ന്യൂസ് ഡെസ്ക്, മലയാളം യുകെ

ഇംഗ്ലണ്ടിലെ ഹാംഷെയറിലെ ചാൻഡ്ലേഴ്‌സ് ഫോർഡിൽ ഹാലോവീൻ ആഘോഷത്തിനിടെ ഉണ്ടായ കത്തിക്കുത്തിൽ അഞ്ച് കൗമാരക്കാർക്ക് ഗുരുതരമായി പരിക്കേറ്റു. ശനിയാഴ്ച രാത്രി 10.30-ഓടെ ഈസ്റ്റ്‌ലീക്ക് സമീപമുള്ള പാർക്ക് റോഡിലെ ഒരു വീട്ടിൽ നടന്ന ആഘോഷത്തിനിടെയാണ് സംഭവം. 16 വയസ്സുള്ള മൂന്ന് ആൺകുട്ടികൾക്കും 17 വയസ്സുള്ള രണ്ട് പേർക്കുമാണ് പരിക്കേറ്റത്. ഇവരെ ഉടൻ ആശുപത്രിയിൽ പ്രവേശിപ്പിച്ചു.

അജ്ഞാതരായ ഒരു സംഘം പാർട്ടി നടന്ന വീട്ടിലേക്ക് അതിക്രമിച്ച് കടന്നതിന് പിന്നാലെയാണ് കത്തിക്കുത്തുണ്ടായതെന്ന് ഹാംഷെയർ പോലീസ് അറിയിച്ചു. സംഭവത്തെത്തുടർന്ന് പ്രദേശത്ത് പോലീസ് സുരക്ഷാവലയം ഏർപ്പെടുത്തി. ആംബുലൻസുകൾക്കൊപ്പം എയർ ആംബുലൻസും സ്ഥലത്തെത്തിയതായി ദൃക്‌സാക്ഷികൾ പറഞ്ഞു. പരിക്കേറ്റ ഒരാൾ വീട്ടിൽനിന്ന് പുറത്തേക്ക് ഓടിവന്ന് തന്നെ കുത്തിയെന്നും രണ്ടുപേർ പിന്തുടരുകയാണെന്നും വിളിച്ചുപറയുന്നത് കണ്ടതായി മറ്റൊരു ദൃക്‌സാക്ഷി വെളിപ്പെടുത്തി.

സംഭവത്തിൽ ഉൾപ്പെട്ടവരെ കണ്ടെത്തുന്നതിനായി പോലീസ് അന്വേഷണം ഊർജിതമാക്കിയിട്ടുണ്ട്. സംഭവത്തെക്കുറിച്ച് എന്തെങ്കിലും വിവരം ലഭിച്ചിട്ടുള്ളവർ മുന്നോട്ടുവരണമെന്ന് അന്വേഷണ ഉദ്യോഗസ്ഥർ അഭ്യർഥിച്ചു. സംഭവത്തിൽ ആശങ്ക പ്രകടിപ്പിച്ച ഈസ്റ്റ്‌ലീ എംപി ലിസ് ജാർവിസ്, പരിക്കേറ്റവർക്കും അവരുടെ കുടുംബങ്ങൾക്കും പിന്തുണ അറിയിക്കുകയും ചെയ്തു. സ്ഥിരീകരിക്കാത്ത വിവരങ്ങളും ഊഹാപോഹങ്ങളും പ്രചരിപ്പിക്കരുതെന്നും അവർ പൊതുജനങ്ങളോട് അഭ്യർഥിച്ചു.

ന്യൂസ് ഡെസ്ക്, മലയാളം യുകെ

സ്പെയിനിലുണ്ടായ ട്രെയിൻ ദുരന്തത്തിൽ കേംബ്രിഡ്ജ് സർവകലാശാലയിലെ പ്രമുഖ ശാസ്ത്രജ്ഞ ഡോ. മാർട്ട ഷഹ്ബാസി കൊല്ലപ്പെട്ടു. ശാസ്ത്രരംഗത്തെ മികവിനുള്ള പുരസ്‌കാരം ഏറ്റുവാങ്ങുന്നതിനായി സ്വന്തം രാജ്യമായ സ്പെയിനിലേക്ക് യാത്ര ചെയ്യുന്നതിനിടെയാണ് അപകടം. ബുധനാഴ്ച മാഡ്രിഡിന് തെക്ക് ഉർദയ്ക്ക് സമീപം രണ്ട് ട്രെയിനുകൾ കൂട്ടിയിടിച്ചുണ്ടായ ദുരന്തത്തിൽ 69 പേർ മരിച്ചതായാണ് റിപ്പോർട്ട്. രണ്ട് കുട്ടികളുടെ മാതാവായ മാർട്ടയുടെ അപ്രതീക്ഷിത വിയോഗം കേംബ്രിഡ്ജിലെ ശാസ്ത്രസമൂഹത്തെ ദുഃഖത്തിലാഴ്ത്തി.

കേംബ്രിഡ്ജിലെ MRC ലബോറട്ടറി ഓഫ് മോളിക്യുലാർ ബയോളജിയിൽ ഗവേഷകസംഘത്തെ നയിച്ചിരുന്ന മാർട്ട, മനുഷ്യ ഭ്രൂണങ്ങളുടെ ആദ്യകാല വളർച്ച, കോശങ്ങളുടെ പ്രവർത്തനം, ഗർഭധാരണ പരാജയങ്ങളുടെ കാരണങ്ങൾ തുടങ്ങിയ മേഖലകളിലാണ് ശ്രദ്ധേയമായ ഗവേഷണങ്ങൾ നടത്തിയത്. 2020-ലാണ് അവർ കേംബ്രിഡ്ജിലെ ലബോറട്ടറിയിൽ ചേർന്നത്. സ്പാനിഷ് സൊസൈറ്റി ഓഫ് ഡെവലപ്‌മെന്റൽ ബയോളജിയുടെ ശാസ്ത്ര മികവിനുള്ള പുരസ്‌കാരത്തിനാണ് അവർ തിരഞ്ഞെടുക്കപ്പെട്ടിരുന്നത്. അവാർഡ് ഏറ്റുവാങ്ങുന്നതിനായി അൻഡലൂഷ്യയിലെ എൽ റൊംപിഡോയിൽ നടക്കുന്ന സമ്മേളനത്തിലേക്ക് പോകുകയായിരുന്നു അവർ.

മാർട്ടയുടെ വിയോഗം വലിയ നഷ്ടമാണെന്ന് MRC ലബോറട്ടറി ഓഫ് മോളിക്യുലാർ ബയോളജി അനുശോചന സന്ദേശത്തിൽ അറിയിച്ചു. അവരുടെ ഗവേഷണ മികവും സഹപ്രവർത്തകരോടുള്ള സൗഹൃദവും എന്നും ഓർമിക്കപ്പെടുമെന്ന് കേംബ്രിഡ്ജ് സർവകലാശാലയിലെ സ്റ്റം സെൽ ഇൻസ്റ്റിറ്റ്യൂട്ട് ഡയറക്ടർ പ്രൊഫ. ബെർട്ടി ഗോട്ട്ജൻസ് പറഞ്ഞു. സ്പാനിഷ് ദേശീയ റെയിൽവേയായ റെൻഫെയുടെ അതിവേഗ ട്രെയിൻ മറ്റൊരു സ്വകാര്യ കമ്പനിയുടെ നിശ്ചലമായ ട്രെയിനിന് പിന്നിൽ ഇടിച്ചാണ് അപകടമുണ്ടായത്. 540-ലധികം യാത്രക്കാർ രണ്ട് ട്രെയിനുകളിലായി ഉണ്ടായിരുന്നുവെന്നാണ് റിപ്പോർട്ട്. ദുരന്തത്തെ തുടർന്ന് സ്പെയിനിൽ മൂന്ന് ദിവസത്തെ ദേശീയ ദുഃഖാചരണം പ്രഖ്യാപിച്ചിരുന്നു.

ന്യൂസ് ഡെസ്ക്, മലയാളം യുകെ

യുകെയിൽ നിരോധിത വിഭാഗത്തിൽപ്പെടുന്ന അഞ്ച് ഇനം നായകളെ വളർത്തുന്നവർക്ക് ബാധകമായ പുതിയ നിയമം 2026 നവംബർ 1 മുതൽ പ്രാബല്യത്തിൽ വന്നു. 12 വയസ്സിന് താഴെയുള്ള കുട്ടികളെ ഇത്തരം നായകളുമായി വീട്ടിലോ സ്വകാര്യ പരിസരങ്ങളിലോ മുതിർന്നവരുടെ മേൽനോട്ടമില്ലാതെ അടുത്തിടപഴകാൻ അനുവദിക്കരുതെന്നാണ് പുതിയ നിയമം അനുശാസിക്കുന്നത്. നിയമം ലംഘിച്ചാൽ നായയുടെ ഉടമകൾക്കെതിരെ ക്രിമിനൽ നടപടികൾ ഉണ്ടാകാം. വീട്ടിൽ കുട്ടിയും നായയും ഒരുമിച്ചുള്ള സാഹചര്യത്തിൽ അൽപ്പസമയത്തേക്ക് പോലും മുറി വിട്ടുപോകേണ്ടി വന്നാൽ ഇരുവരെയും സുരക്ഷിതമായി വേർതിരിക്കുകയോ കുട്ടിയെയോ നായയെയോ ഒപ്പം കൊണ്ടുപോകുകയോ വേണമെന്ന് നായ പരിശീലകയായ ഷാരൺ ബോൾട്ട് മുന്നറിയിപ്പ് നൽകി. ബാത്ത്റൂമിലേക്ക് പോകാൻ പോലും കുട്ടിയെയും നായയെയും തനിച്ചാക്കി വിടാൻ കഴിയാത്ത സാഹചര്യമാണിതെന്ന് അവർ ചൂണ്ടിക്കാട്ടി.

പുതിയ നിയന്ത്രണം ബാധകമാകുന്നത് നിരോധിത ഇനത്തിൽപ്പെട്ട നായകളെ നിയമപരമായി വളർത്തുന്നതിനുള്ള ഒഴിവാക്കൽ സർട്ടിഫിക്കറ്റ് കൈവശമുള്ളവർക്കാണ്. പിറ്റ് ബുൾ ടെറിയർ, ജാപ്പനീസ് ടോസ, ഡോഗോ അർജന്റീനോ, ഫില ബ്രസീലിയേറോ, എക്സ് എൽ ബുള്ളി എന്നിവയാണ് യുകെയിൽ നിരോധിച്ചിട്ടുള്ള അഞ്ച് വിഭാഗങ്ങൾ. നായയുടെ പേര് അല്ലെങ്കിൽ വംശപരമ്പര മാത്രമല്ല, ശരീരഘടനയും രൂപസവിശേഷതകളും പരിഗണിച്ചാണ് നിരോധിത വിഭാഗത്തിൽ ഉൾപ്പെടുത്തുന്നത്. കുട്ടികൾക്ക് ഇത്തരം നായകളുമായി അടുത്തിടപഴകേണ്ട സാഹചര്യമുണ്ടെങ്കിൽ 18 വയസ്സിന് മുകളിലുള്ള ഒരാൾ നേരിട്ട് നിരീക്ഷിക്കണം. ക്യാമറകളോ ബേബി മോണിറ്ററുകളോ മുതിർന്നവരുടെ നേരിട്ടുള്ള സാന്നിധ്യത്തിന് പകരമാകില്ലെന്ന് പരിസ്ഥിതി, ഭക്ഷ്യ ഗ്രാമകാര്യ വകുപ്പ് (DEFRA) വ്യക്തമാക്കിയിട്ടുണ്ട്.

നിലവിലുള്ള നിയമപ്രകാരം ഈ നായകളെ പൊതുസ്ഥലങ്ങളിൽ കൊണ്ടുപോകുമ്പോൾ എല്ലായ്പ്പോഴും വായിൽ മസിൽ (Muzzle) ധരിപ്പിക്കുകയും ചങ്ങലയിൽ ബന്ധിക്കുകയും വേണം. മൈക്രോചിപ്പ് ഘടിപ്പിക്കൽ, വന്ധ്യകരണം, സുരക്ഷിതമായ സ്ഥലത്ത് സൂക്ഷിക്കൽ തുടങ്ങിയ നിബന്ധനകളും പാലിക്കണം. പുതിയ നിയമം ലംഘിക്കുന്നതായി കണ്ടെത്തിയാൽ പോലീസിന് നായയെ പിടിച്ചെടുക്കാനും ഉടമയ്‌ക്കെതിരെ നിയമനടപടി സ്വീകരിക്കാനും അധികാരമുണ്ട്. നിരോധിത ഇനത്തിൽപ്പെട്ട നായയെ ആവശ്യമായ സർട്ടിഫിക്കറ്റില്ലാതെ വളർത്തുന്നതും വിൽക്കുന്നതും കൈമാറുന്നതും കുറ്റകരമാണ്. കുറ്റം തെളിഞ്ഞാൽ ആറുമാസം വരെ തടവോ പരിധിയില്ലാത്ത പിഴയോ രണ്ടും കൂടിയോ ലഭിക്കാം. കുട്ടികളുടെ സുരക്ഷ ഉറപ്പാക്കുന്നതിനൊപ്പം നായകളെ ഉത്തരവാദിത്തത്തോടെ വളർത്തേണ്ടതിന്റെ പ്രാധാന്യവും പുതിയ നിയമം ഓർമിപ്പിക്കുന്നു.

ന്യൂസ് ഡെസ്ക്, മലയാളം യുകെ

ലണ്ടൻ: അറ്റ്ലാന്റിക് അടിമക്കച്ചവടം സൃഷ്ടിച്ച ദീർഘകാല വേദനകളെക്കുറിച്ച് ആത്മാർത്ഥമായ ദുഃഖത്തോടെയും ചരിത്രത്തെ മറച്ചുവയ്ക്കാത്ത സത്യസന്ധതയോടെയും സംസാരിക്കുമെന്ന് ചാൾസ് മൂന്നാമൻ രാജാവ്. കരീബിയൻ പര്യടനത്തിന്റെ അവസാനഘട്ടത്തിൽ ആന്റിഗ്വയിൽ നടക്കുന്ന കോമൺവെൽത്ത് രാഷ്ട്രത്തലവന്മാരുടെ സമ്മേളനത്തിൽ ചൊവ്വാഴ്ച നടത്തുന്ന പ്രസംഗത്തിലാണ് അടിമക്കച്ചവടത്തിന്റെ ചരിത്രവും അതിന്റെ പ്രത്യാഘാതങ്ങളും രാജാവ് പരാമർശിക്കുക. ബ്രിട്ടന്റെ കൊളോണിയൽ ഭരണകാലത്തെ തെറ്റുകൾ തുറന്നുപറയുന്നതിൽ നിന്ന് രാജാവ് പിന്മാറില്ലെന്ന് ബക്കിംഗ്ഹാം കൊട്ടാരം വ്യക്തമാക്കി.

അടിമക്കച്ചവടത്തിൽ ബ്രിട്ടന്റെ പങ്കിനെക്കുറിച്ച് ഔദ്യോഗികമായി മാപ്പുപറയാനുള്ള സാധ്യത തള്ളിക്കളയാനാവില്ലെന്ന് പ്രധാനമന്ത്രി ആൻഡി ബേൺഹാം നേരത്തെ വ്യക്തമാക്കിയിരുന്നു. അടിമക്കച്ചവടം ക്രൂരവും മനുഷ്യത്വരഹിതവുമായ പ്രവർത്തനമായിരുന്നുവെന്നും ഭൂതകാലത്തെ അഭിമുഖീകരിക്കാൻ ബ്രിട്ടൻ തയ്യാറാകണമെന്നും അദ്ദേഹം അഭിപ്രായപ്പെട്ടു. എന്നാൽ അടിമക്കച്ചവടത്തിന് ബ്രിട്ടീഷ് സർക്കാർ ഇതുവരെ ഔദ്യോഗികമായി മാപ്പുപറയുകയോ നഷ്ടപരിഹാരം നൽകുകയോ ചെയ്തിട്ടില്ല. മാപ്പുപറയുന്നതും നഷ്ടപരിഹാരം സംബന്ധിച്ച തീരുമാനങ്ങളെടുക്കുന്നതും സർക്കാരിന്റെ ഉത്തരവാദിത്വമാണെന്നും രാജകൊട്ടാരം വ്യക്തമാക്കി. ബഹാമസിൽ മുൻകാലങ്ങളിലെ ദുരിതങ്ങളെക്കുറിച്ച് സംസാരിച്ച രാജാവ്, ഗയാനയിൽ അടിമവിപ്ലവവുമായി ബന്ധപ്പെട്ട ചരിത്രപ്രാധാന്യമുള്ള സ്ഥലവും സന്ദർശിച്ചിരുന്നു.

രാജ്ഞി കാമിലയ്ക്കൊപ്പമാണ് ചാൾസ് രാജാവ് ആന്റിഗ്വയിലെത്തിയത്. സ്വാതന്ത്ര്യദിനാഘോഷങ്ങളിലും മറ്റ് ഔദ്യോഗിക പരിപാടികളിലും ഇരുവരും പങ്കെടുക്കും. ഒൻപത് ദിവസം നീളുന്ന കരീബിയൻ പര്യടനത്തിനിടെ ഏകദേശം 36 ഔദ്യോഗിക പരിപാടികളിലാണ് രാജാവ് പങ്കെടുക്കുന്നത്. അതേസമയം, 2024 ആദ്യം സ്ഥിരീകരിച്ച അർബുദത്തിന് ഇപ്പോഴും ചികിത്സ തുടരുകയാണെന്നും ആരോഗ്യനില മെച്ചപ്പെട്ട പുരോഗതിയിലാണെന്നും കൊട്ടാരം അറിയിച്ചു. അടുത്തിടെ രാജകുടുംബവുമായി ബന്ധപ്പെട്ട വിവാദങ്ങൾക്കിടയിലും ഔദ്യോഗിക ചുമതലകൾ തുടരുന്ന രാജാവിന്റെ സന്ദർശനം ബ്രിട്ടന്റെ കൊളോണിയൽ ചരിത്രവും അടിമക്കച്ചവടവുമായി ബന്ധപ്പെട്ട ഉത്തരവാദിത്വങ്ങളും വീണ്ടും ചർച്ചയിലേക്ക് കൊണ്ടുവന്നിരിക്കുകയാണ്.

ന്യൂസ് ഡെസ്ക്, മലയാളം യുകെ

ലണ്ടൻ: ബ്രിട്ടനിൽ നിരോധിക്കപ്പെട്ട പാലസ്തീൻ ആക്ഷൻ (Palestine Action) സംഘടനയ്ക്ക് പിന്തുണ പ്രഖ്യാപിച്ചുകൊണ്ട് ലണ്ടനിലെ അമേരിക്കൻ എംബസിക്ക് മുന്നിൽ നടന്ന പ്രതിഷേധത്തിൽ 139 പേരെ പൊലീസ് അറസ്റ്റ് ചെയ്തു. തെക്കുപടിഞ്ഞാറൻ ലണ്ടനിലെ നൈൻ എൽംസിലുള്ള എംബസിക്ക് മുന്നിൽ ശനിയാഴ്ച നടന്ന പ്രതിഷേധത്തിൽ ഏകദേശം 400 പേർ പങ്കെടുത്തതായി സംഘാടകരായ ഡിഫൻഡ് ഔർ ജൂറി (Defend Our Juries) അറിയിച്ചു. ‘വംശഹത്യയെ എതിർക്കുന്നു, പാലസ്തീൻ ആക്ഷനെ പിന്തുണയ്ക്കുന്നു’ എന്നെഴുതിയ പ്ലക്കാർഡുകളുമായാണ് പ്രതിഷേധക്കാർ എത്തിയത്. നിരോധിക്കപ്പെട്ട സംഘടനയെ പിന്തുണയ്ക്കുന്നത് ഭീകരവാദ നിയമപ്രകാരം കുറ്റകരമാണെന്ന് ചൂണ്ടിക്കാട്ടി പൊലീസ് പ്രതിഷേധക്കാരെ ഒരോരുത്തരെയായി അറസ്റ്റ് ചെയ്ത് നീക്കി. പ്രായമായ സ്ത്രീകളടക്കമുള്ളവരെ പൊലീസ് വാഹനങ്ങളിലേക്ക് മാറ്റുന്നതിന്റെ ദൃശ്യങ്ങളും പുറത്തുവന്നു.

2025 ജൂണിലാണ് പാലസ്തീൻ ആക്ഷനെ ബ്രിട്ടീഷ് സർക്കാർ ഭീകരസംഘടനയായി പ്രഖ്യാപിച്ച് നിരോധിച്ചത്. ഇതോടെ സംഘടനയ്ക്ക് പരസ്യമായി പിന്തുണ പ്രഖ്യാപിക്കുന്നതും കുറ്റകരമായി. എന്നാൽ നിരോധനം അഭിപ്രായ സ്വാതന്ത്ര്യത്തിനും സമാധാനപരമായ പ്രതിഷേധത്തിനുമുള്ള അവകാശത്തിനുമെതിരാണെന്നാണ് പ്രതിഷേധക്കാരുടെ വാദം. നിരോധനത്തിനെതിരെ പ്രതിഷേധിച്ചതിന്റെ പേരിൽ 2025 ജൂലൈ മുതൽ ഇതുവരെ 4,000ത്തിലധികം പേർ അറസ്റ്റിലായതായി സംഘാടകർ അവകാശപ്പെട്ടു. പ്രതിഷേധത്തിൽ പങ്കെടുത്ത 75കാരനായ മുൻ അഭിഭാഷകൻ ചാൾസ് അലിസൺ പൗരാവകാശങ്ങൾ ഇല്ലാതാകുന്നതിലുള്ള ആശങ്കയാണ് തന്നെ തെരുവിലിറക്കിയതെന്ന് പ്രതികരിച്ചു. അതേസമയം, ഇത്തരം പ്രതിഷേധങ്ങൾ ആവശ്യത്തിലധികം പൊലീസ് സേനയെ വിനിയോഗിക്കാൻ ഇടയാക്കുന്നുവെന്നാണ് മെട്രോപൊളിറ്റൻ പൊലീസിന്റെ നിലപാട്.

പാലസ്തീൻ ആക്ഷനെ ഭീകരസംഘടനയായി പ്രഖ്യാപിച്ച സർക്കാർ തീരുമാനം ചോദ്യം ചെയ്തുള്ള അപ്പീൽ നവംബർ നാലിന് സുപ്രീംകോടതി പരിഗണിക്കാനിരിക്കെയാണ് പ്രതിഷേധം നടന്നത്. നിരോധനം അഭിപ്രായസ്വാതന്ത്ര്യത്തിനുമേലുള്ള കടന്നുകയറ്റമാണെന്ന് സംഘടനയെ പിന്തുണയ്ക്കുന്നവർ ആരോപിക്കുമ്പോൾ, ഭീകരപ്രവർത്തനങ്ങളുമായി ബന്ധപ്പെട്ട നടപടികളുടെ അടിസ്ഥാനത്തിലാണ് നിരോധനമെന്നാണ് സർക്കാരിന്റെ വിശദീകരണം. സമാനമായ പ്രതിഷേധം എഡിൻബറോയിലെ അമേരിക്കൻ കോൺസുലേറ്റിന് മുന്നിലും നടന്നു. അവിടെ അറസ്റ്റ് റിപ്പോർട്ട് ചെയ്തിട്ടില്ല. പാലസ്തീൻ വിഷയത്തിൽ പ്രതിഷേധിക്കാനുള്ള അവകാശവും ഭീകരവിരുദ്ധ നിയമങ്ങളുടെ പ്രയോഗവും സംബന്ധിച്ച ചർച്ചകൾക്ക് പുതിയ മാനം നൽകുന്നതാണ് സംഭവവികാസങ്ങൾ.

ന്യൂസ് ഡെസ്ക്, മലയാളം യുകെ

ലണ്ടൻ: ജീവിതത്തിലും മരണത്തിലും ഒരുമിച്ച് യാത്രയായി ബ്രിട്ടനിലെ ദമ്പതികൾ. 53 വർഷത്തിലേറെ നീണ്ട ദാമ്പത്യജീവിതത്തിനൊടുവിൽ സ്റ്റാഫോർഡ്ഷയറിലെ ബർട്ടൺ അപോൺ ട്രെന്റിൽ താമസിച്ചിരുന്ന ഡഗ് സീബ്രിഡ്ജും ഭാര്യ ജീൻ സീബ്രിഡ്ജും മരിച്ചത് വെറും 33 മണിക്കൂർ വ്യത്യാസത്തിൽ. സെപ്റ്റംബർ 22ന് വിവാഹത്തിന്റെ 53-ാം വാർഷികം ആഘോഷിച്ച ദമ്പതികൾക്ക് പിന്നാലെയാണ് ഈ ദുരന്തം. ഹ്രസ്വകാലത്തെ അസുഖത്തെത്തുടർന്ന് ഡഗ് ഒക്ടോബർ 10ന് സമാധാനപരമായി മരണമടഞ്ഞു. ഭർത്താവിന്റെ വിയോഗവാർത്ത ജീൻ തന്നെയാണ് സമൂഹമാധ്യമങ്ങളിലൂടെ പങ്കുവച്ചത്. എന്നാൽ രണ്ട് ദിവസത്തിനുള്ളിൽ ജീനും മരിച്ചതോടെ കുടുംബം തീരാദുഃഖത്തിലായി.

കുടുംബത്തിന്റെ അഭിപ്രായത്തിൽ ഇരുവരും പരസ്പരം ഏറ്റവും അടുത്ത സുഹൃത്തുക്കളായിരുന്നു. സ്നേഹവും കരുതലും സന്തോഷവും നിറഞ്ഞ ജീവിതമായിരുന്നു അവരുടേത്. ഡഗിന്റെ വിയോഗത്തിന് പിന്നാലെ ജീനും യാത്രയായത് ഭർത്താവിനെ വിട്ടുപിരിഞ്ഞുള്ള ജീവിതം താങ്ങാനാകാത്തതുകൊണ്ടാണെന്നാണ് കുടുംബം പറയുന്നത്. കുടുംബത്തിന്റെ താങ്ങും കരുത്തുമായിരുന്നു ഡഗ്. അസുഖബാധിതനാകുന്നതുവരെ ബെൽവെഡെർ ബൗൾസ് ക്ലബ്ബിൽ പതിവായി ബൗൾസ് കളിക്കാനും അദ്ദേഹം സമയം കണ്ടെത്തിയിരുന്നു. “ജീവിതത്തിൽ ഒരുമിച്ച്, നിത്യതയിലും ഒരുമിച്ച്. വെറും 33 മണിക്കൂർ വ്യത്യാസത്തിലാണ് ഇരുവരും ഞങ്ങളെ വിട്ടുപോയത്. കൈകോർത്ത് ജീവിച്ചതുപോലെ കൈകോർത്ത് അവർ മടങ്ങി” എന്നാണ് കുടുംബത്തിന്റെ ഹൃദയസ്പർശിയായ കുറിപ്പ്.

ദമ്പതികൾക്ക് ഒരുമിച്ചുള്ള അന്ത്യയാത്ര ഒരുക്കുന്നതിനായി കുടുംബം ധനസമാഹരണവും ആരംഭിച്ചിട്ടുണ്ട്. ഇരുവരുടെയും സംസ്കാരച്ചെലവുകൾക്കായി 3,000 പൗണ്ട് സമാഹരിക്കുകയാണ് ലക്ഷ്യം. ഇതിനകം 1,700 പൗണ്ടിലധികം ലഭിച്ചിട്ടുണ്ട്. നവംബർ ആറിനാണ് ഇരുവരുടെയും സംയുക്ത സംസ്കാരച്ചടങ്ങ് നടത്താൻ തീരുമാനിച്ചിരിക്കുന്നത്. ഔപചാരികമായ വസ്ത്രധാരണ നിബന്ധനകളില്ലെന്നും സൗകര്യപ്രദമായ വസ്ത്രം ധരിച്ച് എത്താമെന്നും കുടുംബം അറിയിച്ചിട്ടുണ്ട്.

ന്യൂസ് ഡെസ്ക്, മലയാളം യുകെ

ലണ്ടൻ: മേഫെയർ, ബെൽഗ്രേവിയ, നൈറ്റ്സ്ബ്രിഡ്ജ് തുടങ്ങിയ ലണ്ടനിലെ ഏറ്റവും സമ്പന്ന മേഖലകളിൽ വിൽപ്പനയ്ക്കെത്തുന്ന പത്തിൽ എട്ട് വീടുകളും ഉടമകൾ ആവശ്യപ്പെടുന്ന വിലയേക്കാൾ കുറഞ്ഞ തുകയ്ക്കാണ് വിറ്റുപോകുന്നതെന്ന റിപ്പോർട്ടുകൾ പുറത്തുവന്നു . സമ്പന്നരായ ഇടപാടുകാർക്ക് സ്വകാര്യ ബാങ്കിങ് സേവനം നൽകുന്ന കൗട്ട്സിന്റെ (Coutts) റിപ്പോർട്ടിലാണ് ഇക്കാര്യം വ്യക്തമാക്കുന്നത്. പ്രൈം സെൻട്രൽ ലണ്ടനിലെ വീടുകളുടെ വില 2026-ലെ മൂന്നാം പാദത്തിൽ അഞ്ച് ശതമാനം ആണ് കുറഞ്ഞത് . ആവശ്യപ്പെട്ട വിലയേക്കാൾ ശരാശരി പത്ത് ശതമാനം കുറവിലാണ് വീടുകൾ വിൽക്കപ്പെടുന്നത്. ഇതോടെ ചില വീട്ടുടമകൾക്ക് ലക്ഷക്കണക്കിന് പൗണ്ട് മുതൽ ദശലക്ഷക്കണക്കിന് പൗണ്ട് വരെ മൂല്യനഷ്ടമുണ്ടാകുന്ന സാഹചര്യമാണ്.

2014-ലെ ഏറ്റവും ഉയർന്ന നിലവാരവുമായി താരതമ്യം ചെയ്യുമ്പോൾ ലണ്ടനിലെ ആഡംബര ഭവനവിലയിൽ 14 ശതമാനം ഇടിവുണ്ടായി. ബ്രെക്സിറ്റ്, കോവിഡ് മഹാമാരി, ഉയർന്ന നികുതികൾ, വായ്പാ ചെലവുകളിലെ വർധന എന്നിവയാണ് വിപണിയെ പ്രധാനമായും ബാധിച്ചത്. വിദേശത്തു നിന്ന് വാങ്ങുന്നവരുടെ താൽപര്യം കുറഞ്ഞതും തിരിച്ചടിയായി. നൈറ്റ്സ്ബ്രിഡ്ജ്, ബെൽഗ്രേവിയ, സൗത്ത് കെൻസിങ്ടൺ തുടങ്ങിയ മേഖലകളിലാണ് ഏറ്റവും വലിയ വിലയിടിവ്. ചില പ്രദേശങ്ങളിൽ വീടുകളുടെ വില മുൻകാലത്തെ ഉയർന്ന നിരക്കിനെ അപേക്ഷിച്ച് 30.8 ശതമാനം വരെയും കുറഞ്ഞിട്ടുണ്ട്. വിൽപ്പനക്കാർ കൂടുതൽ ജാഗ്രത പുലർത്തുന്നതായും പുതിയ വീടുകളുടെ ലിസ്റ്റിങ് മുൻപാദത്തെ അപേക്ഷിച്ച് 14 ശതമാനം കുറഞ്ഞതായും കൗട്ട്സ് റിപ്പോർട്ട് പറയുന്നു.

മൂന്നാം പാദത്തിൽ വീടുകളുടെ വിൽപ്പന ഇടപാടുകളിൽ 9.1 ശതമാനം കുറവുണ്ടായി. രണ്ട് മുതൽ അഞ്ച് ദശലക്ഷം പൗണ്ട് വരെ വിലയുള്ള വീടുകളുടെ ഇടപാടുകളിലാണ് 22.3 ശതമാനം ഇടിവുണ്ടായത്. അതേസമയം, പത്ത് ദശലക്ഷം പൗണ്ടിന് മുകളിൽ വിലയുള്ള വീടുകളുടെ വിപണിയിൽ സജീവത തുടരുന്നതായാണ് സാവിൽസിന്റെ (Savills) പഠനം വ്യക്തമാക്കുന്നത്. ഈ വർഷത്തെ മൂന്നാം പാദത്തിൽ മാത്രം ഇത്തരത്തിലുള്ള 26 ഇടപാടുകൾ നടന്നു. കഴിഞ്ഞ ഒരു വർഷത്തിനിടെ ആകെ 127 വീടുകൾ വിറ്റുപോയി. ഇവയുടെ മൊത്തം മൂല്യം 2.88 ബില്യൺ പൗണ്ടാണ്. അതേസമയം, ബാങ്ക് ഓഫ് ഇംഗ്ലണ്ടിന്റെ അടിസ്ഥാന പലിശനിരക്ക് ഉയരാനുള്ള സാധ്യതയും ഭവനവിപണിയിൽ ആശങ്ക വർധിപ്പിക്കുന്നുണ്ട്.

ന്യൂസ് ഡെസ്ക്, മലയാളം യുകെ

ലണ്ടൻ: രണ്ട് വർഷത്തിനിടയിലെ ഏറ്റവും മഴയേറിയ ആഴ്ചയ്ക്കു പിന്നാലെ യുകെയിൽ അടുത്ത പത്ത് ദിവസത്തേക്ക് മഴയ്ക്ക് സാധ്യതയില്ലെന്ന് കാലാവസ്ഥാ നിരീക്ഷണ റിപ്പോർട്ട്. കഴിഞ്ഞ ആഴ്ച ഓസ്റ്റിൻ, ബോയേലോ എന്നീ പേരിട്ട കൊടുങ്കാറ്റുകൾ രാജ്യത്ത് ശക്തമായ മഴയ്ക്കും മോശം കാലാവസ്ഥയ്ക്കും കാരണമായിരുന്നു. പ്രത്യേകിച്ച് ബോയേലോ കൊടുങ്കാറ്റ് വലിയ തോതിൽ മഴയെത്തിച്ചു. രണ്ട് കൊടുങ്കാറ്റുകളും തിങ്കളാഴ്ചയുണ്ടായ മറ്റൊരു ന്യൂനമർദവും ചേർന്നാണ് കഴിഞ്ഞ രണ്ടുവർഷത്തിനിടയിലെ ഏറ്റവും മഴയേറിയ ആഴ്ചയ്ക്ക് കാരണമായതെന്ന് എൻവയോൺമെന്റ് ഏജൻസി വ്യക്തമാക്കി.

നിലവിൽ രാജ്യത്തിന് മുകളിലോ സമീപത്തോ നിലകൊള്ളുന്ന ഉയർന്ന മർദ മേഖല അടുത്ത പത്ത് ദിവസത്തേക്കെങ്കിലും തുടരുമെന്നാണ് കാലാവസ്ഥാ നിരീക്ഷകരുടെ വിലയിരുത്തൽ. ഇതോടെ രാജ്യത്തിന്റെ മിക്ക ഭാഗങ്ങളിലും വരണ്ടതും ശാന്തവുമായ കാലാവസ്ഥ അനുഭവപ്പെടും. എന്നാൽ നവംബർ പകുതിയോടെ കാലാവസ്ഥയിൽ വീണ്ടും മാറ്റമുണ്ടായേക്കും. ഉയർന്ന മർദ്ദത്തിന്റെ സ്വാധീനം കുറയുന്നതോടെ അറ്റ്ലാന്റിക് സമുദ്രത്തിൽ നിന്നുള്ള ന്യൂനമർദ സംവിധാനങ്ങൾ യുകെയിലേക്ക് എത്താൻ സാധ്യതയുണ്ട്. ഇത് വീണ്ടും മഴയും ശക്തമായ കാറ്റും നിറഞ്ഞ കാലാവസ്ഥയ്ക്ക് വഴിയൊരുക്കും.

അതേസമയം, പസഫിക് സമുദ്രത്തിൽ എൽ നിനോ പ്രതിഭാസം ശക്തിപ്രാപിക്കുന്നതും യുകെയിലെ കാലാവസ്ഥയെ സ്വാധീനിച്ചേക്കാമെന്നാണ് വിലയിരുത്തൽ. ശരത്കാലത്തിന്റെ അവസാനത്തിലും ശൈത്യകാലത്തിന്റെ തുടക്കത്തിലും കൂടുതൽ മഴയ്ക്കും കൊടുങ്കാറ്റിനും എൽ നിനോ കാരണമായേക്കാമെന്ന് നിരീക്ഷകർ ചൂണ്ടിക്കാട്ടുന്നു. നിലവിലെ ശാന്തമായ കാലാവസ്ഥയ്ക്ക് ശേഷം നവംബർ പകുതിയോടെ വീണ്ടും മഴയും കാറ്റും ശക്തമാകാനുള്ള സാധ്യതയാണുള്ളത്.

ന്യൂസ് ഡെസ്ക്, മലയാളം യുകെ

ലണ്ടൻ: റഷ്യൻ വിദേശകാര്യമന്ത്രി സെർജി ലാവ്‌റോവിനൊപ്പം ഔദ്യോഗിക ഗ്രൂപ്പ് ഫോട്ടോയിൽ പങ്കെടുക്കാൻ ബ്രിട്ടനും ഓസ്‌ട്രേലിയയും ഉൾപ്പെടെയുള്ള രാജ്യങ്ങൾ വിസമ്മതിച്ചതിനെ തുടർന്ന് ജി20 വിദേശകാര്യമന്ത്രിമാരുടെ പരമ്പരാഗത ‘ഫാമിലി ഫോട്ടോ’ റദ്ദാക്കി അമേരിക്ക. അറ്റ്‌ലാന്റയിൽ നടന്ന ജി20 വിദേശകാര്യമന്ത്രിമാരുടെ യോഗത്തിന് മുന്നോടിയായി നടത്താനിരുന്ന ഫോട്ടോ സെഷനാണ് യുഎസ് സ്റ്റേറ്റ് സെക്രട്ടറി മാർക്കോ റൂബിയോ ഒഴിവാക്കിയത്. യൂറോപ്യൻ രാജ്യങ്ങൾ ഉൾപ്പെടെ യോഗത്തിൽ പങ്കെടുത്ത മൂന്നിലൊന്ന് രാജ്യങ്ങളും റഷ്യൻ പ്രതിനിധിക്കൊപ്പം ഫോട്ടോ എടുക്കില്ലെന്ന് നിലപാടെടുത്തിരുന്നു. ഫോട്ടോയിൽ പങ്കെടുക്കേണ്ടി വന്നാൽ വിട്ടുനിൽക്കുകയോ പ്രതിഷേധിച്ച് ഇറങ്ങിപ്പോകുകയോ ചെയ്യുമെന്ന് ചില പ്രതിനിധികൾ അറിയിച്ചതായാണ് റിപ്പോർട്ട്.

റഷ്യയുടെ യുക്രെയ്ൻ അധിനിവേശത്തിനെതിരായ നിലപാടാണ് രാജ്യങ്ങളുടെ പ്രതിഷേധത്തിന് പിന്നിൽ. റഷ്യയുമായി സാധാരണ ബന്ധമില്ലാത്ത സാഹചര്യത്തിൽ ലാവ്‌റോവിനൊപ്പം ഫോട്ടോ എടുക്കുന്നത് അംഗീകരിക്കാനാവില്ലെന്ന് ജർമൻ വിദേശകാര്യമന്ത്രി യോഹാൻ വാഡെഫുൾ വ്യക്തമാക്കി. റഷ്യൻ മന്ത്രിമാരുമായി നേരിട്ടുള്ള ഔദ്യോഗിക ഇടപെടൽ വർഷങ്ങളായി ബ്രിട്ടൻ ഒഴിവാക്കുകയാണെന്നും ആ നിലപാടിൽ മാറ്റമില്ലെന്നും വിദേശകാര്യ സെക്രട്ടറി എഡ് മിലിബാൻഡ് പറഞ്ഞു. യോഗത്തിൽ ലാവ്‌റോവിന്റെ സാന്നിധ്യത്തിൽ റഷ്യയുടെ യുക്രെയ്ൻ അധിനിവേശത്തെ ഓസ്‌ട്രേലിയൻ വിദേശകാര്യമന്ത്രി പെന്നി വോങും ശക്തമായി വിമർശിച്ചു. റഷ്യയുടെ നടപടികൾ ആഗോള വിപണിയെയും ഭക്ഷ്യസുരക്ഷയെയും പ്രതികൂലമായി ബാധിച്ചതായും അവർ ചൂണ്ടിക്കാട്ടി.

അതേസമയം, ആഗോള സുരക്ഷയും വ്യാപാരവും നേരിടുന്ന വെല്ലുവിളികൾ പരിഹരിക്കാൻ രാജ്യങ്ങൾ ഒന്നിച്ചുനിൽക്കണമെന്ന് മാർക്കോ റൂബിയോ യോഗത്തിന്റെ ഉദ്ഘാടന പ്രസംഗത്തിൽ ആവശ്യപ്പെട്ടു. യുക്രെയ്ൻ യുദ്ധം, ഇറാനുമായുള്ള അമേരിക്ക – ഇസ്രയേൽ സംഘർഷം, വ്യാപാര തീരുവകൾ, ദക്ഷിണ ചൈനാക്കടലിലെ തർക്കങ്ങൾ തുടങ്ങിയ വിഷയങ്ങളിൽ രാജ്യങ്ങൾക്കിടയിൽ കടുത്ത അഭിപ്രായവ്യത്യാസങ്ങളുണ്ട്. ജി20 സ്ഥാപക അംഗമായ ദക്ഷിണാഫ്രിക്കയെ ഇത്തവണ അമേരിക്ക യോഗത്തിലേക്ക് ക്ഷണിക്കാത്തതും വിവാദമായിട്ടുണ്ട്. ഈ ഭിന്നതകൾ കാരണം യോഗത്തിനൊടുവിൽ സംയുക്ത പ്രസ്താവന പുറത്തിറക്കുന്നതും പ്രയാസകരമാകുമെന്നാണ് വിലയിരുത്തൽ. അടുത്ത മാസം ഫ്ലോറിഡയിൽ ഡൊണാൾഡ് ട്രംപ് ആതിഥേയത്വം വഹിക്കുന്ന ജി20 നേതാക്കളുടെ ഉച്ചകോടിക്ക് മുന്നോടിയായുള്ള ചർച്ചകൾക്കിടെയാണ് നയതന്ത്ര തലത്തിലെ ഈ അസാധാരണ പ്രതിസന്ധി.

ന്യൂസ് ഡെസ്ക്, മലയാളം യുകെ

ലണ്ടൻ: ഭർത്താവ് മയക്കുമരുന്ന് നൽകി വർഷങ്ങളോളം ലൈംഗികമായി പീഡിപ്പിക്കുകയും മറ്റ് പുരുഷന്മാർക്ക് പീഡനത്തിനായി വിട്ടുനൽകുകയും ചെയ്ത സംഭവത്തിൽ വിചാരണ തുടരുന്നു. ബ്രിട്ടനിലെ വിൽറ്റ്ഷെയറിലെ സ്വിൻഡണിൽ ജോവാൻ യങ് (49) എന്ന യുവതിയെ പീഡിപ്പിച്ച കേസിൽ ഭർത്താവ് ഫിലിപ്പ് യങ് (50) കുറ്റം സമ്മതിച്ചിട്ടുണ്ട്. ഓൺലൈൻ പരസ്യങ്ങളിലൂടെയും സ്വിംഗേഴ്സ് വെബ്സൈറ്റിലൂടെയും ഇയാൾ ഭാര്യയെ മറ്റ് പുരുഷന്മാർക്ക് പരിചയപ്പെടുത്തിയെന്നാണ് പ്രോസിക്യൂഷൻ കോടതിയിൽ വ്യക്തമാക്കിയത്. സംഭവത്തിൽ ഉൾപ്പെട്ട മറ്റ് നാല് പുരുഷന്മാരാണ് വിൻചെസ്റ്റർ ക്രൗൺ കോടതിയിൽ വിചാരണ നേരിടുന്നത്.

പ്രതികളിലൊരാളായ കോൺനർ സാൻഡേഴ്സൺ-ഡോയൽ (32), ഓൺലൈൻ പരസ്യം കണ്ടാണ് ഫിലിപ്പ് യങുമായി ബന്ധപ്പെട്ടതെന്ന് പോലീസിനോട് പറഞ്ഞു. യുവതിയെ കെട്ടിയിട്ട് കണ്ണ് മൂടിയ നിലയിലുള്ള ചിത്രമാണ് പരസ്യത്തിലുണ്ടായിരുന്നത്. ദമ്പതികളുടെ സ്വകാര്യ ലൈംഗിക താൽപര്യത്തിന്റെ ഭാഗമായാണ് സംഭവം കരുതിയതെന്നും യുവതിക്ക് മയക്കുമരുന്ന് നൽകിയിരുന്ന കാര്യം അറിയില്ലായിരുന്നുവെന്നും ഇയാൾ അവകാശപ്പെട്ടു. യുവതി ഒരിക്കൽ ‘വേണ്ട’ എന്ന് പറഞ്ഞത് ലൈംഗികബന്ധം അവസാനിപ്പിക്കണമെന്നല്ല, മറിച്ച് മറ്റൊരു രീതിയിൽ തുടരണമെന്നാണെന്നാണ് താൻ കരുതിയതെന്ന് ഇയാൾ മൊഴി നൽകി. എന്നാൽ യുവതിക്ക് താൽപര്യമില്ലെന്ന് പിന്നീട് തോന്നിയതോടെ അവിടെനിന്ന് മടങ്ങിയെന്നും ഇയാൾ പറഞ്ഞു.

മറ്റൊരു പ്രതിയായ നോർമൻ മാക്സോണി (48), യുവതിക്ക് ലൈംഗികബന്ധത്തിന് പൂർണ സമ്മതമായിരുന്നുവെന്നും അവർ ബോധവതിയായിരുന്നുവെന്നും അവകാശപ്പെട്ടു. എന്നാൽ ഇയാൾക്കെതിരെ ബലാത്സംഗക്കുറ്റമാണ് ചുമത്തിയിരിക്കുന്നത്. റിച്ചാർഡ് വിൽക്കിൻസ് (62), മുഹമ്മദ് ഹസൻ (38) എന്നിവരും കേസിൽ പ്രതികളാണ്. ബലാത്സംഗം, ലൈംഗികാതിക്രമം തുടങ്ങിയ കുറ്റങ്ങൾ ഇവർ നിഷേധിച്ചിട്ടുണ്ട്. ഭർത്താവ് വർഷങ്ങളോളം ഭാര്യയെ മയക്കുമരുന്ന് നൽകി പീഡിപ്പിക്കുകയും മറ്റുള്ളവർക്ക് അതിന് അവസരമൊരുക്കുകയും ചെയ്ത സംഭവത്തിൽ വിചാരണ തുടരുകയാണ്.