ന്യൂസ് ഡെസ്ക്, മലയാളം യുകെ

ലണ്ടൻ: ബ്രിട്ടനിലെ ലീഡ്സിൽ പൊലീസിനെ വെട്ടിച്ച് രക്ഷപ്പെടാൻ ശ്രമിച്ച കാർ മറ്റൊരു വാഹനത്തിലിടിച്ചുണ്ടായ അപകടത്തിൽ യുവാവും യുവതിയും മരിച്ചു. ഞായറാഴ്ച പുലർച്ചെ 00.44നാണ് അപകടം. ഗെൽഡേർഡ് റോഡിൽ പൊലീസിന്റെ നിർദേശം അവഗണിച്ച് നിർത്താതെ പോയ നീല ബിഎംഡബ്ല്യു കാർ നിയന്ത്രണം വിട്ട് വെള്ള ഫോക്‌സ്‌വാഗൺ സിറോക്കോ കാറിൽ ഇടിക്കുകയായിരുന്നു. ഫോക്‌സ്‌വാഗൺ ഓടിച്ചിരുന്ന 22കാരൻ സംഭവസ്ഥലത്തുവച്ചുതന്നെ മരിച്ചു. ഒപ്പമുണ്ടായിരുന്ന 23കാരിയായ യുവതി ആശുപത്രിയിൽ ചികിത്സയിലിരിക്കെയാണ് മരിച്ചത്. ഇരുവരും യോർക്കിൽ നിന്നുള്ളവരാണ്.

അപകടത്തിൽപ്പെട്ട ബിഎംഡബ്ല്യു കാറിലുണ്ടായിരുന്ന 39കാരനായ ഹാരോഗേറ്റ് സ്വദേശി, 16ഉം 17ഉം വയസ്സുള്ള രണ്ട് ആൺകുട്ടികൾ, 16കാരിയായ പെൺകുട്ടി എന്നിവരെ അപകടകരമായ രീതിയിൽ വാഹനമോടിച്ച് മരണത്തിന് കാരണമായെന്ന സംശയത്തിൽ പൊലീസ് അറസ്റ്റ് ചെയ്തു. കഞ്ചാവിന്റെ ലഹരിയിൽ വാഹനമോടിച്ചെന്ന സംശയവും 39കാരനെതിരെ ഉയർന്നിട്ടുണ്ട്. ബിഎംഡബ്ല്യുവിലുണ്ടായിരുന്ന കൗമാരക്കാർക്ക് പരുക്കേറ്റതിനെ തുടർന്ന് ആശുപത്രിയിൽ പ്രവേശിപ്പിച്ചെങ്കിലും പരുക്കുകൾ ഗുരുതരമല്ലെന്ന് പൊലീസ് അറിയിച്ചു.

അപകടത്തെ തുടർന്ന് ഗെൽഡേർഡ് റോഡിൽ പൊലീസ് പരിശോധനയും ഗതാഗത നിയന്ത്രണവും തുടരുകയാണ്. ഈ വഴിയുള്ള യാത്രക്കാർ മറ്റ് റോഡുകൾ ഉപയോഗിക്കണമെന്ന് അധികൃതർ നിർദേശിച്ചു. സംഭവത്തിൽ സ്വതന്ത്ര അന്വേഷണം നടത്തുന്നതിനായി കേസ് ഇൻഡിപെൻഡന്റ് ഓഫിസ് ഫോർ പൊലീസ് കണ്ടക്ടിന് കൈമാറിയതായി വെസ്റ്റ് യോർക്ക്ഷയർ പൊലീസ് അറിയിച്ചു. അപകടത്തിന് ദൃക്‌സാക്ഷികളായവർ വിവരങ്ങൾ കൈമാറണമെന്നും പൊലീസ് അഭ്യർഥിച്ചു.

ന്യൂസ് ഡെസ്ക്, മലയാളം യുകെ

ലണ്ടൻ: രാജ്യത്തെ മൂന്ന് മേഖലകളിൽ തണുപ്പ് കൂടുന്നത് മൂലമുള്ള ആരോഗ്യ മുന്നറിയിപ്പ് പുറപ്പെടുവിച്ചു. നോർത്ത് വെസ്റ്റ്, വെസ്റ്റ് മിഡ്‌ലാൻഡ്‌സ്, യോർക്ക്‌ഷയർ ആൻഡ് ഹംബർ മേഖലകളിലാണ് യുകെ ഹെൽത്ത് സെക്യൂരിറ്റി ഏജൻസി (UKHSA) മുന്നറിയിപ്പ് നൽകിയത്. ഞായറാഴ്ച രാത്രി ഒൻപത് മണി മുതൽ വ്യാഴാഴ്ച രാവിലെ ഒൻപത് മണി വരെയാണ് മുന്നറിയിപ്പ്. തണുപ്പ് ആരോഗ്യ – സാമൂഹിക പരിചരണ സേവനങ്ങൾക്ക് ചെറിയ തോതിൽ പ്രതിസന്ധിയുണ്ടാക്കാനും ആശുപത്രികളിലെത്തുന്നവരുടെ എണ്ണം വർധിപ്പിക്കാനും സാധ്യതയുണ്ടെന്ന് അധികൃതർ അറിയിച്ചു. പ്രായമായവർക്കും നേരത്തേ ആരോഗ്യപ്രശ്നങ്ങളുള്ളവർക്കും തണുപ്പ് കൂടുതൽ അപകടസാധ്യത സൃഷ്ടിക്കുമെന്നും മുന്നറിയിപ്പിലുണ്ട്.

വാരാന്ത്യത്തിൽ കാലാവസ്ഥയിൽ നേരിയ ചൂട് അനുഭവപ്പെടുമെന്ന കാലാവസ്ഥാ പ്രവചനങ്ങൾക്കിടെയാണ് തിങ്കളാഴ്ച മുതൽ വീണ്ടും തണുപ്പ് ശക്തമാകുമെന്ന മുന്നറിയിപ്പ്. ഞായറാഴ്ച രാവിലെ താപനില പൂജ്യം ഡിഗ്രിക്ക് താഴേക്ക് പോകാൻ സാധ്യതയില്ലെങ്കിലും പലയിടങ്ങളിലും മേഘാവൃതമായ അന്തരീക്ഷവും തണുത്ത കാറ്റും മഴയും അനുഭവപ്പെടും. വടക്കൻ മേഖലകളിൽ ശക്തമായ മഴയ്ക്കും ഉയർന്ന പ്രദേശങ്ങളിൽ മഞ്ഞുവീഴ്ചയ്ക്കും സാധ്യതയുണ്ട്. ഞായറാഴ്ച രാത്രിയും തിങ്കളാഴ്ച രാവിലെയും മഴയ്ക്കു പിന്നാലെ താപനില താഴുന്നതോടെ റോഡുകളിൽ മഞ്ഞുപാളികൾ രൂപപ്പെടാൻ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. സ്കോട്ട് ലൻഡിലെ ഉയർന്ന പ്രദേശങ്ങളിൽ മഞ്ഞുവീഴ്ച യാത്രാദുരിതത്തിനും കാരണമായേക്കും.

തണുപ്പ് വർധിക്കുന്ന സാഹചര്യത്തിൽ 65 വയസ്സിനു മുകളിലുള്ളവരും ആരോഗ്യപ്രശ്നങ്ങളുള്ളവരും പ്രത്യേകം ശ്രദ്ധിക്കണമെന്ന് യുകെ ഹെൽത്ത് സെക്യൂരിറ്റി ഏജൻസി നിർദേശിച്ചു. വീടുകളിൽ സ്ഥിരമായി ഉപയോഗിക്കുന്ന മുറികൾക്ക് ആവശ്യമായ ചൂട് ഉറപ്പാക്കുകയും ചൂടുള്ള വസ്ത്രങ്ങൾ ധരിക്കുകയും വേണം. പ്രായമായ ബന്ധുക്കളെയും അയൽക്കാരെയും സുഹൃത്തുക്കളെയും ഇടയ്ക്കിടെ സന്ദർശിച്ച് അവരുടെ ആരോഗ്യസ്ഥിതി അന്വേഷിക്കണമെന്നും അധികൃതർ അഭ്യർഥിച്ചു. വെള്ളിയാഴ്ച രാത്രി സൗത്ത് വെയിൽസിലെ സെനിബ്രിഡ്ജിൽ മൈനസ് 6.6 ഡിഗ്രിയും കുംബ്രിയയിലെ ഷാപ്പിൽ മൈനസ് 6.5 ഡിഗ്രിയുമായിരുന്നു രേഖപ്പെടുത്തിയ ഏറ്റവും കുറഞ്ഞ താപനില. വരും ദിവസങ്ങളിലും താപനില താഴാൻ സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം.

ന്യൂസ് ഡെസ്ക്, മലയാളം യുകെ

ലണ്ടൻ: ഇംഗ്ലണ്ടിൽ ക്യാൻസർ രോഗികൾക്ക് സമയബന്ധിതമായി ചികിത്സ ലഭ്യമാക്കുന്നതിനുള്ള എൻഎച്ച്എസിന്റെ ലക്ഷ്യം കൈവരിക്കാനാകില്ലെന്ന് വിദഗ്ധരുടെ മുന്നറിയിപ്പ്. 2027 മാർച്ചോടെ അടിയന്തര റഫറൽ ലഭിക്കുന്ന 80 ശതമാനം ക്യാൻസർ രോഗികൾക്കും 62 ദിവസത്തിനുള്ളിൽ ചികിത്സ ആരംഭിക്കണമെന്നതാണ് ലക്ഷ്യം. എന്നാൽ സെപ്റ്റംബറിലെ കണക്കനുസരിച്ച് 70.7 ശതമാനം രോഗികൾക്ക് മാത്രമാണ് നിശ്ചിത സമയത്തിനുള്ളിൽ ചികിത്സ ലഭിച്ചത്. ലക്ഷ്യത്തിലെത്താൻ പ്രതിമാസം 2,850 രോഗികൾക്ക് കൂടി സമയബന്ധിതമായി ചികിത്സ നൽകേണ്ടതുണ്ട്. നിലവിലെ സ്ഥിതി തുടർന്നാൽ ലക്ഷ്യത്തിൽ നിന്ന് 9,490 രോഗികളുടെ കുറവുണ്ടാകുമെന്ന് റേഡിയോതെറാപ്പി യുകെയുടെ പഠനം വ്യക്തമാക്കുന്നു.

ക്യാൻസർ ചികിത്സയ്ക്കാവശ്യമായ ഡോക്ടർമാരുടെയും ഉപകരണങ്ങളുടെയും കുറവും എൻഎച്ച്എസിലെ നേതൃത്വപരമായ വീഴ്ചകളും പ്രതിസന്ധി രൂക്ഷമാക്കുന്നതായി വിദഗ്ധർ ചൂണ്ടിക്കാട്ടി. പ്രോസ്റ്റേറ്റ്, സ്തനാർബുദ രോഗികളിൽ യഥാക്രമം 70.1, 68.8 ശതമാനം പേർക്ക് സമയബന്ധിതമായി ചികിത്സ ലഭിച്ചപ്പോൾ ശ്വാസകോശ അർബുദ രോഗികളിൽ ഇത് 60.9 ശതമാനവും ഗൈനക്കോളജിക്കൽ ക്യാൻസർ രോഗികളിൽ 60 ശതമാനവുമാണ്. തല, കഴുത്ത് എന്നിവിടങ്ങളിലെ ക്യാൻസർ ബാധിച്ചവരിൽ 56.5 ശതമാനം പേർക്ക് മാത്രമാണ് രണ്ടുമാസത്തിനുള്ളിൽ ചികിത്സ ആരംഭിക്കാനായത്. പ്രാദേശികമായും വലിയ വ്യത്യാസമുണ്ട്. മിഡ്‌ലാൻഡ്‌സിൽ 66.6 ശതമാനം പേർക്ക് മാത്രമാണ് സമയബന്ധിതമായി ചികിത്സ ലഭിച്ചത്. ലണ്ടനിൽ ഇത് 77.3 ശതമാനമാണ്.

അടിയന്തര റഫറലിന് ശേഷം 28 ദിവസത്തിനുള്ളിൽ ക്യാൻസർ രോഗനിർണയം പൂർത്തിയാക്കണമെന്ന ലക്ഷ്യവും കൈവരിക്കാനായിട്ടില്ല. കഴിഞ്ഞ ഒരു വർഷത്തിനിടെ 55.4 ശതമാനം രോഗികൾക്ക് മാത്രമാണ് ഈ സമയപരിധിക്കുള്ളിൽ രോഗനിർണയം നടത്താനായത്. ആശുപത്രികളിലെ വർധിച്ചുവരുന്ന രോഗികളുടെ എണ്ണത്തിന് അനുസരിച്ച് ചികിത്സാ സൗകര്യങ്ങളും ജീവനക്കാരുടെ എണ്ണവും ഉയരുന്നില്ലെന്നാണ് വിദഗ്ധരുടെ വിമർശനം. റേഡിയോളജിസ്റ്റുകൾ, ഓങ്കോളജിസ്റ്റുകൾ തുടങ്ങിയ വിദഗ്ധ ഡോക്ടർമാരുടെ കടുത്ത ക്ഷാമവും നിയമന മരവിപ്പിക്കലും രോഗികളുടെ കാത്തിരിപ്പ് വർധിപ്പിക്കുന്നതായി ചൂണ്ടിക്കാട്ടുന്നു. അതേസമയം, ക്യാൻസർ ചികിത്സാ കാത്തിരിപ്പുസമയം മെച്ചപ്പെടുന്നുണ്ടെന്നും കൂടുതൽ രോഗികൾക്ക് നേരത്തേ രോഗനിർണയം നടത്തുന്നതിനും ചികിത്സ ലഭ്യമാക്കുന്നതിനുമായി ദേശീയ ക്യാൻസർ പദ്ധതി നടപ്പാക്കുമെന്നും ആരോഗ്യവകുപ്പ് അറിയിച്ചു.

ന്യൂസ് ഡെസ്ക്, മലയാളം യുകെ

ലണ്ടൻ: വനിതാ സഹപ്രവർത്തകരോടുള്ള ലൈംഗിക ദുരുപെരുമാറ്റ ആരോപണങ്ങൾ ഉയർന്നതിനെ തുടർന്ന് ബ്രിട്ടീഷ് സർക്കാരിന്റെ എത്തിക്സ് ആൻഡ് ഇന്റഗ്രിറ്റി കമ്മീഷൻ മേധാവി സ്റ്റുവർട്ട് സ്റ്റെർലിങ് ചുമതലകളിൽനിന്ന് താൽക്കാലികമായി മാറിനിന്നു. നേരത്തേ ജോലി ചെയ്തിരുന്ന നോർതാംപ്റ്റൺഷെയർ പൊലീസിൽ അദ്ദേഹത്തിനെതിരെ ഉയർന്ന പരാതികളിൽ അന്വേഷണം നടത്തുകയും ഒരു കേസിൽ അച്ചടക്ക നടപടി സ്വീകരിക്കുകയും ചെയ്തിരുന്നു എന്ന വിവരമാണ് പുറത്തുവന്നത്. 2025 ഒക്ടോബറിലാണ് പുതിയതായി രൂപീകരിച്ച കമ്മീഷന്റെ ആദ്യ ചീഫ് എക്സിക്യൂട്ടീവായി അദ്ദേഹം നിയമിതനായത്. ആരോപണങ്ങൾ ഗൗരവമുള്ളതാണെന്നും വസ്തുതകൾ വേഗത്തിൽ പരിശോധിക്കുന്നതിനായി അദ്ദേഹം ചുമതലകളിൽനിന്ന് മാറിനിന്നതായും സർക്കാർ വക്താവ് അറിയിച്ചു.

2002-ൽ പൊലീസ് ഉദ്യോഗസ്ഥനായിരിക്കെ വനിതാ സഹപ്രവർത്തകയോട് മോശമായി പെരുമാറിയെന്ന പരാതിയിൽ സ്റ്റുവർട്ടിനെതിരെ അച്ചടക്ക അന്വേഷണം നടന്നതായി സൺഡേ ടൈംസ് റിപ്പോർട്ട് ചെയ്തു. പൊലീസ് സ്റ്റേഷനിൽ വെച്ച് വനിതാ സഹപ്രവർത്തകയുടെ മാറിടത്തിൽ അനുചിതമായി സ്പർശിച്ചെന്നായിരുന്നു ആരോപണം. രണ്ടാഴ്ചത്തെ ശമ്പളത്തിന് തുല്യമായ സാമ്പത്തിക പിഴയാണ് അന്ന് ശിക്ഷയായി ലഭിച്ചതെന്ന് റിപ്പോർട്ടിൽ പറയുന്നു. എന്നാൽ 2008-ൽ ജോലിക്ക് പുറത്തുനടന്ന ഒരു സാമൂഹിക ചടങ്ങിനിടെ മറ്റൊരു വനിതാ സഹപ്രവർത്തകയോട് ലൈംഗിക ദുരുപയോഗ പെരുമാറ്റം നടത്തിയെന്ന പരാതിയും ഉയർന്നിരുന്നു. ഈ ആരോപണം സ്റ്റുവർട്ട് നിഷേധിച്ചു. രണ്ടാമത്തെ സംഭവത്തിൽ ക്രിമിനൽ അന്വേഷണം ഉണ്ടായിട്ടില്ലെന്നും പൊലീസ് പ്രൊഫഷണൽ സ്റ്റാൻഡേർഡ്സ് വിഭാഗം പരാതി പരിശോധിക്കുക മാത്രമാണ് ചെയ്തതെന്നും അദ്ദേഹത്തിന്റെ പ്രതിനിധി വ്യക്തമാക്കി. 2002-ലെ അച്ചടക്ക നടപടിയുടെ ഡിജിറ്റൽ രേഖകൾ കൈവശമുണ്ടെന്ന് നോർതാംപ്റ്റൺഷെയർ പൊലീസ് സ്ഥിരീകരിച്ചിട്ടുണ്ട്.

2009-ൽ കാബിനറ്റ് ഓഫീസിൽ ചേർന്ന സ്റ്റുവർട്ട് പിന്നീട് വിവിധ ഉന്നത പദവികളിൽ പ്രവർത്തിച്ചു. 2019-ൽ നാഷണൽ പൊലീസ് ചീഫ്സ് കൗൺസിലിൽ ഡെപ്യൂട്ടേഷനിൽ സേവനമനുഷ്ഠിച്ചു. എലിസബത്ത് രാജ്ഞിയുടെ സംസ്കാരച്ചടങ്ങുകളുടെ ആസൂത്രണത്തിൽ നൽകിയ സംഭാവനകൾ പരിഗണിച്ച് 2023-ൽ അദ്ദേഹത്തിന് ഒബിഇ ബഹുമതിയും ലഭിച്ചിരുന്നു. പൊതുജീവിതത്തിലെ അഴിമതിയും ദുരുപയോഗ പെരുമാറ്റം തടയുന്നതിനും സർക്കാരിന്റെ പ്രവർത്തനങ്ങളിൽ സുതാര്യത ഉറപ്പാക്കുന്നതിനുമായി ലേബർ പാർട്ടി 2024-ലെ തിരഞ്ഞെടുപ്പ് പ്രകടനപത്രികയിൽ വാഗ്ദാനം ചെയ്തതാണ് ഈ കമ്മീഷൻ. പ്രധാനമന്ത്രിക്ക് പൊതുജീവിതത്തിലെ ദുരുപയോഗ പെരുമാറ്റം തടയുന്നതുമായി ബന്ധപ്പെട്ട ഉപദേശം നൽകുന്നതും മേധാവിയുടെ ചുമതലയായിരുന്നു. നിയമനസമയത്ത് ആവശ്യമായ വിവരങ്ങൾ കൃത്യമായി വെളിപ്പെടുത്തിയിരുന്നോ എന്ന കാര്യം ക്യാബിനറ്റ് ഓഫീസ് ഇപ്പോൾ പരിശോധിക്കും.

ന്യൂസ് ഡെസ്ക്, മലയാളം യുകെ

ലണ്ടൻ: 26 വർഷമായി ബ്രിട്ടനിൽ താമസിക്കുന്ന അന്ധയായ 67കാരിയായ നൈജീരിയൻ വനിതയോട് ചികിത്സയ്ക്കായി ഇന്ത്യയിലേക്ക് മടങ്ങാമെന്ന് നിർദേശിച്ച് ബ്രിട്ടീഷ് ആഭ്യന്തര വകുപ്പായ ഹോം ഓഫീസ്. ഇവർ 2000ലാണ് ബ്രിട്ടനിലെത്തിയത്. അധികം വൈകാതെ അക്യൂട്ട് ഗ്ലോക്കോമയെ തുടർന്ന് കാഴ്ച നഷ്ടപ്പെട്ടു. ദീർഘകാല താമസത്തിന്റെ അടിസ്ഥാനത്തിൽ 2022ൽ ബ്രിട്ടനിൽ തുടരാൻ അനുമതി ലഭിച്ച ഇവർക്ക് ഓരോ 30 മാസം കൂടുമ്പോഴും വിസ പുതുക്കേണ്ടതുണ്ട്. പത്തുവർഷം പൂർത്തിയായാൽ മാത്രമേ സ്ഥിരതാമസത്തിനുള്ള അനുമതിയായ ഇൻഡെഫിനിറ്റ് ലീവ് ടു റിമെയ്ൻ (ഐഎൽആർ) ലഭിക്കാൻ അപേക്ഷിക്കാനാകൂ. എന്നാൽ ആഭ്യന്തര മന്ത്രി ഷബാന മഹ്മൂദ് പ്രഖ്യാപിച്ച പുതിയ കുടിയേറ്റ പരിഷ്കാരങ്ങൾ പ്രകാരം ഇവർക്ക് സ്ഥിരതാമസത്തിന് അർഹത നേടാൻ ഇനിയും ഏകദേശം 20 വർഷം കാത്തിരിക്കേണ്ടിവരുമെന്നാണ് ആശങ്ക.

പ്രായവും ശാരീരിക അവശതയും പരിഗണിച്ച് ഇപ്പോൾത്തന്നെ സ്ഥിരതാമസാനുമതി നൽകണമെന്ന് ആവശ്യപ്പെട്ട് കുടിയേറ്റ നിയമസഹായ സംഘടനയായ മൈഗ്രന്റ് ആൻഡ് റെഫ്യൂജി ജസ്റ്റിസ് മുഖേന ഇവർ ഹോം ഓഫീസിനെ സമീപിച്ചിരുന്നു. അസാധാരണ സാഹചര്യങ്ങളിൽ ഐഎൽആർ അനുവദിക്കാൻ വ്യവസ്ഥയുണ്ടെങ്കിലും അപേക്ഷ നിരസിക്കുകയായിരുന്നു. അന്ധർക്കായി നൈജീരിയയിൽ സേവനങ്ങളുണ്ടെന്നും അവിടെ മടങ്ങാമെന്നും ആദ്യം അറിയിച്ച അധികൃതർ, ചികിത്സാ സൗകര്യങ്ങൾ ഇന്ത്യയിലുമുണ്ടെന്നായിരുന്നു നിരസിക്കൽ കത്തിൽ വ്യക്തമാക്കിയത്. എന്നാൽ ഇന്ത്യ സന്ദർശിച്ചിട്ടില്ലെന്നും ആ രാജ്യവുമായി യാതൊരു ബന്ധവുമില്ലെന്നും കംഫർട്ട് ചൂണ്ടിക്കാട്ടി. പിശക് ശ്രദ്ധയിൽപ്പെട്ടതിനെ തുടർന്ന് തിരുത്തിയ കത്ത് വീണ്ടും നൽകാനുള്ള നടപടികൾ ആരംഭിച്ചതായി ഹോം ഓഫീസ് വൃത്തങ്ങൾ അറിയിച്ചു. വ്യക്തിഗത അപേക്ഷകളെക്കുറിച്ച് പ്രതികരിക്കാനാവില്ലെന്നും ഓരോ അപേക്ഷയും ലഭിക്കുന്ന രേഖകളുടെയും തെളിവുകളുടെയും അടിസ്ഥാനത്തിൽ പരിശോധിക്കുമെന്നും അധികൃതർ വ്യക്തമാക്കി.

ബ്രിട്ടീഷ് സർക്കാരിന്റെ പുതിയ ‘എർൺഡ് സെറ്റിൽമെന്റ്’ നയത്തിനെതിരെ കുടിയേറ്റാവകാശ സംഘടനകളും രംഗത്തെത്തിയിട്ടുണ്ട്. പുതിയ വ്യവസ്ഥപ്രകാരം ഭൂരിഭാഗം കുടിയേറ്റക്കാർക്കും സ്ഥിരതാമസത്തിന് അപേക്ഷിക്കാൻ വേണ്ട കുറഞ്ഞ കാലാവധി അഞ്ചുവർഷത്തിൽനിന്ന് പത്തുവർഷമായി ഉയരും. ചില വിഭാഗങ്ങൾക്ക് ഇത് 20 വർഷം വരെയും അനധികൃതമായി രാജ്യത്തെത്തിയ ചില അഭയാർഥികൾക്ക് 30 വർഷം വരെയും നീളാം. മൈഗ്രന്റ് ആൻഡ് റെഫ്യൂജി ജസ്റ്റിസ് പുറത്തുവിട്ട വിവരങ്ങൾ പ്രകാരം 103 വയസ്സുള്ള പാക്കിസ്ഥാനി വനിതയ്ക്കുപോലും പുതിയ വ്യവസ്ഥയിൽ 123 വയസ്സാകുമ്പോഴേ സ്ഥിരതാമസത്തിന് അർഹത ലഭിക്കൂ. വയോധികരും ഭിന്നശേഷിക്കാരും ഉൾപ്പെടെയുള്ളവരെ പതിറ്റാണ്ടുകളോളം അനിശ്ചിതത്വത്തിൽ നിർത്തുന്നത് മനുഷ്യത്വരഹിതമാണെന്നാണ് വിമർശനം. അതേസമയം, കുടിയേറ്റ നിയന്ത്രണവും രാജ്യത്തോടുള്ള സംഭാവനയും അടിസ്ഥാനമാക്കി സ്ഥിരതാമസാവകാശം അനുവദിക്കുകയാണ് നയത്തിന്റെ ലക്ഷ്യമെന്ന് ആഭ്യന്തര മന്ത്രി ഷബാന മഹ്മൂദ് വ്യക്തമാക്കിയിട്ടുണ്ട്.

ന്യൂസ് ഡെസ്ക്, മലയാളം യുകെ

അമേരിക്കയിലെ വിമാനത്താവളങ്ങളിൽ രാജ്യവ്യാപകമായി വിമാന സർവീസുകൾക്ക് താൽക്കാലിക നിയന്ത്രണം ഏർപ്പെടുത്തി ഫെഡറൽ ഏവിയേഷൻ അഡ്മിനിസ്ട്രേഷൻ (എഫ്എഎ). രാജ്യത്തെ വിവിധ എയർ ട്രാഫിക് കൺട്രോൾ കേന്ദ്രങ്ങളെ ബന്ധിപ്പിക്കുന്ന ആശയവിനിമയ സംവിധാനത്തിലുണ്ടായ തകരാറാണ് പ്രതിസന്ധിക്ക് കാരണമായത്. അസാധാരണ സാഹചര്യവും യാത്രക്കാരുടെ സുരക്ഷയും കണക്കിലെടുത്ത് എല്ലാ വിമാനത്താവളങ്ങളിലും പുറപ്പെടുന്ന വിമാന സർവീസുകൾ നിർത്തിവെക്കാൻ നിർദേശം നൽകിയതായി യുഎസ് ഗതാഗത സെക്രട്ടറി സീൻ ഡഫി അറിയിച്ചു. ആകാശത്തുള്ള വിമാനങ്ങൾക്ക് യാത്ര തുടരാൻ അനുമതി നൽകിയെങ്കിലും ചില വിമാനങ്ങൾ വഴിതിരിച്ചുവിടേണ്ടിവന്നു. വാഷിങ്ടണിലെ റൊണാൾഡ് റീഗൻ വിമാനത്താവളം വിമാനങ്ങൾ സ്വീകരിക്കാനുള്ള പരമാവധി ശേഷിയിലെത്തിയതായും ചിക്കാഗോ ഒഹെയർ വിമാനത്താവളത്തിലും സമാന സാഹചര്യമുണ്ടായതായും റിപ്പോർട്ടുകളുണ്ട്.

പ്രതിസന്ധി അമേരിക്കയിലേക്കുള്ള രാജ്യാന്തര വിമാന സർവീസുകളെയും ബാധിച്ചു. ബ്രിട്ടനിൽനിന്ന് അമേരിക്കയിലേക്കുള്ള ചില വിമാനങ്ങൾ റദ്ദാക്കി. ഹീത്രൂവിൽനിന്ന് ന്യൂയോർക്കിലെ ജെഎഫ്കെ വിമാനത്താവളത്തിലേക്കുള്ള രാത്രി 10.30ലെ സർവീസും റദ്ദാക്കിയവയിൽ ഉൾപ്പെടുന്നു. മാഞ്ചസ്റ്ററിൽനിന്ന് ശനിയാഴ്ച രാവിലെ പുറപ്പെടേണ്ട മൂന്ന് വിർജിൻ അറ്റ്ലാന്റിക് സർവീസുകളെയും പ്രതിസന്ധി ബാധിക്കാൻ സാധ്യതയുണ്ടെന്ന് വിമാനത്താവള അധികൃതർ അറിയിച്ചു. യൂറോപ്യൻ രാജ്യങ്ങളിൽനിന്ന് അമേരിക്കയിലേക്കുള്ള വിമാന സർവീസുകൾക്കും താൽക്കാലിക നിയന്ത്രണം ഏർപ്പെടുത്തി. ഫ്ലൈറ്റ് റഡാർ 24ന്റെ കണക്കനുസരിച്ച് റദ്ദാക്കിയ വിമാനങ്ങളുടെ എണ്ണം 1,700 കടന്നു. 7,000ത്തിലധികം വിമാനങ്ങൾ വൈകുകയോ റദ്ദാക്കുകയോ ചെയ്തതായും 15 ലക്ഷത്തിലധികം യാത്രക്കാർ യാത്രയ്ക്കായി കാത്തിരിക്കുന്നതായും റിപ്പോർട്ടുകളുണ്ട്.

സൈബർ ആക്രമണമാണോ മൈക്രോസോഫ്റ്റ് സംവിധാനങ്ങളിലെ തകരാറുമായി ബന്ധപ്പെട്ട പ്രശ്നമാണോ എന്ന സംശയങ്ങൾ ഉയർന്നെങ്കിലും നിലവിൽ സൈബർ ആക്രമണത്തിന് തെളിവുകളില്ലെന്ന് അധികൃതർ വ്യക്തമാക്കി. മൈക്രോസോഫ്റ്റിന്റെ വ്യാപകമായ തകരാറുമായി സംഭവത്തിന് ബന്ധമില്ലെന്നാണ് പ്രാഥമിക വിലയിരുത്തൽ. അമേരിക്കൻ ആഭ്യന്തര സുരക്ഷാ സെക്രട്ടറി മാർക്ക്വെയ്ൻ മുള്ളിൻ ഇത് ഭീകരാക്രമണമോ 9/11ന് സമാനമായ സാഹചര്യമോ അല്ലെന്ന് വ്യക്തമാക്കി. പിന്നീട് ആശയവിനിമയ സംവിധാനങ്ങൾ പുനഃസ്ഥാപിച്ചതോടെ എഫ്എഎ നിയന്ത്രണങ്ങൾ ഘട്ടംഘട്ടമായി പിൻവലിക്കുകയും വിമാന സർവീസുകൾ പുനരാരംഭിക്കുകയും ചെയ്തു. എന്നാൽ വൈകലുകളും റദ്ദാക്കലുകളും തുടരുമെന്ന് അധികൃതർ മുന്നറിയിപ്പ് നൽകി. അമേരിക്കയിലേക്കുള്ള യാത്രക്കാർ വിമാനത്താവളത്തിലേക്ക് പുറപ്പെടുന്നതിന് മുമ്പ് വിമാനക്കമ്പനികളുമായി ബന്ധപ്പെട്ട് സർവീസുകളുടെ സ്ഥിതി ഉറപ്പാക്കണമെന്നും നിർദേശിച്ചിട്ടുണ്ട്.

ന്യൂസ് ഡെസ്ക്, മലയാളം യുകെ

ബ്രിട്ടനിലെ ബർമിങ് ഹാമിൽ ജാമ്യാധികാരിക്കു നേരെ കത്തിയാക്രമണം നടത്തിയ കേസിൽ ഹമാസ് മുൻ നേതാവ് ഇസ്മായിൽ ഹനിയ്യയുടെ അംഗരക്ഷകനായിരുന്ന മുഹമ്മദ് അൽഫത്തിഹ് കുറ്റക്കാരനെന്ന് കോടതി കണ്ടെത്തി. ഭാര്യയുടെ 2,250 പൗണ്ടിലധികം വരുന്ന പിഴയുമായി ബന്ധപ്പെട്ട് കാർ പിടിച്ചെടുക്കാനെത്തിയ ജാമ്യാധികാരി കെവിൻ ബക്നലിനെതിരെയായിരുന്നു ആക്രമണം. 2025 ഒക്ടോബർ 14ന് നടന്ന സംഭവത്തിൽ രണ്ട് വലിയ കത്തികളുമായി ഇയാൾ ഉദ്യോഗസ്ഥനെ പിന്തുടർന്ന് ആക്രമിക്കുകയായിരുന്നു. തലയ്ക്ക് മുറിവേറ്റ ഉദ്യോഗസ്ഥന് ആശുപത്രിയിൽ ചികിത്സ തേടേണ്ടിവന്നു. നിയമവിരുദ്ധമായി പരിക്കേൽപ്പിക്കൽ, രണ്ട് കത്തികൾ കൈവശംവെക്കൽ, നാശനഷ്ടം വരുത്തൽ എന്നീ കുറ്റങ്ങളിലാണ് ഭൂരിപക്ഷ വിധിയിലൂടെ അൽഫത്തിഹ് കുറ്റക്കാരനായത്. എന്നാൽ കൊലപ്പെടുത്താനുള്ള ഉദ്ദേശ്യത്തോടെ പരിക്കേൽപ്പിച്ചെന്ന കുറ്റത്തിൽനിന്ന് കോടതി ഇയാളെ ഒഴിവാക്കി.

ജർമനിയിൽ ജനിച്ച 40കാരനായ അൽഫത്തിഹ് 2006 മുതൽ 2008 വരെ ഹമാസ് മുൻ നേതാവ് ഇസ്മായിൽ ഹനിയ്യയുടെ അംഗരക്ഷകനായി പ്രവർത്തിച്ചിരുന്നുവെന്നാണ് ബിബിസി റിപ്പോർട്ട്. മുഹമ്മദ് നയിം എന്ന പേരിലാണ് ഇയാൾ നേരത്തെ അറിയപ്പെട്ടിരുന്നത്. 2015ൽ ബ്രിട്ടനിൽ അഭയം ലഭിക്കുകയും 2021ൽ ബ്രിട്ടീഷ് പൗരത്വം നേടുകയും ചെയ്തു. ബർമിങ്ങാമിലെ ആക്രമണസമയത്ത് ഭീകരവിരുദ്ധ വിഭാഗത്തിന്റെ നിരീക്ഷണത്തിലായിരുന്നു ഇയാൾ. കേസിൽ അറസ്റ്റിലായിരിക്കെ ജർമൻ അധികൃതരുടെ ആവശ്യപ്രകാരം വീണ്ടും അറസ്റ്റ് ചെയ്തു. ജർമനിയിൽ ജൂതരുടെ കേന്ദ്രങ്ങൾ ലക്ഷ്യമിട്ട് വെടിവെപ്പ് നടത്താനുള്ള ഗൂഢാലോചനയിൽ ഇയാൾക്ക് പങ്കുണ്ടെന്നാണ് ആരോപണം. ആയുധങ്ങൾ എത്തിക്കുന്നതിലും ആക്രമണത്തിന്റെ ആസൂത്രണത്തിലും പങ്കാളിയായിരുന്നുവെന്നാണ് ജർമൻ അന്വേഷണസംഘത്തിന്റെ കണ്ടെത്തൽ. ഇസ്രയേൽ രഹസ്യാന്വേഷണ ഏജൻസിയായ മൊസാദിന് ലഭിച്ച വിവരത്തെ തുടർന്നാണ് ആക്രമണപദ്ധതി തടയാനായതെന്നും റിപ്പോർട്ടിൽ പറയുന്നു.

രണ്ടാഴ്ച നീണ്ട വിചാരണയ്ക്കിടെ ഹമാസുമായുള്ള ബന്ധവും അംഗരക്ഷകനായിരുന്ന വിവരവും ജൂറിയെ അറിയിച്ചിരുന്നില്ല. ആക്രമണം നടന്നത് സ്വയംരക്ഷയ്ക്കായിരുന്നുവെന്നാണ് അൽഫത്തിഹ് കോടതിയിൽ വാദിച്ചത്. ഗാസയിൽ സഹോദരൻ കൊല്ലപ്പെട്ട വിവരം അറിഞ്ഞതിന്റെ തൊട്ടടുത്ത ദിവസമാണ് സംഭവമെന്നും മുൻകാലത്തെ പീഡനാനുഭവങ്ങളും ഭയവും തന്നെ മാനസികമായി തളർത്തിയിരുന്നുവെന്നും ഇയാൾ പറഞ്ഞു. എന്നാൽ കോടതി കുറ്റക്കാരനെന്ന് കണ്ടെത്തിയതോടെ ജനുവരി 11ന് ബാർമിംഗ് ഹാമിൽ ശിക്ഷ വിധിക്കും. ബ്രിട്ടനിലെ ശിക്ഷ പൂർത്തിയാക്കിയശേഷം ജർമനിയിലേക്ക് നാടുകടത്തൽ നടപടികൾ നേരിടേണ്ടിവരും. അഭയം നൽകിയതും പിന്നീട് പൗരത്വം അനുവദിച്ചതും അതിശയകരമാണെന്ന് ബ്രിട്ടീഷ് സർക്കാർ വൃത്തങ്ങൾ പ്രതികരിച്ചു. ഹമാസ് നിരോധിത ഭീകരസംഘടനയാണെന്നും അതിന്റെ പ്രവർത്തനങ്ങളെ പിന്തുണയ്ക്കുന്നവരെ സർക്കാർ അപലപിക്കുന്നുവെന്നും ആഭ്യന്തര മന്ത്രാലയം വ്യക്തമാക്കി.

ന്യൂസ് ഡെസ്ക്, മലയാളം യുകെ

ലണ്ടനിലെ പ്രശസ്ത ഹാസ്യനടനും കുട്ടികളുടെ എഴുത്തുകാരനുമായ ഡേവിഡ് വാലിയംസിനെതിരായ ലൈംഗികാതിക്രമ ആരോപണങ്ങൾ ബ്രിട്ടനിൽ വലിയ വിവാദമാകുന്നു. ആരോപണങ്ങൾ പുറത്തുവന്നതിനു പിന്നാലെ നിരവധി കുടുംബങ്ങൾ കുട്ടികളുടെ പുസ്തകശേഖരത്തിൽനിന്ന് അദ്ദേഹത്തിന്റെ പുസ്തകങ്ങൾ നീക്കം ചെയ്യുകയാണ്. കുട്ടികൾക്ക് ഏറെ പ്രിയപ്പെട്ടിരുന്ന വാലിയംസിന്റെ പുസ്തകങ്ങൾ ഇനി വീട്ടിൽ സൂക്ഷിക്കേണ്ടതില്ലെന്നാണ് ചില മാതാപിതാക്കളുടെ നിലപാട്. ദി വർക്സ്, ടിജി ജോൺസ് തുടങ്ങിയ വ്യാപാരസ്ഥാപനങ്ങളും പുസ്തകങ്ങൾ വിൽപ്പനയിൽനിന്ന് പിൻവലിച്ചു. വാട്ടർസ്റ്റോൺസ് നിലവിലുള്ള പുസ്തകങ്ങൾ പ്രസാധകരായ ഹാർപ്പർകോളിൻസിന് തിരികെ നൽകുന്നതിനെക്കുറിച്ച് ചർച്ച നടത്തുകയാണ്. ചില സ്വതന്ത്ര പുസ്തകശാലകൾ വർഷങ്ങൾക്കു മുമ്പുതന്നെ അദ്ദേഹത്തിന്റെ പുസ്തകങ്ങൾ വിൽക്കുന്നത് നിർത്തിയിരുന്നു.

അതിനിടെ, വാലിയംസിനെതിരായ ഗുരുതരമായ ലൈംഗികാതിക്രമ ആരോപണങ്ങളിൽ ലണ്ടൻ മെട്രോപൊളിറ്റൻ പൊലീസ് ക്രിമിനൽ അന്വേഷണം ആരംഭിച്ചു. 2000 – കളിൽ നടന്നതായി പറയപ്പെടുന്ന സംഭവങ്ങളുമായി ബന്ധപ്പെട്ട് നിരവധി പേർ പൊലീസിൽ പരാതികൾ നൽകിയിട്ടുണ്ട്. മാധ്യമറിപ്പോർട്ടുകളിലെ വിവരങ്ങളും അന്വേഷണത്തിന്റെ ഭാഗമായി പരിശോധിക്കുമെന്നും പൊലീസ് വ്യക്തമാക്കി. പരാതിക്കാരുടെ സ്വകാര്യതയും സുരക്ഷയും പരിഗണിച്ച് സംഭവങ്ങളുടെ കൂടുതൽ വിശദാംശങ്ങൾ പൊലീസ് പുറത്തുവിട്ടിട്ടില്ല. പ്രത്യേക ലൈംഗികാതിക്രമ അന്വേഷണവിഭാഗമാണ് കേസ് അന്വേഷിക്കുന്നത്. ഇതുവരെ വാലിയംസിനെ അറസ്റ്റ് ചെയ്യുകയോ പരിശോധനകൾ നടത്തുകയോ ചെയ്തിട്ടില്ല.

15 വയസ്സുള്ളപ്പോഴാണ് വാലിയംസിനെ പരിചയപ്പെട്ടതെന്നും പിന്നീട് തങ്ങൾ ലൈംഗികമായി ചൂഷണം ചെയ്യപ്പെട്ടതായി തോന്നിയെന്നും രണ്ട് സ്ത്രീകൾ നേരത്തെ വെളിപ്പെടുത്തിയിരുന്നു. ബ്രിട്ടനിലെ “Britain’s Got Talent ” എന്ന ടെലിവിഷൻ പരിപാടിയിലും മുൻ പ്രസാധകസ്ഥാപനമായ ഹാർപ്പർകോളിൻസിലും തന്റെ പ്രശസ്തിയും അധികാരവും ഉപയോഗിച്ച് യുവതികളെ സമീപിച്ചെന്ന ആരോപണങ്ങളും ഉയർന്നിട്ടുണ്ട്. എന്നാൽ താൻ ലൈംഗികചൂഷണം നടത്തിയിട്ടില്ലെന്നും നിയമം ലംഘിച്ചിട്ടില്ലെന്നും വാലിയംസ് ആരോപണങ്ങൾ നിഷേധിച്ചു. അതേസമയം, ചില ബന്ധങ്ങളിൽ മറ്റുള്ളവരുടെ വികാരങ്ങൾ വേണ്ടത്ര പരിഗണിക്കാതിരുന്നതിൽ ഖേദിക്കുന്നതായും അദ്ദേഹം വ്യക്തമാക്കി. വിവാദത്തെ തുടർന്ന് അദ്ദേഹത്തിന്റെ സാഹിത്യ ഏജൻസി ബന്ധം അവസാനിപ്പിക്കുകയും ബിബിസി ഐപ്ലെയറിൽനിന്ന് അദ്ദേഹത്തിന്റെ പരിപാടികൾ നീക്കിത്തുടങ്ങുകയും ചെയ്തിട്ടുണ്ട്.

ന്യൂസ് ഡെസ്ക്, മലയാളം യുകെ

ലണ്ടൻ: ആഗോളതലത്തിലുണ്ടായ മൈക്രോസോഫ്റ്റ് സാങ്കേതിക തകരാറിനെത്തുടർന്ന് ബ്രിട്ടനിലെ ആശുപത്രികൾ, ജിപി ക്ലിനിക്കുകൾ, സ്കൂളുകൾ, സർവകലാശാലകൾ, പൊലീസ് സംവിധാനങ്ങൾ എന്നിവയുടെ പ്രവർത്തനം തടസ്സപ്പെട്ടു. എൻഎച്ച്എസ് സേവനങ്ങളെ സാരമായി ബാധിച്ചതോടെ രോഗികളുടെ വിവരങ്ങൾ പരിശോധിക്കാനും ഇമെയിൽ ഉപയോഗിക്കാനും കഴിയാതെ വന്ന ആരോഗ്യപ്രവർത്തകർ പേപ്പർ രേഖകളെ ആശ്രയിച്ചാണ് ചികിത്സാ നടപടികൾ തുടർന്നത്. ചില ആശുപത്രികളിൽ യോഗങ്ങളും റദ്ദാക്കി. മരുന്നുകളുടെ കുറിപ്പടി നൽകുന്നതിലും കാലതാമസമുണ്ടാകുമെന്ന് ഫാർമസിസ്റ്റുകൾ മുന്നറിയിപ്പ് നൽകി. അതേസമയം, അടിയന്തരവും ജീവന് ഭീഷണിയുള്ളതുമായ ആംബുലൻസ് സേവനങ്ങളെ കാര്യമായി ബാധിച്ചിട്ടില്ലെന്നാണ് റിപ്പോർട്ട്.

വ്യാഴാഴ്ച വൈകുന്നേരത്തോടെ ആരംഭിച്ച തകരാറിനെത്തുടർന്ന് ലോകമെമ്പാടുമുള്ള ആയിരക്കണക്കിന് ഉപയോക്താക്കൾക്ക് മൈക്രോസോഫ്റ്റിന്റെ ഔട്ട്‌ലുക്ക് ഇമെയിൽ സേവനം ഉൾപ്പെടെയുള്ള സംവിധാനങ്ങൾ ഉപയോഗിക്കാനായില്ല. റെയിൽ യാത്രക്കാർക്ക് ഇമെയിൽ വഴി ലഭിച്ച ഡിജിറ്റൽ ടിക്കറ്റുകൾ തുറക്കാൻ കഴിയാത്ത സാഹചര്യമുണ്ടാകാമെന്ന് നാഷണൽ റെയിൽ മുന്നറിയിപ്പ് നൽകി. കോടതികളുടെ പ്രവർത്തനവും തടസ്സപ്പെട്ടു. ചില കേസുകളിൽ വിചാരണ മാറ്റിവയ്ക്കുകയും തടവുകാരെ കോടതിയിൽ എത്തിക്കാനാകാതെ വരികയും ചെയ്തു. മാഞ്ചസ്റ്ററിലെ മിൻഷുൾ സ്ട്രീറ്റ് കോടതിയിൽ ഫാക്സ് മെഷീൻ കണ്ടെത്താൻ ജീവനക്കാർ ശ്രമിക്കേണ്ടിവന്നതായും റിപ്പോർട്ടുണ്ട്. പൊലീസ് വെബ്സൈറ്റുകൾ വഴി കുറ്റകൃത്യങ്ങൾ റിപ്പോർട്ട് ചെയ്യുന്നതിനും തടസ്സമുണ്ടായി.

സ്കൂൾ പരിശോധനകൾ ഉൾപ്പെടെ വിദ്യാഭ്യാസ മേഖലയിലെ പ്രവർത്തനങ്ങളെയും തകരാർ ബാധിച്ചു. നൂറുകണക്കിന് സ്കൂളുകൾക്കും കോളജുകൾക്കും സർവകലാശാലകൾക്കും ഇമെയിൽ സേവനങ്ങൾ ലഭ്യമല്ലാതായി. ബാങ്ക് ഓഫ് ഇംഗ്ലണ്ട്, ഫിനാൻഷ്യൽ കണ്ടക്ട് അതോറിറ്റി തുടങ്ങിയ സ്ഥാപനങ്ങളെയും പ്രശ്നം ബാധിച്ചെങ്കിലും നിർണായക പ്രവർത്തനങ്ങൾ സാധാരണ നിലയിൽ തുടരുന്നതായി ബാങ്ക് അറിയിച്ചു. സൈബർ ആക്രമണമല്ല തകരാറിന് കാരണമെന്നാണ് മൈക്രോസോഫ്റ്റിന്റെ പ്രാഥമിക വിലയിരുത്തൽ. വെള്ളിയാഴ്ച രാവിലെ മുതൽ സേവനങ്ങൾ ക്രമേണ പുനഃസ്ഥാപിക്കപ്പെടുന്നതിന്റെ സൂചനകൾ ലഭിച്ചതായും കമ്പനി അറിയിച്ചു. സംഭവത്തിന്റെ വ്യാപ്തി വിലയിരുത്താൻ സർക്കാർ മൈക്രോസോഫ്റ്റുമായി ചേർന്ന് പ്രവർത്തിക്കുകയാണ്. സാങ്കേതിക സംവിധാനങ്ങളെ അമിതമായി ആശ്രയിക്കുന്നതിന്റെ അപകടം ഈ സംഭവം വ്യക്തമാക്കുന്നതായും സർക്കാർ വൃത്തങ്ങൾ ചൂണ്ടിക്കാട്ടി.

ന്യൂസ് ഡെസ്ക്, മലയാളം യുകെ

ലണ്ടൻ: ബ്രിട്ടനും യൂറോപ്യൻ യൂണിയനും തമ്മിൽ വ്യാപാരം നടത്തുന്ന ഇലക്ട്രിക് വാഹനങ്ങൾക്ക് അധിക ഇറക്കുമതി തീരുവ ഏർപ്പെടുത്തുന്നത് ഒഴിവാക്കാൻ രണ്ടു വർഷത്തെ ഇളവ് ആവശ്യപ്പെടാനൊരുങ്ങി ബ്രിട്ടീഷ് വാഹന വ്യവസായം. ബ്രെക്സിറ്റിനു ശേഷമുള്ള വ്യാപാര കരാറിലെ ബാറ്ററി ഉത്ഭവനിയമങ്ങൾ 2027 ജനുവരി ഒന്നുമുതൽ പ്രാബല്യത്തിൽ വരാനിരിക്കെയാണ് പുതിയ നീക്കം. ഇതു സംബന്ധിച്ച് വീണ്ടും കാലാവധി നീട്ടാൻ ഇരുവിഭാഗവും ധാരണയിലെത്തിയില്ലെങ്കിൽ ബ്രിട്ടനിൽനിന്ന് യൂറോപ്യൻ യൂണിയനിലേക്കും തിരിച്ചുമുള്ള ഭൂരിഭാഗം ഇലക്ട്രിക് വാഹനങ്ങൾക്കും 10 ശതമാനം തീരുവ ബാധകമാകാനുള്ള സാധ്യതയുണ്ട്. നേരത്തേ ഈ വ്യവസ്ഥകൾ നടപ്പാക്കുന്നത് നീട്ടിവച്ചിരുന്നു. എന്നാൽ യൂറോപ്യൻ യൂണിയൻ മുന്നോട്ടുവച്ച പ്രാഥമിക നിർദേശം രണ്ടു വർഷത്തേക്കാൾ കുറഞ്ഞ കാലയളവിലുള്ള ഇളവാണെന്നാണ് റിപ്പോർട്ട്.

ബാറ്ററി നിർമാണത്തിൽ ബ്രിട്ടനും യൂറോപ്യൻ രാജ്യങ്ങളും പ്രതീക്ഷിച്ച വളർച്ച കൈവരിക്കാത്തതാണ് പ്രതിസന്ധിക്ക് പ്രധാന കാരണം. പുതിയ നിയമപ്രകാരം ഇലക്ട്രിക് വാഹനത്തിന്റെ മൂല്യത്തിന്റെ കുറഞ്ഞത് 55 ശതമാനവും ബാറ്ററി സെല്ലുകളുടെ 65 ശതമാനവും ബാറ്ററി പാക്കിന്റെ 70 ശതമാനവും ബ്രിട്ടനിലോ യൂറോപ്യൻ യൂണിയനിലോ ഉൽപ്പാദിപ്പിച്ചതായിരിക്കണം. ഈ നിബന്ധനകൾ പാലിക്കാത്ത വാഹനങ്ങൾക്ക് 10 ശതമാനം തീരുവ നൽകേണ്ടിവരും. ബാറ്ററി നിർമാണശാലകൾ സ്ഥാപിക്കുന്നതിലെ കാലതാമസവും ചൈന, ജപ്പാൻ, ദക്ഷിണകൊറിയ തുടങ്ങിയ രാജ്യങ്ങളിൽനിന്നുള്ള ബാറ്ററി ഘടകങ്ങളുടെ ഇറക്കുമതിയെ ആശ്രയിക്കേണ്ടിവരുന്നതും വാഹന നിർമാതാക്കൾക്ക് വെല്ലുവിളിയാണ്.

അതേസമയം, യൂറോപ്യൻ വാഹന നിർമാതാക്കളുടെ സംഘടനയായ എസിഇഎയുടെ കണക്കനുസരിച്ച് 2027ൽ യൂറോപ്യൻ യൂണിയനിൽനിന്ന് ബ്രിട്ടനിലേക്ക് കയറ്റുമതി ചെയ്യുന്ന ഏകദേശം 5.2 ലക്ഷം ഇലക്ട്രിക് കാറുകളിലും വാനുകളിലും 82 ശതമാനത്തിനും പുതിയ നിബന്ധനകൾ പാലിക്കാനാകില്ല. ഇതുമൂലം മാത്രം 147 കോടി യൂറോയുടെ അധിക ചെലവുണ്ടാകാമെന്നാണ് വിലയിരുത്തൽ. ബ്രിട്ടീഷ് വാഹന നിർമാതാക്കളുടെ സംഘടനയായ എസ്.എം.എം.ടി.യും തീരുവ ഏർപ്പെടുത്തിയാൽ വ്യവസായത്തിന് 140 കോടി പൗണ്ടിന്റെ അധിക ബാധ്യതയുണ്ടാകുമെന്ന് മുന്നറിയിപ്പ് നൽകിയിട്ടുണ്ട്. അതേസമയം, തീരുവ നീട്ടിവയ്ക്കുന്നതുമായി ബന്ധപ്പെട്ട് യൂറോപ്യൻ യൂണിയൻ വ്യവസായ മേഖലയുമായി ചർച്ച നടത്തുകയാണെന്നും ഒരു വർഷത്തെ ഇളവ് പരിഗണനയിലുണ്ടെന്നും റോയിട്ടേഴ്‌സ് റിപ്പോർട്ട് ചെയ്തു. എന്നാൽ രണ്ടു വർഷത്തെ ഇളവിനായുള്ള ബ്രിട്ടീഷ് വ്യവസായത്തിന്റെ ആവശ്യം അംഗീകരിക്കുമോ എന്നത് വ്യക്തമല്ല.