ന്യൂസ് ഡെസ്ക്, മലയാളം യുകെ

യു കെ :- സസ്സെക്സിലെ ഡ്യുക്കായ ഹാരി രാജകുമാരന്റെ സ്വകാര്യ ജീവിതത്തിലേക്ക് കടന്നു കയറി അന്വേഷണങ്ങൾ നടത്തിയെന്ന കേസിൽ നിയമ യുദ്ധം അവസാനിപ്പിക്കാനായി ഗണ്യമായ നഷ്ടപരിഹാരം ഹാരി രാജകുമാരനു നൽകുവാൻ സൺ പത്രത്തിന്റെ ഉടമ തയ്യാറായിരിക്കുകയാണ്. അതോടൊപ്പം തന്നെ തങ്ങളുടെ ഭാഗത്തുനിന്നും ഉണ്ടായ തെറ്റായ നീക്കങ്ങളിൽ ഉള്ള ആത്മാർത്ഥമായ ക്ഷമാപണവും അദ്ദേഹം നടത്തി. സൺ പത്രത്തിന്റെ ഉടമസ്ഥരായ ന്യൂസ് ഗ്രൂപ്പ് ന്യൂസ്‌പേപ്പേഴ്‌സിൽ (എൻജിഎൻ) ജോലി ചെയ്യുന്ന പത്രപ്രവർത്തകരും സ്വകാര്യ അന്വേഷകരും തൻ്റെ സ്വകാര്യജീവിതം കണ്ടെത്തുവാനായി നിയമവിരുദ്ധമായ സാങ്കേതിക വിദ്യകൾ ഉപയോഗിച്ചതായാണ് ഹാരി രാജകുമാരൻ ആരോപിക്കുന്നത്. ഇത് പിന്നീട് പത്രത്തിന്റെ എക്സിക്യൂട്ടീവ് ഉദ്യോഗസ്ഥർ മറച്ചുവയ്ക്കുകയും ചെയ്തതായി അദ്ദേഹം തന്റെ കേസിൽ വ്യക്തമാക്കിയിരുന്നു. 1996 നും 2011 നും ഇടയിൽ സൺ പത്രം നടത്തിയ ഗുരുതരമായ നുഴഞ്ഞുകയറ്റത്തിന് എൻ ജി എൻ ക്ഷമാപണം നടത്തി. അതോടൊപ്പം തന്നെ, കോടതിയിൽ വായിച്ച ഒരു പ്രസ്താവനയിൽ നിയമവിരുദ്ധമായ പ്രവർത്തനങ്ങൾ പത്രത്തിൽ പ്രവർത്തിക്കുന്ന സ്വകാര്യ അന്വേഷകർ നടത്തിയതായി എൻ ജി എൻ സമ്മതിക്കുകയും ചെയ്തു. അതോടൊപ്പം തന്നെ ഹാരി രാജകുമാരന്റെ അമ്മയായ ഡയാന രാജകുമാരിയുടെ സ്വകാര്യ ജീവിതത്തിലേക്കും ഇത്തരത്തിൽ അന്വേഷണങ്ങൾ നടത്തിയതിനെ തുടർന്നുണ്ടായ ബുദ്ധിമുട്ടിൽ തങ്ങൾ ക്ഷമാപണം നടത്തുന്നതായും അവർ വ്യക്തമാക്കി. ഹാരിയും മുൻ ലേബർ ഡെപ്യൂട്ടി ലീഡർ ആയിരുന്ന ടോം വാട്‌സണും ആയിരുന്നു 1996 മുതൽ 2011 വരെ പത്രപ്രവർത്തകരും സ്വകാര്യ അന്വേഷകരും നിയമവിരുദ്ധമായി വിവരശേഖരണം നടത്തിയെന്ന ആരോപണത്തിൽ ന്യൂസ് ഗ്രൂപ്പ് ന്യൂസ്‌പേപ്പേഴ്‌സിനെതിരെ നിയമനടപടി സ്വീകരിച്ചത്. ഇരുവർക്കും വേണ്ടിയുള്ള സെറ്റിൽമെന്റുകൾക്കായും, നിയമനടപടികൾക്കുള്ള ചിലവുകൾക്കായും ഏകദേശം 10 മില്യൺ പൗണ്ടിലധികം തുക എൻ ജി എന്നിനു ചിലവായതായാണ് പുറത്തുവരുന്ന റിപ്പോർട്ടുകൾ വ്യക്തമാക്കുന്നത്.

1996 നും 2011 നും ഇടയിൽ എൻജിഎൻ പ്രസിദ്ധീകരിച്ച 200 ലധികം ലേഖനങ്ങളിൽ നിയമവിരുദ്ധമായ മാർഗങ്ങളിലൂടെ ശേഖരിച്ച വിവരങ്ങൾ അടങ്ങിയിട്ടുണ്ടെന്ന അവകാശവാദമായിരുന്നു രാജകുമാരൻ ഉന്നയിച്ചത്. ഹാരിക്കു പുറമെ, ടോം വാട്സനോഡും എൻ ജി എൻ മാപ്പ് അപേക്ഷിച്ചു. 2006 ൽ ഇത്തരത്തിൽ സ്വകാര്യ അന്വേഷണങ്ങൾ നടത്തിയെന്ന കുറ്റത്തിൽ എൻ ജി എന്നിലെ ജേണലിസ്റ്റുകൾ അറസ്റ്റ് ചെയ്യപ്പെട്ടിരുന്നു. ഇതോടെ വർഷങ്ങൾ നീണ്ട നിയമ യുദ്ധത്തിനാണ് അവസാനമായിരിക്കുന്നത്.

ന്യൂസ് ഡെസ്ക്, മലയാളം യുകെ

ബർമിംഗ്ഹാമിൽ 12 വയസ്സുള്ള ആൺകുട്ടിയെ കുത്തി കൊലപ്പെടുത്തിയതിനെ തുടർന്ന് 14 വയസ്സുള്ള ഒരു ആൺകുട്ടിയെ അറസ്റ്റ് ചെയ്തതായി വെസ്റ്റ് മിഡ്‌ലാൻഡ് പോലീസ് അറിയിച്ചു. ഇന്നലെ ഉച്ചകഴിഞ്ഞ് 4 മണിയോട് അടുത്ത സമയത്താണ് ഹാൾ ഗ്രീനിലെ സ്‌ക്രൈബേഴ്‌സ് ലെയ്‌നിന് സമീപം ഉദരത്തിൽ കുത്തേറ്റ നിലയിൽ ആൺകുട്ടിയെ കണ്ടെത്തിയത്. ഉടനെ ആശുപത്രിയിൽ എത്തിച്ചെങ്കിലും 7 മണിയോടെ മരണമടഞ്ഞു.

അറസ്റ്റിലായ 14 വയസ്സുകാരന്റെ വിവരങ്ങൾ പ്രായ പരിഗണന ഉള്ളതിനാൽ പോലീസ് പുറത്തുവിട്ടിട്ടില്ല. മരണമടഞ്ഞ കുട്ടി ക്രൈസ്റ്റ് ചർച്ച് സെക്കൻഡറി അക്കാദമിയിലെ വിദ്യാർത്ഥിയായിരുന്നു എന്നാണ് പുറത്തുവരുന്ന വിവരങ്ങൾ സൂചിപ്പിക്കുന്നത്. പ്രസ്തുത സ്കൂൾ വെബ്സൈറ്റിൽ മരിച്ച കുട്ടിക്ക് അനുശോചനം അറിയിച്ചുകൊണ്ടുള്ള പ്രസ്താവന പോസ്റ്റ് ചെയ്തിരുന്നു.

ഹാൾ ഗ്രീനിന്റെ പ്രാന്തപ്രദേശത്തുള്ള വീടുകൾ, കടകൾ, പ്രാദേശിക സ്കൂളുകൾ എന്നിവയാൽ ചുറ്റപ്പെട്ട നീണ്ടതും തിരക്കേറിയതുമായ ഒരു റോഡാണ് സ്‌ക്രൈബേഴ്‌സ് ലെയ്ൻ. ഇവിടെ ഒരു സ്കൂൾ കുട്ടി ദാരുണമായി കൊല്ലപ്പെട്ടത് പ്രാദേശിക വാസികളിൽ കടുത്ത ഞെട്ടലാണ് ഉളവാക്കിയിരിക്കുന്നത്. ട്രിറ്റിഫോർഡ് മിൽ പാർക്കിന് സമീപമുള്ള റെയിൽവേ പാലത്തിന് സമീപമാണ് ആക്രമണം നടന്നതെന്ന് കരുതപ്പെടുന്നു. സംഭവത്തെ കുറിച്ച് എന്തെങ്കിലും അറിയാവുന്നവർ വിവരങ്ങൾ കൈമാറണമെന്ന് പോലീസ് അഭ്യർത്ഥിച്ചിട്ടുണ്ട്. യുകെയിൽ കുട്ടികളുടെ ഇടയിലുള്ള കുറ്റകൃത്യങ്ങൾ കൂടുന്നത് വർദ്ധിക്കുന്നതായുള്ള വിവരങ്ങൾ ആണ് പുറത്തു വന്നുകൊണ്ടിരിക്കുന്നത് . കഴിഞ്ഞ ദിവസം 14 വയസ്സുകാരിയായ ഒരു പെൺകുട്ടിയെ തട്ടി കൊണ്ടുപോയി ബലാത്സംഗം ചെയ്തതിന് സമാന പ്രായക്കാരായ രണ്ട് ആൺകുട്ടികൾ അറസ്റ്റിലായിരുന്നു.

ന്യൂസ് ഡെസ്ക്, മലയാളം യുകെ

കുടുംബമായി യുകെ സന്ദർശിക്കാൻ തയ്യാറെടുക്കുന്ന സമയത്ത് തങ്ങളെ കബളിപ്പിച്ച ബർമിംഗ്ഹാം സ്വദേശിയായ മലയാളിയെ കുറിച്ച് കൂടുതൽ വെളിപ്പെടുത്തലുമായി ഡോ. സൗമ്യ സരിൻ രംഗത്ത് വന്നു. മനസ്സിൽ ദുഷ്ടതയും കൊടിയ വിഷവും ഉള്ളവർക്ക് മാത്രമേ ഈ രീതിയിൽ ചിന്തിക്കാനും പ്രവർത്തിക്കാനും സാധിക്കുകയുള്ളൂ എന്നാണ് അവർ തൻ്റെ ഏറ്റവും പുതിയ ലൈവ് വീഡിയോയിൽ പറഞ്ഞത്.

ഡിസംബർ 24ന് ആരംഭിച്ച യുകെ സന്ദർശനത്തിന് മുൻപും അതിനുശേഷവും പേര് വെളിപ്പെടുത്തിയിട്ടില്ലാത്ത മിസ്റ്റർ ബി എന്ന് അവർ പരാമർശിച്ച യു കെ മലയാളിയുമായി ഒത്തുതീർപ്പിന് ശ്രമിച്ചിരുന്നതായി ഡോ. സൗമ്യ പറഞ്ഞു. യുകെയിലെ യാത്രയ്ക്ക് മുമ്പ് അവരുടെ കേരളത്തിലെ വീട്ടിലെത്തിയിരുന്നു. അപ്പോൾ മിസ്റ്റർ ബിയുടെ അമ്മ മാത്രമേ വീട്ടിൽ ഉണ്ടായിരുന്നുള്ളൂ എന്നുമാണ് സൗമ്യ ലൈവ് വീഡിയോയിൽ പറഞ്ഞത്. അമ്മയോട് കാര്യങ്ങൾ അവതരിപ്പിച്ചു. ഇതു കൂടാതെ യുകെയിൽ നിന്ന് മടങ്ങി എത്തിയതിനു ശേഷവും പൊതുവായ ചില സുഹൃത്തുക്കൾ വഴിയായി തങ്ങൾക്ക് നഷ്ടമായ ഭീമമായ തുക മിസ്റ്റർ ബിയിൽ നിന്ന് തിരിച്ചു പിടിച്ച് പ്രശ്നം രമ്യതയിൽ തീർക്കാനും ശ്രമിച്ചിരുന്നു.

എന്നാൽ ഒത്തുതീർപ്പ് ചർച്ചയിൽ വിചിത്രമായ രണ്ട് ആവശ്യങ്ങൾ ആണ് മിസ്റ്റർ ബി ഉന്നയിച്ചത് എന്നാണ് സൗമ്യ പറയുന്നത് . ഒന്നാമത്തേത് തൻ്റെ പ്രായമായ അമ്മയെ ഭീഷണിപ്പെടുത്തിയതിനുള്ള മാപ്പ് അപേക്ഷയാണ്. രണ്ടാമത്തേത് മിസ്റ്റർ ബി വഴിയായി ബുക്ക് ചെയ്ത റൂമുകൾ ക്യാൻസൽ ചെയ്തത് മൂലം അയാൾക്കുണ്ടായ മാനനഷ്ടത്തിന് ക്ഷമ ചോദിക്കലാണ് . ഇതു രണ്ടും ചെയ്തില്ലെങ്കിൽ താനും ലൈവ് വീഡിയോയിൽ വന്ന് കൂടുതൽ വെളിപ്പെടുത്തലുകൾ നടത്തുമെന്ന് അയാൾ പറഞ്ഞതായും ഡോ. സൗമ്യ വെളിപ്പെടുത്തി.

ട്രിപ്പ് തുടങ്ങുന്നതിന് ഏതാനും ദിവസങ്ങൾക്ക് മുൻപ് മാത്രം നടന്ന ഹീനമായ സംഭവത്തിൽ തങ്ങൾക്ക് പിടിവള്ളിയായത് നല്ലവരായ യു കെ മലയാളികളുടെ നിസ്വാർത്ഥമായ സഹായങ്ങൾ ആണെന്ന് ഡോ. സൗമ്യ പറഞ്ഞിരുന്നു. ഏതായാലും മലയാളം യുകെ യ്ക്ക് പറയാനുള്ളത് സത്യം പുറത്തുവരണമെന്നാണ്. പരിചയമില്ലാത്ത ഒരു നാട്ടിലേക്ക് വരുന്ന മലയാളി കുടുംബത്തിന് ഉണ്ടായ ദുരനുഭവത്തിൻ്റെ കൂടുതൽ വിവരങ്ങൾ അധികം താമസിയാതെ പുറത്തുവരുമെന്നാണ് പ്രതീക്ഷിക്കുന്നത്.

ഡോ. സൗമ്യ സരിൻ സമൂഹ മാധ്യമങ്ങളിൽ ഒട്ടേറെ പേർ ഫോളോ ചെയ്യുന്ന ആളാണ്. ശിശുരോഗ വിദഗ്ധയായ അവരുടെ ആരോഗ്യ സംബന്ധമായും അല്ലാതെയുമുള്ള ലൈവ് വീഡിയോകൾ കാണുകയും കമന്റിടുകയും ചെയ്യുന്നവർ നിരവധിയാണ്. നേരത്തെ കോൺഗ്രസിന്റെ മീഡിയാ സെല്ലിന്റെ ചാർജ് വഹിച്ചിരുന്ന, പിന്നീട് പാലക്കാട് ഉപതെരഞ്ഞെടുപ്പിൽ ഇടതുപക്ഷത്തിന്റെ സ്ഥാനാർത്ഥിയാകുകയും ചെയ്ത ഡോ. സരിൻ ആണ് സൗമ്യയുടെ ഭർത്താവ്. ഡോ. സൗമ്യയും ഭർത്താവും മകളുമായി യുകെയിൽ നടത്തിയ യാത്രയുടെ വിശേഷങ്ങൾ അവർ സമൂഹമാധ്യമങ്ങളിൽ പലപ്പോഴായി പങ്കുവെച്ചിരുന്നു. യുകെ യാത്രയ്ക്കായി തയ്യാറെടുക്കുന്ന സമയത്ത് ഉണ്ടായ വളരെ മോശമായ അനുഭവത്തെ കുറിച്ച് ജനുവരി 19-ാം തീയതി ഡോ. സൗമ്യ സരിൻ തന്റെ ലൈവ് വീഡിയോയിലൂടെ വെളിപ്പെടുത്തിയത് വൻ ചർച്ചയായിരുന്നു. സാധാരണ ഗതിയിൽ ട്രിപ്പ് പോകുമ്പോൾ വിശ്വസനീയമായ ഏജൻസികൾ വഴിയാണ് അവർ യാത്ര പ്ലാൻ ചെയ്തിരുന്നത്. എന്നാൽ പതിവിന് വിപരീതമായി യുകെ യാത്രയിൽ സ്വന്തമായി ടിക്കറ്റുകളും റൂമുകളും ബുക്ക് ചെയ്യാനും യാത്ര പ്ലാൻ ചെയ്യാനുമാണ് ഡോക്ടർ ശ്രമിച്ചത്. ഇതിൻറെ ഭാഗമായാണ് ബർമിംഗ്ഹാമിൽ നിന്നുള്ള ഒരു മലയാളി അവരുടെ ഏതോ സുഹൃത്തിൻറെ പരിചയത്തിന്റെ പേരിൽ രംഗപ്രവേശനം ചെയ്തത്. അദ്ദേഹം സൗമ്യയ്ക്ക് വേണ്ടി എയർ ടിക്കറ്റ് ബുക്ക് ചെയ്യുകയും വിശ്വാസം ആർജിക്കുകയും ചെയ്തു . എന്നാൽ ചതിയും വിശ്വാസവഞ്ചനയും മറനീക്കി പുറത്തുവന്നത് പിന്നീടുള്ള സംഭവങ്ങളിലൂടെയാണ്. റൂമുകളും ടിക്കറ്റുകളും എടുക്കാനായി നല്ലൊരു തുക അയാൾ കൈക്കലാക്കിയതായി ഡോ. സൗമ്യ പറയുന്നു. ലണ്ടനിൽ ബുക്ക് ചെയ്ത റൂമിന്റെ റേറ്റ് വളരെ കൂടിയതിനെ തുടർന്ന് ക്യാൻസൽ ചെയ്ത് കുറച്ചു കൂടി കുറഞ്ഞ റേറ്റിൽ റൂം ബുക്ക് ചെയ്യാൻ പറഞ്ഞതോടെയാണ് പേര് വെളിപ്പെടുത്തിയിട്ടില്ലാത്ത ബർമിംഗ്ഹാമിൽ താമസിക്കുന്ന മലയാളിയുടെ യഥാർത്ഥ മുഖം വെളിച്ചത്ത് വന്നത്. ബുക്കിംഗ് ക്യാൻസൽ ചെയ്താൽ അടച്ച പണം നഷ്ടപ്പെടുമെന്ന് അയാൾ ഭീഷണി പെടുത്തി. എന്നാൽ അയാൾ പണമടയ്ക്കാതെയാണ് ബുക്ക് ചെയ്തത് എന്ന് വ്യക്തമായിരുന്നു. അതു മാത്രമല്ല 24 മണിക്കൂറിന് മുമ്പ് ഏത് സമയവും ബുക്കിംഗ് ക്യാൻസൽ ചെയ്യാനുള്ള സ്വാതന്ത്ര്യം കസ്റ്റമറിന് നൽകുന്ന ആപ്പ് വഴിയാണ് അയാൾ ബുക്ക് ചെയ്തിരുന്നത്.

റൂമിനായി മാത്രമല്ല കാർ റെന്റ് എടുക്കുന്നതിനും അയാൾ നല്ലൊരു തുക ഇതിനകം കൈക്കലാക്കിയിരുന്നു. ഇതുകൂടാതെ ഡ്രൈവ് ചെയ്ത് തൻറെ കുടുംബത്തോടൊപ്പം യുകെ ആകെ യാത്ര ചെയ്യാമെന്ന വാഗ്ദാനം പ്രസ്തുത വ്യക്തി നൽകിരുന്നു . തങ്ങൾ അയച്ച പണം തിരികെ ചോദിച്ചതോടെയാണ് വഞ്ചനയുടെയും ചതിയുടെയും നേർ ചിത്രം പുറത്തുവന്നത് എന്ന് ഡോ. സൗമ്യ പറയുന്നു .

യുകെ പോലുള്ള അന്യനാടുകൾ സന്ദർശിക്കുമ്പോൾ അടുത്ത് പരിചയമില്ലാത്തവരെ അമിതമായി ആശ്രയിക്കരുതെന്നാണ് സൗമ്യ തൻറെ വീഡിയോയിലൂടെ നൽകുന്ന ഉപദേശം. ഏതെങ്കിലും രീതിയിൽ പണം അയച്ച് കൊടുത്ത് ബുക്ക് ചെയ്യുന്ന സാഹചര്യം വന്നാൽ സ്വന്തം പേരിൽ തങ്ങളുടെ ബാങ്ക് അക്കൗണ്ടിൽ നിന്ന് തന്നെ ബുക്ക് ചെയ്യണമെന്ന് ഡോ. സൗമ്യ പറഞ്ഞു. ബർമിംഗ്ഹാമിൽ താമസിക്കുന്ന യു കെ മലയാളി എത്ര രൂപയാണ് കബളിപ്പിച്ചത് എന്ന് ഡോ. സൗമ്യ തൻറെ വീഡിയോയിൽ വെളിപ്പെടുത്തിയിട്ടില്ല. നിയമനടപടികളുമായി മുന്നോട്ടു പോകുന്നതുകൊണ്ടാണ് കൂടുതൽ വിവരങ്ങൾ വെളിപ്പെടുത്താത്തത് എന്ന് അവർ പറഞ്ഞു. ചതിയുടെയും വഞ്ചനയുടെയും വിഷമതകൾക്കിടയിൽ യുകെയിൽ നിന്നുള്ള ഒട്ടേറെ പേരുടെ സ്നേഹവും കരുതലും തന്റെ ട്രിപ്പിനെ മനോഹരമാക്കിയതായും അവർ തൻറെ ലൈവ് വീഡിയോയിൽ പറയുന്നുണ്ട്.

ന്യൂസ് ഡെസ്ക്, മലയാളം യുകെ

ഹാംഷെയറിലെ ന്യൂ ഫോറസ്റ്റിലെ ഒരു പൊതു പാർക്കിൽ തങ്ങളുടെ പ്രായത്തിലുള്ള ഒരു പെൺകുട്ടിയെ തട്ടിക്കൊണ്ടുപോയി ബലാത്സംഗം ചെയ്തതിന് 14 വയസ്സുള്ള രണ്ട് ആൺകുട്ടികൾക്കെതിരെ കേസെടുത്തു. ജനുവരി 17 ന് വൈകുന്നേരം ഫോർഡിംഗ്ബ്രിഡ്ജ് പട്ടണത്തിലെ ഒരു വിനോദ സ്ഥലത്താണ് സംഭവം നടന്നതെന്ന് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത് . രണ്ട് ആൺകുട്ടികളിൽ ഒരാൾക്കെതിരെ ബലാത്സംഗം, കൊല്ലുമെന്ന് ഭീഷണിപ്പെടുത്തൽ, പൊതുസ്ഥലത്ത് മാരകായുധം കൈവശം വയ്ക്കൽ, ലൈംഗിക കുറ്റകൃത്യം ചെയ്യാൻ ഉദ്ദേശിച്ച്‌ ഒരാളെ തട്ടിക്കൊണ്ടുപോകൽ , തെറ്റായ രീതിയിൽ തടവിലാക്കൽ എന്നീ കുറ്റങ്ങൾ ചുമത്തിയിട്ടുണ്ടെന്ന് ഹാംഷെയർ പോലീസ് അറിയിച്ചു . രണ്ടാമത്തെ ആൺകുട്ടിക്കെതിരെ ബലാത്സംഗം, കൊല്ലുമെന്ന് ഭീഷണിപ്പെടുത്തൽ, തട്ടിക്കൊണ്ടുപോകൽ എന്നീ കുറ്റങ്ങൾ ചുമത്തിയിരുന്നു.

14 വയസ്സുള്ള ഇരുവരെയും ചൊവ്വാഴ്ച സതാംപ്ടൺ യൂത്ത് കോടതിയിൽ ഹാജരാക്കി . 13 വയസ്സുള്ള മൂന്നാമത്തെ ആൺകുട്ടിയെ കൂടുതൽ പോലീസ് അന്വേഷണം നടക്കുന്നതിനാൽ സോപാധിക ജാമ്യത്തിൽ വിട്ടയച്ചു. ജനുവരി 17-ാം തീയതി വെള്ളിയാഴ്ച രാത്രി 11 മണിയോടെയാണ് സംഭവം പോലീസിൽ റിപ്പോർട്ട് ചെയ്യപ്പെട്ടത്. പക്ഷേ കുറ്റകൃത്യം നടന്നത് അതിനു വളരെ മുമ്പേയാണെന്ന് പോലീസ് പറഞ്ഞു. പെൺകുട്ടിക്ക് ഇപ്പോഴും സ്പെഷ്യലിസ്റ്റ് ഓഫീസർമാരുടെ പിന്തുണയുണ്ട്. സതാംപ്ടണിൽ നിന്ന് 21 മൈൽ പടിഞ്ഞാറാണ് സംഭവം നടന്ന ഫോർഡിംഗ്ബ്രിഡ്ജ് എന്ന സ്ഥലം .

ന്യൂസ് ഡെസ്ക്, മലയാളം യുകെ

യു കെ :- തെറ്റായ വിവരങ്ങൾ നൽകി അർഹമല്ലാത്ത ആനുകൂല്യങ്ങൾ കൈപ്പറ്റുന്ന ബെനിഫിറ്റ് തട്ടിപ്പുകാർക്ക് ഇനി മുതൽ പിടി വീഴും. പിഴയടക്കാത്ത കുറ്റവാളികളെന്നു കണ്ടെത്തുന്നവരുടെ ഡ്രൈവിംഗ് ലൈസൻസുകൾ ഇനിമുതൽ റദ്ദ് ചെയ്യാനാണ് സർക്കാർ തീരുമാനം. തട്ടിപ്പുകൾ തടയാനുള്ള സർക്കാർ നീക്കങ്ങളുടെ ഭാഗമായാണ് ഈ നിയമനിർമ്മാണം. സിസ്റ്റത്തെ ആവർത്തിച്ച് വഞ്ചിക്കുകയും 1,000 പൗണ്ടോ അതിൽ കൂടുതലോ പിഴ ആയവർക്ക് രണ്ട് വർഷം വരെ ഡ്രൈവിംഗ് വിലക്ക് ലഭിക്കും. സർക്കാർ സംവിധാനങ്ങളെ വഞ്ചിക്കുന്നവർക്ക് വലിയ പ്രത്യാഘാതങ്ങൾ ഉണ്ടാക്കുന്നതാണ് ഈ നിയമനിർമ്മാണമെന്ന് വർക്ക് ആൻഡ് പെൻഷൻ സെക്രട്ടറി ലിസ് കെൻഡൽ വ്യക്തമാക്കി. മുൻ കൺസർവേറ്റീവ് സർക്കാർ പ്രഖ്യാപിച്ച സ്കീമിനെ അനുകരിക്കുന്ന തരത്തിൽ, ടാർഗെറ്റ് അന്വേഷണങ്ങളെ സഹായിക്കുന്നതിന് ആനുകൂല്യങ്ങൾ അവകാശപ്പെടുന്നവരെ കുറിച്ചുള്ള അക്കൗണ്ട് വിവരങ്ങൾ കൈമാറാൻ ബാങ്കുകളെ നിർബന്ധിക്കുന്ന പുതിയ അധികാരങ്ങളും ഈ പദ്ധതിയിൽ ഉൾപ്പെടുന്നുണ്ട്. എന്നാൽ ഇതിന് ബാങ്കുകളിൽ നിന്നും, സ്വകാര്യത ആവശ്യപ്പെടുന്ന വ്യക്തികളിൽ നിന്നും ശക്തമായ എതിർപ്പുകൾ ഉണ്ടാകാനുള്ള സാധ്യതയാണ് മുന്നിലുള്ളത്. പാൻഡെമിക് സമയത്ത് നടന്ന സങ്കീർണ്ണമായ തട്ടിപ്പ് കേസുകൾ അന്വേഷിക്കാൻ കൂടുതൽ സമയം പബ്ലിക് സെക്ടർ ഫ്രോഡ് അതോറിറ്റിക്ക് ഈ കരട് നിയമം നൽകുന്നുണ്ട്.

സംശയാസ്പദമായ ക്ലെയിമുകൾ കൂടുതൽ ഫലപ്രദമായി തിരിച്ചറിയാൻ ബാങ്കിംഗ് ഡാറ്റാ ഡി ഡബ്യു പി അന്വേഷകരെ സഹായിക്കുമെന്നും, ഇതിലൂടെ നികുതിദായകർക്ക് അഞ്ച് വർഷത്തിനുള്ളിൽ 1.6 ബില്യൺ പൗണ്ട് ലാഭം ഉണ്ടാകുമെന്നുമാണ് മന്ത്രിമാർ പ്രതീക്ഷിക്കുന്നത്. എന്നാൽ ഇത് ആനുകൂല്യങ്ങൾ അവകാശപ്പെടുന്നവരുടെ സ്വകാര്യതയ്ക്കുള്ള അവകാശത്തെ ഹനിക്കുന്നതാണെന്നും, അതോടൊപ്പം തന്നെ നിയമാനുസൃതമായി അനുകൂല്യങ്ങൾ അവകാശപ്പെടുന്നവരെയും അന്വേഷണത്തിന്റെ പരിധിയിൽ ഉൾപ്പെടുത്തുന്നതാണെന്നും പ്രചാരണ ഗ്രൂപ്പുകൾ മുന്നറിയിപ്പ് നൽകി കഴിഞ്ഞു. എന്നാൽ ബാങ്ക് അക്കൗണ്ടുകൾ ആക്സസ്സു ചെയ്യാൻ ഡി ഡബ്ല്യു പിക്ക് അധികാരമില്ലെന്ന് വിമർശകരെ അഭിമുഖീകരിച്ച മന്ത്രിമാർ ശക്തമായി പ്രതികരിച്ചു.

ന്യൂസ് ഡെസ്ക്, മലയാളം യുകെ

നിക്ഷേപത്തിന് പറ്റുന്ന ഏറ്റവും ആകർഷകമായ രണ്ടാമത്തെ രാജ്യമെന്ന പദവി യുകെ നേടിയതായുള്ള റിപ്പോർട്ടുകൾ പുറത്തുവന്നു. ഒന്നാംസ്ഥാനം യുഎസിനാണ്. കൺസൾട്ടൻസി പിഡബ്ല്യുസി നടത്തിയ ആഗോള ബിസിനസ് നേതാക്കളുടെ വാർഷിക സർവേ അനുസരിച്ചാണ് റാങ്കിംഗ് നടത്തിയിരിക്കുന്നത്. ചൈന, ജർമനി, ഇന്ത്യ എന്നീ രാജ്യങ്ങളാണ് ബ്രിട്ടന്റെ തൊട്ട് പിന്നിലുള്ളത്.

109 രാജ്യങ്ങളിൽ നിന്നുള്ള ഏകദേശം 5000 ചീഫ് എക്സിക്യൂട്ടീവുകളുടെ ഇടയിലാണ് സർവേ നടത്തിയത്. സർവേയുടെ 28 വർഷത്തെ ചരിത്രത്തിൽ യുകെയുടെ ഏറ്റവും ഉയർന്ന റാങ്ക് ആണ് ഇത്. കഴിഞ്ഞവർഷം 4-ാം സ്ഥാനത്തായിരുന്നു യുകെയുടെ സ്ഥാനം. ആഗോളതലത്തിൽ സി ഇ ഒ മാർ ബ്രിട്ടനെ വ്യവസായ സൗഹൃദ രാജ്യമായി കാണുന്നുവെന്നത് അഭിമാനകരമായ നേട്ടമാണെന്ന് ചാൻസിലർ റേച്ചൽ റീവ്സ് പറഞ്ഞു. അന്താരാഷ്ട്രതലത്തിൽ യുകെയിലേയ്ക്ക് കൂടുതൽ നിക്ഷേപം എത്തുന്നതിന് റാങ്കിങ്ങിലെ നില മെച്ചപ്പെടുത്തിയതിലൂടെ സാധിക്കുമെന്നാണ് പ്രതീക്ഷിക്കുന്നത്. സാമ്പത്തിക വളർച്ചയെ മുന്നോട്ട് കൊണ്ടുപോകാനും യുകെയിൽ ഉടനീളം ജീവിത നിലവാരം മെച്ചപ്പെടുത്തുന്നതിനും പുതിയ നിക്ഷേപകർ രാജ്യത്തിലേയ്ക്ക് വരുന്നതിലൂടെ സാധിക്കുമെന്ന് ചാൻസിലർ പറഞ്ഞു.

നിക്ഷേപത്തിന് ഏറ്റവും ആകർഷകമായ രണ്ടാമത്തെ രാജ്യമായി യുകെ മാറിയെന്ന റിപ്പോർട്ട് ചാൻസിലർ റേച്ചൽ റീവ്സിന് ആശ്വാസം പകരുന്ന വാർത്തയാണ്. റീവ്സ് ഡാവോസ് ഉച്ചകോടിയിൽ ബുധനാഴ്ചയും വ്യാഴാഴ്ചയും ചാൻസിലർ പങ്കെടുക്കുന്നുണ്ട്. ബാങ്ക് ഓഫ് ഇംഗ്ലണ്ട് പലിശ നിരക്ക് വെട്ടിക്കുറയ്ക്കും തുടങ്ങിയ കാരണങ്ങളാൽ ഇൻറർനാഷണൽ മോണേട്ടറി ഫണ്ട് യുകെയുടെ വളർച്ച നിരക്ക് 1.5 ശതമാനമെന്ന മുൻ പ്രവചനത്തിൽ നിന്ന് 1.6 ശതമാനമായി ഉയർത്തിയിരുന്നു. രാഷ്ട്രീയ അസ്ഥിരത നേരിടുന്ന ജർമ്മനി, ഫ്രാൻസ് തുടങ്ങിയ പ്രധാന യൂറോപ്യൻ യൂണിയൻ സമ്പദ്‌വ്യവസ്ഥകളിൽ നിന്ന് വ്യത്യസ്തമായി സർക്കാരിന് സുരക്ഷിതമായ ഭൂരിപക്ഷമുണ്ടെന്ന വസ്തുത നിക്ഷേപത്തിനുള്ള സുരക്ഷിത താവളമെന്ന നിലയിൽ യുകെയുടെ ആകർഷണീയത വർദ്ധിപ്പിക്കുമെന്നാണ് സാമ്പത്തിക വിദഗ്ധർ പ്രതീക്ഷിക്കുന്നത്.

ന്യൂസ് ഡെസ്ക്, മലയാളം യുകെ

യുകെയിൽ ആദ്യമായി കീഹോൾ ശസ്ത്രക്രിയയിലൂടെ തലയിലെ ട്യൂമർ നീക്കം ചെയ്തു. ലീഡ്‌സിൽ നിന്നുള്ള 40 വയസ്സുകാരിയായ റുവിംബോ കവിയ ഒരു നേഴ്സായി ആണ് ജോലി ചെയ്യുന്നത്. ട്യൂമർ മൂലമുള്ള വേദന കാരണം അവർക്ക് ഭക്ഷണം കഴിക്കാൻ പോലും സാധിക്കാത്ത അവസ്ഥയിലായിരുന്നു. കീഹോൾ ശസ്ത്രക്രിയയിലൂടെ തലച്ചോറിലെ ട്യൂമർ നീക്കം ചെയ്തത് എൻഎച്ച്എസിൻ്റെ ചികിത്സാ ചരിത്രത്തിലെ ഒരു നാഴികകല്ലായാണ് കണക്കാക്കപ്പെടുന്നത്.

ശസ്ത്രക്രിയയ്ക്ക് മുൻപ് ലീഡ്‌സ് ടീച്ചിംഗ് ഹോസ്പിറ്റൽസ് എൻഎച്ച്എസ് ട്രസ്റ്റിലെ വിദഗ്ധർ 3D സാങ്കേതികവിദ്യയുടെ സഹായത്തോടെ നിരവധി തവണ ശസ്ത്രക്രിയ പരിശീലിച്ചിരുന്നു. നേരത്തെ ഇത്തരം ഒരു ട്യൂമർ നീക്കം ചെയ്യുന്നതിന് സങ്കീർണമായ ശസ്ത്രക്രിയകൾ ആവശ്യമായിരുന്നു. ഇതിനായി തലയോട്ടിയുടെ വലിയ ഒരു ഭാഗം നീക്കം ചെയ്ത് നടത്തുന്ന ശസ്ത്രക്രിയ വലിയ വെല്ലുവിളികൾ നിറഞ്ഞതായിരുന്നു.

ട്യൂമർ നീക്കം ചെയ്യാനായി റുവിംബോ കവിയന് നടത്തിയ ശസ്ത്രക്രിയയ്ക്ക് വെറും മൂന്നു മണിക്കൂർ മാത്രമേ വേണ്ടി വന്നുള്ളൂ. അത് മാത്രമല്ല ശാസ്ത്രക്രിയ നടത്തിയ ആ ദിവസം തന്നെ അവർക്ക് എഴുന്നേറ്റ് നടക്കാനും സാധിച്ചു. സാങ്കേതികവിദ്യയിലെ പുരോഗതി അർത്ഥമാക്കുന്നത് കാവിയ അനുഭവിച്ചതുപോലുള്ള മുഴകൾ ചികിത്സിക്കാൻ ഇപ്പോൾ അപകടസാധ്യത കുറവാണെന്ന് ന്യൂറോ സർജൻ അസിം ഷെയ്ഖ് പറഞ്ഞു. ട്രസ്റ്റിലെ 3D പ്ലാനിംഗ് സർവീസിന്റെ തലവനായ ബയോമെഡിക്കൽ എഞ്ചിനീയർ ലിസ ഫെറി രോഗിയുടെ തലയോട്ടിയുടെ ഒരു മാതൃക നിർമ്മിച്ചിരുന്നു. അതുവഴി ശസ്ത്രക്രിയ നടത്തുന്നതിന് മുമ്പ് പരിശീലനം നടത്താൻ ശസ്ത്രക്രിയ മെഡിക്കൽ സംഘത്തിന് കഴിയും.

ന്യൂസ് ഡെസ്ക്, മലയാളം യുകെ

സൗത്ത് പോർട്ടിൽ മൂന്ന് കുരുന്ന് പെൺകുട്ടികളെ കുത്തി കൊലപ്പെടുത്തുകയും മറ്റ് പത്ത് പേരെ ആക്രമിച്ച് പരിക്കേൽപ്പിക്കുകയും ചെയ്ത സംഭവത്തെ കുറിച്ച് അന്വേഷണം പ്രഖ്യാപിച്ചു. കൊലയാളിയെ കുറിച്ച് നേരത്തെ പോലീസിനും മറ്റ് ഏജൻസികൾക്കും അറിയാമായിരുന്നിട്ടും ഇത്തരം ഒരു ദാരുണ സംഭവം ഒഴിവാക്കാൻ പറ്റാതിരുന്ന സാഹചര്യത്തിലാണ് സംഭവത്തെ കുറിച്ച് പബ്ലിക് എൻക്വയറി നടത്താൻ ആഭ്യന്തര സെക്രട്ടറി യെവെറ്റ് കൂപ്പർ ഉത്തരവിട്ടത്. ആക്രമണത്തിനും ഭീകര പ്രവർത്തനം നടത്തുന്നതിനും പ്രതിയായ റുഡാകുബാനയ്ക്ക് താല്പര്യമുണ്ടെന്ന വിവരം വിവിധ ഏജൻസികൾക്ക് അറിയാമായിരുന്നു എന്നത് വരും ദിവസങ്ങളിൽ വൻ രാഷ്ട്രീയ വിവാദങ്ങൾക്ക് വഴിവെക്കുമെന്നാണ് പുറത്തു വരുന്ന വിവരങ്ങൾ സൂചിപ്പിക്കുന്നത്.

സൗത്ത് പോർട്ട് കേസ് കൈകാര്യം ചെയ്തതിനെ കുറിച്ച് കടുത്ത വിമർശനവുമായി റിഫോം യുകെ നേതാവ് നിഗൽ ഫാരേജ് രംഗത്ത് വന്നിരുന്നു . തൻറെ ജീവിതത്തിൽ കണ്ട ഏറ്റവും മോശം മൂടിവെയ്ക്കലായാണ് മൂന്ന് കുട്ടികളുടെ കൊലപാതകത്തിലെ പ്രതിയെ കുറിച്ച് നടന്നതെന്നാണ് അദ്ദേഹം പറഞ്ഞത്. കൊലപാതകം നടത്തുന്നതിന് മുമ്പ് തന്നെ അക്രമത്തോടുള്ള പ്രതിയുടെ പൊതുവായ അഭിനിവേശത്തെ കുറിച്ച് പ്രിവന്റ് വിഭാഗത്തിലേക്ക് റഫർ ചെയ്തതായി പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്.

കഴിഞ്ഞ ദിവസം സൗത്ത് പോർട്ടിൽ മൂന്നു കുരുന്ന് പെൺകുട്ടികളെ കുത്തി കൊലപ്പെടുത്തിയ പ്രതി കോടതിയിൽ കുറ്റസമ്മതം നടത്തിയിരുന്നു . മുൻപ് നടന്ന ഒരു വിചാരണയിൽ പ്രതി കുറ്റം ചെയ്തിട്ടില്ലെന്ന് വാദിച്ചിരുന്നു. എന്നാൽ ലിവർപൂൾ ക്രൗൺ കോടതിയിൽ കേസ് ആരംഭിക്കാനിരിക്കെ പ്രതിയുടെ വക്കീൽ തന്റെ കക്ഷിക്ക് വീണ്ടും കുറ്റപത്രം സമർപ്പിക്കണമെന്ന്‌ ആവശ്യപ്പെടുകയായിരുന്നു. അതിനുശേഷം പ്രതി മൂന്ന് കൊലപാതക കുറ്റങ്ങളും 10 കൊലപാതക ശ്രമങ്ങളും, രണ്ട് ഭീകരതയുമായി ബന്ധപ്പെട്ട കുറ്റങ്ങളും സമ്മതിക്കുകയായിരുന്നു. മേൽവിവരിച്ച കുറ്റങ്ങൾക്ക് പുറമെ റിസിൻ എന്ന ജൈവ വിഷവസ്തു നിർമ്മിച്ചതിനും അൽ-ഖ്വയ്ദ പരിശീലന മാനുവൽ കൈവശം വച്ചതിനും തീവ്രവാദ നിയമപ്രകാരം റുഡ കുബാനയ്‌ക്കെതിരെ കേസെടുത്തു. ഓരോ കുറ്റങ്ങൾ ചുമത്തിയപ്പോഴും മുഖം പി പി ഇ മാസ്ക് കൊണ്ട് മറച്ചിരുന്ന പ്രതി താൻ കുറ്റക്കാരനാണെന്ന് ഏറ്റുപറഞ്ഞു. പ്രതിയുടെ ശിക്ഷ വ്യാഴാഴ്ച വിധിക്കുമെന്നാണ് അറിയാൻ സാധിച്ചത്.

ന്യൂസ് ഡെസ്ക്, മലയാളം യുകെ

യു എസ് :- യുഎസിന്റെ 47-ാമത് പ്രസിഡൻ്റായി സത്യപ്രതിജ്ഞ ചെയ്ത് മിനിറ്റുകൾക്കകം തന്നെ ഓൺലൈൻ അപ്പോയിൻ്റ്മെൻ്റിലൂടെ ഏകദേശം 1 ദശലക്ഷം കുടിയേറ്റക്കാർക്ക് നിയമപരമായ പ്രവേശനം നൽകാൻ സഹായിച്ച സി ബി പി വൺ ആപ്പ് റദ്ദാക്കിയിരിക്കുകയാണ് ഡൊണാൾഡ് ട്രംപ്. യുഎസ് കസ്റ്റംസ് ആൻഡ് ബോർഡർ പ്രൊട്ടക്ഷൻ (സി ബി പി )നൽകുന്ന വിവിധ സേവനങ്ങൾ ആളുകളിലേയ്ക്ക് എത്തിക്കുവാൻ ഈ ആപ്പ് സഹായകരമായിരുന്നു. ബൈഡൻ സർക്കാർ ഈ ആപ്പ് വളരെ ഫലപ്രദമായി പ്രാവർത്തികത്തിലാക്കിയിരുന്നു . എല്ലാ നിയമവിരുദ്ധമായ പ്രവേശനങ്ങളും നിർത്തലാക്കുമെന്നും ദശലക്ഷക്കണക്കിന് ക്രിമിനലുകളായ കുടിയേറ്റക്കാരെ നാടുകടത്തുമെന്നും ട്രംപ് തന്റെ ഉദ്ഘാടന പ്രസംഗത്തിൽ വ്യക്തമാക്കി. മെക്‌സിക്കൻ മയക്കുമരുന്ന് കാർട്ടലുകളെ ഭീകര സംഘടനകളായി പ്രഖ്യാപിക്കുന്ന ഉത്തരവിലും അദ്ദേഹം ഒപ്പുവച്ചു. വാഷിംഗ്ടണിലെ ക്യാപിറ്റൽ വൺ അരീനയിൽ നടന്ന ഒരു പരിപാടിയിൽ, ട്രംപ് ബൈഡൻ ഭരണകൂടം നടപ്പിലാക്കിയ 80 ഓളം എക്സിക്യൂട്ടീവ് നടപടികൾ ഔപചാരികമായി പിൻവലിക്കുകയും ചെയ്തു. ഭീഷണികളിൽ നിന്നും അധിനിവേശങ്ങളിൽ നിന്നും നമ്മുടെ രാജ്യത്തെ സംരക്ഷിക്കുന്നതിനേക്കാൾ ഉയർന്ന മറ്റൊരു ഉത്തരവാദിത്തം തനിക്ക് ഇല്ലെന്ന സന്ദേശം ആണ് ട്രംപ് ആവർത്തിച്ച് വ്യക്തമാക്കിയത്.

ജനനാവകാശ പൗരത്വം അവസാനിപ്പിക്കാൻ ട്രംപ് പദ്ധതിയിടുന്നതായുള്ള റിപ്പോർട്ടുകളും പുറത്തുവരുന്നുണ്ട്. ഇതിൻ പ്രകാരം, യുഎസിൽ താമസിക്കുന്ന രേഖകളില്ലാത്ത കുടിയേറ്റക്കാരുടെ കുട്ടികൾ ഇനി സ്വയമേവ യുഎസ് പൗരന്മാരായി പരിഗണിക്കപ്പെടില്ല. എന്നിരുന്നാലും, ജന്മാവകാശ പൗരത്വം യുഎസ് ഭരണഘടനയിൽ ഉൾപ്പെടുത്തിയിട്ടുള്ളതിനാൽ, അത് മാറ്റുന്നതിന് കോൺഗ്രസിൻ്റെ ഇരുചേമ്പറുകളിലും മൂന്നിൽ രണ്ട് വോട്ട് ആവശ്യമാണ്. സി ബി പി ആപ്പ് വഴി നിലവിൽ ഷെഡ്യൂൾ ചെയ്യപ്പെട്ട അപ്പോയ്മെന്റുകളും റദ്ദാക്കിയതായാണ് ആപ്പിൽ വിവരങ്ങൾ വ്യക്തമാക്കുന്നത്. ഇത് നിരവധി കുടിയേറ്റക്കാരെയാണ് കണ്ണീരിൽ ആഴ്ത്തിയത്. ഇനി മുന്നോട്ടും കുടിയേറ്റക്കാർക്കെതിരെയുള്ള നിയമങ്ങൾ കഠിപ്പിക്കും എന്ന സന്ദേശമാണ് ട്രംപ് ഇതിലൂടെ നൽകിയിരിക്കുന്നത്.

ന്യൂസ് ഡെസ്ക്, മലയാളം യുകെ

സൗത്ത് പോർട്ടിൽ മൂന്നു കുരുന്ന് പെൺകുട്ടികളെ കുത്തി കൊലപ്പെടുത്തിയ പ്രതി കോടതിയിൽ കുറ്റസമ്മതം നടത്തി. എൽസി ഡോട്ട് സ്റ്റാൻകോംബ്, ആലീസ് ഡ സിൽവ അഗ്യുയർ, ബെബെ കിംഗ് എന്നീ പെൺകുട്ടികളെ കൊലപ്പെടുത്തിയ ആക്സൽ റുഡാകുബാന എന്ന 18 വയസ്സുകാരനാണ് കുറ്റസമ്മതം നടത്തിയത്. ഇയാൾ 3 പേരെ കുത്തി കൊലപെടുത്തിയത് കൂടാതെ മറ്റ് 10 പേരെ കത്തികൊണ്ട് കുത്തി മുറിവേൽപ്പിക്കുകയും ചെയ്തിരുന്നു.

മുൻപ് നടന്ന ഒരു വിചാരണയിൽ പ്രതി കുറ്റം ചെയ്തിട്ടില്ലെന്ന് വാദിച്ചിരുന്നു. എന്നാൽ ലിവർപൂൾ ക്രൗൺ കോടതിയിൽ കേസ് ആരംഭിക്കാനിരിക്കെ പ്രതിയുടെ വക്കീൽ തന്റെ കക്ഷിക്ക് വീണ്ടും കുറ്റപത്രം സമർപ്പിക്കണമെന്ന്‌ ആവശ്യപ്പെടുകയായിരുന്നു. അതിനുശേഷം പ്രതി മൂന്ന് കൊലപാതക കുറ്റങ്ങളും 10 കൊലപാതക ശ്രമങ്ങളും, രണ്ട് ഭീകരതയുമായി ബന്ധപ്പെട്ട കുറ്റങ്ങളും സമ്മതിക്കുകയായിരുന്നു. വിചാരണ സമയത്ത് കൊല്ലപ്പെട്ട പെൺകുട്ടികളുടെ കുടുംബാംഗങ്ങൾ കോടതിയിൽ ഇല്ലായിരുന്നു. മേൽവിവരിച്ച കുറ്റങ്ങൾക്ക് പുറമെ റിസിൻ എന്ന ജൈവ വിഷവസ്തു നിർമ്മിച്ചതിനും അൽ-ഖ്വയ്ദ പരിശീലന മാനുവൽ കൈവശം വച്ചതിനും തീവ്രവാദ നിയമപ്രകാരം റുഡകുബാനയ്‌ക്കെതിരെ കേസെടുത്തു. ഓരോ കുറ്റങ്ങൾ ചുമത്തിയപ്പോഴും മുഖം പി പി ഇ മാസ്ക് കൊണ്ട് മറച്ചിരുന്ന പ്രതി താൻ കുറ്റക്കാരനാണെന്ന് ഏറ്റുപറഞ്ഞു. പ്രതിയുടെ ശിക്ഷ വ്യാഴാഴ്ച വിധിക്കുമെന്നാണ് അറിയാൻ സാധിച്ചത്.

ജൂലൈ 29 – ന് അവധിക്കാല നൃത്ത, യോഗ ക്ലാസുകളിൽ 17 വയസ്സുകാരൻ നടത്തിയ ആക്രമണത്തിൽ മൂന്ന് പെൺകുട്ടികൾ ദാരുണമായി കൊല്ലപ്പെട്ടത് യുകെയിൽ വൻ കോളിളക്കം സൃഷ്ടിച്ചിരുന്നു . കൊലപാതകം നടത്തിയ 17 വയസ്സുകാരൻ അനധികൃത കുടിയേറ്റക്കാരനാണെന്ന് സമൂഹമാധ്യമങ്ങളിൽ വ്യാപകമായി പ്രചരിച്ച തെറ്റായ വിവരങ്ങളുടെ അടിസ്ഥാനത്തിൽ യുകെയിലൊട്ടാകെ വ്യാപകമായി ആക്രമ സംഭവങ്ങളാണ് അരങ്ങേറിയത് . പ്രതി അനധികൃത കുടിയേറ്റം നടത്തിയ മുസ്ലീമാണെന്ന രീതിയിലുള്ള പ്രചാരണങ്ങളെ തുടർന്ന് ആ വിഭാഗത്തിൻറെ ആരാധനാലയങ്ങളിൽ പലതും ആക്രമിക്കുന്ന സംഭവങ്ങളും ഉണ്ടായി. യുകെയിലുടനീളമുള്ള പട്ടണങ്ങളിലും നഗരങ്ങളിലും നടന്ന കലാപങ്ങളുമായി ബന്ധപ്പെട്ട് ഏകദേശം 1,200 പേരെ ആണ് അറസ്റ്റ് ചെയ്തത് .