ബാബു ജോസഫ്
ഒക്ടോബര്‍ 24-ാം തീയതിലെ മാഞ്ചസ്റ്റര്‍ അഭിഷേകാഗ്നി കണ്‍വെന്‍ഷനു വേണ്ടി ഹള്ളില്‍ ഇന്നു വൈകുന്നേരം മുതല്‍ നാളെ വൈകുന്നേരം വരെ 24 മണിക്കൂര്‍ നീണ്ടുനില്‍ക്കുന്ന ഉപവാസ പ്രാര്‍ത്ഥനയും കുരിശിന്റെ വഴികളും നടക്കും. കണ്‍വെന്‍ഷന്റെ ആത്മീയ വിജയത്തിനായുള്ള പ്രത്യേക പ്രാര്‍ത്ഥനകള്‍ ഓരോ കുര്‍ബാന സെന്ററുകളിലും കുടുംബങ്ങളിലും നടന്നുവരുന്നുവരുന്നതിന്റെ ഭാഗമായിട്ടാണ് ഹള്ളില്‍ പ്രത്യേക ഉപവാസപ്രാര്‍ത്ഥനകള്‍ ക്രമീകരിച്ചിരിക്കുന്നത്.
ലോക പ്രശസ്ത വചന പ്രഘോഷകനും സെഹിയോന്‍ മിനിസ്ട്രീസ് സ്ഥാപകനുമായ റവ.ഫാ.സേവ്യര്‍ ഖാന്‍ വട്ടായില്‍ നയിക്കുന്ന ഗ്രേറ്റ് ബ്രിട്ടണ്‍ സീറോ മലബാര്‍ രൂപത പ്രഥമ ബൈബിള്‍ കണ്വെന്ഷന് മാഞ്ചസ്റ്റര്‍ റീജിയന്‍ കേന്ദ്രീകരിച്ച് ഒക്ടോബര്‍ 24ന് നടക്കും. കണ്വെന്ഷന് മുന്നോടിയായി, ബിഷപ്പ് മാര്‍ ജോസഫ് സ്രാമ്പിക്കലിന്റെയും രൂപതാ കേന്ദ്രത്തിന്റെയും പ്രത്യേക സന്ദേശവുമായി കണ്‍വെന്‍ഷനിലേക്കു ഓരോരുത്തരെയും നേരിട്ട് ക്ഷണിച്ചുകൊണ്ടുള്ള ഭവനസന്ദര്‍ശനം ഇതിനോടകം മാഞ്ചസ്റ്ററിലെ എല്ലാ കുര്‍ബാന സെന്ററുകളിലും പൂര്‍ത്തിയായി.
രൂപത വികാരി ജനറാള്‍ റവ.ഫാ.സജി മലയില്‍പുത്തന്‍പുരയുടെ നേതൃത്വത്തില്‍ വിവിധ മാസ് സെന്ററുകളില്‍ നിന്നും തിരഞ്ഞെടുക്കപ്പെട്ടവരുള്‍പ്പെടുന്ന വിപുലമായ സംഘാടകസമിതി ചാപ്ലയിന്‍മാരായ റീജിയണല്‍ കോ ഓര്‍ഡിനേറ്റര്‍ ഫാ. തോമസ് തൈക്കൂട്ടത്തില്‍, ഫാ.ലോനപ്പന്‍ അരങ്ങാശ്ശേരി, ഫാ. സിറില്‍ ഇടമന, ഫാ. മാത്യു മുളയോലില്‍, ഫാ. ബിജു കുന്നക്കാട്ട്, ഫാ.റോയ് കോട്ടയ്ക്കുപുറം, ഫാ. രഞ്ജിത്ത് ജോര്‍ജ് മടത്തിറമ്പില്‍ എന്നിവര്‍ക്കൊപ്പം വിപുലമായ ഒരുക്കങ്ങളാണ് നടത്തിവരുന്നത്.
മാഞ്ചസ്റ്ററിലെ ഏറ്റവും വലിയ കണ്വെന്ഷന് സെന്ററുകളില്‍ ഒന്നായ ഷെറിഡന്‍ സ്യൂട്ടില്‍ വെച്ചായിരിക്കും അനേകായിരങ്ങളെ ക്രൈസ്തവ വിശ്വാസത്തിന്റെ ആഴങ്ങളിലേക്ക് നയിക്കുന്ന അഭിഷേകാഗ്നി കണ്വെന്ഷന് നടത്തപ്പെടുക. ലോകത്തിന്റെ നാനാഭാഗങ്ങളില്‍ നടന്നുവരുന്ന അഭിഷേകാഗ്നി കണ്‍വെന്‍ഷനിലൂടെ ധാരാളം അത്ഭുതങ്ങളും, അടയാളങ്ങളും, രോഗശാന്തികളുമാണ് അനുദിനം സംഭവിച്ചുകൊണ്ടിരിക്കുന്നത്. ഒക്ടോബര്‍ 24 ചൊവ്വാഴ്ച നടക്കുന്ന കണ്‍വെന്‍ഷനില്‍ പങ്കെടുക്കാന്‍ ആയിരകണക്കിനു വിശ്വാസികള്‍ എത്തിച്ചേരും എന്ന് കണക്കാക്കപ്പെടുന്നു.
മോട്ടര്‍വേയില്‍ നിന്നും എളുപ്പത്തില്‍ എത്തിച്ചേരാന്‍ സാധിക്കുന്നതും, സൗജന്യമായ കാര്‍ പാര്‍ക്കിംഗ് സൗകര്യങ്ങളുള്ളതുമായ ഷെറിഡന്‍ സ്യൂട്ട്, മാഞ്ചസ്റ്ററിലെ ഓള്‍ഡ്ഹാം റോഡിലാണ് സ്ഥിതി ചെയ്യുന്നത്. 2017 ഒക്ടോബര്‍ 24 ചൊവ്വാഴ്ച രാവിലെ 10 മുതല്‍ വൈകുന്നേരം 6 വരെയായിരിക്കും ശുശ്രൂഷകള്‍ നടത്തപ്പെടുക. അന്നേ ദിവസം സ്‌കൂള്‍ അവധി ദിനമായതിനാല്‍ മുതിര്‍ന്നവര്‍ക്കും കുട്ടികള്‍ക്കും ഒന്നുപോലെ കണ്‍വെന്‍ഷനില്‍ പങ്കെടുത്ത് ദൈവത്തിന്റെ അനുഗ്രഹം സ്വീകരിക്കുവാന്‍ സാധിക്കും.
ഫാ. സേവ്യര്‍ഖാന്‍ വട്ടായില്‍ നേതൃത്വം നല്‍കുന്ന അഭിഷേകാഗ്നി കണ്വെന്ഷന് നടക്കുന്ന സ്ഥലങ്ങളിലേക്കെല്ലാം നാനാജാതി മതത്തില്‍പ്പെട്ട പതിനായിരങ്ങളാണ് ഒഴുകിയെത്തുന്നത്. ഇപ്രകാരം ജനസമൂഹം ഒന്നായി ദൈവത്തെ ആരാധിക്കുകയും ദിവ്യബലി അര്‍പ്പിക്കുകയും ചെയ്യുന്നതിനാല്‍ വലിയ അത്ഭുതങ്ങളും രോഗശാന്തികളും ഓരോ കണ്‍വെന്‍ഷനിലും സംഭവിക്കുന്നു.
ഗ്രേറ്റ് ബ്രിട്ടണ്‍ രൂപത പ്രഥമ ബൈബിള്‍ കണ്‍വെന്‍ഷനിലേക്കു രൂപത നേതൃത്വവും സംഘാടകസമിതിയും ഏവരെയും സ്‌നേഹപൂര്‍വ്വം ക്ഷണിക്കുന്നു.
വിശാലമായ കാര്‍ പാര്‍ക്കിങ്ങ് സൗകര്യങ്ങളോടു കൂടിയ കണ്വെന്ഷന് സെന്ററിന്റെ അഡ്രസ്സ്.
The Sheridan Suite
371 Oldham Road
Manchester
M40 8RR
സന്ദര്‍ലാന്‍ഡ്: ഭാരതത്തിന്റെ പ്രഥമ വിശുദ്ധയും കേരളത്തിന്റെ സഹന പുഷ്പവുമായ വിശുദ്ധ അല്‍ഫോന്‍സാമ്മയുടെ തിരുനാളും ശതാബ്ദി ആഘോഷവും സന്ദര്‍ലാന്‍ഡ് സെ. ജോസഫ്സ് ദേവാലയത്തില്‍ വെച്ച് സെപ്തംബര്‍ 30 ശനിയാഴ്ച ഭക്തിനിര്‍ഭരമായ ചടങ്ങുകളോടെ സമാപിച്ചു. ശനിയാഴ്ച രാവിലെ 10ന് തുടങ്ങിയ ആഘോഷമായ ദിവ്യബലിയില്‍ ഗ്രേറ്റ് ബ്രിട്ടന്‍ സീറോ മലബാര്‍ ബിഷപ്പ് മാര്‍ ജോസഫ് സ്രാമ്പിക്കല്‍ മുഖ്യ കാര്‍മികനായി തിരുനാള്‍ സന്ദേശം നല്‍കി. നിരവധി വൈദികര്‍ സഹകാര്‍മികത്വം വഹിച്ച വിശുദ്ധ കുര്‍ബാനയില്‍ ബഹു. സീറോ മലബാര്‍ രൂപത ബിഷപ്പ് സന്ദേശം പകര്‍ന്നു. തുടര്‍ന്ന് നടന്ന വിശ്വാസ പ്രഘോഷണ പ്രദക്ഷണത്തില്‍ ഭാരതത്തിന്റെ സാംസ്‌കാരിക പെരുമയും കേരള ക്രൈസ്തവരുടെ വിശ്വാസ തീക്ഷ്ണതയും പ്രതിഫലിച്ചു.
വൈകുന്നേരം സെ. ഐഡന്‍സ് അക്കാദമി ഹാളില്‍ നടന്ന സാംസ്‌കാരിക സമ്മേളനത്തില്‍ ബഹു. സന്ദര്‍ലാന്‍ഡ് സിറ്റി മേയര്‍ അധ്യക്ഷത വഹിക്കുകയും ന്യൂകാസില്‍ ആന്‍ഡ് ഹെക്സാം രൂപത ബിഷപ് റൈറ്റ്. റവ. ബിഷപ് ഷീമസ് കണ്ണിങ്ഹാം ഉദ്ഘാടനം നിര്‍വഹിക്കുകയും ചെയ്തു. സീറോ മലബാര്‍ രൂപത ബിഷപ് മാര്‍ ജോസഫ് സ്രാമ്പിക്കല്‍ പത്തുവര്‍ഷത്തെ പ്രവര്‍ത്തനത്തിന്റെ വീഡിയോ പ്രകാശനം ചെയ്തു. കഴിഞ്ഞുപോയ പത്തുവര്‍ഷക്കാലം ദൈവം ഈ സമൂഹത്തിനു നല്‍കിയ അനുഗ്രഹങ്ങള്‍ക്ക് സാക്ഷ്യമേകാന്‍ പുറത്തിറക്കിയ സോവനീര്‍ പ്രകാശം ചെയ്ത ചടങ്ങില്‍ കുട്ടികളുടെ വിവിധ കലാപരിപാടികള്‍ കൊഴുപ്പേകി.
ബഹു. ഫാ.സജി തോട്ടത്തിലിന്റെ നേതൃത്വത്തിലുള്ള പാരിഷ് കമ്മിറ്റി നോര്‍ത്ത് ഈസ്റ്റിലെ ഏറ്റവും വലിയ മലയാളി ആത്മീയ സമ്മേളനത്തിന് നേതൃത്വം നല്‍കി.
അപ്പച്ചന്‍ കണ്ണഞ്ചിറ
ലണ്ടന്‍:ഗ്രേറ്റ് ബ്രിട്ടണ്‍ സീറോ മലബാര്‍ രൂപതയുടെ നേതൃത്വത്തില്‍ രൂപതാ തലത്തില്‍ നടത്തപ്പെടുന്ന അഭിഷേകാഗ്നി കണ്‍വെന്‍ഷന്റെ ലണ്ടന്‍ റീജിയണല്‍ കണ്വെന്ഷന് പ്രശസ്ത വചന പ്രഘോഷകന്‍ സേവ്യര്‍ഖാന്‍ വട്ടായില്‍ അച്ചന്‍ നയിക്കും. ലണ്ടന്‍ റീജിയണല്‍ കണ്വെന്ഷന് ഒക്ടോബര്‍ 29 ഞായറാഴ്ച രാവിലെ 10:00ന് ആരംഭിച്ച് വൈകുന്നേരം 6:00 മണിക്ക് സമാപിക്കുന്ന രീതിയിലാണ് ക്രമീകരിച്ചിരിക്കുന്നത്. ലണ്ടനിലെ അല്ലിന്‍സ് പാര്‍ക്കില്‍ അഭിഷേകാഗ്നി കണ്വെന്ഷന് വേദിയൊരുങ്ങുമ്പോള്‍ ലണ്ടന്‍ റീജിയണല്‍ കണ്വെന്ഷന് അനുഗ്രഹസാന്ദ്രമാകുവാന്‍ അഖണ്ഡ ജപമാലയും പ്രാര്‍ത്ഥനാ മഞ്ജരിയുമായി ലണ്ടനിലെ സഭാമക്കള്‍ മദ്ധ്യസ്ഥ പ്രാര്‍ത്ഥനാ സന്നാഹത്തിലാണ്.
ഒക്ടോബര്‍ 6ന് മാസാദ്യ വെള്ളിയാഴ്ച രാവിലെ 6:00മണി മുതല്‍ വൈകുന്നേരം 6:00 മണി വരെ ഈസ്റ്റ്ഹാം സെന്ററില്‍ വെച്ചും, വൈകുന്നേരം 6:00 മണി മുതല്‍ ശനിയാഴ്ച രാവിലെ 6:00 മണിവരെ എഡ്മണ്ടനില്‍ വെച്ചും അഖണ്ഡ ജപമാല സമര്‍പ്പണം നടത്തപ്പെടും. ലണ്ടന്‍ റീജിയണലിലെ ശുശ്രൂഷകളുടെ അനുഗ്രഹ വിജയത്തിനായി വിവിധ കുടുംബ കൂട്ടായ്മകളും, പ്രാര്‍ത്ഥനാ ഗ്രൂപ്പുകളും സജീവമായി പ്രാര്‍ത്ഥനാ യജ്ഞത്തില്‍ ഒരുക്കത്തിലാണ്.
പരിശുദ്ധ ജപമാല ഭക്തിയുടെ മാസമായി ആചരിക്കുന്ന ഒക്ടോബര്‍ മാസത്തില്‍ പരിശുദ്ധാത്മാവിന്റെ ഇഷ്ട തോഴിയും ദൈവകുമാരന്റെ മാതാവുമായ പരിശുദ്ധ അമ്മയുടെ ശക്തമായ മാദ്ധ്യസ്ഥ സഹായം യാചിച്ചു കൊണ്ട് നടത്തപ്പെടുന്ന അഖണ്ഡ ജപമാലയില്‍ ചേരുവാന്‍ ആഗ്രഹിക്കുന്ന ഏവര്‍ക്കും സൗകര്യപ്രദമായി പങ്കു ചേരാവുന്ന തരത്തിലാണ് ശുശ്രൂഷ ക്രമീകരിച്ചിരിക്കുന്നത്. ഒന്നിച്ചു കൂടി ജപമാല സമര്‍പ്പിക്കുവാന്‍ സാധിക്കാത്തവര്‍ക്ക് അവരവരുടെ സ്ഥലങ്ങളില്‍ നിന്ന് കൊണ്ട് തന്നെ അഖണ്ഡ ജപമാലയില്‍ പങ്കാളികളാവാന്‍ സാധിക്കും.
പ്രാര്‍ത്ഥനയുടെയും നവീകരണത്തിന്റെയും ദൈവ കൃപയുടെയും നിറവില്‍ രൂപതയെ സുവിശേഷവല്‍ക്കരണത്തിന്റെ പുത്തന്‍ ഉണര്‍വ്വിലേക്ക് നയിക്കപ്പെടുന്നതിലേക്കായി ലക്ഷ്യം വെച്ച് അഭിവന്ദ്യ അദ്ധ്യക്ഷന്‍ മാര്‍ ജോസഫ് സ്രാമ്പിക്കല്‍ സംഘടിപ്പിക്കുന്ന അഭിഷേകാഗ്നി കണ്വെന്ഷന് ലണ്ടനില്‍ ഒക്ടോബര്‍ 29ന് നടത്തപ്പെടുന്ന റീജിയണല്‍ ശുശ്രൂഷയോടെ സമാപനമാകും.
അഖണ്ഡ ജപമാല സമര്‍പ്പണ സ്ഥലങ്ങളുടെ വിലാസം.
October 6th Friday
6:00 am to 6:00 at 3, Boundary Road, East Ham, E13 1PS
6:00 pm to Saturday 6:00 am 49 Hawthorne Road, Edmonton, N18 1EY
ക്ലെമെന്‍സ് നീലങ്കാവില്‍
യുകെയില്‍ സുവിശേഷവത്കരണ പാതയില്‍ നിര്‍ണ്ണായക പങ്കുവഹിക്കുന്ന സെഹിയോന്‍ യുകെയുടെ പുതിയ ദൗത്യം. ദൈവ സന്നിധിയിലേക്ക് പുതുതലമുറയ്ക്ക് സംഗീതവിരുന്നിലൂടെ യാത്ര ചെയ്യാന്‍ അവസരം നല്‍കി സെഹിയോന്‍ യുകെ യൂത്ത്സ് & ടീന്‍സിന്റെ നേതൃത്വത്തില്‍ ആദ്യത്തെ ഇംഗ്ലീഷ് മ്യൂസിക്കല്‍ കണ്‍സേര്‍ട്ട് 2018 ജനുവരി 6ന് അരങ്ങേറും. വെസ്റ്റ് ബ്രോംവിച്ചിലെ ബെഥേല്‍ കണ്വെന്ഷന് സെന്ററില്‍ ഉച്ചയ്ക്ക് 12 മുതല്‍ 5 വരെയാണ് ‘എബ്ലേസ് മ്യൂസിക്കല്‍ കണ്‍സേര്‍ട്ട്’ സംഘടിപ്പിക്കുന്നത്. ആത്മീയശുദ്ധി വരുത്താന്‍ ആഗ്രഹിക്കുന്ന പുതുതലമുറയ്ക്ക് കിട്ടിയ അനുഗ്രഹമാണ് ഈ ഇംഗ്ലീഷ് മ്യൂസിക്കല്‍ കണ്‍സേര്‍ട്ട്.
സംഗീതത്തോടൊപ്പം ഡ്രാമയും, സ്‌കെച്ചിംഗും ഉള്‍പ്പെടെയുള്ള പരിപാടികളും നടക്കും. പുതിയ തലമുറയില്‍ പരിശുദ്ധാത്മാവിന്റെ അഭിഷേകം നിറയ്ക്കാനും ഇനിയുള്ള ഇവാഞ്ചലൈസേഷനുകള്‍ മുന്നോട്ട് നയിക്കാനും അത്യന്താപേക്ഷിതമാണ് ഈ ഇവന്റ്. അതുകൊണ്ട് തന്നെ എല്ലാ മാതാപിതാക്കളും കുട്ടികളെ ഇതില്‍ പങ്കെടുപ്പിക്കാന്‍ പരമാവധി പരിശ്രമിക്കേണ്ടതുണ്ട്. കാലത്തിന്റെ കുത്തൊഴുക്കില്‍ ദൈവീകതയുടെ സ്പര്‍ശം ഏറ്റുവാങ്ങാനും സ്വജീവിതത്തില്‍ പകര്‍ത്താനും വഴിയൊരുക്കുന്നതാണ് എബ്ലേസ് മ്യൂസിക്കല്‍ കണ്‍സേര്‍ട്ട്.
ബെഥേല്‍ കണ്വെന്ഷന് സെന്ററില്‍ സുസജ്ജമായ തയ്യാറെടുപ്പുകളാണ് മ്യൂസിക്കല്‍ ഇവന്റിനായി നടത്തുക. മികവേറിയ സീറ്റും, സ്റ്റേജും മറ്റ് അനുബന്ധ സൗകര്യങ്ങളും ലഭ്യമായിരിക്കും. അഞ്ച് പൗണ്ടാണ് ടിക്കറ്റ് ചാര്‍ജ്ജ്. നോണ്‍ പ്രോഫിറ്റബിള്‍ ഇവന്റായതിനാല്‍ പരിപാടിയുടെ വിജയത്തിനും നടത്തിപ്പിനുമായി മാത്രമാണ് ഈ തുക വിനിയോഗിക്കുക. സ്നാക്കിംഗ് പാര്‍ലറുകളും സെന്ററില്‍ തയ്യാറായിരിക്കും.
ചടങ്ങിലേക്ക് എത്തിച്ചേരുന്നതിന് ആവശ്യമായ യാത്രാസൗകര്യങ്ങളും ഒരുക്കും. ബ്രിസ്റ്റോളില്‍ നിന്ന് ഒരു കോച്ച് ലഭ്യമാക്കും. പത്തു പൗണ്ടാണ് ഒരാള്‍ക്ക് യാത്രക്കായി ചെലവ് വരിക. ഫിഷ്പോണ്ട്, സൗത്ത്മെയ്ഡ് എന്നിവിടങ്ങളില്‍ നിന്നും പിക്കപ്പ് ലഭിക്കും. 57 സീറ്റുകളാണ് യാത്രക്കായി ഒരുക്കിയിട്ടുള്ളത്. ഇതില്‍ ബുക്കിംഗ് വരുന്നതിന്റെ തോതനുസരിച്ച് ആവശ്യമെങ്കില്‍ കൂടുതല്‍ കോച്ചുകള്‍ ലഭ്യമാക്കും.
യുകെയിലെ ആര്‍ച്ച് ബിഷപ്പ് ഉള്‍പ്പെടെ എല്ലാ ബിഷപ്പുമാരേയും, വൈദികരേയും ചടങ്ങിലേക്ക് പ്രത്യേകം ക്ഷണിച്ചിട്ടുണ്ട്. മലയാളികളില്‍ നിന്ന് മാത്രമല്ല ഫിലിപ്പീന്‍സ്, ഇംഗ്ലീഷ് സമൂഹത്തിലെ കുട്ടികളെ ഉള്‍പ്പെടുത്തി ഇവാന്‍ഞ്ചലൈസേഷന്റെ നേതൃത്വം യുവജനങ്ങളിലേക്ക് കൈമാറുന്ന പുത്തന്‍ രീതിയുമാണ് സെഹിയോന്‍ യുകെ എത്തുന്നത്. കൂടുതല്‍ പേരെ ക്ഷണിക്കാനുള്ള ഒരുക്കങ്ങള്‍ നടക്കുന്നു. ഓരോ സ്ഥലത്തും സുസജ്ജമായ ടീം ഇതിന്റെ പ്രവര്‍ത്തനങ്ങള്‍ക്ക് ചുക്കാന്‍ പിടിക്കുന്നു.
ടിക്കറ്റ് വാങ്ങാന്‍ താല്‍പര്യമുള്ളവര്‍ക്ക് ഓണ്‍ലൈനായും, നേരിട്ടും വാങ്ങാന്‍ അവസരമുണ്ട്. കൂടാതെ ദൈവീകമായ ഒരു ചടങ്ങായതിനാല്‍ കൂടുതല്‍ പേരെ പങ്കെടുപ്പിക്കാന്‍ സന്നദ്ധരായ സുമനസ്സുകളുടെയും സഹകരണം പ്രതീക്ഷിക്കുന്നു. പുതുതലമുറയുടെ ദൈവീക സ്രോതസ്സായി മാറാന്‍, അതിനുള്ള ഊര്‍ജ്ജം പകരാന്‍ സാധിക്കുന്ന ചടങ്ങാക്കി എബ്ലേസ് മ്യൂസിക്കല്‍ കണ്‍സേര്‍ട്ടിനെ മാറ്റിയെടുക്കാന്‍ എല്ലാവരുടെയും സഹായസഹകരണങ്ങള്‍ സംഘാടകര്‍ അഭ്യര്‍ത്ഥിക്കുന്നു.
Date: 06 ജനുവരി 2018
Time: 12 pm 5 pm
Venue: ബെതേല്‍ കണ്വെന്ഷന് സെന്റര്‍, വെസ്റ്റ് ബ്രോംവിച്ച്, ബര്‍മ്മിങ്ഹാം
To register: sehionuk.org/register
ഫാ. ബിജു കുന്നയ്ക്കാട്ട് പി.ആര്‍.ഒ
പ്രസ്റ്റണ്‍: ഫാത്തിമാ ദര്‍ശനത്തിന്റെ നൂറാം വാര്‍ഷികത്തോടനുബന്ധിച്ച് മാതാവിന്റെ ദര്‍ശനം ലഭിച്ച ഫ്രാന്‍സിസ്, ജസീന്ത എന്നീ വിശുദ്ധരുടെ തിരുശേഷിപ്പുകള്‍ പ്രസ്റ്റണ്‍ സീറോ മലബാര്‍ കത്തീഡ്രല്‍ ദേവാലയത്തില്‍ തിങ്കളാഴ്ച പ്രതിഷ്ഠിക്കും. തിങ്കളാഴ്ച 9-ാം തീയതി, ഗ്രേറ്റ് ബ്രിട്ടണ്‍ സീറോ മലബാര്‍ രൂപതയുടെ ഒന്നാം വാര്‍ഷികത്തോടനുബന്ധിച്ച് പ്രസ്റ്റണ്‍ കത്തീഡ്രലില്‍ 11 മണിക്ക് അര്‍പ്പിക്കപ്പെടുന്ന ദിവ്യബലിയോട് അനുബന്ധിച്ചായിരിക്കും തിരുശേഷിപ്പ് പ്രതിഷ്ഠ നടക്കുക. വൈദികരുടേയും സന്ന്യാസിനികളുടെയും അല്‍മായരുടെയും സാന്നിധ്യത്തില്‍ രൂപതാധ്യക്ഷന്‍ മാര്‍ ജോസഫ് സ്രാമ്പിക്കലായിരിക്കും തിരുശേഷിപ്പ് പ്രതിഷ്ഠിക്കുന്നത്.
ഫാത്തിമാ ദര്‍ശനത്തിന്റെ നൂറാം വാര്‍ഷികാഘോഷങ്ങള്‍ക്കായി ഫാത്തിമയില്‍ (പോര്‍ച്ചുഗല്‍) എത്തിയ ഫ്രാന്‍സിസ് മാര്‍പാപ്പയാണ് 2017 മേയ് 13ന് നടന്ന ദിവ്യബലിമധ്യേ ഫ്രാന്‍സിസിനെയും ജസീന്തയെയും വിശുദ്ധരായി പ്രഖ്യാപിച്ചത്. മാതാവിന്റെ ദര്‍ശനം ലഭിച്ചതിനുശേഷം രണ്ടുവര്‍ഷം കഴിഞ്ഞ് ഫ്രാന്‍സിലും മൂന്ന് വര്‍ഷം കഴിഞ്ഞ് ജസീന്തയും മരിച്ചു. സുദീര്‍ഘമായ വര്‍ഷങ്ങളിലെ അവശ്യമായ പഠനങ്ങള്‍ക്കും അന്വേഷണങ്ങള്‍ക്കും ശേഷമാണ് ഈ വര്‍ഷം മെയ് 13-ാം തീയതി മാതാവ് പ്രത്യക്ഷപ്പെട്ടതിന്റെ ഓര്‍മ്മ ദിവസം ഇവര്‍ ഇരുവരെയും സഭ വിശുദ്ധരായി പ്രഖ്യാപിച്ചത്. ഫെബ്രുവരി 20 ആണ് ഇവരുടെ തിരുനാള്‍ ദിവസമായി സഭ കൊണ്ടാടുന്നത്.
ശാരീരിക അസുഖമുള്ളവരുടെയും പോര്‍ച്ചുഗീസ് കുട്ടികളുടെയും തടവുകാരുടെയും തടവറയില്‍ കഴിയുന്നവരുടെയും രോഗികളുടെയും മധ്യസ്ഥരായാണ് ഇവര്‍ സഭയില്‍ അറിയപ്പെടുന്നത്. ഫ്രാന്‍സിസിനോടും ജസീന്തയോടുമൊപ്പം ഫാത്തിമയില്‍ മാതാവിന്റെ ദര്‍ശനം ലഭിച്ച മൂന്നാമത്തെ ആളായ ലൂസിയ (സി. ലൂസി) സന്ന്യാസിയാവുകയും 2005ല്‍ തന്റെ 97-ാം വയസില്‍ മരിക്കുകയും ചെയ്തു. വിശുദ്ധയായി പ്രഖ്യാപിക്കപ്പെടുവാനുള്ള നാമകരണ പ്രക്രിയയില്‍ ഇപ്പോള്‍ ദൈവദാസിയായാണ് (Servant of God) സി. ലൂസി അറിയപ്പെടുന്നത്.
പ്രസ്റ്റണ്‍ കത്തീഡ്രലില്‍ വി. ഫ്രാന്‍സിസിന്റെയും വി. ജസീന്തയുടെയും തിരുശേഷിപ്പ് പ്രതിഷ്ഠയെത്തുടര്‍ന്ന് ലദീഞ്ഞു പ്രാര്‍ത്ഥനയും തിരുശേഷിപ്പ് വന്ദനവും ഉണ്ടായിരിക്കും. വിശുദ്ധരുടെ ബഹുമാനാര്‍ത്ഥം നേര്‍ച്ച വിതരണവും ഉണ്ടായിരിക്കും. ഗ്രേറ്റ് ബ്രിട്ടണ്‍ സീറോ മലബാര്‍ രൂപതയുടെ ഒന്നാം വാര്‍ഷികത്തോട് അനുബന്ധിച്ചുള്ള കൃതജ്ഞതാബലിയിലും തിരുശേഷിപ്പ് പ്രതിഷ്ഠാ കര്‍മ്മത്തിലും എല്ലാ വി. കുര്‍ബാന കേന്ദ്രങ്ങളില്‍ നിന്നും വൈദികരോടൊപ്പം അല്‍മായ പ്രതിനിധികളുടെയും സാന്നിധ്യം പ്രതീക്ഷിക്കുന്നതായും സാധിക്കുന്ന എല്ലാവരും ദൈവത്തിനു നന്ദി പറയാനായി അന്നേ ദിവസം പ്രസ്റ്റണ്‍ കത്തീഡ്രലില്‍ എത്തിച്ചേരണമെന്നും രൂപതാധ്യക്ഷന്‍ മാര്‍ ജോസഫ് സ്രാമ്പിക്കല്‍ ഓര്‍മ്മിപ്പിച്ചു.
കേരള കാത്തലിക് അസോസിയേഷന്‍ ഓഫ് ദി യുകെ ട്രസ്റ്റിന്റെ ആഭിമുഖ്യത്തില്‍ സംഘടിപ്പിക്കുന്ന വിശുദ്ധ കുര്‍ബാന ഒക്ടോബര്‍ 7ന് നടക്കും. അപ്ടന്‍ പാര്‍ക്കിലെ (E13 9AX) ലേഡി ഓഫ് കംപാഷന്‍ ചര്‍ച്ചിലാണ് കുര്‍ബാന നടക്കുന്നത്. ശനിയാഴ്ച വൈകിട്ട് 6.30നാണ് കുര്‍ബാന. ഇംഗ്ലീഷ് കുര്‍ബാനയ്ക്ക് ശേഷം പുതിയ ഭാരവാഹികളുടെ സ്ഥാനാരോഹണം നടക്കും. പരിപാടികള്‍ക്കു ശേഷം പാരിഷ് ഹാളില്‍ ലഘുഭക്ഷണവും ക്രമീകരിച്ചിട്ടുണ്ട്.
For more details please contact:
chairman 07533374990
Secretary 07780661258
Treasurer. 07908855899
ഫാ. ബിജു കുന്നയ്ക്കാട്ട് പി.ആര്‍.ഒ
പ്രസ്റ്റണ്‍: 2016 ഒക്ടോബര്‍ 9ന് ഔദ്യോഗികമായി പിറവിയെടുത്ത ഗ്രേറ്റ് ബ്രിട്ടണ്‍ സീറോ മലബാര്‍ രൂപതയുടെ ഒന്നാം പിറന്നാള്‍ പ്രാര്‍ത്ഥനാനിര്‍ഭരമായി വരുന്ന തിങ്കളാഴ്ച രൂപതാ ആസ്ഥാനമായ പ്രസ്റ്റണ്‍ കത്തീഡ്രല്‍ ദേവാലയത്തില്‍ നടക്കും. രാവിലെ 11 മണിക്ക് നടക്കുന്ന ആഘോഷമായ വി. കുര്‍ബാനയ്ക്ക് രൂപതാധ്യക്ഷന്‍ മാര്‍ ജോസഫ് സ്രാമ്പിക്കല്‍ മുഖ്യകാര്‍മ്മികത്വം വഹിക്കും. സഹ കാര്‍മ്മികരായി വികാരി ജനറല്‍മാരും മറ്റു നിരവധി വൈദികരും പങ്കെടുക്കുന്ന ദിവ്യബലിയില്‍ രൂപതയിലെ സന്യസ്തരുടെയും ഓരോ വി. കുര്‍ബാന കേന്ദ്രത്തില്‍ നിന്നുമുള്ള അല്‍മായ പ്രതിനിധികളുടെയും സാന്നിധ്യമുണ്ടായിരിക്കും. കഴിഞ്ഞ വര്‍ഷം പ്രസ്റ്റണ്‍ ഫുട്‌ബോള്‍ സ്‌റ്റേഡിയത്തില്‍ വച്ച് നടന്ന പ്രൗഢഗംഭീരമായ ചടങ്ങുകളിലാണ് പതിനായിരങ്ങളെ സാക്ഷി നിര്‍ത്തി രൂപതയുടെ പ്രഥമ മെത്രാനായി മാര്‍ ജോസഫ് സ്രാമ്പിക്കല്‍ അഭിഷിക്തനായതും ഗ്രേറ്റ് ബ്രിട്ടണ്‍ രൂപത ഔദ്യോഗികമായി ഉദ്ഘാടനം ചെയ്യപ്പെട്ടതും.
173 വി. കുര്‍ബാന കേന്ദ്രങ്ങളില്‍ ശുശ്രൂഷ ചെയ്യാനായി 50ല്‍ അധികം വൈദികരുടെ സേവനവും നാല് സന്യസ്തരുടെ സേവനം ഇപ്പോള്‍ രൂപതയ്ക്ക് ലഭിക്കുന്നുണ്ട്. ഇതു കൂടാതെ വിവിധ പ്രവര്‍ത്തനമേഖലകളെ ഏകോപിപ്പിക്കുന്നതിനായി 18-ഓളം കമ്മീഷനുകള്‍, നടക്കാനിരിക്കുന്ന അഭിഷേകാഗ്നി കണ്വെന്ഷന്, രൂപതയെ എട്ട് റീജിയണുകളിലായി തിരിച്ചുള്ള പ്രവര്‍ത്തനം, രൂപതാ കൂരിയാ ഉള്‍പ്പെടെയുള്ള ഔദ്യോഗിക ആലോചനാസംഘങ്ങള്‍, അല്‍മായര്‍ക്കായി ‘ആല്‍ഫാ ഇന്‍സ്റ്റിറ്റ്യൂട്ട് ഓഫ് തിയോളജിയുടെ ആഭിമുഖ്യത്തില്‍ ദൈവശാസ്ത്ര പഠനത്തിന് അവസരം തുടങ്ങിയ പല കാര്യങ്ങളിലൂടെ രൂപതയുടെ ഭാവി വളര്‍ച്ചയ്ക്കായി ബഹുമുഖ കര്‍മ്മപദ്ധതികള്‍ ആവിഷ്‌കരിക്കാനും ഉറച്ച അടിത്തറ നല്‍കാനും രൂപതാധ്യക്ഷന്‍ നേതൃത്വം നല്‍കുന്ന രൂപതാധികാരികള്‍ക്ക് ഈ കഴിഞ്ഞ ഒരു വര്‍ഷത്തിനുള്ളില്‍ സാധിച്ചു. രൂപതയുടെ കഴിഞ്ഞ ഒരു വര്‍ഷത്തെ പ്രവര്‍ത്തനങ്ങള്‍ സമഗ്രമായി അവതരിപ്പിക്കുന്ന ആദ്യ ബുള്ളറ്റിന്‍ ‘ദനഹാ’, രൂപത പുറത്തിറക്കിയ കലണ്ടര്‍, ക്രിസ്തുമസ് സന്ദേശ കാര്‍ഡുകള്‍ തുടങ്ങിയവയും വിശ്വാസികളുടെ കൈകളിലെത്തിക്കാന്‍ ഈ ഒരു വര്‍ഷത്തിനുള്ളില്‍ സാധിച്ചു.
സമര്‍ത്ഥമായ നേതൃത്വത്തിലൂടെ രൂപതയെ മുമ്പോട്ടു നയിക്കുന്ന രൂപതാധ്യക്ഷന്‍ മാര്‍ ജോസഫ് സ്രാമ്പിക്കലിന്റെ അജപാലന മികവും ഈ നേട്ടങ്ങളിലും പ്രവര്‍ത്തനങ്ങളിലും നിര്‍ണായകമായി. മൂന്ന് രാജ്യങ്ങളിലായി പരന്നുകിടക്കുന്ന ഗ്രേറ്റ് ബ്രിട്ടണ്‍ രൂപതയിലെ വിശ്വാസികളെ ആത്മീയ കാര്യങ്ങളില്‍ നേതൃത്വം വഹിക്കാന്‍ അല്പം പോലും വിശ്രമമെടുക്കാതെയാണ് അദ്ദേഹം ഓടിയെത്തുന്നത്. സൗമ്യഭാവവും ആരെയും ആകര്‍ഷിക്കുന്ന വ്യക്തിത്വ ഗുണങ്ങളുമുള്ള മാര്‍ സ്രാമ്പിക്കല്‍ ഇതിനോടകം വിശ്വാസികളുടെ മനസില്‍ ഇടം പിടിച്ചു കഴിഞ്ഞു. രൂപതാമെത്രാന്റെ പ്രവര്‍ത്തനങ്ങളെ സഹായിക്കാനായി സെക്രട്ടറിയായി പ്രവര്‍ത്തിക്കുന്ന റവ. ഫാ. ഫാന്‍സ്വാ പത്തിലിന്റെ സേവനവും എടുത്തുപറയേണ്ടതാണ്.
തിങ്കളാഴ്ച പ്രസ്റ്റണ്‍ കത്തീഡ്രല്‍ ദേവാലയത്തില്‍ രാവിലെ 11 മണിക്ക് നടക്കുന്ന ദിവ്യബലിക്കും സ്‌നേഹവിരുന്നിനും ശേഷം ഉച്ചകഴിഞ്ഞ് പ്രിസ്ബിറ്റല്‍ കൗണ്‍സിലിന്റെ സമ്മേളനവും ജോയിന്റ് പ്രിസ്ബിറ്റല്‍ കൗണ്‍സില്‍ സമ്മേളനവും പ്രസ്റ്റണ്‍ കത്തീഡ്രല്‍ പാരീഷ് ഹാളില്‍ നടക്കും. ഈ ഒരു വര്‍ഷത്തിനിടയില്‍ ദൈവം നല്‍കിയ എല്ലാ അനുഗ്രഹങ്ങള്‍ക്കും നന്ദി പറയാനായി സാധിക്കുന്ന എല്ലാവരും പ്രസ്റ്റണ്‍ കത്തീഡ്രലില്‍ എത്തിച്ചേരണമെന്ന് രൂപതാധ്യക്ഷന്‍ മാര്‍ ജോസഫ് സ്രാമ്പിക്കല്‍ അറിയിച്ചു.
മറിയമ്മ ജോഷി
കൂടുതല്‍ അറിയുന്തോറും നിങ്ങളെന്നെ കൂടുതല്‍ ഇഷ്ടപ്പെടുമെന്ന് എനിക്ക് നല്ല ഉറപ്പുണ്ട്. എന്റെ ആകുലതകള്‍, പ്രലോഭനങ്ങള്‍, ആത്മപീഡനങ്ങള്‍ ഒക്കെ നിങ്ങളില്‍ ഉണര്‍ത്തുന്നത് എന്നോടുള്ള സ്‌നേഹമല്ലേ, ഞാന്‍ വെറും ഒരു പുഴയല്ല അങ്ങകലെ ഒരു പുണ്യ തീര്‍ത്ഥമുണ്ട്, അതിനെ ലക്ഷ്യമാക്കി ഒഴുകുന്ന പുഴയാണ് ഞാന്‍.
ഏറെ അലഞ്ഞു ഞാന്‍ അവിടെ എത്തി. ഇവിടുത്തെ ആകാശത്തില്‍ ദൈവാത്മാവിന്റെ വിരിച്ച ചിറകുകളുണ്ട്. ജലത്തിനു മീതെ ദൈവചൈതന്യം ചലിക്കുന്നുണ്ട്. ദൈവപുത്രന്‍ മടങ്ങി കുമ്പിട്ട ഇടമാണിത്.
”ഇവനെന്റെ പ്രിയ പുത്രന്‍ ഇവനില്‍ ഞാന്‍ സംപ്രീതനാണ്”. ഏറ്റുപറയുന്ന കുളിര്‍ തെന്നല്‍ ഇവിടെയുണ്ട്. ഇതു പുണ്യ ജോര്‍ദ്ദാനാണ്. ഈ പുഴ ഇതു ഞാനാണ്, ഇതു നീയാണ്. പുണ്യനദി ദൈവപുത്രന്റെ ചങ്കില്‍ നിന്നും ഒഴുകിയ നിണമാണ്. ജലമാണ്. ഇവിടെ മുങ്ങിക്കുളിക്കാന്‍ കഴിഞ്ഞവന്‍ അറിഞ്ഞ ശാന്തി ഏറെയാണ്. ഇത് യേശുവാണ്.
ദൈവം ചാരെ നിന്നിട്ടും തോട്ടക്കാരന്‍ എന്നു തെറ്റിദ്ധരിക്കുന്ന ഉത്ഥാന സംഭവത്തിലെ മറിയത്തിന്റെ വരണ്ട അനുഭവം എത്രയോ തവണ നമ്മുടെ ജീവിതത്തിലും!! നമ്മുടെ വരണ്ട ദിനങ്ങളില്‍ ദൈവസ്‌നേഹമാകുന്ന ആ പുണ്യ ജോര്‍ദ്ദാനിലേക്ക് നമ്മെ കൂട്ടിക്കൊണ്ടു പോവുന്ന ദൈനാനുഭവം നമുക്ക് നല്‍കുന്ന മൂന്ന് ദിനങ്ങള്‍. Chrഗst Culture(Kairose) Chosen 17 Couples Retreat നവംബര്‍ 24, 25, 26 തീയതികളിലായി നടക്കുന്നു.
പ്രിയ സഹോദരങ്ങളെ കേരള കത്തോലിക്കാ സഭ ദര്‍ശിച്ച ഏറ്റവും മികച്ച പ്രവാചകനും ലോകപ്രസിദ്ധ വചന പ്രഘോഷകനും ബൈബിള്‍ പണ്ഡിതനുമായ Catholic Lay Evangalist റെജി കൊട്ടാരവും ടീമും കെഫന്‍ ലീ പാര്‍ക്ക്, വെയില്‍സില്‍ എത്തുന്നു.
24-ാം തീയതി ഗ്രേറ്റ് ബ്രിട്ടണ്‍ സീറോ മലബാര്‍ രൂപതാ അധ്യക്ഷന്‍ മാര്‍ ജോസഫ് സ്രാമ്പിക്കലിന്റെ മുഖ്യ കാര്‍മ്മികത്വത്തില്‍ അര്‍പ്പിക്കപ്പെടുന്ന ദിവ്യബലിയോടു കൂടെ ധ്യാനം ആരംഭിക്കുന്നു. ഈ ആത്മീയ വിരുന്നിലേക്ക് ടീം മുഴുവനും ചേര്‍ന്ന് പ്രാര്‍ത്ഥനാപൂര്‍വ്വം നിങ്ങളെ കുടുംബമായി ക്ഷണിക്കുന്നു.
കൂടുതല്‍ വിവരങ്ങള്‍ക്ക്
Contact
Joshy Thomas 07533422986
Alex Paul 07818252454
Maneesh Xaviour 07862297715
For registration Click the link below
https://rebrand.ly/chosen17
Address
Cefn Lea Park
Rot For New town
SY 16 4 AJ, Wales
ജോണ്‍സണ്‍ ജോസഫ്
സീറോ മലങ്കര കത്തോലിക്കാ സഭയുടെ യുകെ റീജിയനിലുള്ള പതിനാലു മിഷനുകളും ഒന്നുചേര്‍ന്ന വാല്‍സിങ്ഹാം മരിയന്‍ വാര്‍ഷിക തീര്‍ഥാടനവും 87-ാമത് പുനരൈക്യ വാര്‍ഷികാഘോഷവും ഭക്തിസാന്ദ്രവും അവിസ്മരണീയവുമായി. സെപ്റ്റംബര്‍ 24 ഞായറാഴ്ച ഉച്ചക്ക് 12ന് ലിറ്റില്‍ വാല്‍സിങ്ഹാമിലെ അപ്പരിഷന്‍ ഗ്രൗണ്ടില്‍ മലങ്കര സഭയുടെ യു.കെ റീജിയന്‍ കോര്‍ഡിനേറ്റര്‍ ഫാ. തോമസ് മടുക്കമൂട്ടില്‍, ചാപ്ലെയിന്‍ ഫാ.രഞ്ജിത് മടത്തിറമ്പില്‍ എന്നിവര്‍ നയിച്ച പ്രാരംഭ പ്രാര്‍ത്ഥനയോടെ തീര്‍ത്ഥാടനത്തിന് തുടക്കമായി. നൂറ്റാണ്ടുകളായി വാല്‍സിങ്ഹാം തീര്‍ത്ഥാടകര്‍ നഗ്‌നപാദരായി സഞ്ചരിച്ച ഹോളി മൈല്‍ വഴിയിലൂടെ പരിശുദ്ധ മാതാവിന്റെ തിരുസ്വരൂപം വഹിച്ചുകൊണ്ട് മലങ്കര മക്കള്‍ ജപമാലയും മാതൃഗീതങ്ങളും ചൊല്ലി ഭക്തി സാന്ദ്രമായ പ്രദക്ഷിണമായി നീങ്ങിയപ്പോള്‍, പങ്കെടുത്തവരുടെയും കാഴ്ചക്കാരായി തടിച്ചുകൂടിയ ഇംഗ്‌ളീഷ് ജനതയുടെയും മനസ്സില്‍ അനുഗ്രഹമഴ പെയ്തിറങ്ങി.
വാല്‍സിങ്ഹാം കത്തോലിക്ക മൈനര്‍ ബസലിക്കയില്‍ എത്തിച്ചേര്‍ന്ന പ്രദക്ഷിണത്തെ ബസലിക്ക തീര്‍ത്ഥാടന കമ്മറ്റി സ്വീകരിച്ചു. തുടര്‍ന്ന് നടന്ന ആഘോഷമായ ദിവ്യബലിക്ക് മലങ്കര സഭയുടെ യു.കെ കോര്‍ഡിനേറ്റര്‍ ഫാ.തോമസ് മടുക്കമൂട്ടില്‍ കര്‍മ്മികത്വം വഹിച്ചു. ഫാ.രഞ്ജിത് മടത്തിറമ്പില്‍, ഫാ. ജോസഫ് മാത്യു എന്നിവര്‍ സഹകാര്‍മ്മകരായിരുന്നു. പരിശുദ്ധ ദൈവമാതാവിന്റെ വിമലഹൃദയത്തിലേക്കു യു.കെ യിലെ മലങ്കര സമൂഹത്തെ ഫാ. തോമസ് മടുക്കമൂട്ടില്‍ സമര്‍പ്പിച്ചു. മാതൃഭക്തിയും സഭാമതാവിനോടുള്ള സ്‌നേഹവും ഒരുപോലെ നെഞ്ചിലേറ്റണമെന്നു സുവിശേഷസന്ദേശ മധ്യേ ഫാ.രഞ്ജിത് മടത്തിറമ്പില്‍ ബസലിക്കയില്‍ തിങ്ങിനിറഞ്ഞ വിശ്വാസികളെ ഓര്‍മ്മിപ്പിച്ചു.
ബസലിക്ക ഡയറക്ടര്‍ മോണ്‍സിഞ്ഞോര്‍ അര്‍മിറ്റേജ് തന്റെ അനുഗ്രഹ സന്ദേശത്തില്‍ മലങ്കര സഭയോടുള്ള സ്‌നേഹവും സഭാനേതൃത്വത്തോടുള്ള ആശംസകളും അറിയിച്ചു. മലങ്കര കത്തോലിക്കാ സഭയിലെ കുടുംബങ്ങള്‍ വിശ്വാസ പൈതൃകം കാത്തു സൂക്ഷിക്കുന്നതില്‍ പ്രകടിപ്പിക്കുന്ന താല്പര്യം അത്യധികം ശ്ലാഘനീയമാണെന്നും മോണ്‍.അര്‍മിറ്റേജ് കൂട്ടിചേര്‍ത്തു. മലങ്കര സഭയുടെ യൂറോപ്പ് അപ്പോസ്തലിക് വിസിറ്റേറ്ററായി നിയമിക്കപ്പെട്ട അഭിവന്ദ്യ യൂഹാനോന്‍ മാര്‍ തിയോഡോഷ്യസ് പിതാവിന്റെ പ്രാര്‍ത്ഥനയും ആശംസയും ഫാ.തോമസ് മടുക്കമൂട്ടില്‍ വിശ്വാസികളെ അറിയിച്ചു.
പുനരൈക്യ വാര്‍ഷികത്തിന്റെ സ്മരണയില്‍ നടത്തപ്പെട്ട മരിയന്‍ തീര്‍ഥാടനം പങ്കാളിത്തം കൊണ്ടും സംഘാടക മികവ് കൊണ്ടും ഏറെ ശ്രദ്ധനേടി. സഭയുടെ യു.കെ കോര്‍ഡിനേറ്റര്‍ ഫാ.തോമസ് മടുക്കമൂട്ടില്‍, ചാപ്ലെയിന്‍ ഫാ.രഞ്ജിത് മടത്തിറമ്പില്‍, നാഷണല്‍ കൗണ്‍സില്‍ വൈസ് പ്രസിഡന്റ് ജോജി മാത്യു, സെക്രട്ടറി ജോണ്‍സന്‍ ജോസഫ് എന്നിവരുടെ നേതൃത്വത്തിലുള്ള സംഘാടക സമിതിയാണ് ഒരുക്കങ്ങള്‍ക്കു ചുക്കാന്‍ പിടിച്ചത്. എല്ലാ സഹായങ്ങളുമായി നാഷണല്‍ കൗണ്‍സില്‍ അംഗങ്ങളും മിഷന്‍ ഭാരവാഹികളും കുടുംബങ്ങളും ഒന്നുചേര്‍ന്നപ്പോള്‍ മലങ്കര സഭയുടെ ചരിത്രത്തില്‍ എഴുതിച്ചേര്‍ക്കപ്പെട്ട ഒരു ദിവസമായി അതു മാറി.
മാത്യു ജോസഫ്
ഡാര്‍ലിംഗ്ടണ്‍ : ഗ്രേറ്റ് ബ്രിട്ടന്‍ സീറോ മലബാര്‍ രൂപത, പ്രെസ്റ്റണ്‍ റീജിയന്‍ വുമണ്‍സ് ഫോറത്തിന്റെ ഉദ്ഘാടനം രൂപത ബിഷപ് മാര്‍ ജോസഫ് സ്രാമ്പിക്കല്‍ നിര്‍വഹിച്ചു. ഡാര്‍ലിംഗ്ടണ്‍ ഡിവൈന്‍ ധ്യാനകേന്ദ്രത്തില്‍ നടന്ന റീജിയന്‍ സമ്മേളനത്തില്‍ വിമന്‍സ് ഫോറം രൂപത ഡയറക്ടര്‍ സിസ്റ്റര്‍ മേരി ആന്‍ C M C യുടെ സാന്നിദ്ധ്യത്തില്‍ നടന്ന ആദ്യ റീജിയന്‍ തിരഞ്ഞെടുപ്പില്‍, റീജിയന്‍ ചാപ്ലയിന്‍ ബഹു. ഫാ. സജി തോട്ടത്തില്‍ മേല്‍നോട്ടം വഹിച്ചു. ഇനി വരുന്ന നാളുകളില്‍ വുമണ്‍സ് ഫോറം നടത്താന്‍ പോകുന്ന പ്രവര്‍ത്തന രൂപരേഖ ചര്‍ച്ച ചെയ്ത സമ്മേളനത്തില്‍ പുതിയ ഭാരവാഹികളെ തിരഞ്ഞെടുത്തു.
റീജിയണിലെ എല്ലാ പള്ളികളില്‍ നിന്നും പ്രാതിനിധ്യത്തോടെ നടന്ന ചര്‍ച്ചാവേദിയില്‍ സമൂഹത്തില്‍ സ്ത്രീകള്‍ക്കുള്ള സ്ഥാനത്തെക്കുറിച്ചും കുടുംബത്തിലുള്ള മഹനീയ സ്ഥാനത്തെക്കുറിച്ചും തന്റെ ആമുഖ പ്രസംഗത്തില്‍ ബഹു. സ്രാമ്പിക്കല്‍ പിതാവ് ഓര്‍മിപ്പിച്ചു. വിശുദ്ധ കുര്‍ബാനയോടെ അവസാനിച്ച പരിപാടികള്‍ക്ക് ഡാര്‍ലിംഗ്ടണ്‍ സീറോ മലബാര്‍ പാരിഷ് കമ്മിറ്റി അംഗങ്ങള്‍ നേതൃത്വം നല്‍കി.
ഭാരവാഹികള്‍
പ്രസിഡണ്ട് : ജോളി മാത്യു (നോര്‍ത്തല്ലേര്‍ട്ടന്‍)
വൈസ് പ്രസിഡണ്ട് : രജി സെബാസ്റ്റ്യന്‍ (പ്രെസ്റ്റണ്‍)
സെക്രട്ടറി : ലിസ്സി സിബി (സന്ദര്‍ ലാന്‍ഡ്)
ജോ.സെക്രട്ടറി : ബീന ജോസ് (ഡാര്‍ലിംഗ്‌ട്ടെന്‍)
ട്രഷറര്‍ : സിനി ജേക്കബ് (ലീഡ്‌സ്)
