ന്യൂസ് ഡെസ്ക്, മലയാളം യുകെ

മാനസികാരോഗ്യ പ്രശ്നങ്ങൾ ഉള്ളവർക്ക് അടിയന്തിര സേവനങ്ങൾ നൽകാൻ പുതിയ സംവിധാനം എൻ എച്ച് എസ് നടപ്പില്‍ വരുത്തി. ഇനിമുതൽ 111 എന്ന നമ്പറിൽ വിളിച്ച് അവർക്ക് സഹായം അഭ്യർത്ഥിക്കാൻ സാധിക്കും. ഇതോടെ ശാരീരിക പ്രശ്നങ്ങൾക്ക് ഒപ്പം മാനസികാരോഗ്യ പ്രശ്നങ്ങൾക്കും ഇത്തരം പിന്തുണ നൽകുന്ന ആദ്യത്തെ രാജ്യമായി യുകെ മാറും.

ഈ നമ്പറിൽ നിന്നുള്ള സേവനം 24 മണിക്കൂറും ലഭ്യമാണ്. മാനസികാരോഗ്യ പരിശീലനമുള്ള കോൾ കൈകാര്യം ചെയ്യുന്ന ആൾക്കൊപ്പം നേഴ്സുമാർ, മാനസികാരോഗ്യ വിദഗ്ധർ എന്നിവരുടെ ഒരു ടീമിന്റെ ഏകോപനത്തിലൂടെയാണ് എൻഎച്ച്എസ് പദ്ധതി നടപ്പിലാക്കുന്നത്. കോൾ ലഭിക്കുന്ന ടീമിന് പ്രശ്നത്തിന്റെ അടിസ്ഥാനത്തിൽ ഒരു വിലയിരുത്തൽ നടത്താനും അതിൻറെ വെളിച്ചത്തിൽ ക്രൈസസ് ടീമിനെ ആവശ്യമായ സ്ഥലത്തേയ്ക്ക് അയക്കാനും സാധിക്കും. വിളിക്കുന്നവർക്ക് ഒരു ടോക്കിംഗ്-തെറാപ്പി സേവനവും ലഭ്യമാണ്.

111 -ൽ വിളിച്ച് 2 അമർത്തിയാൽ ഈ സേവനം ലഭ്യമാണ്. ആളുകൾക്ക് www.nhs.uk വഴി ഓൺലൈനായും സേവനം ലഭ്യമാണ്. കോവിഡ് പാൻഡെമിക്കിന് ശേഷം വിഷാദം, ഉത്കണ്ഠ തുടങ്ങിയ മാനസിക പ്രശ്നങ്ങളെ തുടർന്ന് സഹായത്തിനായുള്ള ആവശ്യക്കാർ വർദ്ധിച്ചു വരുന്നതിനെ തുടർന്നാണ് പുതിയ സംവിധാനവുമായി എൻഎച്ച്എസ് മുന്നോട്ട് വന്നിരിക്കുന്നത്. ആറ് വർഷം മുമ്പുള്ളതിനെ അപേക്ഷിച്ച് മാനസികാരോഗ്യ പ്രശ്നങ്ങൾ ഉള്ളവരുടെ എണ്ണത്തിൽ ഒരു ദശലക്ഷം വർദ്ധനവ് ഉണ്ടായതായാണ് എൻഎച്ച്എസ് കണക്കുകൾ സൂചിപ്പിക്കുന്നത്. നിലവിൽ രണ്ട് ദശലക്ഷം ആളുകളോളമാണ് മാനസികാരോഗ്യ ചികിത്സയ്ക്കുള്ള വെയ്റ്റിംഗ് ലിസ്റ്റിൽ ഉള്ളത്.