ന്യൂസ് ഡെസ്ക്, മലയാളം യുകെ
ലണ്ടൻ: ബ്രിട്ടനിൽ സമ്പാദ്യനിക്ഷേപങ്ങൾക്ക് അഞ്ച് ശതമാനത്തിലേറെ പലിശ ലഭിക്കുന്ന പദ്ധതികൾ വീണ്ടും സജീവമാകുന്നു. നാഷണൽ സേവിങ്സ് ആൻഡ് ഇൻവെസ്റ്റ്മെന്റ്സ് (എൻഎസ്ഐ) ചില നിക്ഷേപ പദ്ധതികളുടെ പലിശനിരക്ക് ഉയർത്തിയതോടെയാണ് നിക്ഷേപകർക്ക് കൂടുതൽ നേട്ടം ലഭിക്കുന്നത്. ഏകദേശം മൂന്ന് വർഷത്തിനുശേഷമാണ് എൻഎസ്ഐയുടെ ചില പദ്ധതികൾ അഞ്ച് ശതമാനത്തിലധികം പലിശ വാഗ്ദാനം ചെയ്യുന്നത്. എന്നാൽ, ആകർഷകമായ പലിശനിരക്കിലുള്ള പദ്ധതികൾ അധികകാലം ലഭ്യമായേക്കില്ലെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു. ആവശ്യത്തിന് നിക്ഷേപം ലഭിച്ചാൽ ബാങ്കുകളും ധനകാര്യ സ്ഥാപനങ്ങളും ഇത്തരം പദ്ധതികൾ പിൻവലിച്ചേക്കാം.
എൻഎസ്ഐയുടെ ബ്രിട്ടീഷ് സേവിങ്സ് ബോണ്ടുകളിൽ ഒരു വർഷത്തെ നിക്ഷേപത്തിന് 4.99 ശതമാനവും രണ്ടു വർഷത്തേക്ക് 5.07 ശതമാനവും മൂന്നു വർഷത്തേക്ക് 5.1 ശതമാനവും അഞ്ചു വർഷത്തേക്ക് 5.17 ശതമാനവും പലിശ ലഭിക്കും. നേരത്തേ ഈ നിരക്കുകൾ യഥാക്രമം 4.82, 4.81, 4.83, 4.85 ശതമാനമായിരുന്നു. കുറഞ്ഞത് 500 പൗണ്ട് നിക്ഷേപിക്കാം. ഓരോ ബോണ്ട് പദ്ധതിയിലും ഒരാൾക്ക് പരമാവധി പത്തുലക്ഷം പൗണ്ട് വരെ നിക്ഷേപിക്കാം. ബ്രിട്ടീഷ് സർക്കാരിന്റെ ട്രഷറിയുടെ പിന്തുണയുള്ളതിനാൽ നിക്ഷേപിച്ച തുകയ്ക്ക് പൂർണ സുരക്ഷ ലഭിക്കുന്നതാണ് എൻഎസ്ഐയുടെ പ്രധാന ആകർഷണം. എന്നാൽ, കാലാവധി പൂർത്തിയാകുന്നതിനു മുമ്പ് പണം പിൻവലിക്കാൻ കഴിയില്ല. മറ്റു ചില ധനകാര്യ സ്ഥാപനങ്ങൾ ഇതിലും ഉയർന്ന പലിശ നൽകുന്നുണ്ടെങ്കിലും അവയുടെ വിശ്വാസ്യതയും നിക്ഷേപസുരക്ഷയും പരിശോധിക്കണമെന്ന് വിദഗ്ധർ ചൂണ്ടിക്കാട്ടുന്നു.
അതേസമയം, എപ്പോൾ വേണമെങ്കിലും പണം പിൻവലിക്കേണ്ട സാഹചര്യമുള്ളവർക്ക് എളുപ്പത്തിൽ പണം പിൻവലിക്കാവുന്ന സമ്പാദ്യപദ്ധതികളാണ് അനുയോജ്യം. സ്റ്റാർലിങ് ബാങ്കിന്റെ ഈസി സേവർ പദ്ധതിയിൽ നിബന്ധനകൾക്കു വിധേയമായി അഞ്ച് ശതമാനം വരെ പലിശ ലഭിക്കും. 25,000 പൗണ്ട് വരെയുള്ള നിക്ഷേപങ്ങൾക്കാണ് ഈ നിരക്ക് ബാധകം. ഇതിൽ 2.5 ശതമാനം അടിസ്ഥാന പലിശയും ആറുമാസത്തേക്കുള്ള 2.5 ശതമാനം അധിക പലിശയും ഉൾപ്പെടുന്നു. ഒക്ടോബർ ഒന്നിനോ അതിനുശേഷമോ സ്റ്റാർലിങ് കറന്റ് അക്കൗണ്ട് ആരംഭിച്ചവർക്കാണ് ഈ നിരക്ക് ലഭിക്കുക. അതേസമയം, മാർക്കസ് ബൈ ഗോൾഡ്മാൻ സാക്സ് ഒരു വർഷത്തെ സ്ഥിരനിക്ഷേപത്തിന്റെ പലിശ 4.3 ശതമാനത്തിൽനിന്ന് 4.75 ശതമാനമായി ഉയർത്തിയിട്ടുണ്ട്. നിക്ഷേപകർ ഉയർന്ന പലിശയ്ക്കൊപ്പം പണം പിൻവലിക്കാനുള്ള സൗകര്യവും നിക്ഷേപസുരക്ഷയും പരിഗണിച്ച് പദ്ധതികൾ തിരഞ്ഞെടുക്കണമെന്നാണ് വിദഗ്ധരുടെ നിർദേശം.
Leave a Reply