ന്യൂസ് ഡെസ്ക്, മലയാളം യുകെ

ലണ്ടൻ∙ സ്കോട്‍ ലൻഡിലെ സ്റ്റിർലിങ് കൗൺസിൽ മേഖലയിലെ ക്രിയാൻ ലാരിച്ചിന് സമീപമുള്ള പ്രശസ്ത വിനോദസഞ്ചാര കേന്ദ്രമായ ഫാൾസ് ഓഫ് ഫലോക്കിൽ യുവതിയുടെ മൃതദേഹം കണ്ടെത്തി. വെള്ളിയാഴ്ച രാത്രി വെള്ളത്തിൽപ്പെട്ട യുവതിയെ കണ്ടെത്താൻ പൊലീസ്, അഗ്നിരക്ഷാസേന, ജലരക്ഷാ സംഘങ്ങൾ എന്നിവരുടെ നേതൃത്വത്തിൽ വ്യാപക തിരച്ചിൽ നടത്തിയിരുന്നു.

ലോക്ക് ലോമണ്ട് ആൻഡ് ട്രോസാക്സ് നാഷനൽ പാർക്കിന്റെ ഭാഗമായ ഈ പ്രദേശം തിരച്ചിലിനിടെ താൽക്കാലികമായി അടച്ചിരുന്നു. ശനിയാഴ്ച രാവിലെ നടത്തിയ പരിശോധനയിലാണ് യുവതിയുടെ മൃതദേഹം വെള്ളത്തിൽ നിന്ന് കണ്ടെത്തിയത്. മരിച്ചയാളുടെ അടുത്ത ബന്ധുക്കളെ വിവരം അറിയിച്ചതായി പൊലീസ് അറിയിച്ചു.

യുവതിയുടെ മരണം നിലവിൽ ദുരൂഹ മരണമായാണ് പരിഗണിക്കുന്നതെങ്കിലും സംശയാസ്പദ സാഹചര്യങ്ങളോ കുറ്റകൃത്യത്തിന്റെ തെളിവുകളോ കണ്ടെത്തിയിട്ടില്ലെന്ന് പൊലീസ് വ്യക്തമാക്കി. സംഭവത്തിൽ അന്വേഷണം തുടരുകയാണെന്നും കൂടുതൽ വിവരങ്ങൾ പിന്നീട് പുറത്തുവിടുമെന്നും അധികൃതർ അറിയിച്ചു.

ന്യൂസ് ഡെസ്ക്, മലയാളം യുകെ

യുകെയിൽ നിന്ന് ആറുമാസം മുൻപാണ് കുടുംബസമേതം ഓസ്ട്രേലിയയിലെ വെസ്റ്റേൺ ഓസ്ട്രേലിയ സംസ്ഥാനത്തെ ബൺബറിയിലേക്ക് കുടിയേറിയ തൊടുപുഴ കരിമണ്ണൂർ സ്വദേശി ശ്രീ ജോബിൻ ജോസ് (42) അന്തരിച്ചു. പരേതനായ വി. ടി. ജോസഫിന്റെയും സെലിൻ ജോർജിന്റെയും മകനായ ജോബിൻ ഹൃദയസംബന്ധമായ അസുഖത്തെ തുടർന്ന് പെർത്തിലെ ആശുപത്രിയിൽ ചികിത്സയിലിരിക്കെയാണ് മരണത്തിന് കീഴടങ്ങിയത്.

കഴിഞ്ഞ ജൂലൈ 2-ന് അപ്രതീക്ഷിതമായി ഗുരുതരാവസ്ഥയിലായ ജോബിനെ അടിയന്തിരമായി ഹെലികോപ്റ്ററിൽ പെർത്തിലെ ഫിയോണ സ്റ്റാൻലി ആശുപത്രിയിലെത്തിച്ച് ശസ്ത്രക്രിയയ്ക്ക് വിധേയനാക്കിയിരുന്നു. വൈദ്യസംഘത്തിന്റെ പരിശ്രമങ്ങൾക്കൊടുവിലും ജീവൻ രക്ഷിക്കാനായില്ല. യുകെയിൽ നിന്നുള്ള പുതിയ ജീവിതയാത്രയുടെ തുടക്കത്തിലിരിക്കെയാണ് അദ്ദേഹത്തിന്റെ വേർപാട് കുടുംബാംഗങ്ങളെയും സുഹൃത്തുക്കളെയും മലയാളി സമൂഹത്തെയും ദുഃഖത്തിലാഴ്ത്തിയത്.

ഭാര്യ കോതമംഗലം വെളിയൽച്ചാൽ സ്വദേശിനിയും ബൺബറി ആശുപത്രിയിൽ നേഴ്സുമായ റിയ ആന്റണിയാണ്. മക്കൾ: ജോസൻ, ജാക്ക്, റിയോൺ.

ജോബിൻ ജോസിന്റെ നിര്യാണത്തിൽ മലയാളം യുകെ ന്യൂസ് അനുശോചനം രേഖപ്പെടുത്തുകയും ദുഃഖാർത്തരായ കുടുംബാംഗങ്ങളുടെയും പ്രിയപ്പെട്ടവരുടെയും വേദനയിൽ പങ്കുചേരുകയും ചെയ്യുന്നു.

ന്യൂസ് ഡെസ്ക്, മലയാളം യുകെ

ഗ്ലോസ്റ്റർഷയർ∙ ബ്രിട്ടീഷ് രാജാവ് ചാൾസ് മൂന്നാമൻ, മകൻ ഹാരി രാജകുമാരന്റെയും മേഗൻ മാർക്കലിന്റെയും മക്കളായ ആർച്ചിയെയും ലിലിബെറ്റിനെയും നാല് വർഷത്തിന് ശേഷം സ്വകാര്യ കൂടിക്കാഴ്ചയിൽ കണ്ടുമുട്ടിയതായി റിപ്പോർട്ട്. ഗ്ലോസ്റ്റർഷയറിലെ ഹൈഗ്രോവ് ഹൗസിൽ നടന്ന കൂടിക്കാഴ്ചയിൽ രാജ്ഞി കാമിലയും പങ്കെടുത്തു. 2022ലെ പ്ലാറ്റിനം ജൂബിലിക്കു ശേഷമുള്ള ആദ്യ കൂടിക്കാഴ്ചയാണിതെന്ന് ബ്രിട്ടീഷ് മാധ്യമങ്ങൾ റിപ്പോർട്ട് ചെയ്തു.

ഹാരിയും മേഗനും രാജകുടുംബത്തിലെ ഔദ്യോഗിക ചുമതലകൾ ഒഴിഞ്ഞ് അമേരിക്കയിലേക്ക് താമസം മാറിയതിനു ശേഷം കുടുംബബന്ധങ്ങളിൽ അകൽച്ച രൂപപ്പെട്ടിരുന്നു. അടുത്തിടെ യുകെയിലെത്തിയ ഹാരി, കുടുംബത്തോടൊപ്പം ഹൈഗ്രോവിൽ സമയം ചെലവഴിക്കുകയായിരുന്നു. കൊച്ചുമക്കൾക്ക് മുത്തച്ഛനോടൊപ്പം കൂടുതൽ സമയം ചെലവഴിക്കാൻ അവസരം ഒരുക്കുക എന്നതും സന്ദർശനത്തിന്റെ പ്രധാന ലക്ഷ്യങ്ങളിലൊന്നായിരുന്നുവെന്നാണ് റിപ്പോർട്ടുകൾ.

സുരക്ഷാ പ്രശ്നങ്ങളും മുൻകാല അഭിപ്രായവ്യത്യാസങ്ങളും കാരണം ഇരുകുടുംബങ്ങളും തമ്മിലുള്ള ബന്ധം ഏറെക്കാലമായി വാർത്തകളിൽ ഇടം നേടിയിരുന്നു. എന്നാൽ ഈ സ്വകാര്യ കൂടിക്കാഴ്ച രാജകുടുംബത്തിലെ ഭിന്നതകൾ പരിഹരിക്കുന്നതിനുള്ള ഒരു സുപ്രധാന നീക്കമായി വിലയിരുത്തപ്പെടുന്നു. ഹാരിയും ചാൾസ് രാജാവും തമ്മിൽ സമീപകാലത്ത് സ്ഥിരമായി ആശയവിനിമയം നടത്തിയിരുന്നുവെന്നും റിപ്പോർട്ടുകൾ സൂചിപ്പിക്കുന്നു.

ന്യൂസ് ഡെസ്ക്, മലയാളം യുകെ

ലണ്ടൻ∙ ബ്രിട്ടന്റെ നിയമചരിത്രത്തിലെ ഏറ്റവും വലിയ കൂട്ടായ ഉപഭോക്തൃ കേസുകളിലൊന്നായ ‘ഡീസൽഗേറ്റ്’ ഹർജികളിൽ 16 ലക്ഷം വാഹന ഉടമകൾക്ക് തിരിച്ചടി. മെഴ്‌സിഡീസ്-ബെൻസ്, ഫോർഡ്, റെനോ, നിസാൻ, പ്യൂഷോ, സിട്രോയിൻ തുടങ്ങിയ പ്രമുഖ വാഹന നിർമാതാക്കൾക്കെതിരെ നൽകിയ കേസിലെ ഭൂരിഭാഗം ആരോപണങ്ങളും ലണ്ടനിലെ ഹൈക്കോടതി തള്ളി. വാഹനങ്ങളുടെ മലിനീകരണ പരിശോധനയിൽ കൃത്രിമം കാട്ടാൻ നിയമവിരുദ്ധ സോഫ്റ്റ്‌വെയർ ഉപയോഗിച്ചെന്നാണ് ഹർജിക്കാർ ആരോപിച്ചിരുന്നത്.

2009ന് ശേഷം വിറ്റഴിച്ച ഡീസൽ വാഹനങ്ങളിൽ ‘ഡിഫീറ്റ് ഡിവൈസ്’ എന്നറിയപ്പെടുന്ന സാങ്കേതിക സംവിധാനം ഉപയോഗിച്ച് പരിശോധനാ സമയത്ത് മാത്രം കുറഞ്ഞ മലിനീകരണം കാണിക്കുകയും സാധാരണ റോഡ് ഉപയോഗത്തിൽ കൂടുതൽ നൈട്രജൻ ഓക്സൈഡ് പുറത്തുവിടുകയും ചെയ്തുവെന്നായിരുന്നു വാദം. എന്നാൽ ഭൂരിഭാഗം വാഹനങ്ങളിലെയും സംവിധാനങ്ങൾ നിയമവിരുദ്ധമാണെന്ന് തെളിയിക്കാനായില്ലെന്ന് ജഡ്ജി സാറ കോക്കറിൽ വിധിയിൽ വ്യക്തമാക്കി. നിയമം ലംഘിച്ചതായി കണക്കാക്കാൻ പരിശോധനയെ കബളിപ്പിക്കാനുള്ള വ്യക്തമായ ഉദ്ദേശ്യം തെളിയിക്കേണ്ടതുണ്ടെന്നും കോടതി ചൂണ്ടിക്കാട്ടി.

അതേസമയം, ചില മെഴ്‌സിഡീസ്, പ്യൂഷോ–സിട്രോയിൻ മോഡലുകളിൽ ഉപയോഗിച്ചിരുന്ന പ്രത്യേക സാങ്കേതിക സംവിധാനങ്ങളെക്കുറിച്ച് കോടതി പ്രതികൂല നിരീക്ഷണം നടത്തി. അവ നിയമവിരുദ്ധ ‘ഡിഫീറ്റ് ഡിവൈസുകൾ’ ആണോയെന്ന കാര്യത്തിൽ തുടർനടപടികൾ ഉണ്ടാകും. വിധിയിൽ നിരാശ പ്രകടിപ്പിച്ച ഹർജിക്കാരുടെ അഭിഭാഷകർ അപ്പീൽ നൽകുന്നത് പരിഗണിക്കുന്നതായി അറിയിച്ചു. വാഹന നിർമാതാക്കൾ വിധിയെ സ്വാഗതം ചെയ്തപ്പോൾ നഷ്ടപരിഹാരവുമായി ബന്ധപ്പെട്ട തുടർവാദങ്ങളും മറ്റ് നിയമനടപടികളും ഇനിയും കോടതിയുടെ പരിഗണനയിലുണ്ടാകും.

ന്യൂസ് ഡെസ്ക്, മലയാളം യുകെ

ലണ്ടൻ: ബെഡ്ഫോർഡ്‌ഷയറിലെ വീട്ടിൽ ഭാര്യയെയും രണ്ട് പെൺമക്കളെയും കൊലപ്പെടുത്തിയെന്ന കേസിൽ ദക്ഷിണാഫ്രിക്കയിൽ അറസ്റ്റിലായ എൻഡോദാന മ്ഖാന്യിസി ഷുമയ്ക്കെതിരെ കൊലക്കുറ്റം ചുമത്തി. അന്തർദേശീയ പൊലീസ് ഏജൻസിയായ ഇന്റർപോളിന്റെയും ബ്രിട്ടീഷ്, ദക്ഷിണാഫ്രിക്കൻ അധികൃതരുടെയും സംയുക്ത നീക്കത്തിലൂടെയാണ് ഇയാളെ ജോഹന്നാസ്ബർഗിൽ പിടികൂടിയത്.

42 വയസ്സുള്ള നൊത്താബോ സാൻഡിലെ ഷുമയെയും മക്കളായ 15 വയസ്സുകാരി നതാലിയെയും അഞ്ചുവയസ്സുകാരി നാലയെയും ബെഡ്ഫോർഡ്‌ഷയറിലെ ഗ്രേറ്റ് ഡെൻഹാമിലുള്ള വീട്ടിൽ മരിച്ച നിലയിൽ കണ്ടെത്തിയതോടെയാണ് അന്വേഷണം ആരംഭിച്ചത്. ദിവസങ്ങളായി കുടുംബത്തെ കാണാനില്ലെന്ന വിവരത്തെ തുടർന്ന് പൊലീസ് വീട്ടിൽ പ്രവേശിച്ചപ്പോഴാണ് മൃതദേഹങ്ങൾ കണ്ടെത്തിയത്.

സംഭവശേഷം ബ്രിട്ടൻ വിട്ട് സിംബാബ്‌വേയിലേക്കും പിന്നീട് ദക്ഷിണാഫ്രിക്കയിലേക്കും കടന്നതായി കരുതുന്ന ഷുമയെ കണ്ടെത്താൻ വ്യാപകമായ തിരച്ചിൽ നടന്നിരുന്നു. ഇയാളെ ബ്രിട്ടനിലേക്ക് കൈമാറുന്നതിനുള്ള നിയമനടപടികൾ ആരംഭിച്ചതായി അധികൃതർ അറിയിച്ചു. സംഭവത്തിൽ ദുഃഖാചരണവുമായി പ്രാദേശിക സമൂഹവും കുടുംബാംഗങ്ങളും രംഗത്തെത്തി.

ന്യൂസ് ഡെസ്ക്, മലയാളം യുകെ

ലണ്ടൻ: യുകെയിലെ ലിങ്കൺഷെയറിലെ ബോസ്റ്റണിൽ താമസിച്ചിരുന്ന പാലക്കാട് കാഞ്ഞിരപ്പുഴ സ്വദേശിനി ചിഞ്ചു മമ്പള്ളിൽ തോമസ് (34) പ്രസവത്തിന് പിന്നാലെ മണിക്കൂറുകൾക്കകം മരിച്ചത് മലയാളി സമൂഹത്തെ ദുഃഖത്തിലാഴ്ത്തി. ഭർത്താവ് പാലക്കാട് കാരകുറുശ്ശി സ്വദേശിയായ എമിൽ ജോസ്. നാലാമത്തെ കുഞ്ഞിന്റെ ജനനത്തിനായി ജൂലൈ 6-ന് ബോസ്റ്റൺ പിൽഗ്രിം എൻഎച്ച്എസ് ആശുപത്രിയിൽ പ്രവേശിപ്പിക്കപ്പെട്ട ചിഞ്ചു, ജൂലൈ 7-ന് സാധാരണ പ്രസവത്തിലൂടെ ആരോഗ്യവതിയായ പെൺകുഞ്ഞിന് ജന്മം നൽകിയിരുന്നു. അമ്മയ്ക്കും കുഞ്ഞിനും ആരോഗ്യപ്രശ്നങ്ങളില്ലെന്ന വിലയിരുത്തലിനെ തുടർന്ന് ജൂലൈ 8-ന് വൈകിട്ട് ആശുപത്രിയിൽ നിന്ന് ഡിസ്ചാർജ് ചെയ്ത് വീട്ടിലേക്ക് മടങ്ങി.

എന്നാൽ വീട്ടിലെത്തി അധികസമയം കഴിയുന്നതിനുമുമ്പ് ചിഞ്ചുവിന് ശാരീരിക അസ്വസ്ഥത അനുഭവപ്പെടുകയും തുടർന്ന് കുഴഞ്ഞുവീഴുകയും ചെയ്തു. ഉടൻ ആശുപത്രിയിൽ എത്തിച്ച് ചികിത്സ നൽകിയെങ്കിലും ആരോഗ്യനില ഗുരുതരമാവുകയും വ്യാഴാഴ്ച പുലർച്ചെ മരണം സംഭവിക്കുകയുമായിരുന്നു. മരണകാരണം സംബന്ധിച്ച ഔദ്യോഗിക സ്ഥിരീകരണത്തിനും തുടർ മെഡിക്കൽ നടപടികൾക്കും കുടുംബം കാത്തിരിക്കുകയാണ്. നാല് വർഷം മുൻപ് നേഴ്‌സായി ജോലി ലഭിച്ചതിനെ തുടർന്ന് യുകെയിലെത്തിയ ചിഞ്ചുവിനൊപ്പം പിന്നീട് ഭർത്താവും മക്കളും ചേർന്നിരുന്നു. ഒരു വർഷം മുൻപാണ് കുടുംബം ബോസ്റ്റണിൽ സ്വന്തമായി വീട് വാങ്ങി താമസം തുടങ്ങിയത്.

എട്ടു വയസ്സുള്ള മകളും ആറും മൂന്നും വയസ്സുള്ള രണ്ട് ആൺമക്കളും നവജാത പെൺകുഞ്ഞും ഉൾപ്പെടെ നാല് മക്കളെയാണ് ചിഞ്ചു ബാക്കി വെച്ചിരിക്കുന്നത്. പ്രസവശുശ്രൂഷയ്ക്കായി യുകെയിലെത്തിയ മാതാപിതാക്കളായ തോമസും റോസമ്മയും ഉൾപ്പെടെയുള്ള കുടുംബാംഗങ്ങൾ കടുത്ത ദുഃഖത്തിലാണ്. ബോസ്റ്റൺ മേഖലയിലെ സീറോ-മലബാർ സഭയുടെ മാർ യൗസേപ്പ് മിഷനിലെ സജീവ അംഗങ്ങളായിരുന്ന എമിലും കുടുംബവും പ്രദേശത്തെ മലയാളി സമൂഹത്തിൽ സുപരിചിതരാണ്. ചിഞ്ചുവിന്റെ അപ്രതീക്ഷിത വേർപാട് യുകെയിലെ മലയാളി സമൂഹത്തെയാകെ കണ്ണീരിലാഴ്ത്തിയിരിക്കുകയാണ്.

ചിഞ്ചു മമ്പള്ളിൽ തോമസിൻെറ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.

ന്യൂസ് ഡെസ്ക്, മലയാളം യുകെ

ലണ്ടൻ ∙ ഇംഗ്ലണ്ടും വെയിൽസും ഉൾപ്പെടെയുള്ള പ്രദേശങ്ങളിലെ 2025-ലെ ഏറ്റവും ജനപ്രിയ ശിശു പേരുകളുടെ പട്ടിക ദേശീയ സ്ഥിതിവിവരക്കണക്ക് ഓഫീസ് (ONS) പുറത്തുവിട്ടു. ആൺകുട്ടികളുടെ പേരുകളിൽ തുടർച്ചയായി മൂന്നാം വർഷവും മുഹമ്മദ് ഒന്നാം സ്ഥാനം നിലനിർത്തി. 5,957 കുഞ്ഞുങ്ങൾക്ക് ഈ പേര് നൽകിയപ്പോൾ നോഹ, ലിയോ എന്നിവ രണ്ടും മൂന്നും സ്ഥാനങ്ങൾ നേടി.

പെൺകുട്ടികളുടെ പേരുകളിൽ ഒലീവിയ തുടർച്ചയായി പത്താം വർഷവും ഒന്നാം സ്ഥാനത്ത് തുടരുകയാണ്. 2,386 കുഞ്ഞുങ്ങൾക്ക് ഈ പേര് നൽകിയതായി കണക്കുകൾ വ്യക്തമാക്കുന്നു. ലിലി രണ്ടാം സ്ഥാനത്തേക്ക് ഉയർന്നപ്പോൾ അമേലിയ മൂന്നാം സ്ഥാനത്തായി. ഇസ്ല, ഫ്ലോറൻസ്, ഫ്രേയ, പോപ്പി, എൽസി, ഐവി, ഇസബെല്ല എന്നിവയും ആദ്യ പത്തിൽ ഇടം നേടി.

2025-ലെ പട്ടികയിൽ പുതിയതായി ഇടം നേടിയ പേരുകളിൽ പെൺകുട്ടികൾക്കായി എലിയാന, ഗ്രേസി, അനായ, ആൽബ, മാർണി, ലൈല, ഫ്രാങ്കി എന്നിവയും ആൺകുട്ടികൾക്കായി വിൻസെന്റ്, കാർട്ടർ, സ്റ്റാൻലി, റൂബൻ എന്നിവയും ഉൾപ്പെടുന്നു. അതേസമയം ജെസിക്ക, എല്ലി തുടങ്ങിയ ചില പേരുകൾ പെൺകുട്ടികളുടെ ആദ്യ 100 പട്ടികയിൽ നിന്ന് പുറത്തായി. ജനസംഖ്യാ മാറ്റങ്ങളും സാംസ്കാരിക വൈവിധ്യവും യുകെയിലെ പേരിടൽ പ്രവണതകളിൽ വ്യക്തമായി പ്രതിഫലിക്കുന്നുവെന്നാണ് പുതിയ കണക്കുകൾ സൂചിപ്പിക്കുന്നത്.

ന്യൂസ് ഡെസ്ക്, മലയാളം യുകെ

ലണ്ടൻ ∙ കുട്ടികളെയും കൗമാരക്കാരെയും വേപ്പിംഗിൽ നിന്ന് അകറ്റാൻ ഇ-സിഗരറ്റ് ഉൽപ്പന്നങ്ങളുടെ പാക്കേജിംഗിനും ഫ്ലേവറുകൾക്കും കടുത്ത നിയന്ത്രണങ്ങൾ ഏർപ്പെടുത്താൻ യു.കെ. സർക്കാർ പദ്ധതിയിടുന്നു. വേപ്പുകൾ സാധാരണ പാക്കേജിംഗിൽ മാത്രം വിൽക്കുക, ഉപകരണങ്ങളുടെ നിറം വെള്ള, കറുപ്പ്, ചാരനിറം എന്നിവയിലേക്ക് പരിമിതപ്പെടുത്തുക, കടകളിൽ പൊതുകാഴ്ചയിൽ നിന്ന് മാറ്റിവയ്ക്കുക തുടങ്ങിയ നിർദേശങ്ങളാണ് 12 ആഴ്ചത്തെ പൊതുജനാഭിപ്രായ ശേഖരണത്തിനായി മുന്നോട്ടുവെച്ചിരിക്കുന്നത്.

ഫ്ലേവറുകളുടെ പേരിടലിലും നിയന്ത്രണം കൊണ്ടുവരും. “ആപ്പിൾ” പോലുള്ള ലളിതമായ പേരുകൾ അനുവദിക്കുമെങ്കിലും മിഠായി, ഡെസേർട്ട്, മദ്യപാന പാനീയങ്ങൾ എന്നിവയെ ഓർമിപ്പിക്കുന്ന പേരുകൾ നിരോധിക്കും. ആകർഷകമായ പാക്കേജിംഗും നിറങ്ങളും കാരണം കുട്ടികളിൽ വേപ്പിംഗ് വർധിക്കുന്നതായി സർക്കാർ ചൂണ്ടിക്കാട്ടുന്നു. ബ്രിട്ടനിൽ 11 മുതൽ 17 വയസ് വരെയുള്ളവരിൽ ഏകദേശം 19 ശതമാനം പേർ വേപ്പിംഗ് പരീക്ഷിച്ചിട്ടുണ്ടെന്നാണ് കണക്കുകൾ.

പുകയില ഉൽപ്പന്നങ്ങൾക്കും പുതിയ നിയന്ത്രണങ്ങൾ ബാധകമാകും. സിഗരറ്റ് പായ്ക്കറ്റുകളിൽ പുകവലി നിർത്താൻ സഹായം ലഭിക്കുന്ന വിവരങ്ങൾ ഉൾപ്പെടുത്തുക, എല്ലാ പുകയില ഉൽപ്പന്നങ്ങൾക്കും സാധാരണ പാക്കേജിംഗ് നിർബന്ധമാക്കുക, ഡ്യൂട്ടി-ഫ്രീ കടകളിലെയും വിമാനത്താവളങ്ങളിലെയും പ്രദർശന ഇളവുകൾ അവസാനിപ്പിക്കുക തുടങ്ങിയ നടപടികളും പരിഗണനയിലുണ്ട്. അതേസമയം, വേപ്പുകൾ പുകവലി നിർത്താൻ സഹായിക്കുന്ന ഒരു ഉപാധിയായതിനാൽ മുതിർന്ന പുകവലിക്കാരുടെ ഉപയോഗത്തെ പ്രതികൂലമായി ബാധിക്കാത്ത വിധത്തിൽ നിയന്ത്രണങ്ങൾ നടപ്പാക്കണമെന്ന് ആരോഗ്യ വിദഗ്ധർ അഭിപ്രായപ്പെട്ടു.

ന്യൂസ് ഡെസ്ക്, മലയാളം യുകെ

ലണ്ടൻ ∙ 1998-ൽ ഇംഗ്ലണ്ടിലെ ഡഡ്‌ലിയിൽ നിന്ന് ദുരൂഹ സാഹചര്യത്തിൽ കാണാതായ ഏഴ് മക്കളുടെ അമ്മ പാട്രീഷ്യ ലാഷ്‌ലിയുടെ കൊലപാതകവുമായി ബന്ധപ്പെട്ട് 66-കാരനായ ട്രെവർ ഡങ്ക്‌ലിയ്ക്കെതിരെ കൊലക്കുറ്റം ചുമത്തി. സെപ്റ്റംബർ 1998-ൽ ഹാൾ സ്ട്രീറ്റിലെ ഫ്ലാറ്റിൽ അവസാനമായി കണ്ട പാട്രീഷ്യയെ പിന്നീട് കണ്ടെത്താനായിരുന്നില്ല. വെസ്റ്റ് മിഡ്‌ലാൻഡ്സ് പൊലീസ് വ്യാഴാഴ്ചയാണ് കുറ്റം ചുമത്തിയ വിവരം അറിയിച്ചത്.

33 വയസ്സായിരിക്കെയാണ് പാട്രീഷ്യ കാണാതായത്. സുഹൃത്തുക്കൾക്കിടയിൽ ‘പാറ്റ്’എന്ന പേരിലും അവർ അറിയപ്പെട്ടിരുന്നു. ‘വനേസ’, ‘ട്രിഷ്യ’ എന്നീ പേരുകളും ‘ബ്രാഡ്ഫോർഡ്’ എന്ന കുടുംബപ്പേരും അവർ ഉപയോഗിച്ചിരുന്നതായി പൊലീസ് പറഞ്ഞു. ന്യൂകാസിൽ, ലണ്ടൻ, വെയിൽസ്, സ്കോട്‍ ലൻഡ് എന്നിവിടങ്ങളുമായി പാട്രീഷ്യയ്ക്ക് ബന്ധമുണ്ടായിരുന്നു. 1990-കളുടെ മധ്യത്തിൽ ഡഡ്‌ലിയിലേക്ക് താമസം മാറിയ അവർ പ്രദേശത്തെ ‘നോ ലിമിറ്റ്സ്’ ക്ലബ്ബിലും മറ്റ് പബ്ബുകളിലും സ്ഥിരമായി എത്താറുണ്ടായിരുന്നു. ട്രെവർ ഡങ്ക്‌ലിയും പാട്രീഷ്യയും പരസ്പരം പരിചയക്കാരായിരുന്നുവെന്നാണ് അന്വേഷണ സംഘം വ്യക്തമാക്കിയത്.

പ്രതിയെ കസ്റ്റഡിയിൽ റിമാൻഡ് ചെയ്തതായും തിങ്കളാഴ്ച വോൾവർഹാംപ്ടൺ ക്രൗൺ കോടതിയിൽ ഹാജരാക്കുമെന്നും പൊലീസ് അറിയിച്ചു. കേസിൽ കൂടുതൽ വിവരങ്ങൾ ലഭ്യമുള്ളവർ മുന്നോട്ട് വരണമെന്ന് അന്വേഷണ ഉദ്യോഗസ്ഥർ അഭ്യർഥിച്ചു. പാട്രീഷ്യ കാണാതായ സമയത്ത് തന്നെ പൊലീസുമായി ബന്ധപ്പെട്ടവരാണെങ്കിലും വീണ്ടും വിവരങ്ങൾ കൈമാറാൻ മടിക്കരുതെന്നും, ഏകദേശം മൂന്ന് പതിറ്റാണ്ടിന് ശേഷം കുടുംബത്തിന് ഉത്തരങ്ങൾ കണ്ടെത്താൻ അത് സഹായകരമാകുമെന്നും അന്വേഷണ സംഘം വ്യക്തമാക്കി.

ന്യൂസ് ഡെസ്ക്, മലയാളം യുകെ

ലണ്ടൻ ∙ അമേരിക്കൻ സാങ്കേതിക കമ്പനിയായ പാലന്റിറുമായി ദേശീയ ആരോഗ്യ സേവനം (എൻഎച്ച്എസ്) ഒപ്പുവെച്ച 330 ദശലക്ഷം പൗണ്ടിന്റെ ഡേറ്റാ പ്ലാറ്റ്ഫോം കരാർ അവസാനിപ്പിക്കണമെന്ന് ആവശ്യപ്പെട്ട് എംപിമാർ രംഗത്ത്. 2027 – ൽ പ്രാബല്യത്തിൽ വരുന്ന കരാർ അവസാനിപ്പിക്കാനുള്ള വ്യവസ്ഥ ഉപയോഗിച്ച് പദ്ധതിയിൽനിന്ന് പിന്മാറണമെന്ന് പാർലമെന്ററി സമിതി സർക്കാരിനോട് ശുപാർശ ചെയ്തു. ആരോഗ്യ മേഖലയിലെ ഡേറ്റാ സുരക്ഷയെയും പൊതുജന വിശ്വാസത്തെയും കുറിച്ചുള്ള ആശങ്കകളാണ് സമിതി മുന്നോട്ടുവച്ചത്.

എൻഎച്ച്എസിലെ വിവിധ വിവരശേഖരണ സംവിധാനങ്ങളെ ഏകോപിപ്പിക്കുന്ന പ്ലാറ്റ്ഫോമാണ് പാലന്റിർ വികസിപ്പിച്ചിരിക്കുന്നത്. എന്നാൽ രോഗികളുടെ സ്വകാര്യ വിവരങ്ങൾ ഒരു സ്വകാര്യ വിദേശ കമ്പനിയുടെ സാങ്കേതിക സംവിധാനത്തിൽ കൈകാര്യം ചെയ്യുന്നതിനെതിരെ ആരോഗ്യ പ്രവർത്തകരും ട്രേഡ് യൂണിയനുകളും നിരവധി എംപിമാരും ആശങ്ക പ്രകടിപ്പിച്ചു. നൂറിലധികം എൻഎച്ച്എസ് സാങ്കേതിക ജീവനക്കാരും കരാർ പുനഃപരിശോധിക്കണമെന്ന് ആവശ്യപ്പെട്ടിട്ടുണ്ട്.

അതേസമയം, ചികിത്സാ കാത്തിരിപ്പുപട്ടിക കുറയ്ക്കുന്നതിനും രോഗനിർണയ സേവനങ്ങൾ കൂടുതൽ കാര്യക്ഷമമാക്കുന്നതിനും ഈ സംവിധാനം സഹായിച്ചിട്ടുണ്ടെന്ന് കമ്പനി അവകാശപ്പെടുന്നു. രോഗിവിവരങ്ങളുടെ പൂർണ നിയന്ത്രണം എൻഎച്ച്എസിനാണെന്നും വിവരങ്ങൾ മറ്റ് ആവശ്യങ്ങൾക്ക് ഉപയോഗിക്കില്ലെന്നും കമ്പനി വ്യക്തമാക്കി. എന്നിരുന്നാലും ആരോഗ്യ ഡേറ്റാ കൈകാര്യം ചെയ്യാൻ ആഭ്യന്തരമായി വികസിപ്പിച്ച ബദൽ സംവിധാനങ്ങൾ പരിഗണിക്കണമെന്ന ആവശ്യം രാഷ്ട്രീയ തലത്തിലും ശക്തമാകുകയാണ്.