തിരുവനന്തപുരം: സംസ്ഥാന സർക്കാരിന്റെ ‘പ്രിയദർശിനി’ പദ്ധതിക്ക് ഇന്ന് തുടക്കമായി. പദ്ധതിയുടെ ഭാഗമായി സ്ത്രീകൾക്കും ട്രാൻസ്ജെൻഡർ വ്യക്തികൾക്കും കെഎസ്ആർടിസിയുടെ ഓർഡിനറി സർവീസുകളിൽ സൗജന്യമായി യാത്ര ചെയ്യാം. സംസ്ഥാനത്തെ ഓർഡിനറി ബസുകളിലാണ് ആദ്യഘട്ടത്തിൽ പദ്ധതി നടപ്പാക്കുന്നത്.
യാത്രക്കാർക്ക് മുൻകൂർ രജിസ്ട്രേഷൻ ആവശ്യമില്ല. ബസിൽ കയറുമ്പോൾ ആവശ്യമായ തിരിച്ചറിയൽ രേഖ ഹാജരാക്കി സൗജന്യ ടിക്കറ്റ് കൈപ്പറ്റാം. യാത്രയ്ക്കൊപ്പം 15 കിലോ വരെ ലഗേജും സൗജന്യമായി കൊണ്ടുപോകാൻ അനുവദിക്കും. അതിൽ കൂടുതലുള്ള ലഗേജിന് നിലവിലുള്ള ചട്ടപ്രകാരമുള്ള നിരക്ക് ഈടാക്കും.
സ്ത്രീകളുടെ സഞ്ചാരസ്വാതന്ത്ര്യവും തൊഴിൽ, വിദ്യാഭ്യാസ, ആരോഗ്യ മേഖലകളിലേക്കുള്ള പ്രവേശനവും കൂടുതൽ സുഗമമാക്കുകയെന്ന ലക്ഷ്യത്തോടെയാണ് പദ്ധതി നടപ്പാക്കുന്നതെന്ന് സർക്കാർ അറിയിച്ചു. പദ്ധതിയുടെ പ്രവർത്തനം വിലയിരുത്തിയ ശേഷം മറ്റ് സർവീസുകളിലേക്കും വ്യാപിപ്പിക്കുന്ന കാര്യം പരിഗണിക്കും.
Leave a Reply