെയ്‌ 7ന് നടക്കുന്ന സ്കോട്ടിഷ് പാർലമെന്റ് തിരഞ്ഞെടുപ്പിന്റെ ഭാഗമായി ലിൻലിത്‌ഗോ & ഫാൽകിൾർക് പാർലിമെന്റ് മണ്ഡലത്തിലെ സ്കോട്ടിഷ് നാഷണൽ പാർട്ടി സ്ഥാനാർഥിയായ മാർട്ടിൻ ഡേയുടെ തിരഞ്ഞെടുപ്പ് പ്രചരണങ്ങളിൽ സജീവമായി പങ്കെടുക്കുന്നയത്തിനിടയിലാണ് ഐ ഒ സി (യുകെ) – സ്കോട്ട്‌ലൻഡ് യൂണിറ്റ് പ്രസിഡന്റ് മിഥുൻ മോഹനൻ, ജനറൽ സെക്രട്ടറി സുനിൽ പായിപ്പാട്, എക്സിക്യൂട്ടീവ് കമ്മിറ്റി അംഗം ബിജു വർഗീസ്, കേരള ചാപ്റ്റർ കമ്മിറ്റി അംഗം അഡ്വ. ഷോബിൻ സാം, ട്രൂപേഷ് കൃഷ്ണ എന്നിവരുടെ നേതൃത്വത്തിൽ പ്രവാസി സമൂഹത്തിന്റെ ആശങ്കകൾ അറിയിക്കുകയും നിവേദനം സമർപ്പിച്ചു പിന്തുണ തേടിയതും.

സ്കോട്ട്ലൻഡിലെ പ്രവാസി മലയാളി സമൂഹവുമായി ദീർഘകാല അടുപ്പം പുലർത്തുന്ന മാർട്ടിൻ ഡേ പ്രവാസി കുടിയേറ്റക്കാരുടെ ആശങ്കകൾ അനുഭവപൂർവ്വം പരിഗണിക്കാമെന്ന ഉറപ്പും അറിയിച്ചിട്ടുണ്ട്. മാർട്ടിൻ ഡേ ഉൾപ്പടെ 5 സ്ഥാനാർഥികളാണ് മണ്ഡലത്തിൽ മത്സാരിക്കുന്നത്. വർഷങ്ങൾക്ക് മുൻപ് യു കെയിലേക്ക് കുടിയേറിയ മൂവാറ്റുപുഴ സ്വദേശി നിതിൻ ചന്ദ് ആണ് മാർട്ടിൻ ഡേയുടെ സഹദർമ്മിണി.

രണ്ട് ദിവസങ്ങളിലായി നടന്ന പ്രചരണത്തിലൂടെ ഇതിനോടകം 900 ഓളം വീടുകളിൽ നേരിട്ടെത്തി ലീഫ്‌ലെറ്റുകൾ വിതരണം ചെയ്യുന്നതിനും വോട്ടർമാരുമായി സംവദിക്കാനും സംഘത്തിന് സാധിച്ചു. വരും ദിവസങ്ങളിൽ യൂണിറ്റ് വൈസ് പ്രസിഡന്റ് അഞ്ജു സാബിർ, എക്സിക്യൂട്ടീവ് അംഗങ്ങളായ ഡയാന പോളി, അമ്പിളി പ്രദീഷ് എന്നിവരുടെ നേതൃത്വത്തിൽ വനിതാ പ്രതിനിധികളും പ്രവർത്തനങ്ങളിൽ സജീവമാകും.

റോമി കുര്യാക്കോസ്

യൂറോപ്പ്: കേരള നിയമസഭ തെരഞ്ഞെടുപ്പിനോടനുബന്ധിച്ച് പ്രവാസി സമൂഹത്തെ സജീവമായി ഉൾപ്പെടുത്തുന്നതിന്റെ ഭാഗമായി യു ഡിഎഫ് യൂറോപ്പ് സംഘടിപ്പിക്കുന്ന ‘മീറ്റ് ദ കാൻഡിഡേറ്റ്’ പരിപാടി ഈ  ഞായറാഴ്ച (29/03/2026) ഇന്ത്യൻ സമയം രാത്രി 10ന് നടക്കും. യുകെ സമയം വൈകിട്ട് 4.30നും യൂറോപ്പ് സമയം വൈകിട്ട് 5.30നും ആരംഭിക്കുന്ന പരിപാടി ഓൺലൈൻ പ്ലാറ്റ്ഫോമായ സൂം വഴി സംഘടിപ്പിക്കപ്പെടും.

പരിപാടിയുടെ ഔദ്യോഗിക ഉദ്ഘാടനം കോൺഗ്രസ്‌ പാർട്ടി വർക്കിങ് കമ്മിറ്റി സ്ഥിരം ക്ഷണിതാവും യു ഡി എഫ് ക്യാമ്പയിൻ കമ്മിറ്റി ചെയർമാനുമായ നേതാവുമായ രമേശ് ചെന്നിത്തല എം.എൽ.എ നിർവഹിക്കും. കേരളത്തിലെ വിവിധ നിയോജക മണ്ഡലങ്ങളിൽ നിന്നുള്ള പ്രമുഖ യു ഡിഎഫ് സ്ഥാനാർത്ഥികളും നേതാക്കളും പരിപാടിയിൽ പങ്കെടുക്കുകയും പ്രവാസി മലയാളികളുമായി നേരിട്ട് സംവദിക്കുകയും ചെയ്യും.

പങ്കെടുക്കുന്ന പ്രധാന നേതാക്കളിൽ അൻവർ സാദത്ത് (ആലുവ), വി എസ് ജോയ് (തവനൂർ), സന്ദീപ് വാര്യർ (തൃക്കരിപ്പൂർ), കെ എം അഭിജിത്ത് (നാദാപുരം), മനോജ് മൂത്തേടൻ (പെരുമ്പാവൂർ), ഷിബു തെക്കുംപുറം (കോതമംഗലം), എ ഡി തോമസ് (ആലപ്പുഴ), ചാണ്ടി ഉമ്മൻ (പുതുപ്പള്ളി), പഴകുളം മധു (റാന്നി), എ.പി അനിൽകുമാർ (വണ്ടൂർ), അപ്പു ജോൺ ജോസഫ് (തൊടുപുഴ), ആര്യാടൻ ഷൗക്കത്ത് (നിലമ്പൂർ), പി.കെ ബഷീർ (എറനാട്), കെ പ്രവീൺകുമാർ (കൊയിലാണ്ടി), രമേശ് പിഷാരടി (പാലക്കാട്) എന്നിവർ ഉൾപ്പെടുന്നു.

കേരളത്തിലെ തെരഞ്ഞെടുപ്പ് സാഹചര്യങ്ങൾ, മണ്ഡലങ്ങളിലെ പ്രധാന വിഷയങ്ങൾ, വികസന കാഴ്‌ചപ്പാടുകൾ തുടങ്ങിയവയെക്കുറിച്ച് സ്ഥാനാർത്ഥികൾ പരിപാടിയിൽ വിശദീകരിക്കും. പ്രവാസി സമൂഹത്തിന്റെ ചോദ്യങ്ങൾക്കും നിർദ്ദേശങ്ങൾക്കും നേരിട്ട് മറുപടി നൽകുന്നതിനുള്ള അവസരവും പരിപാടി ഒരുക്കുന്നുണ്ട്.

പ്രവാസി മലയാളികളുടെ പങ്കാളിത്തം ശക്തിപ്പെടുത്തുകയും സാമൂഹ്യമാധ്യമങ്ങളിലൂടെയും ഓൺലൈൻ ഇടപെടലുകളിലൂടെയും തെരഞ്ഞെടുപ്പ് പ്രചാരണത്തിന് കൂടുതൽ ഊർജം നൽകുകയും ചെയ്യുക എന്നതാണ് പരിപാടിയുടെ പ്രധാന ലക്ഷ്യമെന്ന് യു ഡി എഫ് യൂറോപ്പ് ചെയർമാൻ സിറോഷ് ജോർജ്, കൺവീനർ സണ്ണി ജോസഫ് എന്നിവർ പറഞ്ഞു.

പരിപാടിയിൽ പങ്കെടുക്കാൻ ആഗ്രഹിക്കുന്നവർക്ക് സൂം ലിങ്ക് വഴി പ്രവേശിക്കാം.

Zoom Link:
https://us06web.zoom.us/j/81109719244?pwd=BcabjEPC7SIbryFdYJuSy68QXtbL3b.1

Meeting ID: 811 0971 9244
Passcode: udfeurope

ലണ്ടൻ. കേരളത്തിലെ പൊതുതെരഞ്ഞെടുപ്പിൽ യുഡിഎഫ് സ്ഥാനാർത്ഥികളെ വിജയിപ്പിക്കുന്നതിനായുള്ള പ്രചാരണ പ്രവർത്തനങ്ങളുടെ ഭാഗമായി ലണ്ടൻ ഈസ്റ്റ് ഹാമിൽ ഇന്ന് (മാർച്ച് 29) യുഡിഎഫ് പുതുയുഗ കേരളം ഇലക്ഷൻ കൺവെൻഷൻ നടക്കും. ഇന്ന് വൈകിട്ട് 5 ന് ആരംഭിക്കുന്ന സമ്മേളനം.ഇന്ത്യൻ ഓവർസീസ് കോൺഗ്രസ്‌, കെഎംസിസി, കേരള പ്രവാസി കോൺഗ്രസ് (ജേക്കബ്), ആർഎസ്പി തുടങ്ങിയ സംഘടനകളുടെ സംയുക്ത വേദിയായ യുഡിഎഫ് യുകെയാണ് കൺവെൻഷൻ നടത്തുന്നത്. ഈസ്റ്റ്‌ ഹാം ബാർക്കിങ് റോഡ് (E6 3BP) ശ്രീ നാരായണ ഗുരു മിഷൻ ഹാളിൽ നടക്കുന്ന കൺവെൻഷൻകെപിസിസി പ്രസിഡന്റ് ഓൺലൈനായി ഉദ്ഘാടനം ചെയ്യും. കേരളത്തിൽ നിന്നുള്ള പ്രമുഖ
രാഷ്ട്രീയ നേതാക്കളും യു കെ യിലെ വിവിധ രംഗങ്ങളിലെ പ്രമുഖരും പങ്കെടുക്കും.

“പുതു യുഗ കേരളം” എന്ന പേരിൽ ആരംഭിച്ച തിരഞ്ഞെടുപ്പ് പ്രചാരണ പ്രവർത്തനങ്ങളുടെ ഭാഗമായി നടക്കുന്ന ഈ സമ്മേളനത്തിൽ മലയാളി സമൂഹത്തിന്റെ സാന്നിധ്യം നിർണായകമാണെന്ന് സംഘാടകർ അറിയിച്ചു. കൺവെൻഷൻ വിജയകരമാക്കാൻ ഏവരും പങ്കുചേരണമെന്ന് ഐഒസി യുകെ കേരള ചാപ്പർ പ്രസിഡന്റ് സുജു കെ ഡാനിയേൽ, കെ എം സി സി പ്രസിഡന്റ് അസ്സനാർ കുന്നുമ്മേൽ ജനറൽ സെക്രട്ടറി സഫീർ പേരാമ്പ്ര,ഐ ഓ സി ഇലക്ഷൻ ക്യാമ്പയിൻ കമ്മിറ്റി കൺവീനർ ബിജു കുളങ്ങര എന്നിവർ അറിയിച്ചു.

കൺവെൻഷൻ നടക്കുന്ന സ്ഥലം: Sree Narayanana Guru Mission Hall, 16 Barking Road, E6 3BP, യുകെ.

ലണ്ടൻ: ക്രോയ്ഡണിലെ യുവജനങ്ങളുടെ വൈവിധ്യമാർന്ന കഴിവുകൾ ആഘോഷിക്കുന്നതിനും അവർക്ക് ഐക്യദാർഢ്യം പ്രഖ്യാപിക്കുന്നതിനുമായി ‘ലവ് നോട്ട് ഹേറ്റ്’ (Love not Hate) എന്ന പേരിൽ ബൃഹത്തായ സാംസ്‌കാരിക പരിപാടി സംഘടിപ്പിക്കുന്നു.2026 മാർച്ച് 28 ശനിയാഴ്ച വൈകുന്നേരം 5 മണി മുതൽ 10 മണി വരെ ക്രോയ്ഡണിലെ റോയൽ റസ്സൽ സ്കൂളിലാണ് (Royal Russell School) ചടങ്ങുകൾ നടക്കുക.

യുവജനങ്ങളുടെ മാനസികാരോഗ്യം മെച്ചപ്പെടുത്തുന്നതിനും, അക്രമങ്ങൾ ബാധിച്ചവർക്ക് ആദരവർപ്പിക്കുന്നതിനുമായാണ് ഈ പരിപാടി വിഭാവനം ചെയ്തിരിക്കുന്നത്. 150-ലധികം യുവപ്രതിഭകൾ തങ്ങളുടെ കലാപരമായ കഴിവുകൾ ഈ വേദിയിൽ പ്രകടിപ്പിക്കും.

പ്രധാന ആകർഷണങ്ങൾ:

മതസൗഹാർദ്ദ പ്രാർത്ഥന: മതസൗഹാർദ്ദം വിളിച്ചോതിക്കൊണ്ട് വിവിധ മതവിഭാഗങ്ങളിൽ നിന്നുള്ള അഞ്ച് മതനേതാക്കൾ ഒരുമിച്ച് നടത്തുന്ന പ്രാർത്ഥനയോടെ ചടങ്ങുകൾ ആരംഭിക്കും.

പ്രമുഖരുടെ സാന്നിധ്യം: ബ്രിട്ടീഷ് പോലീസിംഗ് മന്ത്രി സാറാ ജോൺസ് എം.പി (Sarah Jones MP), ക്രോയ്ഡൺ സിവിക് മേയർ, എക്സിക്യൂട്ടീവ് മേയർ എന്നിവർ പരിപാടിയിൽ മുഖ്യാതിഥികളായി പങ്കെടുക്കും.

വിദഗ്ദ്ധ ചർച്ച (Panel Session): യുവാക്കളെ ബാധിക്കുന്ന അക്രമങ്ങൾക്കെതിരെ കമ്മ്യൂണിറ്റി അടിസ്ഥാനത്തിലുള്ള പരിഹാരങ്ങൾ ചർച്ച ചെയ്യുന്ന പ്രത്യേക സെഷൻ നടക്കും. ലണ്ടൻ മേയർ സാദിഖ് ഖാന്റെ കീഴിലുള്ള വയലൻസ് റിഡക്ഷൻ യൂണിറ്റ് (Violence Reduction Unit) പ്രതിനിധികൾ, മെട്രോപൊളിറ്റൻ പോലീസ് ഉദ്യോഗസ്ഥർ, ബിസിനസ് പ്രമുഖർ, ജീവിതാനുഭവങ്ങൾ പങ്കുവെക്കുന്ന യുവാക്കൾ എന്നിവർ ഇതിൽ സംബന്ധിക്കും.

പ്രത്യേക അതിഥി: സംരംഭകയും ‘ദി അപ്രന്റീസ്’ (The Apprentice) ഫൈനലിസ്റ്റുമായ അനിസ ഖാൻ (Anisa Khan) പ്രത്യേക അതിഥിയായി ചടങ്ങിലെത്തും.

എൻ.എച്ച്.എസ് (NHS) പ്രതിനിധികളും ആരോഗ്യ-ക്ഷേമ മേഖലയിലുള്ള പ്രമുഖരും പരിപാടിയുടെ ഭാഗമാകും. ബോറി അക്കാദമി (The Boury Academy), 808 ഡാൻസ് (808 Dance), ബോളിബീറ്റ് ലണ്ടൻ(BollyBbeat London) യുകെസിപിഎ (UKCPA) തുടങ്ങി നിരവധി കലാ-കായിക സംഘടനകളും പരിപാടിയിൽ സഹകരിക്കുന്നുണ്ട്.

കൂടുതൽ വിവരങ്ങൾക്കും രജിസ്‌ട്രേഷനും www.msfoundations.co.uk എന്ന വെബ്സൈറ്റ് സന്ദർശിക്കാവുന്നതാണ്.

റോമി കുര്യാക്കോസ്

യൂറോപ്പ്: നിർണ്ണായകമായ കേരള നിയമസഭ തെരഞ്ഞെടുപ്പ് പ്രചരണാർത്ഥം യു ഡി എഫ് യൂറോപ്പ് സംഘടിപ്പിച്ച ഓൺലൈൻ തെരഞ്ഞെടുപ്പ് ക്യാമ്പയിൻ ഉദ്ഘാടനം ആവേശകരമായി. ഞായറാഴ്ച ഇന്ത്യൻ സമയം രാത്രി 10 മണിക്ക് ആരംഭിച്ച പരിപാടിയിൽ യൂറോപ്പ്‌, മറ്റു വിവിധ രാജ്യങ്ങളിൽ നിന്നുള്ള നിരവധി യു ഡി എഫ് നേതാക്കളും പ്രവർത്തകരും ആവേശത്തോടെ പങ്കെടുത്തു.

പരിപാടിയുടെ ഔദ്യോഗിക ഉദ്ഘാടനം പ്രതിപക്ഷ നേതാവ് വി ഡി സതീശൻ എം എൽ എ നിർവഹിച്ചു. കേരളത്തിൽ ജനങ്ങളുടെ ജീവിതത്തെ ബാധിക്കുന്ന അടിസ്ഥാന പ്രശ്നങ്ങൾ പരിഹരിക്കാൻ ഭരണ മാറ്റം അനിവാര്യമാണെന്ന് അദ്ദേഹം ഉദ്ഘാടന പ്രസംഗത്തിൽ വ്യക്തമാക്കി. പ്രവാസികളുടെ പിന്തുണ തെരഞ്ഞെടുപ്പിൽ നിർണായക ശക്തിയായിരിക്കുമെന്ന് അദ്ദേഹം കൂട്ടിച്ചേർത്തു. ഈ ജനവിരുദ്ധ സർക്കാരിനെ താഴെയിറക്കാൻ 140 മണ്ഡലങ്ങളിലെയും യു ഡി എഫ് സ്ഥാനർഥികൾക്കായി പ്രവാസികൾ ഒത്തൊരുമിക്കണമെന്നും സാധിക്കുന്ന എല്ലാവരും നാട്ടിലെത്തി വോട്ട് രേഖപ്പെടുത്തണമെന്നും അദ്ദേഹം അഭ്യർത്ഥിച്ചു. യു ഡി എഫ് നേതൃത്വത്തിലുള്ള സർക്കാർ നൂറു സീറ്റുമായി അധികാരത്തിലേറും എന്നും അദ്ദേഹം കൂട്ടിച്ചേർത്തു.

യുഡിഫ് യൂറോപ്പ് ചെയർമാൻ സിറോഷ് ജോർജ് അധ്യക്ഷത വഹിച്ചു. യുഡിഎഫ് യൂറോപ്പ് കൺവീനർ സണ്ണി ജോസഫ് സ്വാഗതം ആശംസിച്ചു. വൈസ് ചെയർമാൻ ഡോ. മുഹമ്മദ് അലി കൂനാരി, ജോയിന്റ് കൺവീനർ ടോമി തൊണ്ടംകുഴി, ബോബിൻ ഫിലിപ്പ്, റോമി കുര്യാക്കോസ് എന്നിവർ ഏകോപനമൊരുക്കി.

മുസ്ലിം യൂത്ത് ലീഗ് സംസ്ഥാന അധ്യക്ഷൻ സയ്യിദ് മുനവ്വർ അലി ഷിഹാബ് തങ്ങൾ, കോൺഗ്രസ്‌ നേതാവ് ആന്റോ ആന്റണി എം പി, ആർ എസ് പി നേതാവ് ഷിബു ബേബി ജോൺ എക്സ് എം എൽ എ, റോജി ജോൺ എം എൽ എ, ശ്രീനാദേവി കുഞ്ഞമ്മ തുടങ്ങി കേരളത്തിലെ പ്രമുഖ യു ഡി എഫ് നേതാക്കൾ പരിപാടിയിൽ പങ്കെടുത്തു സംസാരിച്ചു. നിലവിലെ ഭരണത്തിന്റെ വീഴ്ചകൾ ചൂണ്ടിക്കാട്ടിയും യു ഡി എഫ് മുന്നോട്ട് വയ്ക്കുന്ന ജനകീയ പദ്ധതികളും വികസന കാഴ്ചപ്പാടുകളും ആശയങ്ങളും നേതാക്കൾ അവരുടെ പ്രസംഗങ്ങളിൻ അവതരിപ്പിച്ചു.

ഐ ഒ സി ഗ്ലോബൽ കോർഡിനേറ്റർ അനുരാ മത്തായി, ഐ ഒ സി യൂറോപ്പ് വൈസ് ചെയർമാൻ സിറോഷ് ജോർജ്, വേൾഡ് കെഎംസിസി നേതാവ് യു എ നസീർ, ഐ ഒ സി സ്വിറ്റ്സർലൻഡ് നാഷണൽ പ്രസിഡന്റ്‌ ജോയ് കൊച്ചാട്ട്, കെ എം സി സി യൂറോപ്യൻ യൂണിയൻ നേതാക്കന്മാരായ ഡോ. മുഹമ്മദ് അലി കൂനാരി, അസീസ്, എം എ ജവാദ് , മുഹമ്മദ് കോട്ടക്കൽ, ഐ ഓ സി (യു കെ) – കേരള ചാപ്റ്റർ പ്രസിഡന്റ്റുമാരായ ഷൈനു ക്ലെയർ മാത്യൂസ്, സുജു കെ ഡാനിയേൽ, ഐ ഓ സി (അയർലണ്ട്) കേരള ചാപ്റ്റർ പ്രസിഡന്റ്‌ സാഞ്ചോ മുളവരിക്കൽ, കെഎംസിസി അയർലണ്ട് നേതാക്കന്മാരായ
ഫവാസ്, ഷഫീഖ്, പ്രവാസി കേരള കോൺഗ്രസ് (ജോസഫ്) പ്രതിനിധി ബോസ്സ്, മാധ്യമപ്രവർത്തകൻ ജോസ് കുമ്പിളുവേലിൽ, യൂറോപ്പിലെ വിവിധ രാജ്യങ്ങളിൽ നിന്നുള്ള പ്രവാസി യു ഡി എഫ് പ്രവർത്തകരായ നിതിൻ, മുജീബ്, ബേബി ലുക്കോസ്, അശ്വതി നായർ, ഇൻസൺ ജോസ്, ഷെഫീഖ്, സാഞ്ചോ ലൂസി, നവീൻ, ആദർശ്, നൗഫൽ, സെയ്ഫ്, ബിൻസ് വിൽ‌സൺ, ജോർജ് ജോസഫ്, ഷോബിൻ സാം തുടങ്ങിയവർ പങ്കെടുത്ത് സംസാരിച്ചത് പരിപാടിക്ക് കൂടുതൽ ഊർജവും വ്യാപ്തിയും നൽകി. സോഷ്യൽ മീഡിയയിലൂടെ പ്രചാരണ പ്രവർത്തനങ്ങൾ ശക്തിപ്പെടുത്തുകയും, ഓരോ നിയോജക മണ്ഡലങ്ങളിലും യു ഡി എഫ് സ്ഥാനാർത്ഥികളുടെ വിജയത്തിനായി ഏകോപിത പ്രവർത്തനം ഉറപ്പാക്കുകയും ചെയ്യുമെന്ന് സംഘാടകർ അറിയിച്ചു.

ക്യാമ്പയിന്റെ ഭാഗമായി അടുത്ത ദിവസങ്ങളിൽ ഓൺലൈൻ-ഓഫ്‌ലൈൻ സംയുക്ത പരിപാടികൾ, വോട്ടർമാരെ ലക്ഷ്യമാക്കി ബോധവത്കരണ പ്രവർത്തനങ്ങൾ, ഡിജിറ്റൽ പ്രചാരണങ്ങൾ എന്നിവ സംഘടിപ്പിക്കുമെന്ന്‌ യുഡിഫ് യൂറോപ്പ് കൺവീനർ സണ്ണി ജോസഫ് അറിയിച്ചു. യൂറോപ്പിലെ യു ഡി എഫ് പ്രവർത്തകരുടെ ഏകോപനവും പ്രവർത്തന ശേഷിയും ഈ തെരഞ്ഞെടുപ്പിൽ നിർണായക സ്വാധീനം ചെലുത്തുമെന്ന് നേതാക്കൾ വിലയിരുത്തി.

ഡിനു ഡൊമിനിക്

സാലിസ്ബറി: സാലിസ്ബറി മലയാളി അസ്സോസിയേഷൻ(എസ് എം എ) സംഘടിപ്പിക്കുന്ന സീന മെമ്മോറിയൽ എവർ റോളിങ്ങ് ട്രോഫിക്കായുള്ള ആറാമത് T10 ക്രിക്കറ്റ് ടൂർണ്ണമെന്റ് മെയ് 24ന് നടക്കും. എട്ടു ടീമുകൾ മാറ്റുരയ്ക്കുന്ന ടൂർണമെന്റിലെ വിജയികൾക്ക് ക്യാഷ് പ്രൈസായി 1200 പൗണ്ടും സീന മെമ്മോറിയൽ എവർ റോളിങ് ട്രോഫിയുമാണ് സമ്മാനമായി ലഭിക്കുക. രണ്ടാം സ്ഥാനക്കാർക്ക് അഞ്ഞൂറ് പൗണ്ട് ക്യാഷ് പ്രൈസും ട്രോഫിയുമാണ് സമ്മാനമായി ലഭിക്കുക. എട്ടു ടീമുകൾക്കായുള്ള രെജിസ്ട്രേഷൻ ആരംഭിച്ചു.

തുടർച്ചയായി ആറാം തവണയും സംഘടിപ്പിക്കുന്ന ക്രിക്കറ്റ് ടൂർണ്ണമെന്റ് റോംസിയിലെ വിശാലമായ ഹണ്ട്സ് ഫാം പ്ലെയിംഗ് ഫീൽഡ് ഗ്രൗണ്ടിലാകും നടക്കുക. പത്ത് വീതം ഓവറുകളിലായി രണ്ടു പിച്ചുകളിലായി നടക്കുന്ന മത്സരങ്ങൾ രാവിലെ എട്ട് മണിയോടെ തന്നെ ആരംഭിക്കും. മിതമായ നിരക്കിൽ നാടൻ വിഭവങ്ങളോട് കൂടിയ മുഴുവൻ സമയവും പ്രവർത്തിക്കുന്ന ഭക്ഷണ സ്റ്റാൾ (മട്ടാഞ്ചേരി കിച്ചൻ) സംഘാടകർ ഒരുക്കുന്നുണ്ട്.

പ്രസിഡന്റ് എം പി പത്മരാജ്, സെക്രട്ടറി ജിനോയിസ് തോമസ്, ട്രഷറർ ഷാൽമോൻ പങ്കെത്, സ്പോർട്ട്സ് കോർഡിനേറ്റർ നിഷാന്ത് സോമൻ തുടങ്ങിയവരുടെ നേതൃത്വത്തിലാണ് ടൂർണ്ണമെന്റിനായുള്ള മുന്നൊരുക്കങ്ങൾ നടക്കുന്നത്. ടൂർണമെന്റിനെ കുറിച്ചുള്ള കൂടുതൽ വിവരങ്ങൾക്ക് വിളിക്കുവാൻ 07383924042 (നിഷാന്ത്) എന്ന നമ്പറിൽ ബന്ധപ്പെടുക. ടൂർണമെന്റിന്റെ മനോഹരമായ ചിത്രങ്ങൾ ഒപ്പിയെടുക്കുവാൻ BTM ഫോട്ടോഗ്രാഫി ഇത്തവണയും രംഗത്തുണ്ട്.

അകാലത്തിൽ വിട്ടുപിരിഞ്ഞ എസ് എം എം മുൻ സെക്രട്ടറിയും അംഗവുമായിരുന്ന സീന ഷിബുവിന്റെ സ്മരണാർത്ഥമാണ് ടൂർണ്ണമെന്റ് സംഘടിപ്പിച്ചിരിക്കുന്നത്.

ടൂർണമെൻറ് നടക്കുന്ന സ്ഥലത്തിൻറെ അഡ്രസ്സ്:
HUNT’S FARM PLAYING FIELD,
TIMSBURY,
SO51 0NG