ലീഡ്സ്: ലീഡ്സ് മലയാളി അസോസിയേഷൻ (LEMA) സംഘടിപ്പിച്ച “ഹാർമണി ഫെസ്റ്റ് 2026” മനോഹരമായ ഉത്സവാന്തരീക്ഷത്തിൽ 25, 2026-ന് ആംഗ്ലേഴ്സ് ക്ലബ്ബിൽ വച്ച് ഭംഗിയായി അരങ്ങേറി. പുതിയ ഭരണസമിതിയുടെ നേതൃത്വത്തിൽ സംഘടിപ്പിച്ച ആദ്യത്തെ പ്രധാന പരിപാടിയായിരുന്ന ഈ ഫെസ്റ്റ്, ഈസ്റ്റർ, വിഷു, ഈദ് ആഘോഷങ്ങളെ ഒരുമിച്ച് ഉൾക്കൊണ്ട ഐക്യത്തിന്റെ വേദിയായി മാറി.
പരിപാടിയുടെ ഉദ്ഘാടനം അസോസിയേഷൻ പ്രസിഡന്റായ ശ്രീ ജേക്കബ് കുയിലാടൻ നിർവഹിച്ചു. തന്റെ അധ്യക്ഷ പ്രസംഗത്തിൽ സമൂഹത്തിലെ കൂട്ടായ്മയും ഐക്യവും കൂടുതൽ ശക്തിപ്പെടുത്തേണ്ടതിന്റെ ആവശ്യകത അദ്ദേഹം ഊന്നിപ്പറഞ്ഞു. വൈസ് പ്രസിഡന്റ് ബീന ബോസ്കോ, സെക്രട്ടറി ടിനു പി ജോൺ, ട്രഷറർ ഷിജി കുര്യൻ എന്നിവർ ഉൾപ്പെടെയുള്ള ഭരണസമിതി അംഗങ്ങളും മറ്റ് കമ്മിറ്റി അംഗങ്ങളും ചടങ്ങിൽ പങ്കെടുത്തു.
തുടർന്ന് വിവിധ കലാപരിപാടികളും സാംസ്കാരിക അവതരണങ്ങളും അരങ്ങേറി. കുട്ടികളും മുതിർന്നവരും പങ്കെടുത്ത നൃത്ത-ഗാന പരിപാടികൾ, ഗ്രൂപ്പ് ഡാൻസുകൾ, ക്ലാസിക്കൽ അവതരണങ്ങൾ എന്നിവ ആഘോഷത്തിന് നിറം പകർന്നു. കുടുംബസമേതം എത്തിയ അംഗങ്ങളുടെ വലിയ പങ്കാളിത്തം പരിപാടിയെ കൂടുതൽ സജീവമാക്കി.
പരിപാടിയുടെ പ്രധാന ആകർഷണമായി “ഹാർമണി ഫെസ്റ്റ് തീം ഡാൻസ്” മാറി. LEMA അവതരിപ്പിച്ച ഈ നൃത്താവിഷ്കാരം മാർഗം കളി, സെമി ക്ലാസിക്കൽ, ഒപ്പന എന്നിവയുടെ ഫ്യൂഷനായി ഒരുക്കപ്പെട്ടിരുന്നു. വിവിധ സംസ്കാരങ്ങളുടെയും കലാരൂപങ്ങളുടെയും സംഗമമായ ഈ അവതരണം ഐക്യത്തിന്റെ സന്ദേശം ശക്തമായി പ്രേക്ഷകരിലേക്ക് എത്തിച്ചു.
കുടുംബസമേതം വലിയ തോതിൽ അംഗങ്ങൾ പങ്കെടുത്ത ഈ ആഘോഷം സൗഹൃദവും കൂട്ടായ്മയും നിറഞ്ഞ അനുഭവമായി മാറി. സമൂഹത്തെ കൂടുതൽ ഒരുമിപ്പിക്കുന്ന ഇത്തരം പരിപാടികൾ ഭാവിയിലും സംഘടിപ്പിക്കുമെന്ന് ഭാരവാഹികൾ അറിയിച്ചു.
ഹാർമണി ഫെസ്റ്റ് 2026, ലീഡ്സിലെ മലയാളി സമൂഹത്തിന്റെ ഐക്യവും സംസ്കാരവും ആഘോഷിക്കുന്ന ഒരു സ്മരണീയ നിമിഷമായി മാറിയതായി പങ്കെടുത്തവർ അഭിപ്രായപ്പെട്ടു.
Leave a Reply