ന്യൂസ് ഡെസ്ക്, മലയാളം യുകെ
ലണ്ടൻ: ഇംഗ്ലണ്ടിലെ സ്കൂൾ പരിശോധനാ സംവിധാനമായ ഒഫ്സ്റ്റെഡിനെതിരെ (Ofsted) സമരത്തിനൊരുങ്ങി സ്കൂൾ മേധാവികളുടെ സംഘടനകൾ. പരിശോധനകൾ അധ്യാപകരുടെയും സ്കൂൾ മേധാവികളുടെയും മാനസികാരോഗ്യത്തെയും ക്ഷേമത്തെയും പ്രതികൂലമായി ബാധിക്കുന്നുവെന്ന് ചൂണ്ടിക്കാട്ടി സംഘടനകൾ സമരവോട്ടെടുപ്പ് നടത്തുമെന്ന് മുന്നറിയിപ്പ് നൽകി. സ്കൂൾ, കോളജ് നേതൃത്വത്തിലുള്ളവരുടെ സംഘടനയായ അസോസിയേഷൻ ഓഫ് സ്കൂൾ ആൻഡ് കോളജ് ലീഡേഴ്സ് (എഎസ്‌സിഎൽ) ഒഫ്സ്റ്റെഡിന്റെ നിലവിലെ പരിശോധനാ സംവിധാനം പരിഷ്കരിക്കണമെന്നും പ്രശ്നങ്ങൾക്ക് പരിഹാരമുണ്ടാകുന്നതുവരെ പരിശോധനകൾ നിർത്തിവയ്ക്കണമെന്നും ആവശ്യപ്പെട്ടു. മാറ്റങ്ങളുണ്ടായില്ലെങ്കിൽ സമര നടപടികൾക്കായി വോട്ടെടുപ്പ് നടത്തുമെന്ന് സംഘടന വ്യക്തമാക്കി.
ഒഫ്സ്റ്റെഡ് അടുത്തിടെ നടത്തിയ സർവേയിൽ പങ്കെടുത്ത 88 ശതമാനം സ്കൂളുകളും പരിശോധനകൾ ജീവനക്കാരുടെ മാനസികക്ഷേമത്തെ പ്രതികൂലമായി ബാധിച്ചതായി റിപ്പോർട്ട് ചെയ്തിരുന്നു. കഴിഞ്ഞ വർഷം നടപ്പാക്കിയ പുതിയ പരിശോധനാ ചട്ടക്കൂട് ജോലിഭാരവും സമ്മർദവും കുറയ്ക്കാനാണ് ലക്ഷ്യമിട്ടതെങ്കിലും സ്ഥിതി കൂടുതൽ വഷളായെന്നാണ് സ്കൂൾ മേധാവികളുടെ ആരോപണം. പരിശോധനാ സംവിധാനത്തിനെതിരെ അവിശ്വാസ പ്രമേയം പാസാക്കിയ എഎസ്‌സിഎൽ, അമിതമായ സമ്മർദവും ഉത്കണ്ഠയും കാരണം സ്കൂൾ മേധാവികൾ ജോലി ഉപേക്ഷിക്കുന്ന സാഹചര്യമുണ്ടാകുമെന്ന് മുന്നറിയിപ്പ് നൽകി. നാഷണൽ അസോസിയേഷൻ ഓഫ് ഹെഡ് ടീച്ചേഴ്സും (എൻഎഎച്ച്ടി) അടുത്തയാഴ്ച ചേരുന്ന നേതൃത്വയോഗത്തിൽ സമരമടക്കമുള്ള നടപടികൾ പരിഗണിക്കും.
സ്കൂൾ പരിശോധനാ സമ്പ്രദായം സമഗ്രമായി പുനഃപരിശോധിക്കണമെന്ന് വിദ്യാഭ്യാസ സെക്രട്ടറി ലൂസി പവലും ആവശ്യപ്പെട്ടിട്ടുണ്ട്. പരിശോധനകളും ഉത്തരവാദിത്ത നിർണയവും പ്രധാനമാണെങ്കിലും സ്കൂളുകളുടെ യഥാർഥ സാഹചര്യങ്ങൾ പരിഗണിക്കുകയും നിലവിലുള്ള സമ്മർദം വർധിപ്പിക്കാതെ വിദ്യാഭ്യാസ നിലവാരം മെച്ചപ്പെടുത്താൻ സഹായിക്കുകയും വേണമെന്ന് വിദ്യാഭ്യാസ വകുപ്പ് വ്യക്തമാക്കി. പരിശോധനകളുടെ സമ്മർദം സംബന്ധിച്ച ആശങ്കകൾ പരിഹരിക്കാൻ വിദ്യാഭ്യാസ വകുപ്പുമായി ചേർന്ന് പ്രവർത്തിക്കുകയാണെന്ന് ഒഫ്സ്റ്റെഡും അറിയിച്ചു. 2023ൽ റീഡിങ്ങിലെ സ്കൂൾ മേധാവി റൂത്ത് പെറിയുടെ മരണത്തിൽ ഒഫ്സ്റ്റെഡ് പരിശോധന മാനസികാരോഗ്യ തകർച്ചയ്ക്ക് കാരണമായെന്ന് അന്വേഷണത്തിൽ കണ്ടെത്തിയിരുന്നു. ഇതിനു പിന്നാലെ പരിശോധനാ സംവിധാനം പരിഷ്കരിക്കണമെന്ന ആവശ്യം ശക്തമായിരുന്നു.
Leave a Reply