ന്യൂസ് ഡെസ്ക്, മലയാളം യുകെ
ഇംഗ്ലണ്ടിലെ സർവകലാശാലകൾ സ്വതന്ത്ര അഭിപ്രായപ്രകടനം സംരക്ഷിക്കുന്ന കാര്യത്തിൽ പരാജയപ്പെട്ടാൽ കർശന നടപടി നേരിടേണ്ടിവരുമെന്ന് സർക്കാർ മുന്നറിയിപ്പ് നൽകി. പുതിയ പരാതിനിർവഹണ സംവിധാനത്തിന്റെ ഭാഗമായി, നിയമലംഘനങ്ങൾ കണ്ടെത്തിയാൽ 500,000 പൗണ്ട് വരെ പിഴയോ, അല്ലെങ്കിൽ സ്ഥാപനത്തിന്റെ മൊത്തം വരുമാനത്തിന്റെ 2 ശതമാനം വരെയോ പിഴ ചുമത്താം. ഗുരുതരമായ സാഹചര്യങ്ങളിൽ സർക്കാർ ധനസഹായം പോലും പിൻവലിക്കപ്പെടാം. പുതിയ അക്കാദമിക് വർഷം മുതൽ ഓഫീസ് ഫോർ സ്റ്റുഡന്റ്സ് (ഒ.എഫ്.എസ്) ഈ സംവിധാനം നടപ്പിലാക്കും.
സർവകലാശാല ജീവനക്കാർക്കും വിദ്യാർത്ഥികളല്ലാത്തവർക്കും പോലും നേരിട്ട് പരാതിപ്പെടാൻ സാധിക്കുന്നതാണ് ഈ പദ്ധതി. പരാതികൾ പരിശോധിക്കുന്ന ഒ.എഫ്.എസ്, ആവശ്യമായാൽ സർവകലാശാലകൾക്ക് തീരുമാനങ്ങൾ പുനഃപരിശോധിക്കാനും നഷ്ടപരിഹാരം നൽകാനും നടപടിക്രമങ്ങൾ മെച്ചപ്പെടുത്താനും നിർദ്ദേശം നൽകും. ചില കേസുകളിൽ ലിംഗപരമായോ മതപരമായോ അഭിപ്രായങ്ങൾ പ്രകടിപ്പിച്ചതിനെ തുടർന്ന് അധ്യാപകരെയും പ്രഭാഷകരെയും തടയുന്നതും പീഡിപ്പിക്കുന്നതുമായ സംഭവങ്ങൾ റിപ്പോർട്ട് ചെയ്തിട്ടുണ്ടെന്ന് അധികൃതർ വ്യക്തമാക്കി.
ഹയർ എജ്യുക്കേഷൻ (ഫ്രീഡം ഓഫ് സ്പീച്ച്) ആക്ട് പ്രകാരം സർവകലാശാലകൾ അക്കാദമിക് സ്വാതന്ത്ര്യം ഉറപ്പാക്കേണ്ടത് നിർബന്ധമാണ്. ക്യാമ്പസുകളിൽ ഭയമില്ലാതെ ആശയങ്ങൾ പങ്കിടാൻ അവസരം ഒരുക്കുക എന്നതാണ് നിയമത്തിന്റെ ലക്ഷ്യം. ബുള്ളിയിംഗും ലൈംഗികാതിക്രമവുമായി ബന്ധപ്പെട്ട കേസുകളിൽ രഹസ്യകരാറുകൾ ഉപയോഗിക്കുന്നത് നിയമം വിലക്കുന്നു. സർവകലാശാലകളിൽ ഭീതിയുടെ സംസ്കാരം ഇല്ലാതാക്കാനും ആരോഗ്യകരമായ ചർച്ചകൾ പ്രോത്സാഹിപ്പിക്കാനുമാണ് ഈ നീക്കമെന്ന് വിദ്യാഭ്യാസ സെക്രട്ടറി ബ്രിജറ്റ് ഫിലിപ്സൺ വ്യക്തമാക്കി.
Leave a Reply