ന്യൂസ് ഡെസ്ക് മലയാളം യുകെ

വാക്സിനേഷൻ കേന്ദ്രത്തിൽ രാത്രിയിൽ ഫ്രിഡ്ജ് പ്രവർത്തന രഹിതമായതു കാരണം 450 ഡോസ് ഫൈസർ വാക്സിൻ ഉപയോഗശൂന്യമായതായി റിപ്പോർട്ടുകൾ പുറത്തുവന്നു. കഴിഞ്ഞമാസം റോതർഹാമിലെ വാത്ത്-ഓൺ-ഡിയേണിലെ മോണ്ട്ഗോമറി ഹാളിലാണ് സംഭവം നടന്നത്. ഫ്രിഡ്ജിൽ വാക്സിൻെറ 90 കുപ്പികൾ ആണ് ഉണ്ടായിരുന്നത്. ഓരോ കുപ്പിയിലും 5 ഡോസ് വരെ വാക്സിൻ ആണ് ഉണ്ടായിരുന്നത്. ഫ്രിഡ്ജ് അബദ്ധത്തിൽ ഓഫ് ചെയ്തതാണ് ഇത്രയും വാക്സിൻ ഉപയോഗശൂന്യമാകാനുള്ള കാരണം.

യുദ്ധകാലാടിസ്ഥാനത്തിൽ വാക്സിനേഷൻ പുരോഗമിക്കുന്ന ഈ ഘട്ടത്തിൽ ഇത്രയും ഡോസ് പ്രതിരോധമരുന്ന് ഉപയോഗശൂന്യമായത് തികഞ്ഞ അനാസ്ഥയാണെന്ന് വിലയിരുത്തപ്പെടുന്നു. അറിയാതെ ഉപയോഗശൂന്യമായ വാക്സിൻ ആർക്കെങ്കിലും കുത്തിവെക്കുന്ന സാഹചര്യം ഉടലെടുത്തിരുന്നെങ്കിൽ സ്ഥിതി കടുത്ത വഷളായേനെ എന്നാണ് ആരോഗ്യവിദഗ്ധർ കരുതുന്നത് . യൂറോപ്യൻ യൂണിയനുമായുള്ള പ്രശ്നങ്ങൾ കാരണം വാക്സിൻ ദൗർലഭ്യതയെ കുറിച്ചുള്ള ആശങ്കകൾക്കിടയിൽ നടന്ന സംഭവം കടുത്ത വിമർശനമാണ് ഉയർത്തിയിരിക്കുന്നത്.

മറ്റുള്ള വാക്സിനുകളുടെ അപേക്ഷിച്ച് ഫൈസർ വാക്സിൻ വളരെ താഴ്ന്ന ഊഷ്മാവിൽ മൈനസ് 80 ഡിഗ്രി സെൽഷ്യസിനും മൈനസ് 60 ഡിഗ്രി സെൽഷ്യസിനും ഇടയിലാണ് സൂക്ഷിക്കേണ്ടത് .