ഇന്നലെ നടന്‍ വിനീത് ശ്രീനിവാസനു വേണ്ടി സോഷ്യല്‍ മീഡിയ ഒന്നടങ്കം അന്വേഷിച്ച ആ ആനുഗ്രഹീത ഗായകന്‍ കൊല്ലം കടയ്ക്കല്‍ സ്വദേശി മുഹമ്മദ്. പ്രജോദ് കടയ്ക്കല്‍ എന്ന പത്ര പ്രവര്‍ത്തകന്‍ മുഹമ്മദിന്റെ ലൈവ് വീഡിയോ ഫെയ്‌സ് ബുക്കില്‍ ഷെയര്‍ ചെയ്തതോടെ വൈറലായ വീഡിയോയിലെ ഗായകനെ തേടി വിനീത് ശ്രീവനിവാസന്‍ രംഗത്തു വന്നതോടെ അന്വേഷണവുമായി സമൂഹ മാധ്യമം ഒന്നടങ്കം ഇറങ്ങുകയായിരുന്നു.
മിക്ക ഓണ്‍ലൈന്‍ മാധ്യമങ്ങളും വാര്‍ത്ത പ്രസിദ്ധീകരിച്ചതിനു പിന്നാലെ കമന്റ് ബോക്‌സിലെത്തി നിരവധി പേര്‍ അദ്ദേഹത്തിന്റെ പേരും ഫോണ്‍ നമ്പരും ഷെയര്‍ ചെയ്തു. ഇതോടെയാണ് ദിവസം നീണ്ടു നിന്ന് അന്വേഷണത്തിന് പരിസമാപ്തിയായത്.
സിനിമാക്കഥ പോലെ ട്വിസ്റ്റ് നിറഞ്ഞതാണ് 68 വയസുകാരന്‍ മുഹമ്മദിന്റെ ജീവിതകഥയും. 28വര്‍ഷത്തോളം ചുമട്ട് തൊഴിലാളിയായിരുന്നു. കൊല്ലം ജില്ലയിലെ അഞ്ചലിലായിരുന്നു ജോലി നോക്കിയത്. ഭാര്യയും മൂന്ന് മക്കളും ഉണ്ട്. ഒരു അപകടത്തെ തുടര്‍ന്ന് ജോലിയ്ക്ക് പോകാനാകാത്ത അവസ്ഥയിലായി, കൂട്ടിന് വാര്‍ദ്ധക്യവുമെത്തി. അതോടെ ഭാര്യയ്ക്കും കുട്ടികള്‍ക്കും വേണ്ടാതായി. അവഗണന കടുത്തതോടെ വീട് വിട്ടിറങ്ങുകയായിരുന്നു. ഇപ്പോള്‍ പാട്ടാണ് ഉപജീവന മാര്‍ഗ്ഗം. കവലകളില്‍ കരോക്കെ വച്ച് പാട്ട് പാടും. മെക്ക് സെറ്റും ഓട്ടോ കൂലിയും നല്‍കി ബാക്കിയുള്ളതുമായി ജീവിക്കും. ആറായിരം രൂപ വരെ ചിലദിവസങ്ങളില്‍ ലഭിക്കാറുണ്ടെന്ന് മുഹമ്മദ് പറഞ്ഞു. കോട്ടയം, പത്തനംതിട്ട, ഇടുക്കി ജില്ലകളിലെ വഴിയോരങ്ങളില്‍ സ്ഥിരം സാന്നിധ്യമാണ് മുഹമ്മദ്.
മാര്‍ഗഴിയില്‍ മല്ലിക പൂത്താന്‍ എന്ന ഗാനം എരുമേലി ബസ് സ്റ്റാന്‍ഡിനു വെളിയില്‍ ആലപിച്ചതാണ് പ്രജോദ് എന്ന മാധ്യമ പ്രവര്‍ത്തകന്‍ ഫെയ്‌സ്ബുക്ക് ലൈവിലൂടെ ലോകത്തെ കാണിച്ചത്. തുടര്‍ന്ന് നിരവധിപേര്‍ ഷെയര്‍ ചെയ്തതോടെ അജ്ഞാത ഗായകന്‍ താരമായി മാറി. ഒരു ദിവസം കൊണ്ട് ഏകദേശം ഇരുപത് ലക്ഷത്തോളം പേരാണ് ഗാനം കണ്ടത്.
അങ്ങനെയാണ് ഗാനം നടനും ഗായകനുമായ വിനീത് ശ്രീനിവാസന്റെ ശ്രദ്ധയില്‍പ്പെടുന്നത്. ഈ കലാകാരനെക്കുറിച്ച് എന്തെങ്കിലും വിവരം ലഭിക്കുന്നവര്‍ അറിയിക്കണമെന്ന കുറിപ്പോടെ വിനീത് ഷെയര്‍ ചെയ്തത്. മുന്‍പും ഇദ്ദേഹത്തിന്റെ ഗാനം ആരോ റെക്കോര്‍ഡ് ചെയ്തു യൂ ട്യൂബില്‍ പോസ്റ്റ് ചെയ്തിരുന്നു. പ്രമദവനം വീണ്ടും… എന്ന ഗാനം. പക്ഷേ ശബ്ദം അത്രകണ്ട് കൃത്യമല്ല.
പതിനയ്യായിരത്തില്‍പരം പാട്ടുകളാണ് മുഹമ്മദ് ഹൃദിസ്ഥമാക്കിയിട്ടുള്ളത്. ഏറെയും പഴയ ഗാനങ്ങള്‍. എരുമേലിയില്‍ മൂഹമ്മദിന്റെ മൂന്നു മണിക്കൂര്‍ പ്രകടനം കണ്ടു നാട്ടുകാര്‍ അന്തംവിട്ടു. പ്രായം സംഗീതസാന്ദ്രമായ ആ കണ്ഠത്തെ തൊട്ടിട്ടില്ലെന്ന് പാട്ടു കേട്ടു നിന്ന ജനം കയ്യടിച്ചു സമ്മതിച്ചു. കഴിഞ്ഞ ദിവസം മുക്കൂട്ടുതറയില്‍ മുഹമ്മദ് മൂന്നു മണിക്കൂര്‍ ഇടതടവില്ലാതെ പാടി. എരുമേലിയിലും അങ്ങനെതന്നെ.
ഇടയ്ക്കിടെ പാട്ടിലെ പല്ലവിക്കുശേഷമുള്ള പശ്ചാത്തല സംഗീതത്തിന്റെ ഇടവേളയില്‍ അഞ്ചു രൂപയുടെ നാടന്‍ സോഡ മാത്രം കുടിച്ചു. സിനിമകളിലെ സെമി ക്ലാസിക്കല്‍ ഗാനങ്ങള്‍, നാടക ഗാനങ്ങള്‍, ഗസലുകള്‍, ഭക്തിഗാനങ്ങള്‍ തുടങ്ങിയവയെല്ലാം മുഹമ്മദ് പാടി. ഉച്ചസ്ഥായിയില്‍ എത്തുമ്പോള്‍ പ്രായംകൊണ്ടു നടവു കുനിഞ്ഞുപോയെങ്കിലും കണ്ഠം ഇടറിയില്ലെന്ന് കണ്ടു നിന്നവരുടെ സാക്ഷ്യം.
https://www.facebook.com/prajodkadakkal/videos/1813393175642369/
Leave a Reply