ബില്‍ജി തോമസ്
ജി.വൈ.എം.എ യുടെ 12-ാമത് ഓണാഘോഷ പരിപാടികള്‍ എക്കിള്‍ വാര്‍ മെമ്മോറിയല്‍ ഹാളില്‍ വച്ച് വര്‍ണശബളമായ രീതിയില്‍ ആഘോഷിച്ചു. ആഘോഷങ്ങളുടെ വിശിഷ്ടാതിഥിയായി കോഴിക്കോട് ഗവ. സ്‌കൂളിനെ രാജ്യാന്തര നിലവാരത്തിലെത്തിക്കാന്‍ പ്രധാന പങ്കുവഹിച്ച എം.എല്‍.എ ശ്രീ. എ. പ്രദീപ്കുമാര്‍ പങ്കുകൊണ്ടു.
ചടങ്ങുകള്‍ ഉദ്ഘാടനം ചെയ്ത് സംസാരിക്കവെ ശ്രീ പ്രദീപ്കുമാര്‍ കേരള സര്‍ക്കാരിന്റെ ‘എവിടെയെല്ലാം മലയാളി അവിടെയെല്ലാം മലയാളം’ എന്ന മുദ്രാവാക്യം മുന്‍നിര്‍ത്തി പ്രവര്‍ത്തിക്കുന്ന മലയാളം മിഷന്റെ ഉദ്യമത്തെപ്പറ്റി വിശദീകരിക്കുകയും പ്രവാസി മലയാളികളുടെ കുട്ടികള്‍ക്ക് മലയാള ഭാഷാ പരിജ്ഞാനത്തിന് ആവശ്യമായ എല്ലാ പ്രോത്സാഹനവും മലയാള മിഷന്റെ ഭാഗത്തുനിന്ന് വാഗ്ദാനം ചെയ്യുകയും ചെയ്തു. പുതിയ തലമുറയെ മലയാള ഭാഷയും സാഹിത്യവും സംസ്‌കാരവും പഠിപ്പിക്കുകയും പരിചയപ്പെടുത്തുകയുമാണ് മലയാള മിഷന്റെ ലക്ഷ്യമെന്നും അദ്ദേഹം കൂട്ടിച്ചേര്‍ത്തു.
അസോസിയേഷന്‍ പ്രസിഡന്റായ ശ്രീ ബിനു മാത്യു ചടങ്ങുകള്‍ക്ക് അദ്ധ്യക്ഷത വഹിച്ചു സംസാരിച്ചു. കുട്ടികളുടേയും മുതിര്‍ന്നവരുടേയും കേരളത്തനിമയാര്‍ന്ന കലാകായിക പരിപാടികളും ഗംഭീരമായ ഓണസദ്യയും ഓണാഘോഷത്തിന് നിറപ്പകിട്ടേകി. ഓണാഘോഷ പരിപാടികളുടെ ഭാഗമായി നടന്ന വിപുലമായ കായിക മത്സരങ്ങളില്‍ ജേതാക്കളായവര്‍ക്ക് അസോസിയേഷന്‍ ഭാരവാഹികള്‍ സമ്മാനദാനം നിര്‍വഹിച്ചുകൊണ്ട് ചടങ്ങുകള്‍ക്ക് സമാപനം കുറിച്ചു.
Leave a Reply