ബേസില്‍ ജോസഫ്

ചേരുവകള്‍

ബീഫ് -ഒരു കിലോ
മഞ്ഞള്‍ പൊടി – അര ടീസ്പൂണ്‍
കുരുമുളകുപൊടി – 1 ടീസ്പൂണ്‍
പെരുംജീരക പൊടി – അര ടീസ്പൂണ്‍
അണ്ടിപ്പരിപ്പ് ഉണക്ക മുന്തിരി – 25ഗ്രാം
ബിരിയാണി അരി – 2 കപ്പ്
നെയ്യ് 100 – ഗ്രാം
ഏലയ്ക്ക – 3
പട്ട – ഒരിഞ്ചുള്ള രണ്ടു കഷ്ണം
ഗ്രാമ്പൂ – 4
നാരങ്ങാ നീര് -1 ടേബിള്‍ സ്പൂണ്‍
സവാള – 3
വെളുത്തുള്ളി ചതച്ചത് – 1 ടേബിള്‍ സ്പൂണ്‍
ഇഞ്ചി ചതച്ചത് – 1 ടേബിള്‍ സ്പൂണ്‍
പച്ചമുളക് ചതച്ചത് – 5
തക്കാളി – 3
മല്ലിയില – ഒരു പിടി
പുതിനയില – ഒരു പിടി
തൈര് – അരകപ്പ്
ബിരിയാണി മസാല – 1 ടേബിള്‍ സ്പൂണ്‍
ഉപ്പ് – ആവശ്യത്തിന്

ബിരിയാണി മസാല ഉണ്ടാക്കുന്ന വിധം:-

പട്ട – രണ്ടിഞ്ചു കഷ്ണം, ഏലയ്ക്ക, ഗ്രാമ്പു, ജാതിക്ക ഒരു ചെറിയ കഷ്ണം, ജാതിപത്രി ഒന്നിന്റെ പകുതി, തക്കോലം ഒന്ന്, ജീരകം അര ടീസ്പൂണ്‍ എല്ലാം കൂടെ ചൂടായ ചട്ടിയിലിട്ട് ഒന്ന് ചൂടാക്കി പൊടിക്കുക. ബിരിയാണി മസാല റെഡി. ബീഫ് കട്ട് ചെയ്തു കഴുകി വെള്ളം വാര്‍ത്തെടുത്തു മഞ്ഞള്‍പൊടി കുരുമുളകുപൊടി പെരുംജീരകപൊടി ആവശ്യത്തിന് ഉപ്പ് ചേര്‍ത്ത് നന്നായി കുക്ക് ചെയ്യുക. ഒരു പാത്രത്തില്‍ നെയ് ഒഴിച്ച് ചൂടാവുമ്പോള്‍ പട്ട, ഏലയ്ക്ക, ഗ്രാമ്പൂ എന്നിവ മൂപ്പിക്കുക. ഇതിലേക്ക് കഴുകി വാര്‍ത്ത ബിരിയാണി അരി ചേര്‍ക്കുക. നാരങ്ങാ നീരും ആവശ്യത്തിന് ഉപ്പും ചേര്‍ത്ത് ഇളക്കി അഞ്ചു മിനിറ്റ് ചെറിയ തീയില്‍ വെക്കുക. അരിയിലേക്ക് തിളച്ച വെള്ളം ഒഴിച്ചു ഇളക്കി ചെറിയ തീയില്‍ 10 മിനിറ്റു പാത്രം മൂടിവെച്ചു വേവിക്കുക. വെള്ളം മുഴുവനും വറ്റി ചോറ് മുക്കാല്‍ വേവായാല്‍ തീ ഓഫ് ചെയ്യാം. ബിരിയാണിക്കുള്ള റൈസ് റെഡി.

ചുവടു കട്ടിയുള്ള ഒരു പാത്രം അടുപ്പില്‍ വെച്ച് ചൂടാവുമ്പോള്‍ നെയ്യൊഴിക്കുക. ഒരു സവാള നൈസ് ആയി അരിഞ്ഞത് നെയ്യിലേക്ക് ഇട്ട് ഗോള്‍ഡന്‍ കളറില്‍ വറുത്തുകോരുക. ഇതിലേക്ക് അണ്ടിപ്പരിപ്പ് മുന്തിരി ചേര്‍ത്ത് ഫ്രൈ ചെയ്തു ഒരു പാത്രത്തിലേക്ക് മാറ്റുക. അതേ നെയ്യില്‍ ബാക്കിയുള്ള സവാള വഴറ്റുക. ഉപ്പ് ചേര്‍ക്കുക. സവാള മൂത്തുവരുമ്പോള്‍ ഇഞ്ചി വെളുത്തുള്ളി ചതച്ചത് ചേര്‍ത്ത് മൂപ്പിക്കുക. ഇതിലേക്ക് തക്കാളി അരിഞ്ഞതും പച്ചമുളക് ചതച്ചതും മല്ലിയില പൊതിനയില അരിഞ്ഞതും ബിരിയാണി മസാലയും തൈരും ചേര്‍ത്ത് വഴറ്റുക. തക്കാളി ഉടഞ്ഞു തുടങ്ങിയാല്‍ വേവിച്ച ബീഫ് ചേര്‍ത്തിളകി അഞ്ചു മിനിറ്റു മൂടിവെക്കുക. ശേഷം മസാലയുടെ മുകളില്‍ വേവിച്ചുവെച്ച റൈസ് പകുതി നിരത്തുക. അതിനു മുകളില്‍ ബിരിയാണി മസാല വിതറുക. മല്ലിയില അരിഞ്ഞതും പൊരിച്ച സവാള അണ്ടിപ്പരിപ്പ് മുന്തിരിയും മുകളില്‍ വിതറി ബാക്കി റൈസും ഇതേപോലെ ചെയ്തു മുകളില്‍ അല്‍പ്പം നെയ്യ് ഒഴിക്കുക. പാത്രം മൂടി അതിന്റെ മുകളില്‍ ഒരു വെള്ളംനിറച്ച പാത്രം വെച്ച് 10 മിനിറ്റു ചെറിയ തീയില്‍ വെച്ച് ഓഫ് ചെയ്യാം. മലബാര്‍ ബീഫ് ബിരിയാണി റെഡി പപ്പടം,അച്ചാര്‍ റൈത്ത എന്നിവക്കൊപ്പം വിളമ്പുക.

ഹോട്ടല്‍ മാനേജ്മെന്‍റ് ബിരുദധാരിയായ ബേസില്‍ ജോസഫ് ന്യൂ പോര്‍ട്ടിലാണ് താമസം. മലയാളം യുകെയില്‍ വീക്കെന്‍ഡ് കുക്കിംഗ് എന്ന പംക്തി തയ്യാറാക്കുന്നു. എല്ലാ ഞായറാഴ്ചകളിലും ആണ് വീക്കെന്‍ഡ് കുക്കിംഗ് പ്രസിദ്ധീകരിക്കുന്നത്.

ബേസില്‍ ജോസഫിന്‍റെ കൂടുതല്‍ പാചകക്കുറിപ്പുകള്‍ കാണാന്‍ ഇവിടെ ക്ലിക്ക് ചെയ്യുക