ന്യൂസ് ഡെസ്ക്, മലയാളം യുകെ
സോമർ സെറ്റിൽ സ്കൂൾ വിദ്യാർത്ഥികൾ സഞ്ചരിച്ചിരുന്ന വാഹനാപകടത്തിൽ പെട്ട് 10 വയസ്സുകാരനായ ആൺകുട്ടി മരിച്ചു. ഒൻപത് പേർ പരുക്കുകളോടെ ആശുപത്രിയിൽ ആണ്. രണ്ട് പേർ ബ്രിസ്റ്റൽ ചിൽഡ്രൻസ് ആശുപത്രിയിലും നാല് പേർ സോമർസെറ്റിലും ആണ്. ഇത് കൂടാതെ മൂന്ന് മുതിർന്നവരും സോമർസെറ്റിലെ ആശുപത്രിയിൽ ചികിത്സയിലാണെന്ന് പോലീസ് പറഞ്ഞു.
മൈൻ ഹെഡ് മിഷൻ സ്കൂളിലെ വിദ്യാർഥികളാണ് അപകടത്തിൽ പെട്ടത്. വാഹനത്തിൽ ഏകദേശം 70 പേർ ആണ് ഉണ്ടായിരുന്നത്. അപകടം നടന്ന ഉടനെ 21 യാത്രക്കാരെയാണ് ആശുപത്രിയിൽ പ്രവേശിപ്പിച്ചത്. അപകടത്തിന്റെ കാരണത്തെ കുറിച്ച് അന്വേഷണം നടക്കുന്നുണ്ടെന്നും ദൃക്സാക്ഷികൾ മുന്നോട്ട് വരണമെന്നും സോമർസെറ്റ് പോലീസ് പറഞ്ഞു. അപകടത്തിൽ മരിച്ച വിദ്യാർത്ഥിക്ക് ആദരാഞ്ജലികൾ അർപ്പിക്കാൻ മാതാപിതാക്കളും വിദ്യാർത്ഥികളും നാട്ടുകാരും സ്കൂളിൽ എത്തിയിരുന്നു. അപകടത്തിൽ പെട്ട കുട്ടികളുടെ ചികിത്സയ്ക്കായി സർക്കാരിൽ നിന്ന് ധനസഹായം തേടുന്നതിനായി സോമർസെറ്റ് കൗൺസിലുമായി ചേർന്ന് പ്രവർത്തിക്കുന്നുണ്ടെന്ന് ടിവർട്ടൺ ആൻഡ് മൈൻഹെഡിന്റെ എംപിയായ റേച്ചൽ ഗിൽമോർ അറിയിച്ചു.
അപകടം നടന്ന ഉടനെ തന്നെ എമർജൻസി സർവീസുകൾ രക്ഷാപ്രവർത്തനം ആരംഭിച്ചു. പഠന യാത്രയുടെ ഭാഗമായി മൃഗശാല സന്ദർശിച്ച് മടങ്ങിയ മൈൻഹെഡിൻ്റെ സ്കൂൾ ബസാണ് അപകടത്തിൽ പെട്ടത്. ബസ് ഏകദേശം 20 അടി താഴ്ചയിലേയ്ക്ക് മറിയുകയായിരുന്നു. അപകടത്തിൽപെട്ട വാഹനത്തിൽ നിന്ന് യാത്രക്കാരെ പുറത്തെടുക്കാൻ അഗ്നിശമന സേനാംഗങ്ങൾ കഠിനാധ്വാനം ചെയ്യേണ്ടി വന്നതായി രക്ഷാപ്രവർത്തനത്തിൽ പങ്കെടുത്ത പോലീസ്, ഫയർ സർവീസ്, ആംബുലൻസ് സർവീസ് എന്നിവരുടെ പ്രതിനിധികൾ പങ്കെടുത്ത പത്രസമ്മേളനത്തിൽ അവർ മാധ്യമപ്രവർത്തകരോട് പറഞ്ഞു. 20 ഓളം ആംബുലൻസുകൾക്ക് ഒപ്പം മൂന്ന് എയർ ആംബുലൻസുകളും രക്ഷാപ്രവർത്തനത്തിൽ പങ്കെടുത്തു. അപകടത്തിന്റെ കാരണത്തെ കുറിച്ച് അന്വേഷണം നടത്തുമെന്നും സാക്ഷികളോട് മുന്നോട്ട് വരാൻ അഭ്യർത്ഥിച്ചിട്ടുണ്ടെന്നും അവോൺ ആൻഡ് സോമർസെറ്റ് പോലീസ് പറഞ്ഞു.
Leave a Reply