ന്യൂസ് ഡെസ്ക്, മലയാളം യുകെ

ഗ്ലാസ്‌ഗോ: ബിരുദം ലഭിക്കില്ലെന്ന തെറ്റായ അറിയിപ്പിനെ തുടർന്ന് ആത്മഹത്യ ചെയ്ത വിദ്യാർഥി ഈതൻ സ്കോട്ട് ബ്രൗണിന്റെ (23) മരണത്തിൽ ഗ്ലാസ്‌ഗോ സർവകലാശാലയ്ക്ക് എതിരെ കടുത്ത ആരോപണങ്ങളുമായി കുടുംബം രംഗത്ത് വന്നു. ഭൂമിശാസ്ത്ര വിദ്യാർഥിയായിരുന്ന ഈതന് ഒരു വിഷയത്തിൽ ഗ്രേഡ് ലഭിച്ചിട്ടില്ലെന്നും അതിനാൽ ഓണേഴ്‌സ് ബിരുദത്തിന് അർഹനല്ലെന്നും 2024 സെപ്റ്റംബറിൽ സർവകലാശാല അറിയിച്ചതായി കുടുംബം ആരോപിച്ചു. ബിരുദദാനച്ചടങ്ങ് നടക്കേണ്ടിയിരുന്ന 2024 ഡിസംബർ 13-നാണ് ഈതൻ ആത്മഹത്യ ചെയ്തത്.

സർവകലാശാല നടത്തിയ ആഭ്യന്തര അന്വേഷണത്തിൽ മാർക്ക് കണക്കുകൂട്ടലിൽ ഗുരുതര വീഴ്ചകൾ ഉണ്ടായിരുന്നുവെന്നും ഈതന് 2:1 ഓണേഴ്‌സ് ബിരുദത്തിന് ആവശ്യമായ മാർക്ക് ഉണ്ടായിരുന്നുവെന്നും കണ്ടെത്തി. മാനസികാരോഗ്യ പ്രശ്നങ്ങളെക്കുറിച്ച് ഈതൻ അറിയിച്ചിട്ടും ആവശ്യമായ പിന്തുണ നൽകുന്നതിൽ സർവകലാശാല പരാജയപ്പെട്ടതായും റിപ്പോർട്ടിൽ പറയുന്നു. സംഭവത്തിൽ കുടുംബം നൽകിയ സിവിൽ കേസ് ഒത്തുതീർപ്പാക്കിയെങ്കിലും നഷ്ടപരിഹാര തുക പുറത്തുവിട്ടിട്ടില്ല.

സ്കോട്ടിഷ് വിദ്യാഭ്യാസ സെക്രട്ടറി മെയ്റി മക്‌അല്ലനുമായി കൂടിക്കാഴ്ച നടത്തിയ ശേഷം കുടുംബത്തിന്റെ അഭിഭാഷകൻ ആമിർ അൻവർ, സർവകലാശാലയുടെ വീഴ്ചകൾ ഗുരുതരവും സംവിധാനപരവുമാണെന്ന് ആരോപിച്ചു. അതേസമയം സംഭവത്തിൽ തങ്ങൾ അഗാധ ദുഃഖം രേഖപ്പെടുത്തുന്നതായും അന്വേഷണ റിപ്പോർട്ടിലെ ശുപാർശകൾ നടപ്പാക്കുകയാണെന്നും ഗ്ലാസ്‌ഗോ സർവകലാശാല അറിയിച്ചു.

ന്യൂസ് ഡെസ്ക്, മലയാളം യുകെ

മാഞ്ചസ്റ്റർ ∙ ഭർത്താവ് മയക്കുമരുന്ന് നൽകി അബോധാവസ്ഥയിലാക്കിയ യുവതിയെ ലൈംഗികമായി പീഡിപ്പിച്ച കേസിൽ 38കാരൻ കുറ്റം സമ്മതിച്ചു. മാഞ്ചസ്റ്റർ മിൻഷുൾ സ്ട്രീറ്റ് ക്രൗൺ കോടതിയിൽ സെപ്റ്റംബർ 15നാണ് സീൻ പിയേഴ്സ് ഒരു ലൈംഗിക അതിക്രമക്കുറ്റം സമ്മതിച്ചത്. യുവതിയെ ഭർത്താവ് മയക്കുമരുന്ന് നൽകി മറ്റ് പുരുഷന്മാരെ പീഡിപ്പിക്കാൻ അനുവദിച്ചെന്നാണ് കേസ്.

യുവതിയുടെ സ്വകാര്യത സംരക്ഷിക്കുന്നതിനായി ഭർത്താവിന്റെ പേര് പുറത്തുവിട്ടിട്ടില്ല. ഇയാൾ നേരത്തെ ചില കുറ്റങ്ങൾ സമ്മതിച്ചിരുന്നു. കഴിഞ്ഞ ഓഗസ്റ്റിൽ നടന്ന ബലാത്സംഗം, ലൈംഗിക അതിക്രമം എന്നീ രണ്ട് കുറ്റങ്ങളും ഇയാൾ പിന്നീട് സമ്മതിച്ചു. ഡണ്ടിയിൽ നിന്നുള്ള മുൻ സർവകലാശാല ടെക്നീഷ്യൻ 59കാരനായ കീത്ത് ഫൊതറിങ്ഹാമും നിരവധി കുറ്റങ്ങൾ സമ്മതിച്ചിട്ടുണ്ട്. മൂന്ന് പ്രതികൾക്കും വിചാരണ അവസാനിച്ചശേഷം ശിക്ഷ വിധിക്കും.

2018 മുതൽ 2025 നവംബർ വരെയുള്ള കാലയളവിൽ നടന്നതായി ആരോപിക്കുന്ന വിവിധ ലൈംഗിക കുറ്റങ്ങളിലാണ് മറ്റ് 11 പേർ വിചാരണ നേരിടുന്നത്. ബലാത്സംഗം, ബലാത്സംഗശ്രമം ഉൾപ്പെടെയുള്ള കുറ്റങ്ങൾ ഇവർ നിഷേധിച്ചിട്ടുണ്ട്. ഒക്ടോബർ 19ന് ആരംഭിക്കുന്ന വിചാരണ ഒൻപത് ആഴ്ചയോളം നീളുമെന്നാണ് പ്രതീക്ഷിക്കുന്നത്; ഡിസംബർ മധ്യത്തോടെ വിചാരണ പൂർത്തിയാകും.

ന്യൂസ് ഡെസ്ക്, മലയാളം യുകെ

വീടുകളുടെ വില സെപ്റ്റംബറിൽ കാര്യമായ മാറ്റമില്ലാതെ തുടരുന്നതായുള്ള റിപ്പോർട്ടുകൾ പുറത്തുവന്നു. ലോയ്ഡ്സിന്റെ ഹൗസ് പ്രൈസ് സൂചിക പ്രകാരം ശരാശരി വീടിന്റെ വില 2,98,441 പൗണ്ടാണ്. കഴിഞ്ഞ വർഷം സെപ്റ്റംബറിലെയും ഓഗസ്റ്റിലെയും വിലയുമായി താരതമ്യം ചെയ്യുമ്പോഴും കാര്യമായ വ്യത്യാസമില്ല. 0.1 ശതമാനം പ്രതിമാസ വർധനയും 0.2 ശതമാനം വാർഷിക വർധനയും ഉണ്ടാകുമെന്നായിരുന്നു സാമ്പത്തിക വിദഗ്ധരുടെ പ്രവചനം. ഓഗസ്റ്റിൽ വീടുകളുടെ വില 0.3 ശതമാനം കുറഞ്ഞിരുന്നു.

ആഗോള ബോണ്ട് വിപണിയിലെ ചാഞ്ചാട്ടത്തെ തുടർന്ന് രാജ്യത്തെ പ്രമുഖ ബാങ്കുകളും ബിൽഡിംഗ് സൊസൈറ്റികളും മോർട്ട്ഗേജ് നിരക്കുകൾ ഉയർത്തിയതാണ് ഭവന വിപണിയെ ബാധിച്ചത്. ബാങ്ക് ഓഫ് ഇംഗ്ലണ്ടിന്റെ അടിസ്ഥാന പലിശനിരക്കിൽ കഴിഞ്ഞ ഡിസംബർ മുതൽ മാറ്റമില്ലെങ്കിലും അഞ്ച് വർഷത്തെ ഫിക്സഡ് മോർട്ട്ഗേജ് നിരക്ക് തിങ്കളാഴ്ച മൂന്ന് വർഷത്തിനിടെ ആദ്യമായി ആറ് ശതമാനത്തിലെത്തി. ഉയർന്ന മോർട്ട്ഗേജ് നിരക്കുകളും സാമ്പത്തിക അനിശ്ചിതത്വവും വാങ്ങുന്നവരെയും വിൽക്കുന്നവരെയും കൂടുതൽ ജാഗ്രതയോടെ സമീപിക്കാൻ പ്രേരിപ്പിക്കുന്നതായി ലോയ്ഡ്സ് മോർട്ട്ഗേജ് ഡയറക്ടർ ആൻഡ്രൂ അസാം പറഞ്ഞു.

ജൂലൈ മുതൽ സെപ്റ്റംബർ വരെയുള്ള കാലയളവിൽ വീടുകൾ വാങ്ങുന്നതിനുള്ള മോർട്ട്ഗേജ് അപേക്ഷകൾ കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 18.2 ശതമാനം കുറഞ്ഞതായുള്ള കണക്കുകളും പുറത്തുവന്നു . ആദ്യമായി വീട് വാങ്ങുന്നവരുടെ അപേക്ഷകളിൽ 18.6 ശതമാനം ഇടിവ് ആണ് ഉണ്ടായിരിക്കുന്നത് . അതേസമയം, റീമോർട്ട്ഗേജ് അപേക്ഷകളുടെ എണ്ണം ഉയർന്നത് മൊത്തത്തിലുള്ള മോർട്ട്ഗേജ് പ്രവർത്തനത്തിലെ ഇടിവ് കുറയ്ക്കാൻ സഹായിച്ചു. ഉയർന്ന ഊർജ ചെലവും മോർട്ട്ഗേജ് നിരക്കിലെ വർധനയും വരാനിരിക്കുന്ന ബജറ്റിനെക്കുറിച്ചുള്ള അനിശ്ചിതത്വവും യുകെ ഭവന വിപണിയിൽ സമ്മർദം തുടരാൻ ഇടയാക്കുമെന്നാണ് വിലയിരുത്തൽ.

ന്യൂസ് ഡെസ്ക്, മലയാളം യുകെ

ജനുവരിയിൽ വൈദ്യുതി ബിൽ കുത്തനെ ഉയരുമെന്ന മുന്നറിയിപ്പിനെ തുടർന്ന് ബ്രിട്ടനിൽ കുറഞ്ഞ വരുമാനമുള്ള കുടുംബങ്ങൾക്ക് അധിക സഹായം നൽകാൻ സർക്കാർ ആലോചിക്കുന്നു. ചാൻസലർ ജോൺ ഹീലി 100 കോടി പൗണ്ടിലേറെ ചെലവഴിച്ച് ഊർജബിൽ കുറയ്ക്കാനുള്ള പദ്ധതിയാണ് പരിഗണിക്കുന്നത്. നിലവിൽ ചില ആനുകൂല്യങ്ങൾ ലഭിക്കുന്ന കുടുംബങ്ങൾക്ക് നൽകുന്ന 150 പൗണ്ട് ‘വാം ഹോംസ് ഡിസ്കൗണ്ട്’ 100 പൗണ്ട് കൂടി വർധിപ്പിക്കാനാണ് പ്രധാന നിർദേശം.

അതേസമയം, ഊർജബില്ലിൽ ഉൾപ്പെടുത്തിയിരിക്കുന്ന വിവിധ ലെവികൾ ഒഴിവാക്കി എല്ലാ ഉപഭോക്താക്കൾക്കും ബിൽ 120 പൗണ്ട് വരെ കുറയ്ക്കണമെന്ന നിർദേശവും ഊർജ സെക്രട്ടറി മിയാത്ത ഫഹ്ന്ബുല്ലെ മുന്നോട്ടുവച്ചിട്ടുണ്ട്. എന്നാൽ ഇതിന് 320 കോടി പൗണ്ട് വരെ ചെലവാകുമെന്നതിനാൽ ഈ നിർദേശം സ്വീകരിക്കാൻ ചാൻസലർ തയ്യാറാകാൻ സാധ്യത കുറവാണെന്നാണ് റിപ്പോർട്ട്. നികുതിയിലൂടെ ഈ ചെലവ് കണ്ടെത്തുന്നതും സർക്കാരിന് വലിയ സാമ്പത്തിക ബാധ്യതയാകും.

ജനുവരിയിൽ ഊർജവില പരിധി 442 പൗണ്ട് വരെ ഉയർന്നേക്കുമെന്നാണ് പുതിയ പ്രവചനങ്ങൾ. ഇറാൻ യുദ്ധം മൂലമുള്ള ഊർജവില വർധനയാണ് പ്രധാന കാരണം. ദരിദ്ര കുടുംബങ്ങൾക്ക് കുറഞ്ഞ നിരക്കിൽ വൈദ്യുതി നൽകുന്ന ‘സോഷ്യൽ ടാരിഫ്’, ഉപയോഗത്തിന്റെ അളവനുസരിച്ച് നിരക്ക് മാറ്റുന്ന ‘റൈസിങ് ബ്ലോക്ക് ടാരിഫ്’ തുടങ്ങിയ ദീർഘകാല പരിഷ്കാരങ്ങളും സർക്കാർ പരിഗണിക്കുന്നുണ്ട്. എന്നാൽ ഇത്തരം പദ്ധതികൾ നടപ്പാക്കാൻ കൂടുതൽ സമയവും വിവിധ സർക്കാർ വകുപ്പുകളിൽ നിന്നുള്ള വിവരശേഖരണവും ആവശ്യമായി വരും.

ന്യൂസ് ഡെസ്ക്, മലയാളം യുകെ

അഭയാർഥിയായി അഭയം നേടാൻ സ്വവർഗാനുരാഗികളാണെന്ന് വ്യാജമായി അവകാശപ്പെട്ട സംഘത്തിനെതിരെ ബ്രിട്ടനിൽ നടപടി. ലണ്ടനിലെ വിവിധ വിലാസങ്ങളിൽ നടത്തിയ റെയ്ഡിൽ രണ്ടുപേരെ തട്ടിപ്പ്, കുടിയേറ്റ നിയമലംഘനം എന്നീ കുറ്റങ്ങൾ ചുമത്തി അറസ്റ്റ് ചെയ്തു. അനധികൃതമായി രാജ്യത്ത് തുടരുന്നതായി സംശയിക്കുന്ന മറ്റൊരാളെയും അറസ്റ്റ് ചെയ്തതായി ഹോം ഓഫീസ് അറിയിച്ചു. റെയ്ഡിൽ മൊബൈൽ ഫോണുകളും ആഭരണങ്ങളും ആയിരക്കണക്കിന് പൗണ്ട് പണവും പിടിച്ചെടുത്തു.

ബംഗ്ലാദേശി പുരുഷന്മാരുടെ അഭയാർഥി അപേക്ഷകളിൽ വ്യാജ തെളിവുകൾ ഒരുക്കാൻ സംഘം സഹായിച്ചെന്നാണ് ആരോപണം. 1,000 മുതൽ 4,500 പൗണ്ട് വരെ ഈടാക്കി വ്യാജ കത്തുകൾ, രേഖകൾ, സ്വവർഗ ബന്ധമുണ്ടെന്ന് തെളിയിക്കുന്നതായി തോന്നിക്കുന്ന കത്തുകൾ, സ്വവർഗാനുരാഗികളാണെന്ന് കാണിക്കുന്ന തരത്തിലുള്ള സ്റ്റേജ് ചെയ്ത ഫോട്ടോകൾ എന്നിവ ഒരുക്കിയെന്നാണ് അന്വേഷണ ഉദ്യോഗസ്ഥർ പറയുന്നത്. ലണ്ടനിലെ ബംഗ്ലാദേശി എൽജിബിടി സംഘടനയായ അപൻജോണുമായി (Apanjon) ബന്ധമുള്ളതായി കരുതുന്ന ഈ സംഘവുമായി ബന്ധപ്പെട്ട നൂറിലേറെ അഭയാർഥി അപേക്ഷകൾ ഹോം ഓഫീസ് പുനഃപരിശോധിച്ചുവരികയാണ്. ചില അപേക്ഷകൾ വ്യാജ തെളിവുകളുടെ അടിസ്ഥാനത്തിൽ അനുവദിക്കപ്പെട്ടിട്ടുണ്ടാകാമെന്നും അധികൃതർ പറഞ്ഞു.

വ്യാജ സ്വവർഗാനുരാഗ അവകാശവാദങ്ങളിലൂടെ അഭയം നേടാൻ സഹായിക്കുന്ന സംഘത്തെ കുറിച്ച് നേരത്തെ മാധ്യമങ്ങളിൽ വാർത്ത വന്നിരുന്നു . അന്ന് പുറത്തുവന്ന വിവരങ്ങളുടെ അടിസ്ഥാനത്തിൽ രണ്ട് പേരെ നേരത്തെ അറസ്റ്റ് ചെയ്തിരുന്നു. യഥാർഥ പീഡനത്തിന് ഇരയായവർക്ക് ലഭിക്കേണ്ട സംരക്ഷണത്തെ പരിഹസിക്കുന്നതാണ് ഇത്തരം തട്ടിപ്പുകളെന്ന് ബ്രിട്ടീഷ് ആഭ്യന്തര സെക്രട്ടറി ഷബാന മഹ്മൂദ് പറഞ്ഞു. അഭയാർഥി അപേക്ഷയിൽ തട്ടിപ്പ് തെളിഞ്ഞാൽ അപേക്ഷ തള്ളുകയും രാജ്യത്തുനിന്ന് നീക്കം ചെയ്യുകയും ചെയ്യുമെന്നും അവർ മുന്നറിയിപ്പ് നൽകി. അഭയാർഥി തട്ടിപ്പ് കേസിൽ പരമാവധി 10 വർഷം വരെ തടവ് ലഭിക്കാം.

ന്യൂസ് ഡെസ്ക്, മലയാളം യുകെ

ബ്രിസ്റ്റലിൽ 17കാരിയെ കൂട്ടബലാത്സംഗം ചെയ്ത കേസിൽ മൂന്ന് യുവാക്കൾ ഉൾപ്പെടെ നാലുപേർക്ക് തടവുശിക്ഷ. 21കാരനായ മെഹ്റാബ് സാഫിക്ക് 15 വർഷവും 19കാരായ സൽമാൻ ഹബീബ്ഖെയിൽ, അവാൽ അഹ്മദ്സായി എന്നിവർക്ക് ഒമ്പത് വർഷം വീതവും ശിക്ഷ ലഭിച്ചു. 17കാരനായ മറ്റൊരു പ്രതിക്ക് രണ്ട് വർഷവും ഏഴ് മാസവും യുവജന തടങ്കൽ ശിക്ഷയാണ് കോടതി വിധിച്ചത്.

2025 നവംബറിൽ ബ്രിസ്റ്റലിൽ സുഹൃത്തിനൊപ്പം എത്തിയ പെൺകുട്ടിയെ സാഫി പരിചയപ്പെടുകയായിരുന്നു. പിന്നീട് പ്രണയം നടിച്ച് സന്ദേശങ്ങൾ അയച്ച ഇയാൾ പെൺകുട്ടിയെ ബ്രിസ്റ്റലിലേക്ക് വിളിച്ചുവരുത്തി. വീട്ടിലെത്തിച്ച ശേഷം മദ്യം നൽകുകയും മണിക്കൂറുകളോളം നാല് പേരും ചേർന്ന് പീഡിപ്പിക്കുകയുമായിരുന്നു. പെൺകുട്ടിയെ കാണാതായതിനെ തുടർന്ന് അമ്മ നൽകിയ പരാതിയിൽ പൊലീസ് നടത്തിയ അന്വേഷണത്തിലാണ് സംഭവം പുറത്തായത്.

പൊലീസ് എത്തിയപ്പോൾ പ്രതികൾ രക്ഷപ്പെട്ട് ലോറിക്കുള്ളിൽ ഒളിച്ച് ഫ്രാൻസിലേക്ക് കടക്കാൻ ശ്രമിച്ചു. ഫ്രാൻസിൽ അറസ്റ്റിലായ ഇവരെ പിന്നീട് ബ്രിട്ടനിലേക്ക് തിരിച്ചെത്തിച്ചു. നാല് പ്രതികളും അഫ്ഗാനിസ്ഥാനിൽ ജനിച്ചവരാണെന്നും താലിബാൻ ഭരണത്തിന്റെ പശ്ചാത്തലത്തിൽ ചെറുപ്പത്തിൽ ബ്രിട്ടനിലെത്തിയവരാണെന്നും കോടതിയിൽ വ്യക്തമാക്കി. എന്നാൽ അവരുടെ മുൻകാല അനുഭവങ്ങൾ പെൺകുട്ടിക്ക് സംഭവിച്ച ഗുരുതരമായ മാനസിക ആഘാതത്തിന് ന്യായീകരണമല്ലെന്ന് ജഡ്ജി വ്യക്തമാക്കി.

ന്യൂസ് ഡെസ്ക്, മലയാളം യുകെ

50 വയസ്സിന് താഴെയുള്ളവരിൽ ക്യാൻസർ കേസുകൾ വർധിക്കുന്നതായുള്ള പഠന റിപ്പോർട്ട് പുറത്തുവന്നു . ഇംഗ്ലണ്ടിൽ യുവാക്കളിലെ പ്രോസ്റ്റേറ്റ് ക്യാൻസർ കേസുകൾ 2001നുശേഷം നാലിരട്ടിയായപ്പോൾ, കുടൽ, വൃക്ക, ഗർഭാശയ ക്യാൻസർ കേസുകൾ ഇരട്ടിയിലേറെ വർധിച്ചതായാണ് പഠനം കാണിക്കുന്നത് . വേൾഡ് ക്യാൻസർ റിസർച്ച് ഫണ്ടിന്റെ നേതൃത്വത്തിൽ ഇംഗ്ലണ്ട്, യുഎസ്, നെതർലൻഡ്സ് എന്നിവിടങ്ങളിലെ ക്യാൻസർ വിവരങ്ങൾ വിശകലനം ചെയ്താണ് കണ്ടെത്തൽ.

ഇംഗ്ലണ്ടിൽ 50 വയസ്സിന് താഴെയുള്ളവരിലെ പ്രോസ്റ്റേറ്റ് ക്യാൻസർ നിരക്ക് 2001ൽ ഒരു ലക്ഷത്തിൽ ഒരാൾ എന്നതിൽ നിന്ന് 2023ൽ 3.6 ആയി ഉയർന്നു. കുടൽ ക്യാൻസർ നിരക്ക് 3.9ൽ നിന്ന് 8.4 ആയും വൃക്ക, ഗർഭാശയ ക്യാൻസറുകളും ഇരട്ടിയിലേറെയും വർധിച്ചു. സ്തനാർബുദം, പാൻക്രിയാസ്, കരൾ ക്യാൻസർ എന്നിവയിലും വർധന രേഖപ്പെടുത്തി. അതേസമയം പുകവലി കുറയുന്നതിന്റെ ഫലമായി ശ്വാസകോശ ക്യാൻസർ നിരക്ക് മൂന്ന് രാജ്യങ്ങളിലും കുറഞ്ഞു.

അമിതവണ്ണം, അനാരോഗ്യകരമായ ഭക്ഷണക്രമം, വ്യായാമക്കുറവ്, മദ്യപാനം, പുകവലി, പരിസ്ഥിതി മലിനീകരണം തുടങ്ങിയ ജീവിതശൈലി ഘടകങ്ങൾ വർധനയ്ക്ക് കാരണമാകാമെന്നാണ് വിദഗ്ധരുടെ വിലയിരുത്തൽ. എന്നാൽ ക്യാൻസർ ലക്ഷണങ്ങളെക്കുറിച്ചുള്ള അവബോധം വർധിച്ചതും നേരത്തെയുള്ള രോഗനിർണയവും കണക്കുകളിൽ സ്വാധീനം ചെലുത്തുന്നുണ്ട്. യുവാക്കളിലെ കുടൽ ക്യാൻസർ വർധനയുടെ കാരണങ്ങൾ കണ്ടെത്താൻ കിങ്സ് കോളജ് ലണ്ടൻ 2.5 ലക്ഷം പേരെ ഉൾപ്പെടുത്തി പുതിയ പഠനം ആരംഭിക്കുമെന്നും റിപ്പോർട്ടിൽ പറയുന്നു.

ന്യൂസ് ഡെസ്ക്, മലയാളം യുകെ

ലണ്ടൻ ∙ എൻഎച്ച്എസ് ദന്തഡോക്ടർമാരുടെ സേവനം ലഭിക്കാത്ത സാഹചര്യം മുതലെടുത്ത് യുകെയിലെ സ്വകാര്യ ദന്തചികിത്സാ സ്ഥാപനങ്ങൾ രോഗികളിൽനിന്ന് അമിത തുക ഈടാക്കുന്നതായി ഉപഭോക്തൃസംഘടനയായ വിച് നടത്തിയ അന്വേഷണത്തിൽ കണ്ടെത്തി . രോഗികൾക്ക് ആയിരക്കണക്കിന് പൗണ്ട് അധികമായി നൽകേണ്ടി വന്നതായും ചികിത്സയിലെ പിഴവുകളും മോശം നിലവാരവും നേരിട്ടതായും റിപ്പോർട്ടിൽ പറയുന്നു. ദന്തഡോക്ടറുമായുള്ള ബന്ധം മോശമാകുകയും പിന്നീട് ചികിത്സ ലഭിക്കാതെ വരികയും ചെയ്യുമെന്ന ഭയത്തിൽ പല രോഗികളും പരാതിപ്പെടാൻ പോലും തയ്യാറാകുന്നില്ല. ഒരു രോഗിക്ക് റൂട്ട് കനാൽ ചികിത്സയ്ക്ക് ആദ്യം 3,400 പൗണ്ട് ചെലവ് പറഞ്ഞെങ്കിലും ചികിത്സ പരാജയപ്പെട്ടതിനെ തുടർന്ന് വീണ്ടും വീണ്ടും പണം നൽകേണ്ടിവന്ന് ആകെ ചെലവ് 10,000 പൗണ്ടിന് മുകളിലെത്തിയതായും റിപ്പോർട്ടിലുണ്ട്.

5,848 പേരിൽ നടത്തിയ സർവേയിൽ 17 ശതമാനം പേർ തങ്ങൾക്കോ കുട്ടികൾക്കോ കഴിഞ്ഞ രണ്ട് വർഷത്തിനിടെ സ്വകാര്യ ദന്തചികിത്സയിൽ പ്രശ്നം നേരിട്ടതായി പറഞ്ഞു. പ്രശ്നം നേരിട്ട 1,009 പേരിൽ 22 ശതമാനം പേർ ആദ്യം പറഞ്ഞ തുകയേക്കാൾ കൂടുതൽ പണം നൽകേണ്ടിവന്നതായി വ്യക്തമാക്കി. 26 ശതമാനം പേർ ചികിത്സയുടെ നിലവാരത്തിൽ തൃപ്തരല്ലെന്നും 10 ശതമാനം പേർ ദന്തഡോക്ടറുടെ ഭാഗത്തുനിന്ന് ചികിത്സാപിഴവ് സംഭവിച്ചതായും പറഞ്ഞു. 16 ശതമാനം പേർ ആവശ്യപ്പെട്ടിട്ടില്ലാത്ത ചികിത്സകളിലേക്കോ പ്രതിമാസ പണമടയ്ക്കൽ പദ്ധതികളിലേക്കോ സമ്മർദം നേരിട്ടതായും 39 ശതമാനം പേർ ചികിത്സയുടെ ചെലവ് അമിതമാണെന്നും അഭിപ്രായപ്പെട്ടു. ഒരു യുവതിയുടെ കുടുംബത്തിന് പല്ല് നീക്കം ചെയ്യാനും പതിവായി ശുചീകരണ ചികിത്സ നടത്താനും നിർബന്ധം നേരിട്ടെങ്കിലും പിന്നീട് മറ്റൊരു എൻഎച്ച്എസ് ദന്തഡോക്ടർ പല്ലുകൾ നീക്കം ചെയ്യേണ്ട ആവശ്യമില്ലെന്നും ദന്തശുചിത്വം മികച്ചതാണെന്നും അറിയിച്ചതായും റിപ്പോർട്ടിൽ പറയുന്നു.

പ്രശ്നം നേരിട്ടവരിൽ 62 ശതമാനം പേരും ദന്തചികിത്സാ സ്ഥാപനത്തിനെതിരെ പരാതി നൽകിയില്ല. ദന്തഡോക്ടറുമായുള്ള ബന്ധം മോശമാകുമെന്ന ഭയമാണ് പരാതി നൽകാതിരിക്കാൻ പ്രധാന കാരണമായതെന്ന് സർവേയിൽ പങ്കെടുത്ത 31 ശതമാനം പേർ പറഞ്ഞു. പരാതി നൽകിയവരിൽ 46 ശതമാനം പേർക്കും സാമ്പത്തിക നഷ്ടപരിഹാരമോ ചികിത്സാപരമായ പരിഹാരമോ ലഭിക്കാതെ വാക്കാലുള്ള ക്ഷമാപണത്തിൽ നടപടി അവസാനിച്ചു. സ്വകാര്യ ദന്തചികിത്സാ മേഖലയ്ക്കായി സ്വതന്ത്രമായ ഓംബുഡ്സ്മാൻ സംവിധാനം ഏർപ്പെടുത്തണമെന്നും രോഗികൾക്ക് പരാതിപ്പെടാനുള്ള അവകാശങ്ങൾ ഉറപ്പാക്കണമെന്നും വിച്? ആവശ്യപ്പെട്ടു. എൻഎച്ച്എസ് ദന്തചികിത്സ ലഭ്യത തകർന്നതാണ് സ്വകാര്യ മേഖലയിലേക്കുള്ള രോഗികളുടെ ഒഴുക്ക് വർധിക്കാൻ പ്രധാന കാരണമെന്ന് ബ്രിട്ടിഷ് ഡെന്റൽ അസോസിയേഷനും ചൂണ്ടിക്കാട്ടി. 2010ൽ രാജ്യത്തെ ദന്തചികിത്സാ വിപണിയുടെ 42 ശതമാനമായിരുന്ന സ്വകാര്യ മേഖലയിലെ വിഹിതം 2025ൽ 69 ശതമാനമായി ഉയർന്നതായാണ് കണക്ക്.

ന്യൂസ് ഡെസ്ക്, മലയാളം യുകെ

ലണ്ടൻ ∙ ലണ്ടനിൽനിന്ന് ഷിക്കാഗോയിലേക്ക് പുറപ്പെട്ട ബ്രിട്ടീഷ് എയർവേയ്സ് വിമാനം യാത്രയ്ക്കിടെ അടിയന്തിര സാഹചര്യം നേരിട്ടതിനെ തുടർന്ന് ലണ്ടൻ ഹീത്രൂ വിമാനത്താവളത്തിലേക്ക് തിരിച്ചിറക്കി. അയർലൻഡിന് മുകളിലൂടെ പറക്കുന്നതിനിടെ ആണ് അടിയന്തിര സാഹചര്യം ഉടലെടുത്തത് . ഇതിന് പിന്നാലെ യാത്രക്കാർക്കായുള്ള കടുത്ത ഓക്സിജൻ മാസ്കുകൾ താഴേക്ക് വീണതോടെ വിമാനത്തിനുള്ളിൽ ആശങ്കയും ഉണ്ടായി.

തിങ്കളാഴ്ച ഉച്ചയ്ക്ക് 12.14നാണ് വിമാനം ഹീത്രൂവിൽനിന്ന് ഷിക്കാഗോ ഒഹെയർ വിമാനത്താവളത്തിലേക്ക് പുറപ്പെട്ടത്. യാത്രയ്ക്കിടെ ശക്തമായ കുലുക്കം അനുഭവപ്പെട്ടതായി യാത്രക്കാർ പറഞ്ഞു. സാഹചര്യം മനസ്സിലാക്കിയ പൈലറ്റുമാർ വിമാനം തിരികെ ബ്രിട്ടനിലേക്ക് തിരിച്ചുവിടുകയായിരുന്നു. തിരിച്ചുവരുന്നതിനിടെ ബ്രിസ്റ്റൽ ചാനലിന് മുകളിലൂടെ വിമാനം കുറച്ചുസമയം പറന്നശേഷം വൈകിട്ട് അഞ്ചിന് ശേഷമാണ് ഹീത്രൂവിൽ സുരക്ഷിതമായി ഇറങ്ങിയത്.

വിമാനത്തിലെ യാത്രക്കാർ സുരക്ഷിതരാണെന്നും എല്ലാവരും സാധാരണ നിലയിൽ വിമാനത്തിൽനിന്ന് പുറത്തിറങ്ങിയെന്നും ബ്രിട്ടീഷ് എയർവേയ്സ് അറിയിച്ചു. യാത്രക്കാരുടെ തുടർയാത്രയ്ക്കുള്ള ക്രമീകരണങ്ങൾ ആരംഭിച്ചതായും കമ്പനി വ്യക്തമാക്കി. സംഭവത്തിന്റെ കൃത്യമായ കാരണം അധികൃതർ ഇതുവരെ വ്യക്തമാക്കിയിട്ടില്ല.

ന്യൂസ് ഡെസ്ക്, മലയാളം യുകെ

ലണ്ടൻ ∙ കിഴക്കൻ ജറുസലേമിലെ ബ്രിട്ടീഷ് കോൺസുലേറ്റ് അടച്ചുപൂട്ടാനുള്ള ഇസ്രയേൽ തീരുമാനത്തിൽ കടുത്ത പ്രതികരണവുമായി ബ്രിട്ടൻ. ബ്രിട്ടീഷ് നയതന്ത്ര ഉദ്യോഗസ്ഥരെ പുറത്താക്കിയാൽ അതിന് തുല്യമായി ഒരു ഇസ്രയേൽ നയതന്ത്രജ്ഞനെ വീതം ബ്രിട്ടനിൽനിന്ന് പുറത്താക്കുമെന്ന് മുന്നറിയിപ്പ് യുകെയുടെ ഭാഗത്തുനിന്ന് ഉണ്ടായിട്ടുണ്ട് . നടപടിയുണ്ടായാൽ ഏകദേശം 27 ഇസ്രയേൽ നയതന്ത്രജ്ഞരെ ബ്രിട്ടനിൽനിന്ന് പുറത്താക്കേണ്ടി വന്നേക്കും. ബ്രിട്ടീഷ് – ഇസ്രയേൽ നയതന്ത്ര ബന്ധത്തിലെ ഏറ്റവും മോശം ഘട്ടങ്ങളിലൊന്നായി ഇത് മാറും.

ഇസ്രയേൽ അധിനിവേശ വെസ്റ്റ് ബാങ്കിലെ അനധികൃത കുടിയേറ്റ കേന്ദ്രങ്ങളിൽനിന്നുള്ള ഉൽപന്നങ്ങളുടെ വ്യാപാരത്തിന് ബ്രിട്ടൻ വിലക്ക് ഏർപ്പെടുത്തിയതും ഇത്തരം കുടിയേറ്റങ്ങൾക്ക് സഹായം നൽകുന്ന ബ്രിട്ടീഷ് കമ്പനികൾക്കെതിരെ ഉപരോധം പ്രഖ്യാപിച്ചതുമാണ് കോൺസുലേറ്റ് അടയ്ക്കാനുള്ള ഇസ്രയേൽ തീരുമാനത്തിന് പിന്നിൽ. വ്യാഴാഴ്ച കോൺസുലേറ്റ് അടയ്ക്കുമെന്നാണ് ഇസ്രയേൽ അറിയിച്ചിരിക്കുന്നത്. കിഴക്കൻ ജറുസലേമിലെ ഷെയ്ഖ് ജറാഹ് മേഖലയിലുള്ള കോൺസുലേറ്റ് ടെൽ അവീവിലെ ബ്രിട്ടിഷ് എംബസിയിൽനിന്ന് വ്യത്യസ്തമാണ്. കിഴക്കൻ ജറുസലം, വെസ്റ്റ് ബാങ്ക്, ഗാസ എന്നിവിടങ്ങളിലെ ബ്രിട്ടന്റെ നയതന്ത്ര പ്രവർത്തനങ്ങൾക്കാണ് കോൺസുലേറ്റ് നേതൃത്വം നൽകുന്നത്.

കോൺസുലേറ്റ് അടയ്ക്കാനുള്ള തീരുമാനം പിൻവലിക്കുകയോ മാറ്റിവയ്ക്കുകയോ ചെയ്യണമെന്ന് ആവശ്യപ്പെട്ട് ബ്രിട്ടിഷ് ദേശീയ സുരക്ഷാ ഉപദേഷ്ടാവ് ജോനാഥൻ പവൽ കഴിഞ്ഞയാഴ്ച ജറുസലേമിലെത്തി ഇസ്രയേൽ സർക്കാരുമായി ചർച്ച നടത്തിയെങ്കിലും ഫലമുണ്ടായില്ല. അതേസമയം, ബ്രിട്ടന്റെ നടപടികൾക്കെതിരെ ഇസ്രയേൽ വിദേശകാര്യമന്ത്രി ഗിഡിയോൺ സാർ കടുത്ത വിമർശനം ഉന്നയിച്ചു. കിഴക്കൻ ജറുസലേമിൽ ഇസ്രയേൽ സർക്കാരിന് അധികാരമില്ലെന്ന അന്താരാഷ്ട്ര നിലപാടിനെ വെല്ലുവിളിക്കുന്ന നടപടിയാണ് കോൺസുലേറ്റ് അടയ്ക്കുന്നതിലൂടെ ഉണ്ടാകുന്നതെന്നും ബ്രിട്ടൻ വിലയിരുത്തുന്നു. കഴിഞ്ഞ ഒക്ടോബർ 7ന് ആരംഭിച്ച ഗാസ യുദ്ധത്തിനുശേഷം ഇരു രാജ്യങ്ങളും തമ്മിലുള്ള ബന്ധം തുടർച്ചയായി വഷളായ സാഹചര്യത്തിലാണ് പുതിയ നയതന്ത്ര പ്രതിസന്ധിയും രൂപപ്പെട്ടിരിക്കുന്നത്.