ന്യൂസ് ഡെസ്ക് മലയാളം യുകെ

രാജ്ഞിയെയും രാജ കുടുംബത്തെയും അപകീർത്തിപ്പെടുത്താൻ ശ്രമിച്ചതിനാൽ ഹാരിയുടേയും മെഗാന്റെയും രാജപദവി എടുത്തുകളയണമെന്ന അഭിപ്രായത്തിലാണ് ഒരു കൂട്ടം ജനങ്ങൾ. തിങ്കളാഴ്ച പുറത്തുവന്ന ഇന്റർവ്യൂവിനെ തുടർന്നു നടത്തിയ അഭിപ്രായ സർവേയിൽ രാജ്യത്തെ മുതിർന്ന പൗരന്മാർ ഹാരിക്കും മെഗാനും എതിരാണ്. കൊട്ടാരത്തിൽ നിന്നും ഇരുവർക്കുമെതിരെ മോശം പ്രവർത്തനങ്ങൾ നടക്കാൻ സാധ്യതയില്ലെന്നും, ഇരുവർക്കും രാജകീയമായ സുഖസൗകര്യങ്ങൾ അനുഭവിക്കാൻ താൽപര്യമുണ്ടെങ്കിലും ജോലിചെയ്യാൻ ഇഷ്ടം ഇല്ലാത്തതിനാലാണ് കൊട്ടാരം വിട്ടു പോയതെന്നും, മറ്റൊരു രാജ്യത്ത് താമസം തുടങ്ങിയതെന്നുമാണ് 45 വയസ്സിനു മുകളിലുള്ളവരിൽ കൂടുതൽ പേരും അഭിപ്രായപ്പെട്ടത്. ഇരുവരും നടത്തിയ പരാമർശങ്ങൾ സത്യമാണെന്ന് വിശ്വസിക്കുന്നില്ലെന്നും പകുതിയിലധികം പേരും പറഞ്ഞു.

എന്നാൽ 18 വയസ്സു മുതൽ 45 വരെയുള്ള യുവതലമുറ മെഗാനും ഹാരിക്കും ഒപ്പമാണ് നിലയുറപ്പിച്ചിരിക്കുന്നത്. മെഗാനും കുട്ടിക്കും നേരിടേണ്ടിവന്ന വംശീയാധിക്ഷേപം സത്യമാണെന്ന് വിശ്വസിക്കുന്നതായി ഏറിയ പങ്കും അഭിപ്രായപ്പെട്ടു. ദമ്പതിമാരുടെ മാനസികാരോഗ്യം തകരാറിൽ ആയപ്പോൾ മാത്രമായിരിക്കണം ഇരുവരും മാറിതാമസിക്കാൻ തീരുമാനിച്ചത് എന്നും അവർ അഭിപ്രായപ്പെടുന്നു.

രാജ്യത്തെ ഒന്നടങ്കം പിടിച്ചുകുലുക്കിയ അഭിമുഖത്തെ പറ്റി രാജ്ഞി പ്രതികരിച്ചിരുന്നു . 61 വാക്കുകൾ വരുന്ന മൂന്ന് പാരഗ്രാഫ് സ്റ്റേറ്റ് മെന്റ് പുറപ്പെടുവിച്ചതിൽ “ഇവർക്കും നേരിടേണ്ടിവന്ന ദുരനുഭവങ്ങളെ പറ്റി വേദന ഉണ്ടെന്നും, വംശീയാധിക്ഷേപം പോലെയുള്ള കാര്യങ്ങൾ കൂടുതൽ പരിഗണന അർഹിക്കുന്നു എന്നും, അവയെ കൂടുതൽ ഗൗരവത്തിൽ തന്നെ കണക്കാക്കും എന്നും” പറയുന്നുണ്ട് .

യുവതലമുറയിൽ ഏറിയപങ്കും ഇരുകൂട്ടരും തമ്മിലുള്ള പ്രശ്നങ്ങളും സങ്കീർണതകളും ആശയക്കുഴപ്പങ്ങളും എത്രയും പെട്ടെന്ന് അവസാനിക്കണമെന്ന് ആഗ്രഹം ഉള്ളവരാണ്. ചാൾസ് രാജകുമാരൻ ഒരിക്കലും സ്വന്തം മകനായ ഹാരിയെ അടർത്തിമാറ്റിയിട്ടില്ലെന്ന് കൊട്ടാരത്തിൽ നിന്ന് ഉദ്യോഗസ്ഥർ പ്രതികരിച്ചു. ഇരുവരും സീനിയർ റോയൽസ് എന്ന പദവി ഒഴിഞ്ഞതിനുശേഷം ചാൾസ് രാജകുമാരൻ മകന്റെ സാമ്പത്തിക കാര്യങ്ങൾ ശ്രദ്ധിച്ചിരുന്നു എന്നും, അദ്ദേഹം അഭിപ്രായപ്പെട്ടു.”എന്റെ കുടുംബം സാമ്പത്തികമായി എന്നെ മുറിച്ചുമാറ്റി, ഞങ്ങളുടെ സെക്യൂരിറ്റി പോലും ഞാൻ തന്നെ അറേഞ്ച് ചെയ്യേണ്ടിവന്നു ” എന്ന പരാമർശത്തെ അഭിസംബോധന ചെയ്താണ് ഉദ്യോഗസ്ഥൻ പ്രതികരിച്ചത്.സ്വന്തം മകനും മരുമകളും യാതൊരുവിധത്തിലും ബുദ്ധിമുട്ടില്ല എന്ന് ഉറപ്പുവരുത്താൻ ചാൾസ് ശ്രദ്ധിച്ചിരുന്നു.

ന്യൂസ് ഡെസ്ക് മലയാളം യുകെ

ലണ്ടൻ : നീണ്ടുനിൽക്കുന്ന കോവിഡ് മറ്റു പല ഗുരുതര രോഗങ്ങൾക്കും കാരണമാകുമെന്ന് കണ്ടെത്തൽ. കൊറോണ വൈറസ് ബാധിച്ച് ആശുപത്രിയിൽ പ്രവേശിപ്പിക്കപ്പെടുന്ന ആയിരക്കണക്കിന് രോഗികളിൽ പലർക്കും മറ്റു പല രോഗങ്ങളും കണ്ടുതുടങ്ങി. ടൈപ്പ് 1 പ്രമേഹം പെട്ടെന്നു പിടിപെടുകയും അതുവഴി ഇൻസുലിൻ ഉത്പാദിപ്പിക്കാനുള്ള കഴിവ് നശിക്കുകയും ചെയ്യുന്നു. ടൈപ്പ് 1 പ്രമേഹവും ടൈപ്പ് 2 പ്രമേഹവും സാധാരണക്കാർക്കിടയിൽ പ്രചാരത്തിലുള്ള പ്രമേഹ രോഗത്തിന്റെ രണ്ട് തരങ്ങളാണ്. ഭക്ഷണത്തിൽ നിന്നു ലഭിക്കുന്ന ഗ്ലൂക്കോസിനെ ഊർജ്ജമാക്കി മാറ്റുന്നത് പാൻക്രിയാസ് ഉല്‍പ്പാദിപ്പിക്കുന്ന ഇൻസുലിൻ എന്ന ഹോർമോൺ ആണ്. ഈ ഊർജ്ജത്തെ കോശങ്ങളിലേക്കെത്തിക്കാനുള്ള സൗകര്യവും ഇത് ചെയ്തുകൊടുക്കുന്നു. എന്നാൽ ഇൻസുലിൻ ഉൽപ്പാദനത്തിൽ എന്തെങ്കിലും പ്രശ്നം നേരിട്ടാൽ രക്തത്തിലെ ഗ്ലൂക്കോസിന്റെ അളവ് കൂടും. ടൈപ്പ് 1 പ്രമേഹം, പാൻക്രിയാസ് ഇൻസുലിൻ ഉൽപ്പാദിപ്പിക്കാത്ത അവസ്ഥയാണ്. ഇൻസുലിന്റെ ഉൽപ്പാദനം തകരാറിലാകുന്നു. കുട്ടികളിലും ചെറുപ്പക്കാരിലുമാണ് ടൈപ്പ് 1 പ്രമേഹം സാധാരണയായി കാണുന്നതെങ്കിലും പ്രായമായവരിലും ഇത് ഉണ്ടാകാറുണ്ട്.

കോവിഡ് അണുബാധ പാൻക്രിയാസിന് നേരിട്ട് നാശമുണ്ടാക്കുകയും അത് പ്രമേഹത്തിലേക്ക് നയിക്കുകയും ചെയ്യുമെന്നാണ് ഡോക്ടർമാരുടെ കണ്ടെത്തൽ. ലോംഗ് കോവിഡ്’ എന്ന് വിളിക്കപ്പെടുന്ന അവസ്ഥ ഇതിനകം തന്നെ ആയിരക്കണക്കിന് ആളുകളെ ബാധിച്ചിട്ടുണ്ടെന്ന് കരുതപ്പെടുന്നു. കോവിഡിന്റെ ലക്ഷണങ്ങൾ ആഴ്ചകളോ മാസങ്ങളോ നീണ്ടുനിൽക്കും. പ്രാരംഭ ലക്ഷണങ്ങളുടെ തുടർച്ചയാണ് ലോംഗ് കോവിഡ്. ശ്വാസകോശത്തെ മാത്രമല്ല, തലച്ചോറിനെ വരെ അണുബാധ ബാധിച്ചേക്കാമെന്ന് ഡോക്ടർമാർ പറയുന്നു.

കോവിഡ് ഇപ്പോൾ തലച്ചോറിനെ നേരിട്ട് ബാധിക്കുമെന്ന് കരുതപ്പെടുന്നു. ജനുവരിയിൽ, യുഎസിലെ ജോർജിയ സ്റ്റേറ്റ് യൂണിവേഴ്സിറ്റിയിലെ ഒരു സംഘം നടത്തിയ പഠനത്തിലാണ് ഇത് കണ്ടെത്തിയത്. പഠനത്തിന് നേതൃത്വം നൽകിയ വൈറോളജിസ്റ്റ് പ്രൊഫസർ മുകേഷ് കുമാർ പറഞ്ഞു: ‘ഇത് കൂടുതൽ ശ്വാസകോശ സംബന്ധമായ രോഗമാണെന്ന ചിന്ത മാറ്റേണ്ടതുണ്ട്. തലച്ചോറിനെ ബാധിച്ചുകഴിഞ്ഞാൽ ഇത് ശരീരത്തെ മുഴുവനായും ബാധിക്കും. കാരണം മസ്തിഷ്കം നിങ്ങളുടെ ശ്വാസകോശത്തെയും ഹൃദയത്തെയുമെല്ലാം നിയന്ത്രിക്കുന്നു.” ഫെബ്രുവരിയിൽ, ബ്രിട്ടീഷ് ഗവേഷകരുടെ ഒരു സംഘം കോവിഡ് മുക്തരായ രോഗികളുടെ ഹൃദയത്തിന് മാസങ്ങൾക്ക് ശേഷം തകരാർ സംഭവിച്ചതായി കണ്ടെത്തി. പഠനത്തിലെ കോവിഡ് രോഗികളിൽ ആർക്കും ഹൃദയാഘാതം സംഭവിച്ചിട്ടില്ലെങ്കിലും 148 പേർക്കും ഉയർന്ന ട്രോപോണിൻ അളവ് ഉണ്ടായിരുന്നു. ശരീരത്തിന്റെ മറ്റു പല അവയവങ്ങളിലേക്കും രോഗം പടർന്നുപിടിക്കുമെന്നിരിക്കെ ഇതിനെതിരെ യുക്തമായ പ്രതിവിധി തേടുകയാണ് ശാസ്ത്രലോകം.

ന്യൂസ് ഡെസ്ക് മലയാളം യുകെ

ബ്രിട്ടനിൽ വൻ കോളിളക്കം സൃഷ്ടിച്ച 33 വയസ്സുകാരി സാറാ എവറാർഡിൻെറ തിരോധാനത്തിൽ മെട്രോപൊളിറ്റൻ പോലീസ് ഉദ്യോഗസ്ഥനെ അറസ്റ്റ് ചെയ്തു. കുറ്റവാളിയെ സഹായിച്ചു എന്ന സംശയത്തിൻെറ പേരിൽ നേരത്തെ ഒരു സ്ത്രീയെ അറസ്റ്റ് ചെയ്തിരുന്നു. അന്വേഷണത്തിൻെറ ഭാഗമായി സാറയെ അവസാനമായി കണ്ട പ്രദേശത്തെ 750 ഓളം വീടുകൾ പരിശോധനയ്ക്ക് വിധേയമാക്കിയതായും 120 ലധികം ഫോൺകോളുകൾ തങ്ങൾക്ക് ലഭിച്ചുവെന്നും പോലീസ് അറിയിച്ചു.

മാർച്ച് മൂന്നിന് ക്ലാഫാം ജംഗ്ഷനിലെ ലീത്‌വൈറ്റ് റോഡിലുള്ള ഒരു സുഹൃത്തിന്റെ ഫ്ലാറ്റിൽ നിന്നും തൻറെ വീട്ടിലേക്കുള്ള യാത്രാമധ്യേയാണ് മാർക്കറ്റിംഗ് മാനേജരായി ജോലി ചെയ്തിരുന്ന സാറയെ കാണാതായത്. സാറയുടെ തിരോധാനം ദേശീയ മാധ്യമങ്ങളടക്കം വൻ പ്രാധാന്യത്തോടെ റിപ്പോർട്ട് ചെയ്തിരുന്നു . അറസ്റ്റിലായത് മെട്രോപൊളിറ്റൻ പോലീസ് ഉദ്യോഗസ്ഥനാണെന്നത് തന്നെ ഞെട്ടിച്ചു എന്ന് അസിസ്റ്റന്റ് കമ്മീഷണർ നിക്ക് എഫ്‌ഗ്രേവ് പറഞ്ഞു.

അമ്മു മറിയം തോമസ്, മലയാളം യുകെ ന്യൂസ് ടീം

നേഴ്സുമാർ ഉൾപ്പെടെയുള്ള എൻഎച്ച്എസ് ജീവനക്കാർക്കുള്ള നിർദ്ദിഷ്ട ശമ്പളവർദ്ധനവിനെ കുറിച്ചുള്ള വാർത്തകൾ അവസാനിക്കുന്നില്ല. നേഴ്സുമാർക്ക് നേരത്തെ നിശ്ചയിച്ചിരുന്ന ശമ്പളവർദ്ധനവ് 2.1% ആയിരുന്നു എന്ന് എൻഎച്ച്എസ് മേധാവി സൈമൺ സ്റ്റീവൻസ് വെളിപ്പെടുത്തി. മുൻനിശ്ചയിച്ച 2.1% ശമ്പള വർദ്ധനവിൽ നിന്ന് കൊറോണ വൈറസ് മൂലമുള്ള സാമ്പത്തിക പ്രതിസന്ധിയെ തുടർന്ന് ശമ്പളവർദ്ധനവ് 1 % ആയി കുറയ്ക്കേണ്ടി വന്നു എന്ന ന്യായീകരണമാണ് എൻഎച്ച്എസ് മേധാവിയുടെ ഭാഗത്തുനിന്നും ഉണ്ടായിരിക്കുന്നത്. ഇതിനിടെ പ്രധാനമന്ത്രി ബോറിസ് ജോൺസണും നിർദ്ദിഷ്ട ശമ്പള വർദ്ധനവിലെ കുറവിനെ ന്യായീകരിക്കുന്ന പ്രതികരണമാണ് നടത്തിയത്.

നേഴ്സുമാരുടെ കുറഞ്ഞ ശമ്പളവർദ്ധനവ് എൻഎച്ച്എസിലേയ്ക്കുള്ള നേഴ്‌സിംഗ് റിക്രൂട്ട്മെന്റിനെ സാരമായി ബാധിക്കും എന്ന അഭിപ്രായവും ഉയർന്നുവന്നിട്ടുണ്ട്. 1 % ശമ്പള വർദ്ധനവിലെ അപാകതയെ കുറിച്ച് പുനർവിചിന്തനം നടത്തണമെന്ന ആവശ്യം പ്രതിപക്ഷത്തിൻെറയും പൊതുസമൂഹത്തിൻെറയും ഭാഗത്തുനിന്ന് ഉയർന്നുവരുന്നത് വരുംദിവസങ്ങളിൽ കൂടുതൽ ചർച്ചകൾക്ക് വഴിവെക്കുമെന്ന് വിലയിരുത്തപ്പെടുന്നു. ശമ്പള വർദ്ധനവിലെ അപാകതയ്ക്കെതിരെ ശക്തമായി പ്രതികരിക്കാൻ രാജ്യത്തെ നേഴ്‌സിംഗ് യൂണിയനുകൾ തീരുമാനം എടുത്തിരുന്നു. മാഞ്ചസ്റ്റർ സിറ്റി സെൻററിൽ കഴിഞ്ഞദിവസം പ്രതിഷേധ റാലി സംഘടിപ്പിച്ചതിന് 65 വയസ്സുള്ള എൻഎച്ച്എസ് നേഴ്സിനെ 10000 പൗണ്ടാണ് പോലീസ് പിഴ ഈടാക്കിയത്. സമാന സംഭവത്തിൽ മറ്റൊരു ജീവനക്കാരെ അറസ്റ്റ് ചെയ്യുകയും 200 പൗണ്ട് പിഴ ഈടാക്കുകയും ചെയ്തിരുന്നു.

1% ശമ്പള വർദ്ധനവിനെതിരെ പണി മുടക്കിനായി 35 മില്യൻ പൗണ്ട് ഫണ്ട് സ്വരൂപിക്കാൻ നേഴ്‌സിംഗ് യൂണിയനുകൾ തീരുമാനമെടുത്തത്തത് വരും ദിവസങ്ങളിൽ കൂടുതൽ സമരങ്ങൾക്ക് ബ്രിട്ടൺ സാക്ഷ്യം വഹിക്കും എന്നതിന്റെ സൂചനയാണ്. റോയൽ കോളേജ് ഓഫ് നേഴ്സിംഗ് ശമ്പള വർദ്ധനവിനെ ദയനീയം എന്നാണ് വിശേഷിപ്പിച്ചത്. ഒരു ശതമാനം ശമ്പള വർദ്ധനവ് എന്നാൽ ഏറ്റവും കൂടുതൽ പ്രവർത്തി പരിചയം ഉള്ള നേഴ്സിന് ആഴ്ചയിൽ വെറും 3.50 പൗണ്ട് കൂടിയേ അധികമായി ലഭിക്കുകയുള്ളൂ എന്ന ആർസിഎൻ ജനറൽ സെക്രട്ടറി ഡാം ഡോണ കിന്നെയർ മുന്നറിയിപ്പ് നൽകി. ഇത് വളരെ ദയനീയവും നിരാശാജനകവും ആണെന്ന് അവർ കൂട്ടിച്ചേർത്തു.

ന്യൂസ് ഡെസ്ക് മലയാളം യുകെ

ലണ്ടൻ : ഓപ്ര വിൻഫ്രെയുമായുള്ള മേഗന്റെയും ഹാരിയുടെയും അഭിമുഖത്തിന് പിന്നാലെ ചാൾസ് രാജകുമാരനുമായും വില്യം രാജകുമാരനുമായും അടിയന്തര ചർച്ചകൾ നടത്തി എലിസബത്ത് രാജ്ഞി. ഞായറാഴ്ച സംപ്രേഷണം ചെയ്ത അഭിമുഖത്തിൽ നടത്തിയ അവകാശവാദങ്ങൾ കൊട്ടാരത്തെ ആകമാനം പിടിച്ചു കുലുക്കിയിട്ടുണ്ട്. അതേസമയം ഇരുവരെയും പ്രതിസ്ഥാനത്തുനിർത്തി കഥകൾ മെനഞ്ഞ്​ ടാബ്​ളോയിഡുകൾ ‘പണി’ തുടങ്ങിയിട്ടുമുണ്ട്​. മേഗനെ ദുരന്തനായികയായി അവതരിപ്പിക്കുന്ന കഥകൾ ഓരോ മണിക്കൂറിലും പുതുതായി അവതരിപ്പിച്ച്​ മാനനഷ്​ടം തീർക്കാമെന്ന കണക്കുകൂട്ടലിലാണ് കൊട്ടാരം അനുകൂല മാധ്യമങ്ങൾ. കഴിഞ്ഞ മാസം ജെയിംസ്​ കോർഡന്​ അനുവദിച്ച അഭിമുഖത്തിൽ കൊട്ടാരത്തിലെ അനുഭവങ്ങളാണ് തങ്ങളെ ഇത്രയും വേഗം രാജ്യം വിടാൻ പ്രേരിപ്പിച്ചതെന്ന്​ പറഞ്ഞിരുന്നു. നാല്​ ടാബ്ലോയ്​ഡുകളുമായും ബന്ധം അവസാനിപ്പിച്ചതായും അന്ന്​ ഹാരി വ്യക്തമാക്കിയിരുന്നു.

ടാബ്ലോയിഡ് മാധ്യമങ്ങൾ വർഗീയത സൃഷ്ടിക്കുകയാണെന്ന് ഹാരി തുറന്ന് പറഞ്ഞു. “വെയിൽസ് രാജകുമാരനുമായി സമാധാനമുണ്ടാക്കണമെന്നാണ് തന്റെ ആഗ്രഹം. സഹോദരനും അച്ഛനും രാജകുടുംബത്തിന്റെ വ്യവസ്ഥയിൽ കുടുങ്ങിക്കിടക്കുകയാണ്.” ഹാരി വെളിപ്പെടുത്തി. ഹാരിയുടെയും മേഗന്റെയും മാനസികാരോഗ്യം നോക്കുന്നതിൽ രാജകുടുംബം പരാജയപ്പെട്ടുവെന്നും ഒരു കുടുംബാംഗം അവരുടെ കുഞ്ഞിനെതിരെ വംശീയാധിക്ഷേപം നടത്തിയെന്നുമുള്ള വാദങ്ങളിൽ പ്രധാനമന്ത്രി അഭിപ്രായം പ്രകടിപ്പിക്കാൻ വിസമ്മതിച്ചു. രാജകുടുംബവുമായി ബന്ധപ്പെട്ട കാര്യങ്ങളിൽ പ്രധാനമന്ത്രി ഇടപെടുന്നത് ശരിയല്ലെന്ന് അദ്ദേഹം പറഞ്ഞു.

തന്റെ സഹോദരൻ വില്യം രാജകുമാരന് കൊട്ടാരം ഉപേക്ഷിക്കാൻ കഴിയില്ലെന്ന് തനിക്ക് വളരെ ബോധ്യമുണ്ടെന്ന് ഹാരി പറഞ്ഞു. കൊട്ടാരം സംവിധാനത്തിൽ നിന്ന് പുറത്തുപോകാൻ വില്യം ആഗ്രഹിക്കുന്നുണ്ടോയെന്ന ചോദ്യത്തിന് “എനിക്കറിയില്ല” എന്ന് അദ്ദേഹം മറുപടി പറഞ്ഞു. കൊട്ടാരം നിയന്ത്രണവും യുകെ ടാബ്ലോയിഡുകൾ സൃഷ്ടിക്കുന്ന അന്തരീക്ഷവും ഭയാനകമാണെന്ന് ഹാരി വ്യക്തമാക്കി.

ന്യൂസ് ഡെസ്ക് മലയാളം യുകെ

ബ്രിട്ടനിൽ കോവിഡ് വ്യാപനവും മരണനിരക്കും കുറയുന്നതിൻെറ ആശ്വാസത്തിലാണ് രാജ്യം. തുടർച്ചയായ രണ്ടാം ദിവസവും കോവിഡ് മൂലമുള്ള മരണനിരക്ക് 100 -ൽ താഴെയാണെന്നത് ഔദ്യോഗിക കണക്കുകൾ വ്യക്തമാക്കുന്നു. ഇന്നലെ യുകെയിൽ 65 പേരാണ് കോവിഡ് -19 മൂലം മരണമടഞ്ഞത്. ഞായറാഴ്ച മരണനിരക്ക് 82 ആയിരുന്നു. 79 കോവിഡ് മരണങ്ങൾ രേഖപ്പെടുത്തിയ ഒക്ടോബർ 9 -ന് ശേഷം ആദ്യമായാണ് മരണ നിരക്ക് കുറയുന്നത് രോഗവ്യാപന തീവ്രത കുറഞ്ഞതിൻെറ സൂചനയായി വിലയിരുത്തപ്പെടുന്നു. ഇന്നലെ 4712 പേർക്കാണ് പുതിയതായി കോവിഡ് ബാധിച്ചത്. ഞായറാഴ്ച കോവിഡ് ബാധിതരുടെ എണ്ണം 5177 ആയിരുന്നു . അതേസമയം രാജ്യത്ത് ഇതുവരെ 22377255 പേർ പ്രതിരോധകുത്തിവെയ്പ്പ് സ്വീകരിച്ചതായി ഔദ്യോഗിക കണക്കുകൾ വ്യക്തമാക്കുന്നു.

ഇന്നലെ വളരെ നാളുകൾക്ക് ശേഷം യുകെയിലെ വിദ്യാർത്ഥികൾ അധ്യയനത്തിനായി തങ്ങളുടെ സ്കൂളുകളിലേയ്ക്ക് തിരിച്ചെത്തി. വിദ്യാർഥികൾ സ്കൂളുകളിൽ തിരിച്ചെത്തുന്നത് രാജ്യത്തെ സംബന്ധിച്ച് വളരെ സന്തോഷത്തിൻെറ ദിനമെന്നാണ് പ്രധാനമന്ത്രി ബോറിസ് ജോൺസൻ വിശേഷിപ്പിച്ചത് . എന്നാൽ ഇത് രോഗവ്യാപനതോത് ഉയരാൻ കാരണമായേക്കാം എന്നും ജാഗ്രത പാലിക്കണമെന്നും പ്രധാനമന്ത്രി മുന്നറിയിപ്പ് നൽകി. നിയമങ്ങൾ പാലിക്കുന്നത് മുമ്പത്തേക്കാളും പ്രധാനമാണെന്നത് ഡൗണിങ് സ്ട്രീറ്റിൽ നടത്തിയ വാർത്താ സമ്മേളനത്തിൽ അദ്ദേഹം ഓർമ്മിപ്പിച്ചു. മറ്റു യൂറോപ്യൻ രാജ്യങ്ങളിൽ കേസുകൾ വർദ്ധിക്കുന്നത് മുന്നറിയിപ്പായി രാജ്യം കാണണമെന്ന് പ്രധാനമന്ത്രി കൂട്ടിച്ചേർത്തു.

ന്യൂസ് ഡെസ്ക് മലയാളം യുകെ

വിദേശ ഇന്ത്യക്കാർക്ക് ഇന്ത്യയിൽ ചില അവകാശങ്ങൾ ഉറപ്പാക്കുന്നതാണ് ഓവർസീസ് സിറ്റിസൺസ് ഓഫ് ഇന്ത്യ (ഒസിഐ) കാർഡ്. ഏത് ആവശ്യത്തിനും ഇന്ത്യ സന്ദർശിക്കുന്നതിനുള്ള അനുമതി നൽകുന്ന ആജീവനാന്ത വിസ കൂടിയാണിത്. രജിസ്റ്റർ ചെയ്ത ഓരോ ഒസി‌ഐയ്ക്കും ഒരു രജിസ്ട്രേഷൻ സർട്ടിഫിക്കറ്റ് നൽകും, അത് ഇന്ത്യൻ പാസ്‌പോർട്ട് പോലെ വ്യത്യസ്ത നിറത്തിൽ അച്ചടിക്കും, കൂടാതെ വ്യക്തിയുടെ ഫോട്ടോയും ആവശ്യമായ എല്ലാ സുരക്ഷാ സവിശേഷതകളും അതിൽ ഉണ്ടായിരിക്കും. എന്നിരുന്നാലും, ഇന്ത്യാ ഗവൺമെന്റിന്റെ മുൻകൂർ അനുമതിയില്ലാതെ ഗവേഷണ പ്രവർത്തനങ്ങൾ, മിഷനറി പ്രവർത്തനങ്ങൾ, പർവതാരോഹണം, പത്രപ്രവർത്തനം എന്നിവ നടത്താൻ ഒസിഐ കാർഡ് ഉടമകൾക്ക് അവകാശമില്ല. സർക്കാർ നിയന്ത്രിത പ്രദേശത്ത് ഉൾപ്പെടുന്ന ഏതെങ്കിലും സ്ഥലം സന്ദർശിക്കാൻ ഒസിഐ കാർഡ് ഉടമയ്ക്ക് പ്രൊട്ടക്റ്റഡ് ഏരിയ പെർമിറ്റ് (പിഎപി) / റെസ്ട്രിക്റ്റഡ് ഏരിയ പെർമിറ്റ് (ആർ‌എപി) ആവശ്യമാണ്. ഇവർക്ക് കാർഷിക, തോട്ടം വസ്തുവകകൾ ഏറ്റെടുക്കുന്നതുമായി ബന്ധപ്പെട്ട കാര്യങ്ങളിലൊഴികെ സാമ്പത്തിക, വിദ്യാഭ്യാസ മേഖലകളിൽ ലഭ്യമായ എല്ലാ സൗകര്യങ്ങളിലും പ്രവാസി ഇന്ത്യക്കാരുമായുള്ള (എൻആർഐ) തുല്യത ഉറപ്പാക്കുന്നുണ്ട്. ഇന്ത്യയിലെ ദേശീയ പാർക്കുകളും വന്യജീവി സങ്കേതങ്ങളും സന്ദർശിക്കാൻ ഇന്ത്യൻ സന്ദർശകരുടെ അതേ പ്രവേശന ഫീസാണ് ഈടാക്കുന്നത്. പല കാര്യങ്ങളിലും എൻ‌ആർ‌ഐകൾക്ക് ലഭിക്കുന്ന നേട്ടങ്ങൾ ഒസിഐ കാർഡ് ഉടമകൾക്കും ബാധകമാണ്. ഒ‌സി‌ഐ കാർഡ് ഉടമകൾക്ക് അനുവദിച്ചു നൽകാത്ത ഒട്ടേറെ അനുകൂല്യങ്ങളുമുണ്ട്. വോട്ടുചെയ്യാൻ അർഹതയില്ല. നിയമസഭ അസംബ്ലി, നിയമസഭ കൗൺസിൽ അല്ലെങ്കിൽ പാർലമെന്റ് അംഗം, പ്രസിഡന്റ്, വൈസ് പ്രസിഡന്റ്, സുപ്രീം കോടതി , ഹൈക്കോടതി ജഡ്ജി തുടങ്ങിയ ഭരണഘടനാ പദവികൾ വഹിക്കാൻ കഴിയില്ല. ഏതെങ്കിലും സംസ്ഥാനത്തിന്റെ കാര്യങ്ങളുമായി ബന്ധപ്പെട്ട് പൊതു സേവനങ്ങളിലേക്കും തസ്തികകളിലേക്കും നിയമനം ലഭിക്കാനും അർഹതയില്ല.

ഒസി‌ഐ കാർഡ് ഉടമകളായി രജിസ്റ്റർ ചെയ്യുന്നവരുടെ വിരലടയാളത്തിന്റെയും മുഖത്തിന്റെയും ബയോമെട്രിക്സ് എടുക്കേണ്ടത് നിർബന്ധമാണ്. എംബസിയിൽ അപേക്ഷാ ഘട്ടത്തിൽ തന്നെ, അതായത് ഡോക്യുമെന്റ് വെരിഫിക്കേഷൻ ഘട്ടത്തിൽ തന്നെ അപേക്ഷകർ ബയോമെട്രിക്സ് നൽകാൻ നിർദ്ദേശിക്കുന്നു. ഏതെങ്കിലും കാരണത്താൽ അപേക്ഷകന് ബയോമെട്രിക്സ് നൽകാൻ കഴിയുന്നില്ലെങ്കിൽ ഇത് എംബസിയെ രേഖാമൂലം അറിയിക്കണം. ഈ ബയോമെട്രിക്സ് എൻറോൾമെന്റ് തീയതി മുതൽ അടുത്ത 5 വർഷത്തേയ്ക്ക് സാധുവായിരിക്കും. 70 വയസ്സിനു മുകളിൽ ഉള്ളവരെയും 12 വയസ്സിന് താഴെയുള്ളവരെയും ‘ബയോമെട്രിക് ക്യാപ്‌ചറിംഗിൽ’ നിന്ന് ഒഴിവാക്കും.

https://ociservices.gov.in/ ൽ കയറി രജിസ്റ്റർ ചെയ്യാവുന്നതാണ്. ഫോട്ടോയും ഒപ്പും അവിടെ പറഞ്ഞിരിക്കുന്ന സൈസിലാണ് നൽകേണ്ടത്. ഓൺ‌ലൈനായി സമ്പൂർണ്ണ അപേക്ഷ സമർപ്പിച്ചതിന് ശേഷം, അപേക്ഷകൻ ഒ‌സി‌ഐ അപേക്ഷ PDF ഫോർമാറ്റിൽ അയയ്ക്കേണ്ടതുണ്ട്, കൂടാതെ എംബസിക്ക് അടച്ച ഫീസ് തെളിവ് [email protected] ൽ ലഭിക്കും. നിങ്ങളുടെ കോൺ‌ടാക്റ്റ് നമ്പറും നിങ്ങളുടെ ഇ-മെയിലിലും നൽകേണ്ടത് അത്യാവശ്യമാണ്. എന്തെങ്കിലും തെറ്റുണ്ടെങ്കിൽ അപേക്ഷകൻ ഇത് ശരിയാക്കിയ ശേഷം എംബസിയെ ഇ-മെയിൽ വഴി അറിയിക്കണം. അതിനുശേഷം, ഒറിജിനൽ ഡോക്യുമെന്റുകൾ പരിശോധിക്കുന്നതിനും അഭിമുഖം നടത്തുന്നതിനും ബയോമെട്രിക്സ് ക്യാപ്‌ചറിംഗിനും ഒസിഐ ഫീസ് നിക്ഷേപിക്കുന്നതിനുമായി എംബസിയിൽ നേരിട്ട് ഹാജരാകാൻ അപേക്ഷകനോട് ആവശ്യപ്പെടും. ഇപ്പോഴത്തെ പൗരത്വത്തിന്റെ തെളിവ് (6 മാസത്തെ സാധുതയുള്ള പാസ്‌പോർട്ടിന്റെ പകർപ്പ്),ആപ്ലിക്കേഷൻ നൽകിയ സ്ഥലത്തെ മേൽവിലാസം ( സ്വന്തം/ മാതാപിതാക്കൾ/ പങ്കാളിയുടെ പേരിൽ ഉള്ള വൈദ്യുതി ബിൽ / ടെലിഫോൺ ബിൽ എന്നിവയുടെ പകർപ്പ് മതിയാവും) എന്നിവയൊക്കെ അപ്പോൾ സമർപ്പിക്കേണ്ട വിവിധ രേഖകളാണ്. കൂടുതൽ വിവരങ്ങൾക്കും രജിസ്ട്രേഷൻ സമയത്തെ സംശയങ്ങൾ പരിഹരിക്കുന്നതിനും www.indianembassyberlin.gov.in എന്ന സൈറ്റിലെ കോൺസുലർ സർവീസ് > ഒസിഐ – ജനറൽ ഇൻഫർമേഷൻ പരിശോധിച്ചാൽ മതിയാവും.

ന്യൂസ് ഡെസ്ക് മലയാളം യുകെ

വാഷിങ്ടൺ : ബക്കിംഗ്ഹാം കൊട്ടാരത്തിലെ സുഖാനുഭവം വേണ്ടെന്ന് വെച്ച് അമേരിക്കയിലേയ്ക്ക് താമസം മാറിയ ഹാരിയുടെയും മേഗന്റെയും വെളിപ്പെടുത്തലിൽ ഞെട്ടി ബ്രിട്ടീഷ് ജനത. രാജകീയ ജീവിതത്തിന്റെ പിരിമുറുക്കവും ഒറ്റപ്പെടലും മൂലം അഞ്ചു മാസം ഗർഭിണിയായിരിക്കുന്ന സമയത്ത് ആത്മഹത്യയ്ക്ക് വരെ ശ്രമിച്ചെന്ന് മേഗൻ കണ്ണീരോടെ വെളിപ്പെടുത്തി. കറുത്ത വംശജയായ മേഗന്​ പിറക്കുന്ന കുഞ്ഞ്​ എന്തുമാത്രം കറുപ്പായിരിക്കുമെന്ന ചോദ്യം കൊട്ടാരത്തിൽ നിന്നുതന്നെ ഉയർന്നതായി ഓപ്ര വിൻഫ്രിക്ക്​ നൽകിയ അഭിമുഖത്തിൽ അവൾ പറഞ്ഞു. മകൻ ആർച്ചിക്ക് ‘രാജകുമാരന്‍’ എന്ന കൂട്ടുപേര് നല്‍കാത്തതിന്റെ കാരണം ഇതാണെന്നും അവര്‍ പറഞ്ഞു. ഹാരിക്കൊപ്പം ജീവിതം തുടങ്ങു​മ്പോൾ സ്വാഗതമോതിയ രാജ്​ഞിയും കുടുംബത്തിലെ മറ്റ് അംഗങ്ങളും പിന്നീട് കയ്യൊഴിയുകയായിരുന്നു.

2018 ല്‍ ഹാരി മേഗനെ വിവാഹംചെയ്തപ്പോള്‍ തന്നെ രാജകുടുംബത്തിനും വെളുത്തവര്‍ഗക്കാര്‍ക്കും വലിയ അതൃപ്തിയുണ്ടായിരുന്നു. ചില പത്രങ്ങള്‍ പോലും പരസ്യമായി വംശീയാധിക്ഷേപങ്ങൾ കുത്തിനിറച്ചിരുന്നു. കല്യാണം കഴിഞ്ഞ് കുറച്ചുകഴിഞ്ഞപ്പോള്‍ തന്നെ ഇരുവരും കൊട്ടാരം വിടുകയും യു.എസിലേക്ക് ജീവിതം മാറ്റുകയും ചെയ്തത് വലിയ വാർത്തയായിരുന്നു. “ഞാന്‍ ഗര്‍ഭിണിയായിരുന്ന മാസങ്ങളില്‍, ‘നിനക്ക് സുരക്ഷാ സംവിധാനം ലഭിക്കില്ല, രാജകുമാരന്‍, രാജകുമാരി എന്ന നാമവും കിട്ടില്ല’ എന്നിങ്ങനെ കേള്‍ക്കുമായിരുന്നു. ജനിക്കുമ്പോള്‍ അവന്റെ നിറം എന്തായിരിക്കുമെന്ന ആശങ്കയും ഉയര്‍ത്തി.” മേഗന്‍ തന്റെ അനുഭവം തുറന്നുപറഞ്ഞു. എന്നാൽ ഇതാരാണ് പറഞ്ഞതെന്ന കാര്യം അവർ വെളിപ്പെടുത്തിയിട്ടില്ല.

“ഞാൻ ആ കുടുംബത്തിൽ ചേർന്ന സമയത്താണ് എന്റെ പാസ്‌പോർട്ട്, ഡ്രൈവിംഗ് ലൈസൻസ്, താക്കോലുകൾ എന്നിവ അവസാനമായി കാണുന്നത്. ലോസ് ഏഞ്ചൽസിലേക്ക് പോകാൻ സമ്മതിച്ചതിലൂടെ ഹാരി എന്റെ ജീവൻ രക്ഷിച്ചു. ” മേഗൻ പറഞ്ഞു. വിവാഹത്തിനു ശേഷം പിതാവ്​ ചാൾസ്​ രാജകുമാരൻ തന്‍റെ ഫോൺ വിളികൾ എടുക്കാതായതോടെ ഇനിയും കുടുംബത്തിന്റെ ഭാഗമായി തുടരുന്നതിൽ അർത്ഥമില്ലെന്ന ചിന്തയാണ് തന്നെ മാറിതാമസിക്കാൻ പ്രേരിപ്പിച്ചതെന്ന് ഹാരി വെളിപ്പെടുത്തി. എന്നാൽ തന്റെ ഏറ്റവും അടുത്ത ആളുകളിൽ ആദ്യത്തെയാൾ പിതാവാണെന്നും എത്രയും വേഗം തർക്കം പരിഹരിക്കാൻ ശ്രമിക്കുമെന്നും അദ്ദേഹം പറഞ്ഞു. ദീർഘമായ അഭിമുഖം ലോകം കണ്ടതോടെ ബ്രിട്ടനിൽ അനുകൂലിച്ചും പ്രതികൂലിച്ചും വാർത്തകൾ വന്നു. 1995 ൽ ഡയാന രാജകുമാരി ബിബിസിയുടെ മാർട്ടിൻ ബഷീറുമായി സംസാരിച്ചതിന് ശേഷമുള്ള ഏറ്റവും അസാധാരണമായ രാജകീയ അഭിമുഖത്തിൽ വംശീയാധിക്ഷേപം അടക്കമുള്ള തുറന്നുപറച്ചിൽ നടന്നതോടെ കൊട്ടാരം സ്വീകരിക്കുന്ന നിലപാടറിയാൻ കാത്തിരിക്കുകയാണ് ജനങ്ങൾ. ‘അപകീർത്തിപ്പെടുത്തുന്ന’ വിവരങ്ങൾ താൻ പങ്കിടുന്നില്ലെന്നും എന്നാൽ ‘ആളുകൾ സത്യം മനസിലാക്കേണ്ടത് വളരെ പ്രധാനമാണെന്നും’ മേഗൻ പറഞ്ഞു. അഭിമുഖം ആരംഭിക്കുന്ന സമയത്ത് ഓപ്ര ഒരു സുഹൃത്തായി ഡച്ചസിനെ സ്വാഗതം ചെയ്യുകയും അവളുടെ വളർന്നുവരുന്ന കുഞ്ഞിനെ അഭിനന്ദിക്കുകയും ചെയ്തു. ചോദ്യങ്ങളൊന്നും മുൻകൂട്ടി പങ്കിട്ടിട്ടില്ലെന്നും അവർ അറിയിച്ചു.

ന്യൂസ് ഡെസ്ക് മലയാളം യുകെ

ലണ്ടൻ : മറ്റേണിറ്റി യൂണിറ്റുകൾ സുരക്ഷിതമാണെന്ന അവകാശവാദം ഉന്നയിച്ച ആശുപത്രികൾക്ക് വൻ തിരിച്ചടി. വാദം വ്യാജമാണെന്ന് കണ്ടെത്തിയതോടെ ലക്ഷകണക്കിന് പൗണ്ട് തിരിച്ചടയ്ക്കാൻ ആശുപത്രികൾ നിർബന്ധിതരായി. 115 എൻ‌എച്ച്‌എസ് ട്രസ്റ്റുകളാണ് ഏറ്റവും പുതിയ 10 സുരക്ഷാ നടപടികളും പാലിക്കുന്നതായി അവകാശവാദം ഉന്നയിച്ചത്. എന്നാൽ 14 ആശുപത്രികൾക്ക് അത് തെളിയിക്കുന്നതിന് സാധിച്ചില്ല. പ്രസവ സേവന യൂണിറ്റുകൾ സുരക്ഷിതമല്ലെന്ന് കണ്ടെത്തിയതിന് പിന്നാലെ ഏഴ് ആശുപത്രികൾ 8.5 മില്യൺ പൗണ്ട് തിരിച്ചടയ്ക്കേണ്ടി വരും. ആശുപത്രികളിലെ സുരക്ഷാ പ്രശ്നം മൂലം കുഞ്ഞുങ്ങൾ മരിച്ചതായി പല കുടുംബങ്ങളും പറഞ്ഞു.

പ്രസവസമയത്തും തുടർന്നും സുരക്ഷ ഉറപ്പാക്കുന്നതിനായി 10 പ്രധാന സുരക്ഷാ മേഖലകളിൽ ശ്രദ്ധ കേന്ദ്രീകരിക്കണമെന്ന തീരുമാനത്തോടെ 2018 ലാണ് എൻഎച്ച്എസ് റെസല്യൂഷൻ, മറ്റേണിറ്റി ഇൻസെന്റീവ് സ്‌കീം ആരംഭിച്ചത്. 2018-19 ൽ എൻ‌എച്ച്‌എസിനെതിരെ ഏകദേശം 5 ബില്യൺ പൗണ്ടിന്റെ ആരോപണങ്ങൾ ഉയർന്നിരുന്നു. അതിൽ 60 ശതമാനം പ്രസവ സേവനങ്ങളുമായി ബന്ധപ്പെട്ട് നിൽക്കുന്നു. പദ്ധതിയുടെ ആദ്യ രണ്ട് വർഷങ്ങളിൽ പണം തിരികെ നൽകാൻ നിർബന്ധിതരായ ട്രസ്റ്റുകളിൽ ഷ്രൂസ്ബറി, ടെൽഫോർഡ് ഹോസ്പിറ്റൽ ട്രസ്റ്റ് എന്നിവ ഉൾപ്പെടുന്നു. അവർ 953,000 പൗണ്ട് തിരികെ നൽകി. എൻ‌എച്ച്‌എസ് ചരിത്രത്തിലെ ഏറ്റവും വലിയ പ്രസവ അഴിമതികളിലൊന്നിൽ മോശം പരിചരണത്തിന്റെ ഫലമായി 12ഓളം സ്ത്രീകളും 40 ലധികം കുഞ്ഞുങ്ങളും മരിച്ചുവെന്ന് തുടർന്ന് നടത്തിയ അന്വേഷണത്തിൽ കണ്ടെത്തി.

ശിശു മരണത്തെക്കുറിച്ച് അന്വേഷണവും കെയർ ക്വാളിറ്റി കമ്മീഷൻ ക്രിമിനൽ പ്രോസിക്യൂഷനും നേരിടുന്ന ഈസ്റ്റ് കെന്റ് ഹോസ്പിറ്റൽസ് യൂണിവേഴ്സിറ്റി ട്രസ്റ്റ് രണ്ട് വർഷത്തിനിടെ 2.1 മില്യൺ പൗണ്ട് തിരിച്ചടവാണ് നേരിടുന്നത്. നോട്ടിംഗ്ഹാം യൂണിവേഴ്സിറ്റി ഹോസ്പിറ്റൽസ് ട്രസ്റ്റും പട്ടികയിൽ ഉൾപ്പെട്ടിട്ടുണ്ട്. കെയർ ക്വാളിറ്റി കമ്മീഷൻ സുരക്ഷാ ആശങ്കകൾ ഉന്നയിച്ചതിന് ശേഷം പണം തിരിച്ചടയ്ക്കുമെന്ന് പ്രതീക്ഷിക്കുന്ന മറ്റ് മൂന്ന് ട്രസ്റ്റുകളിൽ നോർത്ത് വെസ്റ്റ് ആംഗ്ലിയ ഫൗണ്ടേഷൻ ട്രസ്റ്റ്, വെസ്റ്റ് സഫോക്ക് ഫൗണ്ടേഷൻ ട്രസ്റ്റ്, നോർത്തേൺ ഡെവോൺ ഹെൽത്ത് കെയർ ട്രസ്റ്റ് എന്നിവയും ഉൾപ്പെടുന്നു.

ന്യൂസ് ഡെസ്ക് മലയാളം യുകെ

കൊറോണ വൈറസിനെതിരെ ബ്രിട്ടൻെറ അതിജീവനത്തിൻെറ മുന്നണി പോരാളികളായ നേഴ്സുമാർക്ക് 1 % മാത്രം നിർദിഷ്ട ശമ്പളവർധനവ് പ്രഖ്യാപിച്ചതിനെതിരെ ബ്രിട്ടനിൽ പ്രതിഷേധം പുകയുന്നു. മാഞ്ചസ്റ്ററിൽ സിറ്റി സെൻററിൽ കഴിഞ്ഞദിവസം പ്രതിഷേധ റാലി സംഘടിപ്പിച്ചതിന് പോലീസ് പിഴ ചുമത്തി. പ്രതിഷേധറാലി സംഘടിപ്പിച്ചതിന് 65 വയസ്സുള്ള എൻഎച്ച്എസ് നേഴ്സിനാണ് പിഴ ചുമത്തപ്പെട്ടത്. മറ്റൊരു ജീവനക്കാരനെ അറസ്റ്റുചെയ്യുകയും 200 പൗണ്ട് പിഴ ചുമത്തുകയും ചെയ്തതായും റിപ്പോർട്ടുകൾ പുറത്തുവന്നിട്ടുണ്ട്. കൊറോണ വൈറസ് നിയമപ്രകാരം പൊതുസമ്മേളനങ്ങൾ നിരോധിച്ചിരിക്കുന്ന സാഹചര്യത്തിലാണ് പിഴയും അറസ്റ്റും നടന്നിരിക്കുന്നതെന്നാണ് പോലീസിൻെറ വിശദീകരണം.

സർക്കാരിനെ സമ്മർദത്തിലാക്കി കൂടുതൽ നേഴ്സിംഗ് യൂണിയനുകൾ സമരമുഖത്ത് അണിചേരുമെന്ന റിപ്പോർട്ടുകൾ നേരത്തെ പുറത്തു വന്നിരുന്നു . രാജ്യത്തെ അക്ഷരാർത്ഥത്തിൽ കൊറോണ വൈറസിൽ നിന്നും സുരക്ഷിതമായി തങ്ങളുടെ അംഗങ്ങൾ സംരക്ഷിക്കുകയായിരുന്നു എന്നും കുറഞ്ഞ ശമ്പള വർദ്ധനവ് കടുത്ത അനീതിയാണെന്നും ബ്രിട്ടീഷ് മെഡിക്കൽ അസോസിയേഷനും മറ്റു സംഘടനകളും പറഞ്ഞു.

1% ശമ്പള വർദ്ധനവിനെതിരെ പണി മുടക്കിനായി 35 മില്യൻ പൗണ്ട് ഫണ്ട് സ്വരൂപിക്കാൻ നേഴ്‌സിംഗ് യൂണിയനുകൾ തീരുമാനമെടുത്തത്തത് വരും ദിവസങ്ങളിൽ കൂടുതൽ സമരങ്ങൾക്ക് ബ്രിട്ടൺ സാക്ഷ്യം വഹിക്കും എന്നതിന്റെ സൂചനയാണ്. റോയൽ കോളേജ് ഓഫ് നേഴ്സിംഗ് ശമ്പള വർദ്ധനവിനെ ദയനീയം എന്നാണ് വിശേഷിപ്പിച്ചത്. ഒരു ശതമാനം ശമ്പള വർദ്ധനവ് എന്നാൽ ഏറ്റവും കൂടുതൽ പ്രവർത്തി പരിചയം ഉള്ള നേഴ്സിന് ആഴ്ചയിൽ വെറും 3.50 പൗണ്ട് കൂടിയേ അധികമായി ലഭിക്കുകയുള്ളൂ എന്ന ആർസിഎൻ ജനറൽ സെക്രട്ടറി ഡാം ഡോണ കിന്നെയർ മുന്നറിയിപ്പ് നൽകി. ഇത് വളരെ ദയനീയവും നിരാശാജനകവും ആണെന്ന് അവർ കൂട്ടിച്ചേർത്തു.