ന്യൂസ് ഡെസ്ക്, മലയാളം യുകെ
ലണ്ടൻ: ഇംഗ്ലണ്ടിലെ ഗ്രാമപ്രദേശങ്ങളിൽ ചിലവ് കുറഞ്ഞ വീടുകളുടെ ലഭ്യത കുറയുമെന്ന ആശങ്ക ശക്തമായതിനെ തുടർന്ന് ഭവനനിർമാണ ചട്ടങ്ങളിൽ ഇളവ് നൽകാനുള്ള നിർദേശം ബ്രിട്ടീഷ് സർക്കാർ പിൻവലിച്ചു. 10 മുതൽ 49 വരെ വീടുകൾ ഉൾപ്പെടുന്ന ഭവനപദ്ധതികളിൽ നിർബന്ധമായും ഉൾപ്പെടുത്തേണ്ട താങ്ങാനാവുന്ന വീടുകളുടെ (Affordable Housing) ക്വോട്ട ഒഴിവാക്കാനായിരുന്നു സർക്കാർ ആലോചിച്ചിരുന്നത്. പുതിയ വീടുകളുടെ നിർമാണം വേഗത്തിലാക്കുകയും സർക്കാരിന്റെ ഭവനലക്ഷ്യങ്ങൾ കൈവരിക്കുകയുമായിരുന്നു ഇതിന് പിന്നിലെ പ്രധാന ഉദ്ദേശ്യം.
നിർദേശപ്രകാരം, നിർമാണ കമ്പനികൾക്ക് താങ്ങാനാവുന്ന വീടുകൾ നേരിട്ട് നിർമിക്കുന്നതിന് പകരം പണം നൽകി ബാധ്യത നിറവേറ്റാൻ അനുമതി ലഭിക്കുമായിരുന്നു. എന്നാൽ ഇത് ഗ്രാമപ്രദേശങ്ങളിൽ സാധാരണ വരുമാനക്കാരായ കുടുംബങ്ങൾക്കും യുവാക്കൾക്കും ലഭിക്കുന്ന വീടുകളുടെ എണ്ണം ഗണ്യമായി കുറയ്ക്കുമെന്ന് ഭവനരംഗത്തെ വിദഗ്ധരും സാമൂഹിക ഭവന സംഘടനകളും മുന്നറിയിപ്പ് നൽകി. ഇംഗ്ലണ്ടിലെ ഗ്രാമീണ മേഖലകളിൽ പകുതിയിലധികം താങ്ങാനാവുന്ന വീടുകളും ഇത്തരം പദ്ധതികളിലൂടെയാണ് നിർമ്മിക്കപ്പെടുന്നതെന്നും, ചട്ടം മാറിയാൽ അടുത്ത പത്ത് വർഷത്തിനിടെ ഏകദേശം 32,000 വിലകുറഞ്ഞ വീടുകൾ നഷ്ടമാകാൻ സാധ്യതയുണ്ടെന്നും നാഷണൽ ഹൗസിങ് ഫെഡറേഷൻ ചൂണ്ടിക്കാട്ടി.
സർക്കാർ നടത്തിയ പൊതുജനാഭിപ്രായ ശേഖരണത്തിൽ നിർദേശത്തിനെതിരെ വ്യാപക എതിർപ്പാണ് ഉയർന്നത്. ലഭിച്ച പ്രതികരണങ്ങളിൽ വലിയൊരു വിഭാഗം ആളുകളും സംഘടനകളും പദ്ധതി ഉപേക്ഷിക്കണമെന്ന് ആവശ്യപ്പെട്ടു. ഇതേത്തുടർന്നാണ് സർക്കാർ നിലപാട് മാറ്റിയത്. താങ്ങാനാവുന്ന വീടുകളുടെ നിർമാണം വർധിപ്പിക്കുമെന്ന തിരഞ്ഞെടുപ്പ് വാഗ്ദാനത്തിൽ നിന്ന് പിന്നോട്ടില്ലെന്നും, അതേസമയം രാജ്യത്തെ ഭവനനിർമാണം വേഗത്തിലാക്കാൻ മറ്റ് പദ്ധതികളുമായി മുന്നോട്ടുപോകുമെന്നും ഭവനകാര്യ സെക്രട്ടറി ആഞ്ചല റെയ്നർ വ്യക്തമാക്കി. റെയിൽ, ട്രാം സ്റ്റേഷനുകൾക്ക് സമീപമുള്ള പ്രദേശങ്ങളിലെ ഭവനപദ്ധതികൾക്ക് അനുമതി നൽകുന്ന നടപടികൾ ലളിതമാക്കുന്നതും സർക്കാരിന്റെ പുതിയ പദ്ധതികളിൽ ഉൾപ്പെടുന്നു.
Leave a Reply