ന്യൂസ് ഡെസ്ക്, മലയാളം യുകെ
ഡൊണൾഡ് ട്രംപ് ഗ്രീൻലാൻഡിനെ കുറിച്ച് വീണ്ടും കടുത്ത നിലപാട് സ്വീകരിച്ചതോടെ, അമേരിക്കയിലും യൂറോപ്പിലും ഓഹരി വിപണികൾ കനത്ത ഇടിവ് രേഖപ്പെടുത്തി. വാൾസ്ട്രീറ്റിൽ എസ് & പി 500 സൂചിക 1.5 ശതമാനവും ഡൗ ജോൺസ് 1.3 ശതമാനവും താഴ്ന്നു. ടെക് ഓഹരികൾ നിറഞ്ഞ നാസ്ഡാക് സൂചിക 1.8 ശതമാനം ഇടിഞ്ഞു. ആമസോൺ, ടെസ്ല, എൻവിഡിയ തുടങ്ങിയ കമ്പനികൾക്ക് വലിയ നഷ്ടമാണ് ഉണ്ടായത്. ബ്രിട്ടനിലെ എഫ്ടിഎസ്ഇ 100 സൂചിക 0.7 ശതമാനം കുറഞ്ഞു. ഫ്രാൻസ്, ജർമ്മനി, ഇറ്റലി എന്നിവിടങ്ങളിലെ പ്രധാന ഓഹരി സൂചികകളും ഒരു ശതമാനത്തോളം താഴ്ന്നു. ഡോളറിന്റെ മൂല്യവും ഇടിഞ്ഞു.
ജർമ്മനി, ഫ്രാൻസ്, ഡെൻമാർക്ക്, ബ്രിട്ടൻ അടക്കമുള്ള എട്ട് യൂറോപ്യൻ രാജ്യങ്ങളിൽ നിന്നുള്ള ഇറക്കുമതികൾക്ക് കൂടുതൽ തീരുവ ചുമത്തുമെന്ന ട്രംപിന്റെ ഭീഷണിയാണ് വിപണിയിൽ ആശങ്ക പരത്തിയത്. എന്നാൽ ലോക സാമ്പത്തിക ഫോറത്തിൽ സംസാരിച്ച അമേരിക്കൻ വാണിജ്യ സെക്രട്ടറി ഹോവാർഡ് ലട്ട്നിക് പുതിയ വ്യാപാരയുദ്ധം ഉണ്ടാകില്ലെന്ന് വ്യക്തമാക്കി. തീരുവകൾ ട്രംപ് നയതന്ത്ര ചർച്ചകൾ ആരംഭിക്കാൻ ഉപയോഗിക്കുന്ന ഒരു മാർഗമാണെന്ന് അദ്ദേഹം പറഞ്ഞു. ഗ്ലോബലൈസേഷൻ അമേരിക്കൻ തൊഴിലാളികളെ പിന്നിലാക്കിയതായും അദ്ദേഹം ആരോപിച്ചു. ബ്രിട്ടീഷ് ധനമന്ത്രി റേച്ചൽ റീവ്സും ചർച്ചകൾ വഴി പ്രശ്നം പരിഹരിക്കണമെന്ന നിലപാട് വ്യക്തമാക്കി. ഗ്രീൻലാൻഡിന്റെ ഭാവി അവിടുത്തെ ജനങ്ങൾ തീരുമാനിക്കേണ്ടതാണെന്നും അവർ പറഞ്ഞു.
അതേസമയം അമേരിക്കൻ ധനകാര്യ സെക്രട്ടറി സ്കോട്ട് ബെസന്റ് യൂറോപ്യൻ രാജ്യങ്ങൾ തീരുവകൾക്ക് തിരിച്ചടി നൽകരുതെന്ന് മുന്നറിയിപ്പ് നൽകി. എന്നാൽ, നിക്ഷേപകരുടെ ആശങ്ക അകലുന്നില്ലെന്ന് സാമ്പത്തിക വിദഗ്ധർ പറയുന്നു. ഇതിന്റെ ഭാഗമായി സ്വർണ്ണവും വെള്ളിയും റെക്കോർഡ് വിലയിലെത്തി. ഔൺസിന് 4,700 ഡോളർ കടന്ന സ്വർണ്ണവിലയും 95 ഡോളറിന് മുകളിലെത്തിയ വെള്ളിവിലയും സുരക്ഷിത നിക്ഷേപത്തിലേക്കുള്ള നീക്കം വ്യക്തമാക്കുന്നു. ഗ്രീൻലാൻഡിനെ പൂർണമായി സ്വന്തമാക്കുന്നതുവരെ തീരുവ തുടരുമെന്ന ട്രംപിന്റെ പ്രഖ്യാപനവും ഫ്രഞ്ച് വൈനും ഷാംപെയ്നും മേൽ 200 ശതമാനം തീരുവ ചുമത്തുമെന്ന ഭീഷണിയും ആഗോള വ്യാപാര രംഗത്ത് കൂടുതൽ അനിശ്ചിതത്വം സൃഷ്ടിക്കുകയാണ്.
Leave a Reply